Pr 9
9
Li chaab'il na'leb' ut li xmajelalil li seeb'al k'a'uxl
1Li chaab'il na'leb' xkab'la li rochoch
ut xruutz'u'uji ru rik'in wuqub' chi oqech;
2xkamsiheb' li xul re li ninq'e
ut xyeechi'i li chaab'il b'iin.
Xkawresi li xmeex
3ut xtaqlaheb' li xmoos ixq
re xyeeb'al resil toj sa'atqeb' li xnajt teramil b'ool re li tenamit:
4“Kimqex arin laa'ex li maak'a' eek'a'uxl.
Chalqex laa'ex li maak'a' eena'leb'.
5Wa'inqex wik'in
ut uk'umaq linb'iin xink'uub'.#9,5 Eklo 24,19-21.
6Kanab'omaq li xmajelalil eena'leb',
ut taawanq eeyu'am;
taaqehomaq xb'ehil li seeb'al k'a'uxl”.
7Li naq'usuk re li q'etq'et,
naxk'am chaq tz'eqtaanaak sa' xb'een;
li naq'usuk re li ink'a' us xch'ool,
junes hob'e'k tixb'oq chaq sa' xb'een.
8Maaq'us li q'etq'et xb'aan naq xik' tatril;
chaq'us li wank xna'leb', ut a'an tatxra.
9Chatij li wank xna'leb', ut q'axal wi' chik tixtaw xkomon na'leb';
chatzol li tiik xch'ool, ut taanimanq li xk'a'uxl.
10Li roxloq'inkil ru li Qaawa',
a'an xtiklajik li chaab'il na'leb';#9,10 Job 28,28; Sal 111,10; Pr 1,7.
wi nakanaw ru Li nim xsantilal,
a'an reetalil naq seeb' aak'a'uxl.
11Sa' ink'ab'a' laa'in taatiqmanq roq laayu'am
ut taak'ihob'resimanq laakutan.
12Wi wank aana'leb', toxaayal xsahil;
ab'an wi q'etq'etat, laa'at tattojoq re rik'in rahilal.
13Li xmajelalil seeb'al k'a'uxl
a'an chanchan jun li ixq aj molol aatin,
jip ut maak'a' naxnaw.
14Naxchunub' rib' chire li rochoch,
sa' jun li na'ajej jwal najt xteram chiru li tenamit,
15ut naxb'oqeb' laj numel b'e,
eb' li yal tiik li xb'eheb':
16“Kimqex arin laa'ex li maak'a' eek'a'uxl.
K'ehomaq reetal laa'ex li maak'a' eena'leb':
17Li uk'a' elq'anb'il,
a'an jwal ki';
ut li wa nawa'mank sa' muqmu,
a'an jwal sa”, chan reheb'.
18Ab'anan eb' li yookeb' chi ab'ink
ink'a' neke'xnaw naq li ochoch a'an,
a'an xna'ajeb' li kamenaq,
ut eb' li rula' wankeb' chik sa' xchamal li xb'alb'a.
Currently Selected:
Pr 9: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
