Jakari 12

Ala a taa dɔ Jerusalem gogo

1Ndərta gə́ Njesigənea̰ pa wɔji ne dɔ Israɛl.

Njesigənea̰ gə́ to njenaji dara ləm,

Gə njetum gel naŋg nee ləma,

Gə njera ndil dəw gə́ to mée’g ləm tɔ lé pa togə́bè pana:

2Aa ooje, n’a kar Jerusalem tel to ŋgo kai oŋg lə neḛ ndá koso-dəwje lai gə́ gugu giree ləm, gə Judaje ləm tɔ lé d’a kai karee ila kəm dee kar dee d’aw jogè-jogè loo gə́ d’a kaḭ dɔ Jerusalem sub gə rɔ lé. 3Mee ndəa’g neelé n’a kar Jerusalem to asəna gə biri mbal gə́ wɔi yaa̰ mbata lə koso-dəwje lai. Deḛ lai gə́ ndigi karee ḭta gogo lé d’a kiŋga doo keneŋ ndá ginkoji dəwje gə raŋg lai gə́ dɔ naŋg nee d’a kɔm na̰’d mba rɔ səa. 4Njesigənea̰ pa njaŋg pana: Mee ndəa’g neelé n’a kɔm ɓəl dɔ kunda-kaw-rɔje’g lai ləm, deḛ gə́ njérɔ gə kundaje lé kara ɓəl a kunda dee badə gaŋg dee ləm tɔ. Nɛ n’a kila kəm neḛ dɔ ginkoji Judaje’g loo gə́ n’a kila kəm tɔ dɔ kundaje lai gə́ to ka̰ koso-dəwje lé. 5Mbaije gə́ Juda d’a pa meḛ dee’g pana: Njéɓeeje gə́ Jerusalem lé siŋga dee ḭ rɔ Njesigənea̰ gə́ njeboo-néje gə́ to Ala lə dee lé. 6Mee ndəa’g neelé n’a kar mbaije gə́ Juda to d’asəna gə kir gə́ pər o̰ keneŋ bilim-bilim mee pil’g ləm, d’a to kasəna gə pərŋgel gə́ o̰ lèm-lèm mee wala’g bèe ləm tɔ. D’a tuji koso-dəwje lai gə́ gugu gir dee par gə́ dɔkɔl gə dɔgel ndá Jerusalem ɓa a nai toree’d gə́ Jerusalem ya.

7Njesigənea̰ a kaji njérɔje gə́ Juda kédé ɓa gə mba kar rɔnduba lə gel-bɔje lə Dabid ləm, gə rɔnduba lə njé gə́ Jerusalem ləm tɔ lé ur dɔ ka̰ Judaje’g el. 8Mee ndəa’g neelé Njesigənea̰ a kaḭ bada dɔ njé gə́ Jerusalem’g ndá njerəm gə́ dan dee’g mee ndəa’g neelé siŋgá a kasəna gə ka̰ Dabid bèe ləm, gel-bɔje lə Dabid d’a to kəm dee’g asəna gə Ala bèe ləma, d’a to kasəna gə kura lə Njesigənea̰ gə́ dara no̰ dee’g bèe ləm tɔ.

Kwa-ndòo-yoo mee ɓee’g lai

9Meḛ ndəa’g neelé n’a kula rɔ neḛ ndubu gə mba tuji ginkoji dəwje gə raŋg lai gə́ d’a gə ree rɔ gə Jerusalem lé. 10Tɔ ɓəi n’a kar ndil gə́ ka̰ noji ləm, gə́ ka̰ ra ndòo ləm tɔ ɔm dɔ gel-bɔje’g lə Dabid ləm, gə dɔ njé gə́ Jerusalem’g ləm tɔ. Ndá d’a tel kəm dee gə́ rɔ neḛ-neḛ’d gə́ d’ɔs neḛ gə niŋga lé. D’a no̰ no̰ neḛ’g to gə́ no̰ ne ŋgon kára lə kea̰ bèe ləm, d’a no̰ sii mbigi-mbigi to gə́ no̰ ne ŋgondər bèe ləm tɔ#Ja̰ 19.37, LkJ 1.7 #Mat 24.30, LkJ 1.7. 11Mee ndəa’g neelé ndòo yoo a to yaa̰ Jerusalem asəna gə kəmndooyoo gə́ Hadadrimo̰ kəm wəl-loo gə́ Megido bèe. 12Dəw-mee-ɓeeje lai d’a si dan kəmndooyoo’g, gel-bɔje kára-kára lai d’a si ɓəd-ɓəd: gel-bɔje lə Dabid d’a si ɓəd ləm, denéje lé d’a si ɓəd ləm tɔ: gel-bɔje lə Natan d’a si ɓəd ləm, denéje d’a si ɓəd ləm tɔ: 13gel-bɔje lə Ləbi d’a si ɓəd ləm, denéje d’a si ɓəd ləm tɔ: gel-bɔje lə Simei d’a si ɓəd ləm, denéje d’a si ɓəd ləm tɔ. 14Gel deeje gə́ raŋg kára-kára lai lé d’a si ɓəd-ɓəd ləm, denéje d’a si ɓəd ya ləm tɔ.

Currently Selected:

Jakari 12: SBA2015

Highlight

Copy