Lk 5
5
Eb' li xb'een xtzolom li Jesus
(Mt 4,18-22; Mk 1,16-20)
1Naq wan chaq li Jesus chire li palaw Genesaret xk'ab'a' ut eb' li tenamit yookeb' chi xtiikisinkil rib' sa' xb'een re rab'inkil Raatin li Yos, 2kiril wiib' li kok' jukub' wankeb' chire li palaw. Ak elenaqeb' chaq laj kar chisa', yookeb' chi xch'ajb'aleb' li xyooy. 3Kitaqe'k li Jesus sa' jun li jukub', a' li re laj Simón, ut kixtz'aama chiru naq tixnajtob'resi kach'inaq rik'in li ch'och'; kik'ojlaak sa' li jukub' ut ki'ok chi xtzolb'aleb' li tenamit.
4Naq kiraqe'k chi aatinak, kixye re laj Simón:
—Jilosi laajukub' toj sa' xchamal li palaw ut kutomaq leeyooy re naq texkarab'q.
5Kichaq'ok laj Simón ut kixye:
—At Tzolonel, xqatawasi qib' chiru jun q'oqyink ut maak'a' xqakara. Ab'an, sa' xk'ab'a' laawaatin, tinkut li yooy.
6Ut naq ke'xb'aanu chi jo'kan, k'ajo' xk'ihal li kar ke'xchap: ki'ok chi t'upe'k li xyooyeb'. 7Toja' naq ke'xk'ut ruq'eb' chiruheb' li rech aj karinel li wankeb' chaq sa' li jukub' jun chik, re naq te'chalq chi xtenq'ankileb'. Ke'chalk, ut ke'xnujob'resi xkab'ichal li jukub': ka'aj chik maa neke'sob'e'k!
8Naq kiril a'an laj Simón Pedro, koxkut rib' chi roq li Jesus ut kixye:
—Elen chink'atq, at Qaawa', xb'aan naq laa'in jun winq aj maak!
9Sachso xch'ool laj Pedro, jo'kaneb' ajwi' li rochb'een xb'aan li k'iila kar ke'xchap. 10Jo'kan ajwi' ke'xk'ul laj Santiago ut laj Jwan, ralaleb' laj Sebedeo, rech aj karineleb' laj Simón. Ab'an li Jesus kixye re laj Simón:
—Matxiwak. Chalen anaqwan eb' laawas aawiitz'in chik taasik' cho'q ruuchil li kar.
11Toja' naq ke'xk'am eb' li jukub' chi ch'och'el, ke'xkanab' chixjunil ut ke'xtaaqe.
Li Jesus kixk'irtasi jun li saqlep rix
(Mt 8,1-4; Mk 1,40-45)
12Naq wan chaq li Jesus sa' jun li tenamit, kiwulak aran jun li winq saqlep chixjunil li rix ut, naq kiril li Jesus, kixhupub' rib' ut kirelaji ru:
—Qaawa', wi taawaj, truuq tinaak'irtasi, chan re.
13Li Jesus kixye' li ruq', kixch'e' ut kixye re:
—Twaj, tatk'iraaq.
Ut sa' junpaat ki'elk li saqlep chirix. 14Li Jesus kixchaq'rab'i chi jo'ka'in:
—Maa'ani aj e chaye a'in; ayu b'an, k'ut aawib' chiru laj tij ut tatmayejaq chirix laak'irajik jo' naxye li xChaq'rab' laj Moisés re naq ch'olch'ooq chiruheb', chan.
15Ab'anan q'axal chik kisutunk resil li Jesus, ut naab'aleb' li tenamit neke'xch'utub' rib' chi rab'inkil jo' ajwi' re naq te'k'irtasiiq li xyajeleb'. 16A'ut li Jesus naxik sa'eb' li junesal na'ajej ut aran natijok chaq.
Kik'irtasiik jun li sik
(Mt 9,1-8; Mk 2,1-12)
17Sa' jun li kutan li Jesus yo chi xtzolb'aleb' li tenamit ut wankeb' aj Pariseey ut aj nahol Chaq'rab' k'ojk'ookeb' aran, chalenaqeb' chaq sa' chixjunil li xsutam Galilea ut Judea, jo'wi' Jerusalén. Ut li xwankil li Qaawa' nak'ehok re chi k'irtasink.
18Toja' naq wankeb' winq ke'chalk, ke'xk'am chaq chiru ch'aat jun li sik: te'raj raj roksinkil re xk'eeb'al chiru li Jesus. 19Ab'anan ink'a' ke'xtaw b'ar te'roksi xb'aan naq naab'aleb' li poyanam; jo'kan naq ke'taqe'k sa' xb'een li kab'l, ke'xyiib' jun li okeb'aal sa' xyanqeb' li teex ut aran ke'xkub'si li sik chiru li xch'ina ch'aat toj sa' yiib'ej, chiru li Jesus. 20Naq kiril li xpaab'aaleb', kixye li Jesus:
—At winq, kuyb'il sachb'il chik laamaak.
21Toja' naq eb' laj tz'iib' ut eb' laj pariseey ke'xtikib' xk'oxlankil: “Ani a'in naq naxmajewa li Yos? Ani truuq chi kuyuk sachok maak? Ma ink'a' tab'i' ka'ajwi' li Yos?”, chankeb' sa' xch'ool.
22Kixnaw li Jesus k'aru yookeb' chi xk'oxlankil ut kixye reheb':
—K'a'ut naq nekek'oxla a'an sa' leech'ool? 23B'ar wank li ink'a' ch'a'aj xyeeb'al: «Kuyb'il sachb'il chik laamaak», malaj: «Waklin ut b'een»? 24Ab'anan re teenaw naq li K'ajolb'ej wank xwankil sa' ruuchich'och' re kuyuk sachok maak -kixye re li sik: Aawe ninye, waklin, xok laach'ina ch'aat ut ayu sa' laawochoch.
25Ak taawakliiq chi junpaat li sik chiruheb', kixxok li xch'aat yokyo wi' ut koho sa' rochoch, yo chi xnimankil ru li Yos.
26Q'axal ke'sachk xch'ool chixjunileb'; ke'xnima ru li Yos ut ke'xye chi k'ajo'eb' xxiw:
—Xninqal sachb'ach'oolej xqil anaqwan.
Li Jesus kixb'oq laj Leví
(Mt 9,9-12; Mk 2,13-17)
27Chirix chik a'in li Jesus ki'elk ut kiril jun aj titz'ol toj, aj Leví xk'ab'a', k'ojk'o sa' titz'leb'aal toj:
—Taaqehin, chan re.
28Ut laj Leví kixaqliik, kixkanab' chixjunil ut kixtaaqe.
29Naq laj Leví kixb'aanu jun nimla ninq'e sa' rochoch sa' xk'ab'a' li Jesus, wankeb' aran naab'aleb' aj titz'ol toj ut jalaneb' chik li yookeb' chi hilank sa' meex rochb'eeneb'. 30Eb' laj pariseey ut eb' laj tz'iib' li neke'okenk chirixeb' ke'choqoqnak sa' xyanqeb' li xtzolom:
—K'a'ut naq nekexwa'ak ut nekex'uk'ak rik'ineb' laj titz'ol toj ut eb' laj maak? chankeb'.
31Kichaq'ok li Jesus ut kixye reheb':
—Ink'a' neke'raj aj b'anonel li kaweb', a'eb' b'an li yaj neke'ajok re. 32Ink'a' xinchalk chi xb'oqb'aleb' li tiikeb' xch'ool, a'eb' b'an laj maak re naq te'xyot' xch'ool te'xjal xk'a'uxl.
Eb' li xtzolom li Jesus ink'a' neke'ayuunik
(Mt 9,14-17; Mk 2,18-22)
33Ut eb' a'an ke'xye re li Jesus:
—Eb' li xtzolom laj Jwan k'iila sut neke'ayuunik ut neke'tijok, jo'kaneb' ajwi' eb' li xtzolom laj Pariseey; ut eb' laatzolom laa'at neke'wa'ak neke'uk'ak.
34Kixye li Jesus reheb':
—Ma truuq tab'i' teek'e chi ayuunik li b'oqb'ileb' rik'in sumlaak wi toj wank li b'eelomej rik'ineb'? 35Ab'an taawulaq xkutankil naq taamaq'e'q li b'eelomej chiruheb': toja' naq te'ayuuniq, sa'eb' li kutan a'an.
36Kixye ajwi' reheb' jun jaljookil ru aatin:
—Maajun napejok junaq ak' aq'ej re xxiitinkil junaq li q'eel. Wi ta jo'kan, taaq'uye'q li ak' aq'ej ut li q'eel ink'a' tixk'am rib' rik'in li ak' xiitil. 37Maajun nak'ehok li ak' b'iin sa' q'eel tz'uum-kuk. Wi ta jo'kan, li ak' b'iin tixpuk' li tz'uum-kuk, taahoye'q li b'iin ut eb' li tz'uum-kuk te'oso'q. 38Li ak' b'iin tento xk'eeb'al sa' ak' tz'uum-kuk. 39Maajun li ak xruk' li najteril b'iin, taaraj chik ruk'b'al li ak', xb'aan naq naxye: «Li najteril b'iin, a'an jwal chaab'il».
Currently Selected:
Lk 5: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.