Nm 16

Laj Koré, laj Datán ut laj Abirón ke'xq'etq'eti rib' chiru li Yos

1Laj Koré,#16,1 Eklo 45,18-19; Jud 11. ralal laj Isar, ri laj Kehat ut ri xmam laj Leví, rochb'een laj Datán ut laj Abirón, ralaleb' laj Eliab, ut laj On, ralal laj Pélet, ri xmameb' laj Rubén, 2ke'xq'etq'eti rib' chiru laj Moisés, rochb'eeneb' lajeeb' roxlajuk'aal (250) xjolomileb' li xkomonileb' laj Israel, jwal nawnookeb' ru sa' li komonil ut ninqeb' xwankil. 3Ke'xch'utub' rib' chi xwech'b'al laj Moisés ut laj Aharón, ut ke'xye reheb': “Jwal naxik wi' chik xb'een nekeb'aanu. Chixjunileb' li komonil santob'resinb'ileb' ut li Qaawa' wank sa' xyanqeb'. K'a'ut naq laa'ex nekek'e eewankil sa' xb'een li xkomonil li Qaawa'?”, chankeb'.

4Naq kirab'i a'in, laj Moisés kixhupub' rib' chiru ch'och' 5ut kixye re laj Koré ut chixjunileb' li rochb'een: “Wulaj eq'la li Qaawa' tixk'e chi nawe'k ani li sik'b'il ru,#16,5 2 Ti 2,19. ani li xsantob'resihom, li taaruhanq chi nach'ok rik'in. Li sik'b'il ru xb'aan li Qaawa', a'an truuq taanach'oq rik'in. 6B'aanuhomaq chi jo'ka'in: teechap leexanxaar laa'at, a Koré, ut eb' laawochb'een. 7K'ehomaq ru xam chisa' ut wulaj teek'at li pom chiru li Qaawa'. Li ani taasik'e'q ru xb'aan li Qaawa', a'anaq li santob'resinb'il. Jwal naxik wi' chik xb'een nekeb'aanu laa'ex aj Leví”.

8Chirix chik a'an kixye re laj Koré: “Ab'ihomaqin, ex ralal laj Leví. 9Ma ink'a' tz'aqal cho'q eere naq li xYos laj Israel xsik'ok chaq eeru sa' xyanqeb' laj Israel re naq texwanq chi xk'atq A'an, texk'anjelaq sa' li Loq'laj Muheb'aal ut wanqex chi xjolomileb' li komonil chirix li mayejak? 10Li Qaawa' xexb'oq chi k'anjelak rik'in, laa'at ut eb' laawas aawiitz'in, li ralalex laj Leví, ut toj teeraj wank cho'q aj tij! 11Jo'kan naq a' li Qaawa' nekewech' rix laa'at ut eb' laakomon. Ani laj Aharón naq yooqex chi aatinak chirix?”.

12Moqon chik laj Moisés kixtaqla xb'oqb'aleb' laj Datán ut laj Abirón, ralaleb' laj Eliab. A'ut eb' a'an ke'xye: “Ink'a' naqaj xik. 13Ma ink'a' tz'aqal cho'q aawe rik'in naq xoohaawisi chaq sa' li xq'emal ch'och' re naq tookamq sa' li chaqich'och'? Ma toj taawaj taqlank sa' qab'een? 14Ink'a' xoohaak'am chaq sa' jun xq'emal ch'och', chi moko xak'e chiqeechani jun li na'ajej na'elk wi' li awimq ut li uub'. Ma nakak'oxla naq mutz'eb' li tenamit a'in? Ink'a' tooxik”, chankeb'.

15Toja' naq k'ajo' naq kijosq'o'k laj Moisés ut kixye re li Qaawa': “At Qaawa', maak'e sa' aach'ool li xmayejeb'. Laa'in maak'a' xinmaq' chiruheb', chi moko junaq b'uur, chi moko xinb'aanu rahilal reheb'”.

16Chirix chik a'an laj Moisés kixye re laj Koré: “Chalqex chiru li Qaawa' wulaj, laa'at aawochb'eeneb' laakomon ut laj Aharón. 17Teexok leexanxaar chejunjunqal, teek'e pom chisa' ut teek'am chiru li Qaawa': lajeeb' roxlajuk'aal (250) chi xanxaar. Laa'at ajwi' ut laj Aharón teek'am leexanxaar chiru li Qaawa'”, chan laj Moisés.

18Toja' naq li junjunq kixxok li xxanxaar, kixk'e ru xam ut pom chisa' ut ke'xk'am sa' rokeb'aal li Loq'laj Na'ajej. Jo'kan ajwi' ke'xb'aanu laj Moisés ut laj Aharón. 19Laj Koré kixch'utub'eb' li xkomon chire rokeb'aal li Loq'laj Na'ajej chi xwech'b'al laj Moisés ut laj Aharón. Toja' naq kik'utunk xloq'al li Qaawa' chiruheb' chixjunil li komonil, 20ut li Qaawa' kixye re laj Moisés ut laj Aharón: 21“Elenqex sa' xyanqeb' li komonil a'in, re naq teb'insach ru chi junpaat”, chan.

22A'ut eb' a'an ke'xhupub' rib' chiru ch'och' ut ke'tijok chi kama'in: “At Qaawa' Yos, laa'at nakatk'ehok xyu'am li junjunq. Jun ajwi' li xmaakob'k: k'a'ut naq laa'at nakatjosq'o'k rik'in chixjunil li komonil?”, chankeb'.

23Ut li Qaawa' kixye re laj Moisés: 24“Aatinaheb' chixjunil li komonil ut ye reheb': «Elenqex chi xsutam li xmuheb'aaleb' laj Koré, laj Datán ut laj Abirón»”.

25Kiwakliik laj Moisés ut koho wankeb' wi' laj Datán ut laj Abirón; ut li xcheekelaleb' laj Israel koheb' chirix. 26Toja' naq ki'aatinak rik'ineb' li komonil ut kixye reheb': “B'aanuuq usilal, elenqex chi xk'atq li xmuheb'aaleb' a reemaaru aj winqeb' a'in. Maak'a' li k'aru reheb' teech'e'. Mare anchal texkamq xb'aan chixjunileb' li xmaakeb'”, chan.

27Eb' a'an ke'elk chi xk'atq li xmuheb'aaleb' laj Koré, laj Datán ut laj Abirón. Laj Datán ut laj Abirón ke'elk chaq sa' li xmuheb'aaleb' ut wankeb' chik chiru li okeb'aal rochb'eeneb' li rixaqil ut eb' li xkok'al. 28Toja' naq kixye laj Moisés: “Rik'in a'in teenaw naq li Qaawa' xtaqlank chaq we chi xb'aanunkil chixjunil a'in ut moko yal ta xinyoob' wib' injunes. 29Wi te'kamq eb' li winq a'in jo' naq nakamk yalaq ani, a'an reetalil naq ink'a' xinxtaqla chaq li Qaawa'. 30Ab'anan, wi li Qaawa' tixb'aanu xninqal b'aanuhom ut taatehonq li ch'och' ut tixnuq'eb' rochb'een chixjunil li k'aru wank reheb' ut te'xik sa' xb'alb'a chi yo'yo, aran teenaw naq eb' li winq a'in xe'xtz'eqtaana li Qaawa'”, chan laj Moisés.

31Toje' ajwi' taaraqe'q chi aatinak laj Moisés naq kisob'e'k li ch'och' chi rub'eleb'; 32kitehonk li ch'och' ut kixnuq'eb' li winq a'an rochb'een chixjunil li xjunkab'aleb'. Jo'kan ajwi' ke'xk'ul chixjunileb' laj Koré rochb'een li jo'nimal wank reheb'. 33Koheb' chi yo'yo sa' li xb'alb'a rochb'een chixjunil li k'aru wank reheb'; chirix chik a'an kitz'ap li ch'och'. Chi jo'kan ke'sachk chi junajwa sa' xyanqeb' laj Israel. 34Naq ke'rab'i chi japeb' re, chixjunileb' laj Israel ke'elelik ut ke'xye chirib'ileb' rib': “Mare tooxnuq' ajwi' li ch'och' laa'o”, chankeb'. 35Toja' naq jun li xam nachalk rik'in li Qaawa' kixsach ruheb' li lajeeb' roxlajuk'aal (250) chi winq li ke'yeechi'ink pom.

Eb' li xanxaar

36Ut li Qaawa' kixye re laj Moisés: 37“Ye re laj Elehasar, li ralal laj Aharón laj tij, naq risiiq eb' li xanxaar sa' li cha ut xch'achaliiq li ru xam chi najt. 38Li xxanxaareb' li winq a'in li xe'kamk xb'aan naq xe'maakob'k, santob'resinb'ileb' chik anaqwan xb'aan naq xe'oksiik chiwu laa'in. Rik'ineb' li xanxaar a'in teeyiib' perpookil ch'iich' ut letzomaq chiru li artal. A'anaq ajwi' jun li reetalil chiruheb' laj Israel”, chan li Qaawa'.

39Laj Elehasar kixxokeb' li xxanxaareb' li ke'kamk sa' li xam ut kixyiib' perpookil ch'iich' re xletzb'al chiru li artal. 40A'an jun reetalil chiruheb' laj Israel naq maajun junaq li maawa' aj tij taamayejaq pom chiru li Qaawa'; juneseb' li ralal xk'ajol laj Aharón truuq te'xb'aanu a'an. Mare anchal te'xk'ul jo' laj Koré ut eb' li xkomon, jo' yeeb'il chaq xb'aan li Qaawa' re laj Moisés.

Laj Aharón kixtoj rix xmaakeb' li tenamit

41Sa' li kutan jun chik, chixjunil li xkomonileb' laj Israel ke'xwech' laj Moisés ut laj Aharón rik'in xyeeb'al: “Laa'ex xekamsiheb' li xtenamit li Qaawa'”, chankeb'.

42Chixjunil li tenamit ke'ok chi xwech'inkil laj Moisés ut laj Aharón, ut eb' a'in ke'sutq'iik sa' li Loq'laj Na'ajej. Toja' naq li Choql kimuheelank re li Loq'laj Muheb'aal ut kik'utunk xloq'al li Qaawa'. 43Laj Moisés ut laj Aharón ke'wulak toj chiru li Loq'laj Na'ajej, 44ut li Qaawa' kixye re laj Moisés: 45“Elenqex sa' xyanqeb' li komonil a'in, xb'aan naq ok we chi xsachb'aleb' ru chi junpaat”, chan.

Laj Moisés ut laj Aharón ke'xhupub' rib' chiru ch'och', ut 46laj Moisés kixye re laj Aharón: “Xok laaxanxaar, k'e xam chisa' xkomon li wank sa' li artal, ut k'e ajwi' li pom. Chirix a'an ayu chi junpaat wankeb' wi' li komonil ut taatoj rix li xmaakeb'. Xb'aan naq xnumtaak li xjosq'il li Qaawa' ut ak xtiklaak li raxkamk”, chan.

47Laj Aharón kixb'aanu jo' kiyehe'k re xb'aan laj Moisés: koho sa' aanil ut koxk'e rib' sa' xyanqeb' li tenamit. Ak xtiklaak li raxkamk sa' xyanqeb'. Kixk'e li pom sa' li xanxaar ut kimayejak sa' xk'ab'a'eb'. 48Kixxaqab' rib' sa' xyanqeb' li kamenaq ut eb' li yo'yookeb', ut kiraqe'k li raxkamk. 49Li ke'kamk xb'aan li raxkamk a'an kaalaju mil rik'in o'lajuk'aal xkab' o'q'ob' (14,700), chi ink'a' k'eeb'ileb' sa' ajl li ke'kamk xmaak laj Koré. 50Chirix chik a'an laj Aharón kisutq'iik wan wi' laj Moisés, sa' rokeb'aal li Loq'laj Na'ajej: ak raqenaq chik li raxkamk.

Currently Selected:

Nm 16: QQC

Highlight

Copy