Pr 10
10
II. EB' LI XYEHOM LAJ SALOMÓN (10,1—22,16)
1Xyehom laj Salomón:
Li alalb'ej li wank xna'leb' naxsahob'res xch'ool li xna' xyuwa';
li kaw xjolom naxrahob'tesi xch'ooleb'.#10,1 Pr 15,20.
2Li nab'ihomo'k sa' b'alaq'il maak'a' na'ok wi';
ab'an li tiik xch'ool naxkol li xyu'am.#10,2 Pr 11,4; Eklo 5,8.
3Li Qaawa' ink'a' naxk'e chi kuyuk tz'okaak li tiik xch'ool;
ab'an ink'a' naxk'e re li ink'a' us xna'leb' li k'aru narataw.#10,3 Sal 34,10-11.
4Li q'emal naneb'a'o'b'resink;
li k'anjelak chi kaw nab'ihomob'resink.
5Li q'olok sa' xq'ehil, a'an seeb'al ch'oolej;
li wark sa' xq'ehil li q'olok, a'an xutaanal.
6Osob'tesinb'il xb'aan li Yos li ani chaab'il xch'ool;
a'ut li ink'a' us xna'leb' junes maa'usilal muqmu chi xtz'uumal re.
7Junelik osob'tesinb'il li xk'ab'a' li winq chaab'il;
a'ut li ink'a' us xna'leb' sa' junpaat taasache'q li xk'ab'a'.
8Li chaab'il xna'leb' narab'i ut naxpaab' li xchaq'rab'inkil;
li junes mem aj aatin naxye, taa'oso'q.
9Li tiik ru xyu'am, maak'a' naxxiwa;
a'ut li ink'a' nawank sa' tiikilal
sa' jun kutan taak'utunq li xlab'al xch'ool.
10Li nab'alaq'ink, naab'al li rahilal naxyoob';
li junes mem aj aatin naxye, taa'oso'q.
11Li aatin naxye li tiik xch'ool, nak'ehok yu'am;
a'ut li ink'a' us xna'leb' junes maa'usilal muqmu chi xtz'uumal re.
12Li xik'il uuchink nayoob'ank raaxiik';
a'ut li rahok naxkuy chixjunil li maak.#10,12 Stg 5,20; 1 P 4,8.
13Wi chaab'il laana'leb', a'an nak'utunk naq nakat-aatinak;
ab'an wi maak'a' aana'leb', taak'ehe'q aalob'.
14Li chaab'il xna'leb' naxk'uula li xnawom;
ut naq na'aatinak li kaw xjolom, raaxiik' naxyoob'.
15Li b'ihom naru tixkol rib' rik'in li xb'ihomal;
a'ut li neb'a' maak'a' tixkol wi' rib'.
16Li xq'ajkamunkil li tiik xch'ool, a'an li yu'am;
ut li ink'a' us xna'leb', a' li maak naxxok.
17Li naxpaab' li xtijb'al, chaab'il b'e naxik wi';
a'ut li ink'a' naxpaab', taasachq.
18Laj tik'ti' naxmuq li xik'il uuchink;
ut li ani nawulak chiru molok tik'ti', a'an maak'a' xna'leb'.
19Li k'ajo' naxye, naab'al sut namaakob'k;
li naxkuy rib' chi aatinak, a'an chaab'il xna'leb'.
20Tz'aqal plaat li k'aru naxye li tiik xch'ool;
a'ut maak'a' na'ok wi' li xk'a'uxl li ink'a' us xch'ool.
21Li raatin li tiik xch'ool naxtenq'a naab'aleb' chi poyanam;
a'ut li kaw xjolom nakamk xb'aan xmaak'a'il xna'leb'.
22Li rosob'tesihom li Qaawa' nab'ihomob'resink
ut ink'a' naxk'am chaq rahil ch'oolej.
23Li jip nasaho'k xch'ool chi b'aanunk maa'usilal;
li chaab'il xna'leb' nasaho'k xch'ool rik'in li xna'leb'.
24Li ink'a' us xch'ool naxk'ul li naxxiwa ru;
a'ut li chaab'il xch'ool naxtaw li naxrahi ru.
25Li ink'a' us xna'leb' na'oso'k xb'aan li k'iila rahilal;
ut li tiik xch'ool wanq chi junelik.
26Laj q'em, a'an chanchan li sib':
k'ajo' naq naxrahob'tesi xch'ool laj eechal re.
27Li naroxloq'i li Qaawa' k'iila chihab' taayo'yooq;
a'ut li ink'a' us xna'leb' taak'ose'q li xyu'am.
28Li royb'enihomeb' li tiikeb' xch'ool, a'an li sahil wank;
a'ut li ink'a' useb' xna'leb' maak'a' neke'royb'eni.
29Li Qaawa' naxkoleb' li neke'xb'aanu li us,
ut naxsach ruheb' li ink'a' useb' xna'leb'.
30Li tiik xch'ool junelik us na'elk;
a'ut li yib'ru xna'leb' jun k'amok ajwi' li xyu'am sa' ruuchich'och'.
31Li tiikeb' xch'ool junes chaab'il na'leb' neke'xye;#10,31 Sal 37,30.
a'ut li ink'a' useb' xna'leb' neke'ch'anab'aak chi aatinak.
32Sa rab'inkil chi aatinak li tiik xch'ool;
a'ut li ink'a' us xna'leb' junes yib' aj aatin naxye.
Currently Selected:
Pr 10: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
