Ezeq 4
4
Ezequiel tachuma adobe wet yen tetnekayej Jerusalén tä letayhfwas inuhiyela
1Wet Dios äp tahuy n'oyej wet yok:
–Am, hin'o, chuma adobe wet tihi tä letatache. Wet lesayen, ti'pe häp hupuy tä Jerusalén lepeyak. 2Wet enlhi n'oka'tshayajchal peykas tä y'ajomche huppe p'otes, lunkatejlhi hupuy peyak, häpkhilek tet häp chik matche tä letayhfwas inuye Jerusalén. Wet potpe honhat lhipey tä iwhäye häp lelafwek tä tuntey peyak, äm atojphä, häpkhilek nifwotas takasitpe. Wet enlhi n'ot'äsawtes peykas häpkhilek tet häp chik matche tä nifwotas isakan lech'oye häp Jerusalén. Wet äpte enlhi lepeykas häp honhat lhipey tä nifwotas lhaihuthichewek tä yen kasthawtesa. 3Wet is chik letachuma chinaj lhip tä isänhän wet tumtejlä adobe tä Jerusalén lepeyak ihi, häpkhilek tet iwoyek häpe n'olafwek tä tuntey. Wet ehi tä Jerusalén lepeyaktso tatache tä chinaj lhiptso tumejlä, häpkhilek tet häp chik matche tä õ'nuye Jerusalén. Wet häp täja tä letetnekej tä tehlattso häp m'ak tä ihiyeja häp Israel lhayis.
4“Wet is chik alethat katsi, lemä'pe häp ip tä hats'amkat, wet letilhäj häp Israel lhayis lech'isukyaj. Is chik lemä'pe iptso, tilhäj nilhokej Israel lhayis letes 5pajla'tha trescientos noventa (390) ifwalas. Häp ifwala weihalha häpe t'at tä oyen tetnekayej nekchäm weihalha tä otasnhipeja'pe lech'isukyaj tä iwoye häp Israel lhayis.
6“Wet chik nofwphä ifwalastso, häp tä nech'e lemähla'pe häp ip tä afwomkat cuarenta ifwalas, tsi nech'e häpe Judá lhayis letes tä letilhäjila. Häp ifwala weihalha häpe t'at tä oyen tetnekayej nekchäm weihalha tä otasnhipeja'pe lech'isukyaj tä iwoye häp Judá lhayis. 7Wet nech'e letilhakhiyela häp Jerusalén lepeyak tä tet iwoyek letayhfwas ilunejlhi, wet lehuthichehena akay'uche takweyey, wet leyethiyejela olhey häp Jerusalén lepeyak. 8Wet nech'e oyäythila amej niyhäy häpkhilek nemhit lehanej lewoyneja chik letilhakchä, pajla'tha nofwphä häp ifwalas tä lewhäy tä leteläytej tä lemä katsi.
9“Wet chuma häp trigo, cebada, habas, lentejas, mijo, wet lhäy'e häp avena. Wet kasowek tä letsäyho akähi, w'awlhatho häp ifwalas tä trescientos noventa (390) ifwalas tä lemähla'pe häp ip tä hats'amkat, häpkhilek lhenpej aka pana. 10Häp äk tä letufwla ifwala weihalha is chik ninuya'pe un cuarto kilo. 11Wet inät tä leyähiyeja ifwala weihalha äpte isit'a chik inuhla'pe häp medio litro. 12Aka pan häpkhila cebada, wet lhenla alhet hukwa n'oelh y'amuk, wet is chik wichi hiw'enej tä lhenlhi. 13Häp n'olhäk tä kok'ayena, häp tä letetnekej tä mälhhiyejattso tä Israel lhayis tufw chik lhahiyeja wichi tä w'enha lhamejen tä ihiche honhatil tä olham oyokwesiyela.”
14Wet onchulho Lhawuk wet oyok:
–Iwuk Dios, tälhe tä kamaj ohan'äfwaj tä ohanhiyejt'a chik otufw m'ak tä kok'aye. N'am hanhiyej t'at chik otufw itshäwet p'itsek wok tä itshäwet elh tä fwitsaj lelänek. Ihichet'a chik ts'ilak chik oyelhte chik otufw.
15Wet tä Lhawuk nichulh n'oho, wet yok:
–Tä kakalhahi chik lhen alhet hukwa n'oelh y'amuk, is chik lelhäneji alhet häp w'asetaj y'amuk. Häp tä is chik lep'oyej aka pan.
16Wet äpte y'isej elh lhämet wet yok:
–Hin'o, osohiyeja Jerusalén häp lhäk tä wuj tä hiw'en. Chik t'ekhen, hiw'awlhatla lhamhohen m'ak tä lhimphaj tä iche, wet nemhit iwohla tamsekayej lhäk chik tufw. Wet inät äpte lhimphaj tä hiw'enla, wet neytsehiyeja chik iyäyej, wet matche tä lelhakli ihihila lhamel. 17Neheläp lhäy'e nehläs ilänhihena häp lhamel. Nilhokej lhamel lhatkayahnhanhiyeja t'at, tapoyejej lenowayhyajay. Wet ilopenhihena, ts'ilakhila lhiley, häp lech'isukyajay tä tamenej.
Currently Selected:
Ezeq 4: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.