Ef 5
5
Woyayepej m'ak tä t'uhawetej wichi tä häpehen isi leles
1Tenay Dios, tä ahäpehen leles tä lehumnhay. 2Wopej ahumnhayaja, mälhyej tä Cristo n'aihumnhen wet lhayachaje t'ilek lhatapehen, tä hätet iwoye m'ak tä õyachaje Dios tä õyen n'okhayajayej tä ikänitlhi t'at häp lham.
3Mat n'okain'oyaj wok m'ak at chik häpe chik kok'aye, wok n'otkänyaj tä ni'isa, oyok, yej woyaye tähesna, wet yej lhenay ämeta, tsi ahäpehen Dios laka wichi. 4Yej woye ämet chik len'äfwlhatejwethä aiyhäj, wok ämtes tä amukwehyaj wok ektshanyaj, tsi m'ayhaytso t'uhawethit'a amejen. Mat wopej graciasayej Dios. 5Tsi lehanej t'at, elh chik iwo lakain'oyaja, wok iwoye m'ak tä kok'aye, wok alhaknhatsaj, lew'et ihihit'ala Cristo lhäy'e Dios Leniyatyaj. Tsi häp elh tä alhaknhatsaj, hätet iwoye chik yen häpeya laka dios m'ak tä nilhak'alch'oye. 6Yej tach'ahuye elh chik häpe chik fwetaj ikänitlhi amejen lhämtes tä kamatachehen. Tsi häp m'ayhay tä oyämene, häp tä itone Dios lewäk wichi tä niwoyaye lham lhämtes.#Col 3.5-6 7Tä mälhyejtso, yej aletan'istej lhamel.
8Ifwalas tä pajche amel ahusey ihi t'at honataj, mat athana tä lheyayej Lhawuk, ahusey ihi t'at isi. Wet häp tä oyok, Woyayepej m'ak tä t'uhawetej wichi tä häpehen isi leles, 9tsi lhay tä wuj tä tälhe isi häpe n'o'isyaj, lhäy'e m'ak tä is alhoho, lhäy'e m'ak tä matche. 10Ämay letäfwelej m'ak tä Lhawuk ihuminche. 11Yej alet'aje wichi lakeyes tä najit lahaya tä tälhe honataj, mat n'älitpe. 12Tek ot'uhläk oyäme m'ak tä lhamel weskatej tä iwoye, oyämhiyet'a, tsi on'äfwelhpe. 13Mat nilhokej m'ak tä isi hin'älit, isiche t'at. 14Wet häp tä õyok:
“Yahinphä, am tä lemä,
nephä tä lhehi n'op'itseyhay,
wet Cristo ihutunla atape.”
15Tä mälhyejtso, uyayhlä wet tetshanay m'ak tä lewoye. Yej alhen isukisa mat äm ahusey ihi. 16Wo kotsayej lewhäyna wet äm is m'ak tä lewoye,#Col 4.5 tsi ifwalasna isit'a. 17Yej woye m'ak tä najit lahaya, mat äm matche tä let'uhläk letäfwelej Lhawuk lenech'ethayaj.
18Yej alhen w'oknhasayej hat'es, tsi häp tä iwasthi wichi, mat ämpej tapokwe ahusey Espíritu tä Dios T'amajchet. 19Ämejwethä amhomche salmos lhäy'e n'otenkay tä isen. Choywethä wet is chik ahusey iwunit Lhawuk. 20Wopej graciasayej Dios Lhajcha nilhokej m'ayhay, häp tä isej Lhawuk Jesucristo.#Col 3.16-17
21Tä ahäpehen wichi tä itiyej lewujyaj Cristo, oyok, Is chik elh weihalhapej hätet iwoyek yen at lewuka häp elh.
Häpet atsinhay tä lech'efwas ihi
22Atsinhay tä hach'efwas ihi, en awuhuya hach'efwas,#Col 3.18; 1~Ped 3.1 tech'aynej tä lhen at awuka häp Lhawuk. 23Tsi atsinha lhetek t'at häp lech'efwa, mälhyet iwoye Cristo tä Dios leles lhetek. Häte Dios leles Lefwayhthi, tsi häpe lham t'isan t'at. 24Tä mälhyejtso tä Dios leles yen Lewuka Cristo, häte atsinhay, m'ak at chik häpe chik iwoye, is tä yen at lewukayej lech'efwa.
Häpet hin'ol tä lech'efwas ihi
25Wet amel tä hin'ol tä hach'efwas ihi, humin hach'efwas,#Col 3.19; 1~Ped 3.7 mälhyej tä Cristo ihumin Dios leles wet lhayachaje'pe t'ilek. 26Häp täjtso tä iwoye yämthilek yen t'amajchetesa, häp tä isej Dios lhämet, wet ilejej inät tä ibautisaynej, 27häpkhilek häpehen Dios leles tä isis chik lham itihi tä itayche, wet laj lech'ohleya, newache m'ak chik iyej, mat t'amajchetes t'at wet tek kok'ayehen.#2~Cor 11.2; Col 1.22; Apoc 21.2,9
28Häte hin'o elhpej tä lech'efwa ihi, is chik ihumin lech'efwa, mälhyej tä ihumin lham t'isan. Tsi elh tä ihumin lech'efwa, lhaihumin t'at. 29Ihichet'a elh chik häpe chik y'ulhan lham t'isan, mat ichunhan wet t'uye. Mälhyejtso tä Cristo iwoyeje Dios leles, 30tsi häpe lham t'isan t'at, wet n'amel n'ahäpehen lhipey häp t'isantso. 31Mälhyej tä Dios lhämet tä ihi Lehi yok, “Häp hin'o yikch'oye lajcha lhäy'e lako wet lhaip'ajtej lech'efwa, wet lhamel täkwfwasna hätet iwoyek hätefwajni.”#Gén 2.24 32Mat lhek tetshan täja, oyok, iche m'ak tä tumchä tä ihi Dios lhämettso, wet olham otichunhayaj yok, yäme häp Cristo lhäy'e Dios leles. 33Mat amel häte, is chik hin'o elh weihalhapej ihumin lech'efwa, mälhyej tä lhaihumin, wet atsinha is chik tek yen w'et m'ayeka lech'efwa.
Currently Selected:
Ef 5: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
