Pr 8
8
Li xb'oqom li choxahil na'leb'
1Li chaab'il na'leb' yo chi b'oqok,
kaw xyaab' xkux li seeb'al k'a'uxl.
2Sa' xb'eeneb' li b'ool naxik chi b'oqok,
ut naxaqlije'k sa'atqeb' li xaalib'e;
3na'ab'imanje'k sa' rokeb'aaleb' li tenamit,
ut sa'atqeb' li jalb'e japjo re chi xyeeb'al:#8,1-3 Pr 1,20-21; Eklo 24; Sab 6,12-16.
4“Eerik'in laa'ex ok we chi aatinak,
li xyaab' linkux cho'q reheb' chixjunil li poyanam.
5Ex saaj al li maak'a' eena'leb' ut jipex,
tzolomaq li chaab'il na'leb' ut li seeb'al k'a'uxl.
6Ab'ihomaqin, xb'aan naq tin'aatinaq chi tz'aqal re ru;
ok we xyeeb'al xninqaleb' ru aatin.
7Li ok we xyeeb'al, a'an tz'aqal yaal;
ut maajun junaq tik'ti' wank chisa'.
8Tz'aqal re ru li aatin ok we xyeeb'al,
ut maajun junaq b'alaq'il aatin tinye.
9Ch'olch'o ru chixjunil cho'q re li seeb' xch'ool,
ut tz'aqal yaal li waatin cho'q re li wank xk'a'uxl.
10Meesik' li plaat ut li oor,
sik'omaq b'an eena'leb' ut leetijb'al.
11Xb'aan naq q'axal loq' li chaab'il na'leb' chiru li ch'ina'usil pek,
ut ink'a' naru xjuntaq'eetankil rik'in li b'ihomal.
12“Laa'in li chaab'il na'leb',
ut li wochb'een a'an li seeb'al k'a'uxl.
Ninnaw na'leb'ak chi chaab'il.
13Roxloq'inkil ru li Yos
a'an xtz'eqtaanankil li maa'usilal;
laa'in xik' nawil li q'etq'etil, li nimob'resink ib',
li yib'ru yu'amej ut li tik'ti'.
14We li k'uub'ank ut li xb'aanunkil;
laa'in laj k'ehol na'leb'
ut li xyo'leb'aal li kawil ch'oolej.
15Sa' ink'ab'a' neke'awab'ejink eb' li awab'ej,
ut eb' laj nahonel chaq'rab' neke'raqok aatin sa' tiikilal.
16Sa' ink'ab'a' wankeb' xwankil li xjolomileb' li tenamit,
ut tiik xch'ooleb' chixjunileb' laj raqol aatin.
17Laa'in ninraheb' li nake'rahok we;
ut eb' li nikine'xsik' chi anchaleb' xch'ool, nikine'xtaw.
18Wik'in wankeb' li b'ihomal ut li loq'al,
li sahilal ut li tiikil ch'oolej.
19Jwal chaab'il li ninyeechi'i
chiru li chaab'il oor;
ut li ninsi laa'in,
a'an q'axal loq' wi' chik chiru li plaat.
20Laa'in ninb'eek sa' li tiikilal,
ut sa' xb'ehil li tz'aqal yaal,
21re xb'ihomob'resinkil eb' li neke'rahok we
ut xnujob'resinkil li rochocheb' chi sahil eechej.
22“Li Qaawa' Yos kiyoob'tesink we xb'enwa,
junxilaj chiru chixjunil li xb'aanuhom.#8,22 Eklo 1,4.9; 24,9; Ap 3,14.
23Kinxsiya chaq sa' xtiklajik,
rub'elaj xyoob'tesinkil li ruuchich'och'.
24Kinxyoob'tesi chaq naq toj maak'a' chaq li palaw,
junxilaj chiruheb' li yu'amha' ut eb' li nima'.
25Naq toj maji' neke'k'ojlaak sa' xna'ajeb' li tzuultaq'a,
ak xyoob'tesihomin chaq li Qaawa',
26naq toj maak'a' chaq li ch'och' ut li che'k'aam,
chi moko li pojtz' k'uub'k'u wi' li ruuchich'och'.
27Naq li Yos kixhel li choxa sa' xb'eeneb' li palaw,
aran wankin laa'in.
28Naq kixkanab'eb' li choql chiru li choxa
ut kixk'ojob' li palaw sa' xna'aj;
29naq kixraq li xna'aj li palaw
re naq ink'a' taa'elq li ha';
naq kixk'e li rub'elankil li ruuchich'och',#8,29 Job 38,8-11; Sal 104,6-9; Jr 5,22.
30ak wankin chaq aran chi xk'atq li Qaawa'
cho'q aj k'ehol xna'leb'.
Laa'in nink'ehok chaq xsahil xch'ool rajlal kutan,
junelik ninb'atz'unk chiru
31sa' li ruuchich'och' yoob'tesinb'il xb'aan;
ut nintaw xsahil linch'ool
rik'ineb' li ralal xk'ajoleb' li poyanam.#8,22-31 Job 28,23-27; Eklo 24,5; Sab 8,6; 9,9.
32“Ut anaqwan, ex walal ink'ajol,
ab'ihomaq li waatin.
Us xaq eere wi teetzol eerib' wik'in.
33Paab'omaq li waatin
ut chiwanq eechaab'il na'leb';
meetz'eqtaana leetijb'al inb'aan.
34Us xaq re li na'ab'ink we,
wulaj wulaj naraj wab'inkil
ut ninxsik' toj sa' li wochoch.
35Xb'aan naq ani natawok we,
naxtaw li yu'am,
ut li Qaawa' naxk'ut li rusilal.#8,35 Eklo 1,20; 4,12.
36Ab'an li natz'eqtaanank we,
naxsach rib' xjunes;
li xik' na'ilok we,
naxsik' li xkamik”.
Currently Selected:
Pr 8: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
