Pr 6
6
Q'usuk chirix k'asok
1At walal ink'ajol, wi xatk'asok chirix laawas aawiitz'in;
wi xasume xtojb'al li xk'as junaq ink'a' nakanaw ru;
2wi xaye laawaatin
ut xab'ak' aawib' rik'in laayeechi'om,
3maak'e aawib' chi chape'k, at walal,
ut b'aanu a'in re xkolb'al aawib' chiru laawas aawiitz'in:
ayu sa' rochoch,
tz'aaman elajin chiru;
4matwark ut mathilank
toj reetal taayiib' ru laach'a'ajkilal.
5Kol aawib' jo' naxb'aanu li yuk chiru li ch'imb',
kama' naxb'aanu li xik'anel xul chiru li ra'al.
Laj q'em ut li sank
6Laa'at li ink'a' nawulak chawu k'anjelak,
il li sank,
chak'e reetal chanru yo chi k'anjelak
ut tzol aawib' rik'in.
7Us ta maajun najolomink re
ut maak'a' aj taqlanel
chi moko aj eechal re,
8ab'an sa' saq'ehil naxch'utub' li xtzekemq
ut naxk'uula li xwa sa' xq'ehil li q'olok.
9Ut laa'at li ink'a' nawulak chawu k'anjelak,
toj jo'q'e sotsooqat,
jo'q'e taa'ajq aawu sa' laawara?
10Nakatwark junpaataq, nakatxiiqank;
chirix chik a'an nakathilank chi moq'mo laatel.
11Ut maak'a' sa' aach'ool naq taachalq li neb'a'il,
k'utaamil chawu li we'ej jo' junaq aj elq',
jo' junaq aj b'eeninel rib'.#6,10-11 Pr 24,33-34.
Li ink'a' us xch'ool
12Li ink'a' us xch'ool ut yib'ru xna'leb'
junes tik'ti' na'elk chi xtz'uumal re;
13naxmutz' jun li ru,
yal naxkelo li roq naq nab'eek,
nak'utb'esink rik'in ru'uj ruq'.
14Yib'ru li xna'leb':
junes maa'usilal wank sa' xch'ool
ut junelik yo chi xyoob'ankil raaxiik'.
15Jo'kan naq taanaq li rahilal sa' xb'een
chi maak'a' sa' xch'ool;
taa'oso'q chi junpaat,
chi maak'a' chik xja'lenkil.
Li k'aru ink'a' nawulak chiru li Yos
16Wank waqib' li na'leb', malaj wuqub',
li ink'a' nawulak chiru li Yos
ut xik' na'ile'k xb'aan chi junajwa:
17li q'etq'etil, li tik'ti'ik,
li kamsink poyanam maak'a'eb' xmaak,
18li k'uub'ank maa'usilal,
li xrahinkil ut ratawankil li ink'a' us,
19li q'ab'ank sa' li raqleb'aal aatin
ut li yoob'ank raaxiik' sa' xyanqeb' li tenamit.
Li muxuk sumlaak
20At walal ink'ajol, k'e sa' laach'ool
li raatin ut li xq'usum laana' laayuwa'.
21Chatz'iib'a sa' laawaanm
ut chiwanq sa' laak'a'uxl
jo' junaq chaab'il q'ol chakux laa'at.#6,20-21 Pr 1,8-9.
22A'an tk'amoq aab'e naq tatb'eeq;
tatxk'aak'ale naq tatsotlaaq;
ut taaseeraq'iq aawik'in naq taa'ajq aawu.
23Xb'aan naq li chaq'rab' ut li taqlahom,
a'an jun lochlookil xam;
li qatijb'al ut qaq'usb'al
a'an xb'ehil li yu'am.#6,23 Sal 19,9; 119,105.
24A'an tatxkol chiru li ixq ink'a' us xch'ool,
ut chiruheb' li b'alaq'il aatin naxye li ab'li ixq.
25Maak'e aawib' chi q'unb'esiik xb'aan li xch'ina'usal,
chi moko chakanab' aawib' chi xb'alaq'i xb'aan li rilob'aal.
26Laj yumb'eet nak'ojlaak xch'ool yal rik'in li xwa;
ab'an laj muxul sumlaak li k'aru naxsik', a'an xsachb'al laayu'am.
27Ma naru tab'i' xk'amb'al xam chire laach'ool
chi ink'a' taak'atq laab'aatal?
28Ma naru tatb'eeq sa' xb'een ru xam
chi ink'a' ta taak'at laawoq?
29Jo'kan ajwi' naxk'ul
li naxch'ik rib' rik'in rixaqil li ras riitz'in:
chixjunil li nach'e'ok re li ixq a'an,
ink'a' taakuymanq li xmaak.
30Maajun natz'eqtaanank re junaq aj elq'
wi na'elq'ak xb'aan xtz'okajik;
31ab'an wi natawe'k chi elq'ak,
tento tixk'e wuqub' wa chik xk'ihal li reeqaj,
jo'wi' chixjunil li xjunkab'lal.
32Ab'an li naxch'ik rib' rik'in junaq ab'li ixq,
xjunes rib' naxsach li xyu'am.
33Tento tixkuy sak'e'k ut hob'e'k,
ut xutaanal taakanaaq wi' chi junelik.
34Xb'aan naq li b'eelomej aj sowen, a'an chanchan li xam;
ink'a' taakuyuq naq twulaq xkutankil li eeqajunk.
35Ink'a' tk'ojlaaq xch'ool rik'in k'a'aq re ru;
us ta chixjunil li xb'ihomal li ruuchich'och'
taak'ehe'q re cho'q reeqaj,
ab'anan ink'a' tixk'ulub'an.
Currently Selected:
Pr 6: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
