Jakari 7
7
Kɔg mee ɓoo gə ndutɔr
1Ləb gə́ njekɔm’g sɔ gə́ mbai o̰ ne ɓee lé Njesigənea̰ ula Jakari ta mee ndɔ gə́ njekɔm’g sɔ lə naḭ gə́ njekɔm’g jinaikara gə́ to naḭ Kislə lé. 2Njé gə́ Betel d’ula Sareser gə Régem-Melek gə dəwje lə dee mba kar dee d’aw ra ndòo rɔ Njesigənea̰’g ləm, 3gə mba kula njékinjanéməsje gə́ mee kəi’g lə Njesigənea̰ gə́ njeboo-néje, gə njéteggintaje ləm tɔ pana: See to maji kəm kar sí no̰je mee naḭ gə́ njekɔm’g mi ləm, gə jɔgje meḛ sí ɓó ləm tɔ to gə́ jeḛ n’raje mee ləbje bula gə́ kédé lé wa.
4Njesigənea̰ gə́ njeboo-néje ulam ta gə rɔtaje nee togə́bè pana: 5Maji kam m’ula koso-dəwje gə njékinjanéməsje lai gə́ mee ɓee’g lé m’pana:
Loo gə́ seḭ ɔgje meḛ sí ɓó ləm, gə no̰je ləm tɔ
Mee naḭ gə́ njekɔm’g mi gə njekɔm’g siri ləm tɔ
As ləbje rɔ-siri lé
See to mbata lə neḛ-neḛ nja ɓa
Seḭ ɔgje ne meḛ sí ɓó gə mbəa lé wa.
6Tɔɓəi loo gə́ seḭ sɔje gə aije lé
See to seḭ ya ɓa sɔje gə aije el wa.
7See seḭ gərje ta néje gə́ Njesigənea̰ pa gə ndu njéteggintaje gə́ dɔtar loo gə́ dəwje d’isi gə meekulɔm mee ɓee gə́ Jerusalem ləm, gə mee ɓeeje gə́ gugu dəa sub ləm, gə loo gə́ par gə́ dɔkɔl ləma, gə ndag-loo’g ləm tɔ lé el wa.
8Njesigənea̰ ula Jakari ta gə rɔtaje nee pana: 9Njesigənea̰ gə́ njeboo-néje pa togə́bè pana:
Gaŋje rəwta gə́ gə dɔ najee ləm,
Raje gə na̰ meemaji ooje ne kəmtondoo lə na̰ ləm tɔ.
10Ulaje kəm njékəisiŋgaje gə ŋganalje
Esé njéndooje əsé mbáje ndòo el ləm,
Wɔjije-kwɔji ra gə na̰ majel el ləm tɔ.
11Nɛ deḛ ndigi koo ta el ləm, deḛ d’ɔs bag dee gə́ tar gə kəsta ləma, d’ɔs mbi dee jigi d’udu nà d’a koo ne ləm tɔ. 12Deḛ d’ar meḛ dee kədərə to gə́ jər gə́ ɓaree diama̰ ləm, deḛ mbad koo godndu gə taje lə Njesigənea̰ gə́ njeboo-néje gə́ yeḛ ula dee gə ndilee gə ndu njéteggintaje ləa gə́ dɔtar lé ləm tɔ. Gelee gə́ nee ɓa Njesigənea̰ gə́ njeboo-néje ar oŋg-boo ḭ ne səa pu. 13Yen ŋga Njesigənea̰ gə́ njeboo-néje pa ne njaŋg pana:
Loo gə́ neḛ m’ɓar dee ndá
Deḛ mbad koo ta lə neḛ.
Togə́bè ɓa loo gə́ deḛ ɓar neḛ ndá
Neḛ kara neḛ mbad koo ta lə dee tɔ.
14Neḛ n’sané dee mbuna ginkoji dəwje gə raŋg’d
Gə́ deḛ gər dee el ləm,
Ɓee lə dee tel to dɔnduba tor dee’g
Ar dəw kára kara dəs keneŋ aw
Esé tel keneŋ el ləm tɔ.
Ɓee gə́ maji dum lé deḛ d’aree tel to dɔdilaloo ya.
Currently Selected:
Jakari 7: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
