Pr 7
7
Li xna'leb' li ixq aj yumb'eet
1At walal ink'ajol, paab' li waatin
ut tz'iib'a sa' laawaanm laachaq'rab'inkil inb'aan.
2K'anjela ru linchaq'rab',
ut taawanq aayu'am;
k'uula sa' laach'ool jo' li sahil eechej.
3Chatz'ejwali aawib' rik'in,
ut maatz'eq chirix laawaanm.
4K'ul li chaab'il na'leb' jo' tawi' aawanab',
ut li seeb'al k'a'uxl jo' aawech'alal.
5A'an taakoloq aawe chiru li ixq ink'a' us xna'leb',
chiru li ixq aj b'alaq' li naraj aaluktesinkil rik'in q'unil aatin.#7,5 Pr 2,16.
6Sa' jun kutan yookin chi ilok
sa' xb'entaanil li wochoch,
7ut ke'wil jun ch'uuteb' li saaj al
li maak'a'eb' xna'leb';
ut sa' xyanqeb' a'an wank jun li maak'a' xk'a'uxl.
8Naq kiwulak sa' xaalib'e, kiq'axonk junpak'al
ut tiik koho sa' rochoch jun li ixq ink'a' us xch'ool.
9Ak yo chi ewuuk,
ak ok re li q'oqyink.
10Toja' naq li ixq ki'elk chaq chi xk'ulb'al,
tiqto chaq chi chaab'il;
ut na'ilok jo' junaq aj yumb'eet.
11A'an jun li ixq seeb' xch'ool chi b'alaq'ik,
ut ink'a' jwal nawank sa' li rochoch;
12junes sa' b'e nawank, sa' li k'ayiil ut sa' xxaalatq li b'e,
re royb'eninkil li taanume'q xb'enwa.
13Naq li ixq kiril ru li al,
kixq'alu ut kixtz'ub' ru,
ut chi maak'a' xxutaan kixye re:
14“Laa'in kinyeechi'i inmayej
re wank sa' usilal rik'in li Yos,
ut anaqwan ak xinmajeya li kinyeechi'i.
15Jo'kan naq xin'elk chaq chak'ulb'al.
K'ajo' naq xatinsik',
ut anaqwan xatintaw!
16Xinyiib' ru linch'aat chi chaab'il
xink'e jun ch'ina'usil t'ikr li chalenaq Ejiipt;
17xink'e ajwi' sununkil b'an chiru,
yiib'anb'il rik'in miir ut kaneel.
18Kim b'i', ut uk'aqo b'iin toj reetal taasaqewq;
ut qayalaq xsahil li rahok ib'.
19Xb'aan naq linb'eelom maa'ani sa' kab'l:
xkoho chi najt ut toj taab'ayq chaq.
20Naab'al li tumin xk'am chirix,
ut toj sa' xxoronik li po tol'elq sa' kab'l”.
21Rik'in b'alaq'il aatin kirelaji ru li al,
kixq'unb'esi ut kireechani chi junwaakaj.
22Ut li mem aj al koho chirix li ixq:
kama' junaq b'ooyx naxik chi kamsiik;
jo' junaq kej xt'ane'k sa' li ch'imb'
23ut chi junpaat xpaynumiik li xch'ool chi simaj;
jo' junaq xik'anel xul noxnaq sa' li ra'al,
chi ink'a' naxnaw naq aran taasachq li xyu'am.
24Jo'kan utan, at walal ink'ajol, chinaawab'i;
k'e sa' laach'ool li aatin ninye aawe.
25Maapo' laak'a'uxl xmaak li ixq a'an,
ut maataaqe sa' li xmaa'usilal.
26Xb'aan naq naab'aleb' li ak xe'sachk xb'aan,
ut k'ajo'eb' li xe'oso'k chi junwaakaj.
27Li xik sa' rochoch li ixq a'an, a'an li xik sa' xb'alb'a:
a'an li xik sa' xna'ajeb' li kamenaq.
Currently Selected:
Pr 7: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
