Pr 11
11
1Li Qaawa' naxtz'eqtaana li b'alaq'il peex,
ut naxk'ul xch'ool li nab'isok chi tz'aqal.#11,1 Lv 19,35-36; Dt 25,13-16; Pr 20,10.23; Am 8,5.
2Li q'etq'etil nak'ehok sa' xutaan;
li ani naxkub'si rib', a'an wank xna'leb'.#11,2 Pr 13,10.
3Li chaab'il xch'ool nab'eresiik xb'aan li xtiikilal;
eb' laj b'alaq' te'oso'q sa' li xb'alaq'ileb'.
4Li b'ihomal maak'a' na'ok wi' sa' xkutankil li raqok aatin;
ka'ajwi' li tiikilal nakolok chiru li kamk.#11,4 Pr 10,2; Eklo 5,8.
5Li tiikilal naxtuqub' ru xb'e li tiik xch'ool;
a'ut li ink'a' us xna'leb' taa'oso'q sa' li xmaa'usilal.
6Li tiikilal naxkoleb' li chaab'ileb' xch'ool;
a'ut eb' laj b'alaq' neke'aaleek xb'aan li k'aru neke'rataw.
7Naq nakamk li naxb'aanu maa'usilal, na'oso'k li ratawom
jo'wi' li k'aru naxk'oxla xb'aanunkil.
8Li tiik xch'ool nakole'k chiru li rahilal,
ut a' chik li ink'a' us xna'leb' nak'uluk re li ch'a'ajkilal.
9Li ink'a' us xna'leb' naxk'e sa' rahilal eb' li ras riitz'in rik'in li raatineb';
ab'anan li xseeb'al xch'ooleb' li tiikeb' ru xyu'am
nakolok reheb'.
10Naq li tiik xch'ool us na'elk,
k'ajo' naq neke'saho'k xch'ool li tenamit;
ut naq nakamk li ink'a' us xna'leb',
neke'xajok chixjunileb'.
11Naq li Yos narosob'tesiheb' li tiikeb' xch'ool,
nawakliik chixjunil li tenamit;
a'ut li ink'a' useb' xna'leb'
neke'xjuk' li tenamit rik'in li raatineb'.
12Li maak'a' xna'leb' na'aatinak chirix li ramiiw;
a'ut li chaab'il xk'a'uxl nakanaak chi ch'anch'o.
13Li namolok aatin naxseeraq'i chixjunil,
a'ut li winq paab'ajel ru naxk'uula sa' xch'ool.
14Wi eb' li wankeb' sa' xwankil maak'a'eb' xna'leb',
nasachk li tenamit;
ab'an wi naab'aleb' laj k'ehol na'leb',
taakole'q li tenamit.#11,14 Pr 24,6; Sab 6,24.
15Ra tixk'ul li nak'asok chirix li ink'a' naxnaw ru.
Maab'aanu a'an, ut sa tatwanq.
16Li ixq chaab'il xna'leb' nak'eemank xloq'al,
ut li winq seeb' xk'a'uxl nab'ihomo'k.
17Li natoq'ob'ank u narusila rib' xjunes;
a'ut li narahob'tesink, xjunes naxsach rib'.
18Li yib'ru xna'leb' moko ch'olch'o ta li xq'ajkamunkil;
a'ut li naxb'aanu li tiikilal, a'an ch'olch'o li xtojb'al.
19Li nab'aanunk re li tiikilal naxtaw li yu'am;
li naxsik' li maa'usilal naxtaw li kamk.
20Li Qaawa' xik' narileb' li yib'ru xna'leb'eb',
ab'an nasaho'k xch'ool rik'ineb' li chaab'ileb' xyu'am.
21Ch'olch'o naq li ink'a' us xna'leb' tixtoj rix li xmaak;
ab'an li tiikeb' xch'ool te'kole'q.
22Li ixq ch'ina'us ut maak'a' xna'leb'
chanchan wi' li matq'ab' oor chi ru'uj junaq aaq.
23Li tiikeb' xch'ool junes li us neke'raj xb'aanunkil;
a'ut li royb'enihom li ink'a' useb' xna'leb'
naxk'am chaq josq'il ut rahilal.
24Wankeb' neke'sihink,
ut b'ihomo'k chik neke'xb'aanu;
wankeb' ajwi' aj pix neke'k'uulank,
ut neb'a'il nokoxe'oso'q wi'.
25Li natenq'ank chi anchal xch'ool, nab'ihomo'k;
li ani nasihink, k'uluk ajwi' naxb'aanu.
26Li namuquk ixim namajewaak xb'aaneb' li tenamit;
a'ut li nak'ayink, na'osob'tesiik.
27Li naxsik' li us, nak'eemank xloq'al;
li nasik'ok maa'usilal, a'an ajwi' toxtaw.
28Li k'ojk'o xch'ool rik'in li xb'ihomal, taa'oso'q jo' li chaqiq'een;#11,28 Eklo 5,1; Mk 10,23-25.
ut li tiikeb' xch'ool chanchanaqeb' li raxraxil ru k'iche'.
29Li ink'a' naxch'oolani li rochoch,
maak'a' chik taakanaaq re;
li maak'a' xna'leb',
junelik taawanq rub'el xwankil li wank xna'leb'.
30Li tiikilal nak'ehok yu'am;
wi wank aana'leb', jalaneb' chik te'taaqenq aawe.
31Wi li tiik xch'ool naxk'ul li xq'ajkamunkil arin sa' ruuchich'och',
ma toja' ta chik laj maak ut li ink'a' us xna'leb'.#11,31 1 P 4,18.
Currently Selected:
Pr 11: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
