Ezeq 3

1Wet nech'e tahuy n'oyej wet yok:

–Hin'o, tufw häp n'olesaynhayna. Wet chik tajyäme tä letufw, mäla hoyela Israel lhayis häpkhilek lhämhoplhi häp lhamel.

2Wet och'enhi ok'aj wet ichunhan n'oyej häp n'olesaynhay tä ihi papel. 3Wet nech'e yok:

–Hin'o, is chik letim athana häp n'olesaynhay tä ow'en amho, wet äm tapoyej hats'e.

Wet tä otim, hak'onek, hätet iwoye akäyek.#Apoc 10.9-10

4Tä tajyäme täja, wet yok:

–Hin'o, mäh hoye häp Israel lhayis, fwenho olhämtes. 5Wichi tä ochen ame häpkhit'a wichi tä kahanayej lhämtes, wet athahit'a amho tsi häpe t'at häp Israel lhayis. 6Ochenhit'a ame wichi tä w'enhache lhamejen tä wujpey tä ka'ayhifwasa tä yämejlhi lhämtes tä atha tä katäfwelachehen. Chik ochenhin'e ame lhamel, tach'ahuhin'e ame chik lefwenho olhämtes. 7Tha mat tä häpe Israel lhayis, wet tach'ahuhit'ala ame tsi häp tä lhamel tach'ahuhit'a n'oye. Nilhokej häp Israel lhayis tä t'unhen wet lhethey t'unhen. 8Mat olham oayämla t'un häpkhilek lhamel nikalha amhi.#Jer 1.18 9Oayämla t'un, otech'aynhila amej häp tunte tä t'un. Tej chik lhain'älit tä fwitses, yej nowaye lhamel, yej nuhat amho. Yej tetshan tsi häpe wichi tä ni'isahen.

10Wet Dios äp tahuy n'oyej wet yok:

–Hin'o, äm matche tä letach'ahu n'oye. Yej p'ethatlä nilhokej häp m'ak tä ofwel amho, tihi etek. 11Mäh yahne aiyhäj tä haw'etfwas tä õ'soyejte lhamel laka honhat wet õ'häne honhat tä kalew'eta. Ämhoplhi lhamel, wet chik tach'ahu ame wok tej chik nitch'ahuya ame p'iya, fwenhola olak, “Lhawuk Dios lhämet tä t'uhläk ofwel amhohen.”

12Wet Lhawuk laka Espíritu ineyhatphän'o, wet oläte m'ak tä lepak äytaji tä tum ow'echehi, hätet iwoye honhat w'ahu. Häpe t'at Lhawuk lewujyaj tä isi tä nephä, yikch'oye lhip tä ihi. 13Wet häp m'ayhay tä oyämetso oläte lhafwis lepak tä tajwek, lhäy'e häp m'ayhay tä hätet iwoye kaletaj käläy tä iyej lhamel, äpte oläte lepak. Wet tä nichulhwek lepakastso, hätet iwoye honhat w'ahu. 14Wet Dios laka Espíritu ineyhatphän'o, matche tä itsoklhi n'oyej takwey tä takhajay, wet y'ayhat n'ohlä häp lhip tä oihi. Ichen n'ochufwi lewäkw wet nech'e olät lhame tä wuj tä owäkw iyej Israel lhayis. 15Wet tä onchäte Tel Abib, wet oi'pe tewok tä lhey Kebar lhip, tsi häp tä Israel lhayis tä õ'soyej p'ante laka honhat, häp tä yen lew'eta. Wet siete ifwalas tä oiyej t'at häp lhamel, wet wuj tä oyen tichunhayaja m'ak tä ow'en lhäy'e tä oläte.

Dios yen lewoya Ezequiel tä iwo siläta Israel lhayis tä lewit'äy ihihila häp lhamel tä iwoye m'ak tä ni'isa

(Ezeq 33.1-9)

16Wet tä nichäte siete ifwalas, Lhawuk tahuy n'oyej wet yok:

17–Hin'o, oayen lewoya tä lewopej siläta Israel lhayis chik iche lewit'äyhyaj chik nämhiyela lhamel. Olhämetpej tä ofwel amho häp tä lefwenhihopeja lhamel, häpkhilek ihanejpej m'ak tä ot'uhläk owoyeje lhamel. 18Etp'i iche hin'o tä ni'isa wet olham oyok, “Y'inhila häp hin'otso.” Wet chik am kafwelaho letes wet newache ämet tä lhok, “Leche akeyis häpkhilek letafway”, oyok, hin'otso y'inhila t'at tä ihi lech'isukyaj. Mat amla t'at chik oayen tesayej tä älhyej niwoya chowej elha, häp tä kafwelaho olhämtes.

19“Tha mat chik lewo silätayej olhämtes häp elh tä ni'isa, wet nileyache lakeyis, häp hin'otso y'inhila t'at tä ihi lech'isukyaj. Mat am oayenhit'ala tesayej, tsi häp lham tä nitch'ahuya ame tä lefwenho olhämtes.

20“Äpte etp'i iche hin'o tä lehusek ihi tä ileyej m'ak tä is tä iwoye wet iwoye m'ak tä ni'isa. Wet etp'i olham otihlä lewit'äyhyaj. Wet chik am kafwelaho letes, wet y'inhila t'at tä ihi lech'isukyaj. Wet nemla otichunche lakeyis tä isen tä iwoye mhaji, mat amla t'at chik oayen tesayej tä älhyej niwoya chowej elha, häp tä kafwelaho olhämtes.

21“Tha mat chik letahuyej häp hin'otso wet ileyej tä iwoye m'ak tä ni'isa, wet häp tä kamaj lham iläyhla t'at, häp tä iwoye afwonkanyaj, häpkhilek älhyej laj lewit'äyhyaja, wet äpte am alefwayhtej häp awit'äyhyaj.”

Ezequiel nemhit tahuy ayej

22Wet Lhawuk iti n'o'pe takwey wet yäm n'oye tä yok:

–Nephä, mäh hoye tachenhas kawayhi. Chik lechäte, otahuyhila amej.

23Wet owoye, onephä, ohoye tachenhas kawayhi. Tä onchäte, ow'en häp Lhawuk lewujyaj tä isi, hätet iwoye tähaj ow'en tä oi'pe tewok Kebar lhip. Wet ot'upeyhchä pajtha otacho tiji honhat. 24Wet Lhawuk laka Espíritu tiyäj n'oho wet ineyhatphän'o. Otkasitphä wet yäm n'oye tä yok:

–Mäh hochufwi awukwe wet p'ohi lepe. 25Õ'ayäythila amej niyhäy häpkhilek kahoyaye wichi, tsi lehanhiyejt'ala alewoyneja chik lenuphä. 26Wet äpte ow'enla amho tä hak'ajlhich'u sathihola hak'ajch'o, wet nemla letahuy ayej häpkhilek kafwona lhamel. Tsi lhamel häpehen wichi tä tatay n'ohlä. 27Mat chik ot'upejläk lhämhoplhi wichi, wet häp tä nech'e lehanhiyejpejak lhämhoplhi lhamel, wet lefwenhihopeja olhämet. Elh chik t'uhläk tach'ahuye, tach'ahuhiyela, wet elh chik nit'uyahläk tach'ahuye, tek tach'ahuhiyela. Tsi häpe wichi tä tatay n'ohlä.

Currently Selected:

Ezeq 3: WCHB

Highlight

Copy