Pr 5
5
Li ixq ink'a' us xna'leb' naxsachb'esi li winq
1At walal ink'ajol, paab' linchaab'il na'leb';
k'uula sa' laach'ool li xseeb'al ink'a'uxl.
2Chi jo'kan taak'oxla rix li taaye,
ut tat-aatinaq chi wank aana'leb'.
3Xb'aan naq li ixq li ink'a' us xch'ool na'aatinak rik'in q'unil aatin,
chanchan xki'al li xya'al kab';
a'an naxnaw q'unb'esink kama' wi' xsahil li aseeyt.
4Ab'an q'axal ra noxraqe'q wi', jo' li b'aqche'
malaj li xyok'om junaq ch'iich' ka'pak'al xq'esnal.
5Xtaaqenkil li ixq a'an, a'an re kamk;
ut li xb'e tiik naxik sa' li xb'alb'a.
6Li ixq a'an maak'a' naraj wi' li xb'ehil li yu'am,
chi moko naxk'e reetal naq yo chi sachk.
7Jo'kan b'i', at walal, paab' li waatin
ut misachk sa' laach'ool li ninye aawe.
8Matxik chirix li ixq ink'a' us xna'leb',
chi moko chatjiloq chire li rochoch.
9Maaq'axtesi laayu'am chi moko laakawilal sa' ruq'eb' li josq' aj winq,
k'ajo' naq tate'xrahob'tesi;
10re naq maajun aj ab'l poyanam tixyal xsahil laajunkab'lal
chi moko sa' ruq' jalan chik tox'oso'q li xakamsi wi' aawib' chi k'anjelak.
11Mare anchal ra taaweek'a moqon naq yooqat chi oso'k
ut maak'a'aq chik xkawilal laawoq laawuq'.
12Ut taaye: “K'a'ut naq ink'a' xinpaab' linq'usb'al?
K'a'ut naq xintz'eqtaana lintzolb'al?
13Ink'a' xwaj xpaab'ankil laj tzolonel we,
chi moko xink'ulub'a xna'leb'eb' li xe'q'usuk we.
14Ut anaqwan ka'aj chik maa xin'oso'k xb'aan li rahilal
chiru chixjunileb' linkomonil”.
Chara laawixaqil
15K'ojob' aach'ool rik'in laawixaqil,
ut yal xsahil li rahok ka'ajwi' sa' laawochoch.
16Maab'atz'unle laayu'am sa' b'e,
chi moko chara jalan chik li ixq.
17Aawehaq aajunes laawixaqil,
ut maawotz xsahil li sumlaak rik'in jalan chik.
18Osob'tesinb'ilaq taxaq laasum'aatin,
ut sahaq aach'ool rik'in laawixaqil li xatsumlaak wi' sa' laasaajilal!
19A'an q'un ut chaab'il xch'ool
kama' jun li ch'ina'usil kej.
Chik'ojlaaq taxaq aach'ool chi wank rik'in,
ut a'anaq xnimal xsahil laawaanm chi junelik.
20At walal ink'ajol, k'a'ut naq taak'e aach'ool chirix li ab'li ixq?
K'a'ut naq taaq'axtesi aawib' re li maawa' aawixaqil?
21Li Qaawa' naril li xna'leb' li junjunq
ut naxk'e reetal li xb'aanuhom.
22Li ink'a' us xch'ool nat'ane'k sa' li xmaa'usilal;
a' ajwi' li xmaak nasachok re.
23Li xmaak'a'il xna'leb' taakamsinq re,
ut li xmemil ut li xjipil taasachoq re.#5,3-23 Pr 7,6-27; 23,27; Eklo 9,3-9.
Currently Selected:
Pr 5: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
