Nm 17

1Li Qaawa' kiraatina laj Moisés ut kixye re: 2“Aatinaheb' laj Israel ut ye reheb' naq chi xjunqalileb' li xjolomileb' li junq teep te'xk'am chaq junjunq xxuq'eb' sa' xk'ab'a'eb' li xjunqkab'al: te'xk'e aawe kab'laju chi xuq'. Taatz'iib'a xk'ab'a'eb' li junjunq chiru li xuq'. 3Chiru li xxuq' laj Leví, taatz'iib'a li xk'ab'a' laj Aharón xb'aan naq a'an li xjolomil li xteepaleb' laj Leví. 4Taakanab'eb' sa' li Loq'laj Muheb'aal, chiru li Loq'laj Kaax, b'arwi' junelik nin'aatinak aawik'in. 5Li winq taatuxmeq li xxuq', a'an li sik'b'il ru inb'aan. Chi jo'kan eb' laj Israel te'xkanab' eewech'b'al”, chan li Qaawa'.

6Laj Moisés kixye a'in reheb' laj Israel ut li junjunq chi xjolomil li junq teeq kixq'axtesi li xxuq': kab'laju chi xuq' ke'xk'e sa' xk'ab'a'eb' li kab'laju chi teep. Sa' xyanqeb' li xuq' a'an wank ajwi' li xxuq' laj Aharón. 7Ut laj Moisés kixkanab'eb' li xuq' chiru li Qaawa' sa' li Loq'laj Muheb'aal. 8Chiru li kutan jun chik, naq ki'ok laj Moisés sa' li Loq'laj Muheb'aal, kixk'e reetal naq li xxuq' laj Aharón, ruuchil li xteepaleb' laj Leví, xtuxmek chik:#17,8 Heb 9,4. ki'atz'umak ut ki'uuchink. 9Toja' naq laj Moisés kirisi chixjunileb' li xuq' chiru li Qaawa' ut kixk'ut chiruheb' laj Israel; eb' a'in ke'ril ut li junjunq kixxok li xxuq'.

10Toja' naq li Qaawa' kixye re laj Moisés: “K'e wi' chik li xxuq' laj Aharón chiru li Loq'laj Kaax; chak'uula aran cho'q reetalil chiruheb' li q'etq'eteb'; chi jo'kan ink'a' chik te'wech'inq chiwix, ut ink'a' te'kamq”, chan.

11Laj Moisés kixb'aanu jo' kiyehe'k re xb'aan li Qaawa'; 12ab'an eb' laj Israel ke'xye re laj Moisés: “Xoo'oso'k chiqajunilo; chiqajunilo tookamq! 13Yalaq ani taajiloq chi xk'atq li xLoq'laj Muheb'aal li Qaawa', taakamq. Ma tookamq chiqajunilo?”, chankeb'.

Currently Selected:

Nm 17: QQC

Highlight

Copy