Nm 15

Li chaq'rab' chirix li mayejak

1Li Qaawa' kixye re laj Moisés:

2“Ye reheb' laj Israel: Naq toxex'okaq sa' li ch'och' texink'e wi' chi wank, 3ut naq teeyeechi'i leewakax malaj leekarneer cho'q k'atb'il ut sununkil mayej sa' xk'ab'a' li Qaawa' re naq taatz'aqloq ru li xeyeechi'i we malaj xb'aan naq jo'kan x'alaak sa' leech'ool malaj sa' xk'ab'a' junaq ninq'e, 4tento naq laj mayejanel tixyeechi'i re li Qaawa' kaahib' liib'r chi k'aj yoq'inb'il rik'in aseeyt. 5Taayeechi'i ajwi' jun meet li b'iin rochb'een li k'atb'il mayej malaj li junjunq chi karneer. 6Wi li mayej a'an jun chib'aat, taak'e waqxaqib' liib'r chi k'aj yoq'inb'il rik'in aseeyt, 7ut numenaq jun liitr li b'iin, ut taayeechi'i a'an cho'q sununkil mayej chiru li Qaawa'. 8Ut wi laamayej chiru li Qaawa' a'an jun saaj wakax cho'q aak'atb'il mayej malaj re xk'amb'al wi' chik aawib' sa' usilal rik'in li Yos, sa' xk'ab'a' junaq aayeechi'om, 9tento naq taayeechi'iiq ajwi' oxlaju liib'r chi k'aj yoq'inb'il rik'in waqxaqib' sek' chi aseeyt, jalan wi' chiru li saaj wakax xayeechi'i, 10ut waqxaqib' sek' chi b'iin, rochb'een li saaj wakax, jo' chaab'il ut sununkil mayej chiru li Qaawa'. 11Jo'ka'in taa'uxmanq rik'in li junjunq chi saaj wakax ut eb' li kok' ketomq, eb' li karneer malaj eb' li chib'aat. 12Jo'ka'in taa'uxmanq reheb' li junjunq chi xul, a' yaal jo'k'ihal na'ajmank xmayejankil. 13A'an a'in te'xb'aanu chixjunileb' laj Israel, naq te'xmayeja xk'atb'il mayej li jwal sununk chiru li Qaawa'.

14“Ut wi wank junaq jalan xtenamit sa' eeyanq malaj sa' xyanqeb' leeralal eek'ajol li te'wanq moqon, ut naraj xyeechi'inkil xk'atb'il mayej jwal sununk chiru li Qaawa', tento tixb'aanu jo' nekeb'aanu laa'ex. 15Li chaq'rab' a'in k'eeb'il eere laa'ex jo' ajwi' reheb' laj ab'l tenamit. A'an jun chaq'rab' chi junajwa cho'q reheb' leeralal eek'ajol: juntaq'eet cho'q eere laa'ex ut cho'q re li jalan xtenamit. 16Jun ajwi' li chaq'rab' ut jun ajwi' li taqlahom wanq cho'q eere ut cho'q reheb' laj ab'l tenamit wankeb' sa' eeyanq”,#15,16 Lv 24,22. chan li Yos.

17Li Qaawa' kixye ajwi' re laj Moisés:

18“Ye reheb' laj Israel: Naq toxex'okaq sa' li na'ajej texink'am wi', 19ut naq teewa' li wa re li na'ajej a'an, xb'een xb'een tento teeq'axtesi b'ayaq we li wa a'an. 20Teemayeja ajwi' junaq eek'uluj jo' xb'een leewa teeyiib' cho'q re li Qaawa'; tento teera jo' xb'een ru leerawimq. 21Li mayej a'in tento teeyeechi'i we chi junelik.

22“Mare taaq'etmanq junaq reheb' li chaq'rab' a'in, li yeeb'il inb'aan re laj Moisés 23chalen chaq sa' li xb'een kutan toj anaqwan, re naq teepaab' laa'ex ut leeralal eek'ajol. Wi teeq'et, chi ink'a' rajom eech'ool, tento teeb'aanu chi jo'kan:

24“Wi xeq'et li chaq'rab' sa' komonil chi ink'a' nekenaw, chixjunil li tenamit tento te'xmayeja junaq saaj wakax jo' k'atb'il mayej jwal sununk chiru li Qaawa', rochb'een li mayej k'aj ut li b'iin, jo'wi' jun chib'aat cho'q re li kuyuk maak. 25Chirix chik a'an laj tij taamayejaq re xtojb'al rix li xmaak chixjunil li xkomonileb' laj Israel, ut chi jo'kan taakuymanq li xmaakeb', xb'aan naq yal ink'a' xe'xk'e reetal ut xe'xq'axtesi ajwi' we li k'atb'il mayej ut li xyeechi'omeb' chirix li maak. 26Chi jo'kan taakuymanq xmaak li xkomonileb' laj Israel jo' ajwi' li xmaakeb' laj ab'l tenamit wankeb' sa' eeyanq, xb'aan naq chixjunil li tenamit xe'maakob'k chi ink'a' xe'xk'e reetal.

27“Ab'anan wi jun ajwi' xmaakob'k chi ink'a' xk'ehom reetal, tento tixk'e cho'q xmayej jun tuq'ixq chib'aat aj jun chihab'. 28Laj tij tixmayeja a'an chiru li Qaawa' re xtojb'al rix li xmaak li xmaakob'k chi ink'a' xk'ehom reetal; ut naq taa'uxq mayejak sa' xk'ab'a' li xmaakob'k, taakuymanq li xmaak.#15,27-28 Lv 4,27-31. 29Jun ajwi' li chaq'rab' wanq cho'q reheb' laj Israel ut cho'q reheb' laj ab'l tenamit li wankeb' sa' eeyanq: maak'a' chik junaq chaq'rab' cho'q reheb' li neke'maakob'k chi ink'a' xe'xk'e reetal.

30“A'ut li namaakob'k chi yal naraj xch'ool, a' yaal ma aj Israel malaj jalan xtenamit, naxmux xloq'al li Qaawa'. Li taab'aanunq re a'an, taakamsiiq 31xb'aan naq xtz'eqtaana li raatin li Qaawa' ut xq'et li xchaq'rab'. Taakamsiiq li winq li ixq a'an, ut li xmaak taakanaaq sa' xb'een”, chan li Qaawa'.

Roxloq'inkil li hilob'aal kutan

32Naq eb' laj Israel toj wankeb' sa' li chaqich'och', ke'xtaw jun li winq yo chi si'ib'k sa' hilob'aal kutan. 33Eb' li ke'tawok re chi si'ib'k, ke'xk'am rik'in laj Moisés, laj Aharón ut chiru chixjunil li komonil. 34Ke'xk'e sa' tz'alam, xb'aan naq toj maji' nanawmank k'aru taa'uxmanq rik'in. 35Toja' naq li Qaawa' kixye re laj Moisés: “Kamqaq li winq a'an. Chiteniiq chi pek xb'aan chixjunil li komonil, chirix li na'ajej wankeb' wi' li muheb'aal”, chan. 36Ut chixjunil li komonil ke'risi toj chirix li na'ajej wankeb' wi' li muheb'aal ut ke'xteni chi pek toj reetal kikamk, jo' yeeb'il xb'aan li Qaawa' re laj Moisés.

37Li Qaawa' kixye ajwi' re laj Moisés:

38“Ye reheb' laj Israel naq eb' a'an ut eb' li ralal xk'ajol te'xyiib' xmach li raq'eb' chi junqre ut teeb'ak' rik'in raxmoyin noq'.#15,38 Dt 22,12. 39Te'wanq xmach li raq'eb', re naq jo'q'e te'ril, taanaq sa' xch'ooleb' chixjunil li xchaq'rab' li Qaawa'. Chi jo'kan te'xpaab' ut ink'a' te'xb'aanu li naraj xch'ooleb' chi moko taaxik xch'ooleb' chirix li k'aru neke'ril, a' li tz'aqal neke'xmux wi' rib'eb'. 40Chi jo'kan taajultiko'q reheb' chixjunil linchaq'rab' ut te'xpaab', ut q'axtesinb'ilaqeb' we laa'in li xYoseb'. 41Laa'in li Qaawa' leeYos, li kin'isink chaq eere Ejiipt, re naq laa'inaq leeYos. Laa'in li Qaawa' leeYos!”.

Currently Selected:

Nm 15: QQC

Highlight

Copy