Pr 4
4
Xsik'b'al ru ut xk'uulankil li chaab'il na'leb' k'a'uxl
1Ex walal ink'ajol, ab'ihomaq leetijb'al xb'aan leeyuwa';
k'ehomaq eech'ool chi xtawb'al eena'leb'.
2Jwal chaab'il li na'leb' nekexintzol wi';
jo'kan naq meetz'eqtaana li nink'ut cheru.
3Laa'in ajwi' xink'uula'alo':
k'ajo' naq xinxra linna'.
4Ut linyuwa' xk'e chaq inna'leb',
xye we chi jo'ka'in:
“K'uula sa' laach'ool eb' li waatin;
paab' linchaq'rab', ut tatyo'yooq.
5Sik' li chaab'il na'leb',
ut chiwanq xseeb'al laach'ool;
maatz'eqtaanaheb',
chi moko chisachq sa' laach'ool li k'aru ninye.
6Wi nakara li chaab'il na'leb' ut maajun sut nakatz'eqtaana,
a'an tatxtenq'a ut tatxkol.
7Chayal aaq'e chi xtawb'al aana'leb';
chaweechani li seeb'al k'a'uxl,
us ta tento xk'ayinkil laajunkab'lal.
8Chara li chaab'il na'leb', ut a'an tixterq'usi laaloq'al;
chajunaji aawib' rik'in, ut a'an tixxaqab' laawankil.
9Sa' laajolom tixk'e jun lemtz'il q'ol
ut tixsi aawe jun xchaq'alil ru koroon”.
10Ab'i, at walal;
k'ulub'a li waatin,
re naq najtaq roq laayu'am sa' ruuchich'och'.
11Yookin chi xk'utb'al chawu li chaab'il b'e,
ut nakatintzol rik'in li chaab'il na'leb'.
12Chi jo'kan sa' laab'eenik
maak'a' taach'i'ch'i'inq aawe,
ut wi tat-aanilaq, ink'a' tattichk'oq.
13Chap aawib' chi kaw rik'in li nink'ut chawu, ut maawach'ab' chik;
k'uula sa' laach'ool xb'aan naq a'an laayu'am.
14Matxik chirixeb' li ink'a' useb' xna'leb',
chi moko chataaqe xb'eheb' li ink'a' chaab'ileb' xch'ool.
15Chakol aawib' chiruheb' ut maataaqe li xb'eheb';
isi aawib' chiruheb' ut ayu chi uub'ej.
16Xb'aan naq eb' a'an ink'a' neke'ruuk chi wark,
wi ink'a' xe'b'aanunk maa'usilal;
ut ink'a' nakub'eek xwaraheb', wi ink'a' xe'xrahob'tesi junaq xb'enwa.
17Li xwaheb', a'an li maa'usilal;
ut li ruk'a'eb', a'an li raaxiik'.
18Li xyu'ameb' li tiikeb' xch'ool
a'an chanchan xsaqenkil li hik'e'k:
na'ok chi lemtz'unk
toj reetal nakutano'k ru sa' wa'leb'.
19A'ut li xyu'ameb' li ink'a' useb' xch'ool
a'an chanchan li aak'ab':
chi moko neke'xnaw b'ar xe'tichk'ok.#4,18-19 Sal 1,6; Eklo 39,24.
20At walal ink'ajol, ab'i li waatin;
chak'e reetal li ninye aawe.
21Misachk chawu,
k'uula b'an sa' xchamal laawaanm.
22Xb'aan naq a'an li yu'am cho'q re li ani nak'ulub'ank re;
a'an chanchan jun li b'an nak'ehok kawilal.
23Xb'een xb'een chab'eresi laak'a'uxl,
xb'aan naq rik'in a'an natiklaak li yu'am.
24Isi sa' xtz'uumal aawe chixjunil li tik'ti'
jo' ajwi' li b'alaq'il aatin.
25Tiik tat-iloq chawu
ut k'e reetal li k'aru us.
26Chatiikob'resi ru laab'e,
re naq maak'a' taak'ul sa' laab'eenik.
27Maajal laab'e,
chi moko sa' laanim uq' chi moko sa' laatz'e uq' tatxik;
ut junelik wanqat sa' tiikilal.
Currently Selected:
Pr 4: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.