Ef 3
3
Dios itshupyeneje Pablo yämthilek ihäne Lesilätyaj wichi tä kahäpeya Judío lhayis
1Tä ohäpe Cristo Jesús lakawo, õhp'o n'ohi'pe täjtso, lhäy'e tä otch'ot amehen amel tä akahäpeya Judío lhayis. 2Tsi oyenek pajche lehanayej tä Dios lep'altsenyaj t'at tä t'ekhayej n'oye lechumet yämthilek otch'ot amehen. 3Dios hin'älit m'ak tä nin'älita tä pajche t'uhläk iwoye, wet ifwel n'oho yämthilek ohanej, mälhyej tä oyämene lhimphaj tä ochen amehen. 4Chik leyahyenay olhämet, lehanhiyeja tä ontäfwelej m'ak tä nech'ayek tä Dios iwoye, häp tä isej Cristo lechumet. 5Fwalas tä pajche iskatho wichi m'ak tä t'uhläk iwoyena. Mat athana hin'ältej laka apóstoles tä t'amajchetes lhäy'e profetas tä t'amajchetes, häp tä isej Espíritu tä T'amajchet. 6Wet leskalhektso häp täja, oyok, Wichi tä kahäpeya Judío lhayis nech'e lhamtej lewuhuy häp Dios lakäpfwayajay tä isen tä lham t'amajejo leles, hätet iwoye Judío lhayis, häp tä isej Dios Silätyaj tä Is. Nemhit w'enha lhamejen, mat Judío lhayis lepuhfwas t'at, wet m'ak tä Dios pajche ifwel p'ante, y'aje t'at lhamel, häp tä isej Cristo Jesús.#Col 1.25-27
7Wet olham, wet Dios hip'altsenej n'oye lep'altsenyaj tä wuj wet yenn'o Lesilätyajwoya, häp tä oisej lakhajyhayaj tä ikhajyen n'oyej. 8Matche tä ow'et m'ayekfwaj t'at tä oiyej Dios leles. Matkat lham itshupyenej n'oye lep'altsenyajna, yämthilek owo silätayej wichi tä kahäpeya Judío lhayis häp Cristo tä lajit lepesa tä lewujyaj ihi. 9Wet Dios ne'tek opäyne nilhokej wichi m'ak tä lham yäm matche tä iwoye. Lham tä lhenek nilhokej m'ayhay, wet tälhe tä nech'enyaya iskat m'ak tä nech'ayek tä t'uhläk iwoye. Mat athana nech'e hin'älit, 10yämthilek n'okhajyhayajay lhäy'e n'oniyatyajay tä iche puleye, nitäfwelej Dios lehanyajay tä w'enhahiche, häp tä isej lham leles tä itäfwnhatejen lhamel täjtso. 11Yiwetej t'at m'ak tä lham pajche t'uhläk iwoye tälhe tä nech'enyaya, wet nech'e yenlhi t'at häp tä isej Cristo Jesús Lhawuk. 12Häp lham tä n'aisej tä y'at'ekhaye, wet ihichet'a m'ak chik lhafwunyaj iyeji yämthilek y'asakane Dios. 13Häp tä tamenej tä olhaip'altsen amehen, oyok, Yej nuhat amhohen tä oteläythayaj in'oyej atapehen, tsi amel awujyaj t'at täja.
Cristo lehumnhayaj
14Tä mälhyejtso, owo ot'alhyaja atapehen, otihi okamchetey honhat tä oihi tä Lhajcha itayche, 15häp lham tä nilhokej lew'et lheley tä ipuleye lhäy'e wichi tä ihonhatena tälhe. 16Wet ot'alhe chik iti amhiche lakhajyhayaj tä itälhtho lakäywet tä wuj, yämthilek takhajayhen ahusey häp tä isej laka Espíritu. 17Wet is chik Cristo yen lew'eta ahusey häp tä isej achayaj, häpkhilek at'unejiche n'ohumnhayaj wet lewoyay afwettsilahi, 18yämthilek amel lhäy'e nilhokej Dios leles iyhäj matche tä lehanej tä tsajo häp Cristo lehumnhayaj, wet pitaj, wet pitoj, wet tojphä, 19wet letäfwelayej lehumnhayaj tä lhäy'e lhip tä inu'pe hin'ol letäfwnhayaj. Chik mälhhiyejatso, ahäpkhila wichi tä imälhewek tä Dios tapo amejen.
20Wet athana is chik lewujyaj ihi Dios, häp lham tä lakhajyhayaj tachumlhi n'amhihen, wet ihanej iwoyneje m'ak tä lhäy'e lhip tä inu'pe m'ak tä y'at'alheje, lhäy'e lhatichunhayajay. 21Is chik lewujyaj ihi Dios, häp tä isej leles lhäy'e Cristo Jesús, yämthilek tiyäj'attsiy. Amén.
Currently Selected:
Ef 3: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.