Jakari 10
10
Raje tamaji ta Ala’g lé ɓó ta magəje’g el
1Maji kar sí dəjije Njesigənea̰ ma̰-ndi
Gə́ to ma̰-ndi dɔ-nai!
Njesigənea̰ a karee tel ləm,
Yeḛ a kar sí ma̰-ndi
Gə́ ər ɓai-ɓai ləma,
Yeḛ a kar koje uba lub-lub mee ndɔ’g lə nana kara ləm tɔ.
2Mbata magəje lé pa taje gə́ kari ba ləm,
Njénékooje lé teggin taŋgɔm ləma,
Nije gə́ d’ɔr gée lé to néje gə́ ŋgɔm
Gə́ gɔl ne meḛ dəwje gə ta gə́ kari ba ləm tɔ.
Gelee gə́ nee ɓa d’ila ne mbir-mbir to gə́ koso-badje bèe ləm,
D’isi ne dan nékəmndoo’g
Mbata njekul dee godo ləm tɔ.
Ndukun gə́ wɔji dɔ kɔr dee kɔm dee tar lé
3Oŋg ḭ sə neḛ pu dɔ deḛ gə́ to njékulbadje’g,
N’a kar bo̰ néra bàl bya̰je lé ɔs ta dee’g,
Mbata Njesigənea̰ gə́ njeboo-néje aw tən koso-nékulje ləa
Gə́ to gel-bɔje lə Juda lé,
Ndá yeḛ a riŋga dee asəna gə kunda rɔnduba ləa loo-rɔ’g bèe.
4Mbal kunda dɔkum kəi a kḭ rəa’g ləm,
Ŋgawlar ɓər né kara a kḭ rəa’g ləma,
Ɓandaŋ rɔ kara a kḭ rəa’g ləm tɔ.
Mbaije lai kara d’a kḭ rəa’g na̰’d tɔ.
5D’a to kasəna gə bao-rɔje
Gə́ tuba bɔrɔ gə́ mba̰-rəwje loo-rɔ’g bèe,
D’a rɔ rɔ ya mbata Njesigənea̰ a nai sə dee,
Ndá deḛ gə́ njérɔ gə kundaje lé
Rɔkul a dəb dɔ dee’g.
6N’a kar siŋga Judaje ḭ dɔ maree’d gə́ kédé-kédé ləm,
N’a taa dɔ njé’g lə Jisəb ləm tɔ,
N’a tel ree sə dee
Mbata mee neḛ aw taḭ-taḭ mbata lə dee,
Ndá d’a to kasəna gə dəwje gə́ n’uba dee n’ya̰ dee kédé el lé bèe,
Mbata neḛ n’to Njesigənea̰, Ala lə dee
Ndá n’a koo ta lə dee ya.
7Eprayimje d’a to kasəna gə bao-rɔje,
Meḛ dee a lel dee asəna gə dəw gə́ ai mán-nduú bèe,
Ŋgan deeje d’a koo ndá d’a kal rɔ dee ləm,
Meḛ dee a lel dee dɔ Njesigənea̰’g ləm tɔ.
8N’a ɓar dee gə kɔl ndá d’a mbo̰ dɔ na̰
Mbata neḛ n’uga dɔ dee,
Ndá bula lə dee a kḭ dɔ maree’d gə́ kédé-kédé to gə́ kédé ya.
9N’a sané dee mbuna koso-dəwje’g
Ndá loo gə́ d’isi əw lé meḛ dee a kolé dɔ neḛ’g,
D’a si kəmba gə ŋgan deeje na̰’d ndá d’a tel ree.
10N’a kar dee d’ḭ Ejiptə tel ree ləm,
N’a mbo̰ dee mee ɓee gə́ Asiri ləm tɔ,
N’a kar dee ree ɓee gə́ Galaad gə Liba̰
Ndá loo a kas dee el.
11D’a gaŋg baa-boo-kad gə́ to ka̰ néurti
Ndá neḛ Njesigənea̰ n’a kunda paŋgəm mán baa-boo-kad ləm,
Ɓul ma̰-booje d’a kyi tə-tə ləm tɔ,
Ti-rɔ lə Asirije a tuji ləm,
Kag-mbai ɓeeko̰ lə Ejiptəje kara a sané pá ləm tɔ.
12Mbɔl dɔ Njesigənea̰ lé
N’a kar siŋga dee ḭ ne dɔ maree’g ləm,
D’a kaw ne kəm dee gə́ kédé-kédé gə ria-yeḛ ləm tɔ,
Njesigənea̰ ɓa pa bèe.
Currently Selected:
Jakari 10: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
