Jakari 11
11
Njésiŋgamoŋje tuji pugudu-pugudu
1I ɓee gə́ Liba̰, maji kari teḛ tarəwkɔgje ləi
Gə mba kar pər roo kag-sɛdrəje ləi dula-dula.
2Seḭ kag-siprɛsje, maji kar sí no̰je siije mbigi-mbigi
Mbata kag-sɛdrəje lé toso ləm,
Kagje gə́ ŋgal pur-pur lé tuji mba̰ ləm tɔ.
Seḭ kag-sɛnəje gə́ Basan lé
Maji kar sí no̰je siije mbigi-mbigi
Mbata kag-kɔrje gə́ dəw askəm kandə keneŋ el lé
Tuji mbad-mbad.
3Njékulbadje d’ɔr ndu dee wəl no̰ ne sii mbigi-mbigi
Mbata boo-ronduba lə dee tuji mba̰,
Ŋgan toboḭje d’inja miḭ hər-hər
Mbata néti-rɔ lə Jurdɛ̰ lé unda naŋg ndəs.
Njékulbadje gə́ joo
4Njesigənea̰ Ala ləm pa togə́bè pana: Maji kam m’ul badje gə́ twa dee d’aw sə dee gə́ loo-tḭja-gwɔs dee’g lé. 5Deḛ gə́ ndogo dee lé tḭja gwɔs dee lal né gə́ bèe. Yeḛ gə́ rab dee lé pana: Maji kar dɔ ri Njesigənea̰ ai səgərə mbata ma m’tel ne bao. Nɛ njékulbadje d’oo kəmtondoo lə dee el. 6Mbata n’a koo kəmtondoo lə dəwje gə́ mee ɓee’g neelé el ŋga, Njesigənea̰ ɓa pa bèe. Nɛ aa ooje, n’a kya̰ dee ji na̰’d gə́ yo gə́ nee ləm, n’a kya̰ na̰ na̰ kara ji mbai’g ləa-ləa ləm tɔ. D’a tuji ɓee neelé nɛ n’a taa dəw kára kara ji dee’g el.
7Yen ŋga ma m’un ne kudu kul badje gə́ twa dee d’aw sə dee gə́ loo-tḭja-gwɔs dee’g lé, to deḛ gə́ to majel d’unda mar deeje tɔgərɔ ya. Ma m’wa kag gə́ ɗugu joo jim’g. M’unda ri yee gə́ kára lə Noji ləm, m’unda ri yeḛ gə́ raŋg lə Kɔm-na̰’d ləm tɔ. Yee ɓa m’ul ne badje lé ya. 8Ma m’tɔb njékulbadje munda mee naḭ gə́ kára ba ya. Rɔm asm dɔ dee’g ləm, deḛ ya kara d’ḛjim bəḭ-bəḭ ləm tɔ. 9Bèe ɓa m’pana: M’a kul sí el ŋga. Maji kar yeḛ gə́ a gə kwəi ndá wəi ya ləm, yeḛ gə́ a gə kudu ndá udu ya ləma, deḛ gə́ nai ndá d’usɔ na̰ yo gə́ nee ya ləm tɔ.
10Ma m’un kag gə́ ɗugu ləm gə́ ria lə Noji lé ndá m’təd gə mba tuji ne manrɔ gə́ ma man ne rɔm m’ar koso-dəwje lai lé. 11Manrɔ neelé tuji mee ndəa’g neelé ndá badje gə́ kəm dee to ndòo gə́ d’unda meḛ dee yel dɔm’g lé deḛ gər gao to gə́ to ta lə Njesigənea̰ ya. 12Ma m’ula dee m’pana: Ɓó lé seḭ ooje gə́ nékəmra ndá amje nékoga-dɔ-jim, ɓó lé bèe el tɔ ndá to ta lə sí ya.
Togə́bè ɓa deḛ d’wɔji nékoga-dɔ-jim as larnda rɔ-munda#Mat 26.15 #Mat 27.9-10. 13Njesigənea̰ ulam pana: Maji kam m’odo lar gə́ to yaa̰ neelé m’ar njekubajo, to lar gə́ ra ne gadm ya.
Bèe ɓa ma m’odo larnda gə́ rɔ-munda lé m’aw m’ɔm mee kəi’g lə Njesigənea̰ mbata lə njekubajo lé. 14Tɔɓəi m’təd kag gə́ ɗugu ləm gə́ njekɔm’g joo gə́ ria lə Kɔm-na̰’d lé gə mba tuji ne kɔm na̰’d sad lə ŋgako̰ na̰je gə́ to mbuna Judaje gə Israɛlje’g. 15Njesigənea̰ ulam pana: Maji kam m’taa nékulaje lə njekulbadje gə́ to mbə lé ya ɓəi. 16Mbata aa oo, n’a kar njekulbadje gə́ raŋg kára ḭ mee ɓee’g neelé gə́ mée a to dɔ badje gə́ d’isi tuji lé el. Yeḛ a kaw saŋg ŋgan badje el ləm, yeḛ a tɔ ta doo lə deḛ gə́ d’iŋga lé el ləm, yeḛ a kaa dɔ deḛ gə́ rɔ dee to kari el ləm tɔ. Nɛ yeḛ a sɔ deḛ gə́ d’ər ndəb-ndəb ləm, yeḛ a sɔ deḛ gə́ d’ər ndəb-ndəb saar teḛ ne mèr gɔl dee gə́ naŋg ləm tɔ.
17Meeko̰ a koso dɔ njekulbadje gə́ gə mḭdé ba
Gə́ tusu badje ləa ya̰ dee.
Maji kar kiambas tuji kag jia gə kəmee gə́ dɔkɔl!
Maji kar kag jia tudu kurum ləm,
Kar kəmee gə́ dɔkɔl tɔ kab ya ləm tɔ.
Currently Selected:
Jakari 11: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
