Lk 4

Li raalenkil li Jesus sa' li chaqich'och'

(Mt 4,1-11; Mk 1,12-13)

1Li Jesus, nujenaq chi Santil Musiq'ej,#4,1 K'iila sut San Lukas na'aatinak chirix xk'anjel li Santil Musiq'ej (cf. 1,15.35.41.67; 2,25-27; 4,1.14.18; 10,21; 11,13; 24,49). ki'elk chaq chire li nima' Jordán ut kik'ame'k xb'aan li Musiq'ej sa' li chaqich'och'. 2Aran chiru ka'k'aal kutan ki'aaleek xb'aan laj tza. Maak'a' kixtzeka chiruheb' li kutan a'an, ut sa' xraqik kitz'okaak.

3Toja' naq kiyehe'k re xb'aan laj tza:

—Wi laa'at Ralal li Yos, ye naq li pek a'in chijaltesiiq cho'q wa.

4Kichaq'ok li Jesus ut kixye re:

—Tz'iib'anb'il sa' li Santil Hu naq moko ka'aj ta wi' rik'in wa yo'yooq li winq.#4,4 Dt 8,3.

5Chirix a'an laj tza kixk'am li Jesus taqe'q ut kixkutb'eke chiru chixjunileb' li xninqal ru tenamit li wank sa' ruuchich'och'; 6ut kixye re:

—Tink'e aawe chixjunil a wankilal ut a loq'al a'in, xb'aan naq q'axtesinb'il sa' wuq' ut li ani twaj xk'eeb'al wi' tink'e re. 7Jo'kan utan, wi taahupub' aawib' chinloq'oninkil, aawehaq chixjunil.

8Kichaq'ok li Jesus ut kixye re:

—Tz'iib'anb'il sa' li Santil Hu naq taaloq'oni ru li Qaawa' laaYos ut ka'ajwi' chiru a'an tatpaab'anq.#4,8 Dt 6,13.

9Toja' naq laj tza kixk'am li Jesus Jerusalén, koxxaqab' sa' ru'uj li rochoch li Yos ut kixye re:

—Wi laa'at Ralal li Yos, kut aawib' taq'a, 10xb'aan naq tz'iib'anb'il sa' li Santil Hu:

«Tixtaqlaheb' chaq li x'ánjel

chawilb'al».

11Tz'iib'anb'il ajwi':

«Tate'xk'am sa' ruq'eb'

re naq ink'a' taatoch' laawoq chiru pek».#4,11 Sal 91,11-12.

12Kichaq'ok li Jesus ut kixye re:

—Tz'iib'anb'il ajwi': «Maayal rix li Qaawa' laaYos».#4,12 Dt 6,16.

13Ut naq kiraqe'k laj tza chi xyalb'al raalenkil, ki'elk rik'in li Jesus toj tixtaw chik tz'aqal xhonalil.

III. LI XK'ANJEL LI JESUS SA' XTEEPAL GALILEA (4,14—9,50)

Xtiklajik li xk'anjel li Jesus

(Mt 4,12-17, 23; 13,53-58; Mk 1,14-15, 39; 6,1-6)

14Kisutq'iik li Jesus Galilea, nujenaq rik'in xwankil li Musiq'ej, ut kisutunk resil sa' chixjunil li na'ajej a'an. 15Naxtzoleb' sa'atqeb' li xch'utleb'aal kab'l ut nak'eemank xloq'al xb'aaneb' chixjunil.

16Naq kiwulak Nazará b'arwi' kik'iiresiik, ki'ok sa' li ch'utleb'aal kab'l sa' sábado, jo' k'aynaq xb'aanunkil, ut kixaqliik re xyaab'asinkil xsa' li Santil Hu. 17Kiq'axtesiik re li xhu li propeet Isaías. Kixhir ru ut kixtaw li raqal b'arwi' tz'iib'anb'il li aatin a'in:

18“Li xMusiq' li Qaawa' wank sa' inb'een

xb'aan naq xinxyul re xyeeb'al li Chaab'il Esilal

reheb' li neb'a'.

Xinxtaqla chaq chi xpuktesinkil resil li kolb'a ib'

reheb' li wankeb' sa' tz'alam,

chi xyeeb'al resil reheb' li mutz' naq te'iloq wi' chik,

chi rach'ab'ankil li rahob'tesinb'ileb'

19ut xpuktesinkil jun santil chihab' sa' xk'ab'a' li Qaawa'”.#4,18-19 Is 61,1-2.

20Chirix a'an kixbot li hu, kixq'ajsi re laj k'anjel ut kik'ojlaak. Q'es ruheb' rik'in li Jesus chixjunileb' li wankeb' sa' li ch'utleb'aal kab'l. 21Toja' naq kixtikib' xyeeb'al reheb':

—Li tz'iib'anb'il aatin a'in li toja' xerab'i, xtz'aqlok ru anaqwan.

22Chixjunileb' chaab'il neke'xye chirix, nalaje'sachk xch'ool xb'aan li chaab'il aatin na'elk chi xtz'uumal re, ut neke'xye:

—Ma maawa' tab'i' a'in li ralal laj José?

23Kixye li Jesus reheb':

—Ch'olch'o naq teeye we li aatin a'in: «At aj b'anonel, b'an wan aawib'. Chixjunil li xqab'i naq xk'ulmank aran Kafarnaúm, b'aanu ajwi' arin sa' laatenamit».

24Kixye ajwi':

—Relik chi yaal ninye eere naq maajun propeet nak'ule'k chi chaab'il sa' li xtenamit. 25Relik chi yaal ninye eere: naab'aleb' xmalka'an ke'wank Israel chiruheb' li kutan kiwank wi' laj Elías, naq kitz'apmank li choxa chiru oxib' chihab' rik'in waqib' po ut kichalk jun nimla we'ej sa' chixjunil li ruuchich'och'; 26ab'an maajun reheb' a'an kitaqlaak wi' laj Elías, ka'ajwi' rik'in jun li xmalka'an aj Sarepta sa' xteepal Sidón.#4,25-26 1 R 17,1.8-16; Stg 5,17. 27Jo'kan ajwi' naab'aleb' li saqlep rix ke'wank Israel naq kiwank li propeet Eliseo; ab'an maajun reheb' a'an kik'iraak: ka'ajwi' laj Nahamán aj Siria.#4,27 2 R 5,1-14.

28Naq ke'rab'i a'in, chixjunileb' li wankeb' sa' li ch'utleb'aal kab'l k'ajo' naq ke'josq'o'k. 29Ke'xaqliik, ke'risi li Jesus sa' li tenamit ut ke'xk'am toj sa' xb'een jun nimla uul chiru li tzuul k'ojk'o wi' li xtenamiteb', re naq te'xkut raj toj taq'a. 30A'ut li Jesus kinume'k sa' xyanqeb' ut koho.

Kixk'irtasi jun li winq wank tz'ajn aj musiq'ej rik'in

(Mk 1,21-28)

31Kikub'eek sa' li tenamit Kafarnaúm, sa' xteepal Galilea. Rajlal sábado naxtzoleb' li wankeb' aran, 32ut neke'kanaak chi sachsookeb' xch'ool rik'in li xk'utum, xb'aan naq na'aatinak rik'in xwankilal.

33Wank aran, sa' li ch'utleb'aal kab'l, jun li winq wank tz'ajn aj musiq'ej rik'in; ut a'an kixjap re chi kaw chi xyeeb'al:

34—K'aru wank qe aawik'in, at Jesus aj Nazaret? Ma xatchalk chi qajuk'b'al? Ninnaw anihat laa'at: a' li xSantil Alal li Yos, chan.

35Li Jesus kixq'us chi kaw ut kixye:

—Matchoqink! Elen rik'in li winq a'an.

Toja' naq li tz'ajn aj musiq'ej kixrum li winq chiru ch'och', sa' xyiheb', ut ki'elk rik'in chi maak'a' kixb'aanu re.

36Chixjunileb' ke'kanaak chi sachsookeb' xch'ool ut neke'xyehatq chirib'ileb' rib':

—K'a' chi aatinul a'in? Nataqlank rik'in wankilal ut kawilal sa' xb'eeneb' li tz'ajn aj musiq'ej, ut neke'elk xb'aan.

37Ut kisutunk resil li Jesus yalaq b'ar sa' chixjunileb' li na'ajej aran.

Kixk'irtasi li xna' li rixaqil laj Simón

(Mt 8,14-15; Mk 1,29-31)

38Naq ki'elk li Jesus sa' li ch'utleb'aal kab'l, ki'ok sa' rochoch laj Simón. Li xna' li rixaqil laj Simón k'ajo' xtiq; ut ke'relaji ru sa' xk'ab'a' li ixq. 39Naq kixk'utzub' rib' sa' xb'een, kixq'us chi kaw li tiq, ut kikanab'aak li ixq xb'aan li xyajel. Kiwakliik chi junpaat ut ki'ok chi k'anjelak chiruheb'.

Naab'aleb' ke'k'irtasiik ewu

(Mt 8,16-17; Mk 1,32-34)

40Naq ok re li saq'e, chixjunileb' li wankeb' xyaj, a' yaal k'aru xyajeleb', kilaje'xk'am rik'in li Jesus ut a'an kixk'e li ruq' sa' xb'eeneb' chixjunqaleb', ut kixk'irtasiheb'. 41Naab'aleb' ajwi' ke'elk maa'us aj musiq'ej rik'ineb', japjookeb' re chi xyeeb'al:

—Laa'at li Ralal li Yos!

A'ut a'an kixq'useb' chi kaw ut ink'a' kixkanab'eb' chi aatinak, xb'aan naq neke'xnaw naq a'an li Kriist.

Li Jesus ki'elk Kafarnaúm

(Mk 1,35-39)

42Naq kisaqewk, ki'elk aran li Jesus ut koho sa' jun junesal na'ajej; ut eb' li tenamit yookeb' chaq chi xsik'b'al. Naq ke'wulak rik'in, ke'raj raj xt'ilb'al re naq ink'a' tixkanab'eb'. 43Ab'an li Jesus kixye reheb':

—Tento tinpuktesi li xChaab'il Esil li xnimajwal awab'ejihom li Yos sa'eb' ajwi' li jalan chik tenamit, xb'aan naq a'in aj e naq xintaqlaak chaq.

44Ut kixpuktesi li Chaab'il Esilal sa'atqeb' li ch'utleb'aal kab'l wankeb' sa' xteepal Judea.

Currently Selected:

Lk 4: QQC

Highlight

Copy