Ezeq 5
5
Ezequiel yisetche lhetek lhäy'e lepäsey
1Lhawuk tahuy n'oyej wet yok:
–Hin'o, is chik letachuma häp tsonhat tä y'uy, istejche etek wet lhäy'e apäsey. Wet chuma n'okaw'awlhanthi wet tihi tres lhipey häp haw'oley tä lew'enhathen. 2Wet chik tajyäme tä tet iwoyek õ'nuye häp Jerusalén lepeyak tä lhenlhi, is chik letachuma weihalha häp lhip haw'oley tä lew'enhathen tres wet tihi Jerusalén lepeyak lechowej tä lep'o. Wet chik tajyäme täja, wet chuma häp tsonhat wet isteji elh haw'ole lhip tä lew'enhathen tres, wet lunkatejlhi häp Jerusalén lepeyak. Wet haw'ole lhip tä imälhehi wet tihlä häp leyalh wet leyalh ichäjla. Wet olham omälhhichela len'äyij wet ochäjila otkwey häp oka tsonhat. 3Wet äpte chuma haw'oley lhip, äm lhimphaj, wet äytho wet käfwnhi haw'uy lhip.#Jer 39.10 4Wet äp chuma lhiphaj haw'oleytso wet thatho itäj wet y'ohihola. Wet itäj tä y'oyejo, lhal hip'ohla nilhokej Israel.
5“Olham tä ohäpe Awuk Dios oyok, Honhattsi Jerusalén. Olhamte tä otihi lechowej wichil lhäy'e iyhäj honhatil. 6Mat Jerusalén nemhit tach'ahu n'oye, tatayhlä olhämtes lhäy'e ochufwenyajay tä otiyej. Wet hich'atej tä inu'pe häp wichil iyhäj tä iwhäye häp lham. Iwohiyet'a olhämtes wet nemhit ihänlhi ochufwenyaj.
7“Häp tä tamenej tä olham tä ohäpe Awuk Dios oyok, Amel lenu'pe wichi tä laka honhates i'awhäyehen tä tatay n'ohlä. Nemhit lewoye olhämtes tä one'tek lewoye, wet nits'ilakhiyat wichi tä i'awhäyehen chik lehänlhi laka leyes. 8Wet häp tä tamenej tä olham tä ohäpe Awuk Dios oyok, Te olham ottayhla ahilä, Jerusalén. Okalelhthila amho tä ates ihi, häpkhilek nilhokej wichi hiw'en m'ak tä owoyej ame. 9Tä hich'atej tä ni'isachehen häp akeyis, wet häp tä owohiyeja ame häp m'ak tä n'am hanej chik owoyej ame lhäy'e tä äp n'am hanej chik owohiyela. 10Jerusalén, wichi tä i'amhi lhamel tufwihena leles#Lam 4.10 wet leles tufwihena lajchalis. Ochenla ame awit'äyhyaj, wet wichi iyhäj tä imälhehi ofwtsatkatla'pe honhat tä tafwojyhiye, tapinhiye, ifwala tälhche, lhäy'e tä ifwala y'uyhi.
11“Tä amel nem lhen amajcheta Owukwe tä Ot'amajchet, mat lekänchiyej acheyälis tä kok'aye lhäy'e akeyis tä hich'atej tä ni'isahen, wet häp tä olham tä ohäpe Awuk Dios tä n'ilataj oyäm kalelhäj olhämet, oyok, tek otäyhthiyeja amel ates, nemla oaip'altsenhen, tek letafwayhiyeja owäkw. 12Jerusalén, wichi tä i'amhi äytes tä tifwiyeja iyhäj, lhäy'e häp nehläs tä y'inhiyejena. Wet iyhäj häp tä letayhfwas ilunhiyeja tä ilänhen häpkhilek nofwej. Wet iyhäj tä imälhehi häp tä ofwtsatkatla'pe honhat tä tafwojyhiye, tapinhiye, ifwala tälhche, lhäy'e tä ifwala y'uyhi. Wet olham ohänla lhamel, ochäjila t'at otkwey häp oka tsonhat.#5.12 Häp tä letetnekej Ezequiel lew'ole tä Dios t'uhläk itihi tres lhipey tä hiw'enhathen (versículo 1).
13“Otihiyeja olham owäkw häp lhamel, wet matche tä lhamel teskanhiyeja oka'tshayaj häpkhilek tajyäme owäkw. Chik tajyäme tä otasin lhamel, wet lhamel nech'e ihanhiyeja tä ohäpe Lewuk Dios, lhäy'e tä ihanhiyeja tä matche tä olham tä olhämet tä pajche owo silätayej häp owäkw tä otihiyeja lhamel, häp tä lhamel ihänlhi iyhäj dios lhayis.
14“Jerusalén, oaiwasthihila, wet wichi tä ihiche honhates tä i'awhäye ailäkwilhila, wet nilhokej lhamel tä inukwe n'äyij hiw'enla awit'äyhyaj tä i'amej. 15Tsi otihla amej owäkw, ochenla ame awit'äyhyaj tä äytajche, oyämla äytajche tä oaitasin. Wet wichi tä ihiche honhates tä i'awhäye lhamel n'äyihila amho wet itihla amej leläkwyhanyaj, wet awit'äyhyaj tä i'amej istunla lhamel. Olham tä ohäpe Awuk olhämet täja. 16Olham ochenla ame nehläs tä wuj, tehlat iwoye häp n'och'ähal tä tifwej wichi. Matche tä oyämla nofwej wichi tä i'amhi, nehläs ilänhihena, lajit lhäka. 17Ottayhiyejahlä nehläs lhäy'e itshätäy tä fwitses häpkhilek tifwej. Äpte ottayhiyejahlä äytes, wet hin'ol tä fwitses inuhiyela, wet wujla'pe lhamel chik y'inhen tä ihi n'oka'tshayaj.#Apoc 6.8 Olham tä ohäpe Awuk Dios olhämet täja.”
Currently Selected:
Ezeq 5: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.