Jakari 8
8
Ndukun gə́ wɔji dɔ ɓee gə́ Jerusalem lé
1Njesigənea̰ gə́ njeboo-néje riba dɔ rəa gə rɔtaje nee pana:
2Njesigənea̰ gə́ njeboo-néje pa togə́bè pana:
Mee neḛ aw taḭ-taḭ gə boo-kəmkəḭ mbata lə Sio̰ ləm,
Oŋg-boo ḭ sə neḛ dəa’g ləm tɔ.
3Njesigənea̰ pa togə́bè pana: Neḛ n’tel n’ree Sio̰,
Neḛ ndigi si dan njé gə́ Jerusalem’g.
D’a ɓar Jerusalem lé ɓee-boo gə́ njekila koji ləm,
Mbal lə Njesigənea̰ gə́ njeboo-néje lé
D’a ɓaree mbal gə́ to gə kəmee ləm tɔ.
4Njesigənea̰ gə́ njeboo-néje pa togə́bè pana:
Ɓugaje gə́ diŋgam gə njé gə́ dené d’a si gə mba̰-rəwje gə́ Jerusalem ya tɔɓəi,
Nana kara gə kag-tɔs jia’g-jia’g
Mbata lə ləb dee gə́ bula lé.
5Basaje gə ŋgama̰dje bula d’a taa loo keneŋ pəl-pəl
Gə mba ndam mba̰-rəwje gə́ mee ɓee-boo’g lé.
6Njesigənea̰ gə́ njeboo-néje pa togə́bè pana:
Ɓó lé néje neelé to gə́ nékɔb
Kəm ges koso-dəwje gə́ nai mee ndəa gən lé
See a to gə́ nékɔb kəm neḛ Njesigənea̰’d gə́ njeboo-néje lé to wa.
7Njesigənea̰ gə́ njeboo-néje lé pa togə́bè pana:
Aa ooje, neḛ n’ɔr koso-dəwje lə neḛ mee ɓee’g par gə́ bər ləm,
Gə loo gə́ kàr ur naŋg keneŋ ləm tɔ n’aji dee.
8N’a ree sə dee ndá d’a si Jerusalem,
D’a to koso-dəwje lə neḛ ləm,
N’a to Ala lə dee
Gə goo kankəmta gə néra gə́ danasur ləm tɔ.
9Njesigənea̰ gə́ njeboo-néje lé pa togə́bè pana:
Seḭ gə́ ɓogənè ooje taje nee ta njéteggintaje’g
Gə́ teḛ mee ndəa gə́ deḛ tum ne gin kəi lə Njesigənea̰ gə́ njeboo-néje lé
Loo gə́ d’a gə kunda ne kəi gə́ to gə kəmee lé
Arje ji sí ɓar mèr-mèr.
10Mbata mee ndəa gə́ kédé lé
Dəw ra kula ndá iŋga nédɔjiá el ləm,
Nékulje kara d’iŋga né gə́ wɔji dɔ dee el ləm tɔ.
Meekulɔm gə́ téḛ bèe kara godo
Mbata lə deḛ gə́ d’andə kəi əsé deḛ gə́ teḛ raga
Mbata lə njéba̰je lé,
Bèe ɓa neḛ n’ya̰ dəwje lai
N’ar dee d’oma̰ ne gə na̰ gə mbəa.
11Nɛ ɓasinè n’a ra gə ges koso-dəwje gə́ nai neelé
To gə́ neḛ n’ra ne mee ndəa gə́ kédé’g lé el,
Njesigənea̰ gə́ njeboo-néje ɓa pa bèe.
12Mbata kandə néje gə́ deḛ dubu lé
A teḛkɔr ləm,
Nduú a kul bo̰-bo̰ gə ka̰dee ləm,
Naŋg a kar dee nésɔ dee ləma,
Dara a kar dee mán-tàl ləm tɔ,
Bèe ɓa n’a kar ges koso-dəwje gə́ nai neelé
D’al rɔ dee wɔji dɔ néje’g neelé lai ya.
13Seḭ ginkoji Judaje gə ginkoji Israɛlje lé
Kédé seḭ toje koso-dəwje
Gə́ ndɔl wa dɔ dee mbuna ginkoji dəwje gə raŋg’g
Nɛ ɓasinè n’a kaji sí ləm,
Seḭ a toje nétɔrndu mbuna dee’g ləm tɔ,
Bèe ndá gə́ ɓəlje el, arje ji sí ɓar mèr-mèr.
14Njesigənea̰ gə́ njeboo-néje pa togə́bè pana:
To gə́ kédé neḛ n’wɔji gə mba ra sə sí né gə́ majel
Loo gə́ bɔ síje-je d’ar mee neḛ ḭ ne sə neḛ pu lé
Neḛ n’uba gée n’ya̰ el,
Njesigənea̰ gə́ njeboo-néje ɓa pa bèe.
15Nɛ ɓasinè mee ndɔje’g neelé
Neḛ n’tel n’wɔji njaŋg gə mba ra meemaji gə njé gə́ Jerusalem
Gə dəwje gə́ Juda bèe-bèe ya.
Bèe ndá maji kar sí ɓəlje el.
16Aa ooje, né gə́ kəm kar sí raje ɓa nee:
Ulaje na̰ kankəmta mbuna na̰’d ləm,
Gaŋje rəwta tarəwkɔgje’g lə sí gə goo rəbee
Mba si ne gə meekulɔm ləm tɔ#Epe 4.25.
17Maji kar dəw kara mbuna sí’g
Wɔji mée’g gə mba ra majel gə maree el ləm,
Ubuje rɔ sí gə taŋgɔm el ləm tɔ,
Mbata néje lai neelé neḛ n’ə̰ji dee bəḭ-bəḭ,
Njesigənea̰ ɓa pa bèe.
Ndɔ kɔg mee ɓoo a tel to ndɔ ra naḭ
18Njesigənea̰ gə́ njeboo-néje ulam ta gə rɔtaje nee pana: 19Njesigənea̰ gə́ njeboo-néje pa togə́bè pana: Kɔg mee ɓoo gə́ mee naḭ gə́ njekɔm’g sɔ ləm, gə naḭ gə́ njekɔm’g mi ləm, gə naḭ gə́ njekɔm’g siri ləma, gə naḭ gə́ njekɔm’g dɔg ləm tɔ lé a tel to ndɔ kalrɔ gə ndɔ rɔlel gə naḭ gə́ ka̰ ra rɔlel mbata lə koso-dəwje gə́ Juda. Nɛ maji kar sí undaje kankəmta gə meekulɔm ɓa dan kəm sí’g.
20Njesigənea̰ gə́ njeboo-néje ɓa pa togə́bè pana:
Koso-dəwje ɓəd-ɓəd ləm,
Gə dəwje gə́ d’isi mee ɓee-boo’g ləm tɔ, d’a ree ya ɓəi.
21Dəwje gə́ mee ɓee gə́ kára d’a kaw mee yee gə́ raŋg’d pana:
Ar sí j’aw n’raje ndòo rɔ Njesigənea̰’g ləm,
Gə n’saŋgje Njesigənea̰ gə́ njeboo-néje ləm tɔ.
Jeḛ kara j’a kawje ya tɔ.
22Bèe ɓa koso-dəwje bula ləm,
Gə ginkoji dəwje bula ləm tɔ
D’a ree saŋg Njesigənea̰ gə́ njeboo-néje
Gə mba ra ndòo rəa’g mee ɓee gə́ Jerusalem.
23Njesigənea̰ gə́ njeboo-néje pa togə́bè pana:
Mee ndəaje’g neelé diŋgamje dɔg gə́ takɔji dee ɓəd-ɓəd mbuna ginkoji dəwje gə raŋg’g lé
D’a kwa ta kubu lə dəw kára gə́ to gə́ Jip pa ne pana:
N’a kawje sə sí mbata neḛ n’gərje gao to gə́ Ala nai sə sí-seḭ ya.
Currently Selected:
Jakari 8: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
