Ef 4

Y'alhaip'ajtejwek Dios laka Espíritu

1Tä mälhyejtso, olham tä Lhawuk tamen n'oyej tä õhp'o n'ohi, olhaip'altsen amehen tä oyok, Tä Lhawuk t'än amehen, woyayepej m'ak tä t'uhawetej. 2Yej alechäjwethä, yej afwitses, yej lhak'alwethä, mat teläytej t'at aelh che häpe wet humnhen lhamel.#Col 3.12-13 3Äm matche yämlek atamsek ayäyitwek, häpkhilek nittäya amejen tä alep'ajtejwek Espíritu tä Dios T'amajchet. 4Dios leles hätet iwoye t'isan weihalha, wet iche weihalha Espíritu tä Dios T'amajchet, mälhyej tä weihalha t'at aniwhayaj tä Dios t'änej amehen. 5Iche weihalha Lhawuk, weihalha lhat'ekhahyaj, weihalha bautismo. 6Iche weihalha Dios Lhajcha wet lhaka Niyat, wet äp tachumhilhi nilhokej n'amel wet in'amejen.

7Mat Cristo hip'altseneje elh weihalhapej n'amel häp t'awayhat tä häpe lakhajyhayaj, yämlek hich'otyeneje Lhawuk lechumet. 8Häp täjtso tä tamenej tä Dios lhämet tä ihi Lehi yok:

“Iho'pe lhip tä tojphä,

wet ichäj lhamche iyhäj tä pajche yäythen,

wet hiw'enhomche t'awayhtes häp wichi.”#Sal 68.18

9Wet ¿atsi tä tamenej lhämet tä yok, “Iho'pe lhip tä tojphä”? Tä mälhyejtso, n'äl tä ichunkat tä inuhchä honhatena. 10Wet häp elh tä inuhchä häpe t'at lham tä äp yäpil w'echehi pule, yämlek nilhokej m'ayhay tapoyej tä lham ihi. 11Wet lham t'at tä hiw'enhomche wichi häp t'awayhtes tä häpe lakhajyhayajay. Iyhäjfwas yen häpeya apóstoles, wet iyhäj yen häpeya profetas, wet iyhäj yen Lesilätyajwosa, wet iyhäj yen häpeya pastores tä ichufwenhen wichi. 12Häp täjtso m'ak tä iwoye, yämlek nilhokej lakawosna iwaklhat Dios leles iyhäj häpkhilek iwoye lham lechumet. Wet tälhe täja, y'alhokej n'amel tä n'ahäpe Cristo t'isan y'alhaichihelit, 13pajla'tha y'alhaip'ajtejwek lhachayaj wet y'atäfwelej häp lham tä häpe Dios Lhäs, wet n'ahäpehen iyhäj tä thänhäyej Dios lhämet wet lhahusey w'awulhi Cristo.

14Che mälhyejtso, nemla n'ahäte iwoye nä'tshas, iwopej elha m'ak tä fwetaj iwoye, wet nemla y'alhayachaje hin'ol tä akantses tä fwetaj n'aiwetahatejen lechufwenyajay tä ni'isahen, tä hätet iwoye yafwthitas tä ichäj m'ak at che häpe. 15Mat n'anukwepej m'ak tä matche wet n'ahumnhen n'aiyhäj, häpkhilek y'alhaichihelit wet matche tä y'alhaip'ajtej Cristo. Lham häpe Dios leles lhetek, 16wet t'isan imälhewek t'uneji t'at häp lham, wet t'isan isej nilhokej lhipey tä y'uy lhamhomche wet lhaip'ajtitwek. Wet lhip elh weihalhapej, che iwoye m'ak tä t'uhawetej che iwoye, t'isan imälhewek lhaichihelit t'at wet yiklhayejphä lehumnhayaj.#Col 2.19

N'äyij tä nech'ayek tä Dios leles inukwe

17Tä mälhyejtso, olham tä Lhawuk lhämet n'oyej, ofwel amhohen tä onityen amejen, oyok, Yej tujlhache tä lenukwe wichi tä nitäfwelayej Dios tä matche len'äyij. Lhamel iwoye t'at letichunhayajay tä najit lahaya, 18wet honatsi i'pe lehusey. Häp n'ow'atshancheyaj tä Dios hiw'enho laka wichi, y'ajiyet'a lhamel, tsi tek nitäfwelej Dios, häp lehusey tä t'unhen tä tamenej. 19Lhayachaje lemukwehyajay wet y'ayhtejen tä iwoye lesukyajay tä w'enhahiche tä kok'aye, wet ihichet'a len'äfwlhi che häpe.#Rom 1.21-25

20Mat amel tä let'ekhayaye Cristo, häpkhit'a m'ayhaytso che alechufwenejen. 21Tä lelätaye tä õyen lhämeta, wet che matche tä lewoyaye, lehanej t'at tä lham häpe t'at tä m'ak tä matche tälhe. 22Tä mälhyejtso, leyache akeyes tä pajche, lanayhi achowej wumek tä ihanej wasi lhäy'e tä aikänchiyej lenech'ethayajay. 23Anech'aynejichepej ahusey lhäy'e atichunhayajay, 24wet en haw'uya achowej elh tä nech'ayek tä häpe Dios lhenek. Tsi lham t'uhläk aitech'ayen lhamej,#Col 3.9-10 wet ayen häpeya iyhäj tä ische alhoho wet t'amajchetes, wet lewoyayepej m'ak tä matche.

25Tä mälhyejtso, leyayej tä w'et lhämwethä, mat elh weihalhapej woyeje ämet tä matche aelh,#Zac 8.16 tsi nilhokej n'ahäpehen lhipey t'isan weihalha.

26Che letawäkwäy, yej ch'anlhaye che awäk iton ame hach'isukyaj,#Sant 1.19-20 mat nofwatphä'thahya, 27wet yej wo lew'eta ahättaj.

28Elh tä t'etan, is che ileyej tä t'etan, mat tachumlhi. Is che iwoye lechumet tä is, häpkhilek iche m'ak tä hich'otyeneje wichi tä iwatlä m'ayek.

29Isit'a che ämtes tä ni'isachehen tälhche ayhi, mat is che häpepej ämet tä is, wet tach'ote aiyhäj tä iläte yämlek isej, wet ichätyenpe Dios lakäpfwayaj. 30Yej wo lefwitajayaja Dios laka Espíritu tä T'amajchet, häp lham tä n'otetnek amejen tä kalelhäj tä Awukay t'at Dios wet aisej che nichäte ifwala tä afwayhyaj. 31Tiyayej kanhi nilhokej m'ak tä tapay tä ihi ahusey, lhäy'e afwitseyaj, lhäy'e awäk, lhäy'e tä let'änejpe ämet tä ni'isa aelh, lhäy'e tä lesitäyen aelh, lhäy'e nilhokej han'äyihyajay. 32Is che ahäpehen iyhäj tä lehusey ihi. P'altsenhen aiyhäj wet täyhtejen letes, mälhyej tä Dios itäyhat amejen ates tä isej Cristo.#Col 3.13

Currently Selected:

Ef 4: WCHB

Highlight

Copy