Mark 4
4
Gosɔta gə́ wɔji dɔ njekilakər lé
Mat 13.1-9, Lug 8.4-8
1Jeju un kudu ndoo dee ta dɔ koŋgo baa-boo’g. Boo-dəwje gə́ bula digi-digi ree d’wa dɔ na̰ rəa’g gugu dəa sub ɓad ɓa yeḛ uru mee to’g aw rəm si keneŋ. Koso-dəwje d’isi dɔ koŋgo baa-boo’g rib-rib#Lug 5.1-3. 2Yeḛ ndoo dee néje gə́ ɓəd-ɓəd gə gosota ula dee pana: 3Aa oo, njendɔ aw mba kila kər. 4Loo gə́ yeḛ aar gə mba kila lé ndá njé gə́ na̰je teḛ jia’g wa naŋg kag-rəw’g: yelje ree keneŋ d’o̰. 5Njé gə́ na̰je teḛ wa naŋg dɔ mba̰ ər’g loo gə́ naŋg to keneŋ təgəsə bèe ndá ḭ wububu mbata andə naŋg sur el. 6Waga ba ya, loo gə́ kàr ɔs ndá kàr ɔsee aree tudu wa gɔgɔgɔ mbata ŋgira aw naŋg yaa̰ el. 7Njé gə́ na̰je teḛ wa naŋg mee kunje’g ndá kunje d’ḭ tur dəa d’udee lusu aree andə el tɔ. 8Njé gə́ na̰je teḛ pə ɔm dɔ naŋg gə́ maji’g lé ndá yeḛ gə́ nà ndá andə rɔ-munda, yee gə́ nà ndá andə rɔ-misa̰, yee gə́ nà ndá andə tɔl ləm tɔ.
9Tɔɓəi Jeju ula dee pana: Nana ɓa gə́ mbia to gən mba koo ndá maji karee oo ne ya.
Gin-né gə́ ar Jeju ndoo dee gə gosotaje lé
Mat 13.10-17, Lug 8.9-10
10Loo gə́ yeḛ nai gə karee ndá deḛ gə́ d’isi mbɔree’g dəb gə deḛ gə́ dɔg-gir-dee-joo neelé ree rəa’g dəjee gin gosota neelé. 11Yeḛ ula dee pana: Seḭ nja Ala ar kəm sí inja gə mba kar sí gərje ne ta lə ɓeeko̰ lə Ala gə́ to loo-kiya’g ɓəi, nɛ deḛ gə́ raŋg lé d’oo taje lai gə gosotaje ba.
12Mba kar dee d’oo gə kəm dee ya nɛ d’aa gə kaa mbə̰ ləm,
Deḛ d’oo gə mbi dee ya nɛ ɓar mbi dee’g gə́ ɓar ɓó gər ginee el ləm tɔ,
Ɓa nà d’a kɔs ne badm tel kar mee Ala oso lemsé dɔ dee’g#Esa 6.9-10.
Jeju ɔr gin gosota neelé
Mat 13.18-23, Lug 8.11-15
13Tɔɓəi Jeju dəji dee pana: Ŋga see gosota gə́ nee ya ɓəi seḭ gərje el wa. Ŋga see gosotaje gə́ raŋg lai ndá see seḭ a gərje to gə́ ban ɓəi wa. 14Njekilakər lé kandə né gə́ yeḛ ila lé yee ɓa gə́ ta gə́ yeḛ ndoo dee. 15Loo gə́ dəwje d’oo ta lé gər ginee el ndá Njekurai ree ɔr kandə ta nee gə́ oso meḛ dee’g lé ho̰d ndá dəwje neelé to d’asəna gə kag-rəw gə́ kandə kər lé wa naŋg keneŋ. 16Kandə kər gə́ oso naŋg dɔ mba̰ ər’g lé to asəna gə deḛ gə́ d’oo ta ndá taa gə ŋgaŋ-kogo, 17nɛ ŋgira ta neelé ɔm jamee meḛ dee’g el ndá d’aw ne waga el mbata meḛ dee mbɔrè. Loo gə́ néurti əsé néɓəl teḛ dɔ dee’g mbata ta neelé gə́ deḛ taa ndá d’oso kas d’ila ta kɔrɔ yal mba̰. 18Kandə kər gə́ oso mee kun’g lé to asəna gə deḛ gə́ d’oo ta neelé 19nɛ tor ta gə́ dɔ naŋg nee ɓa deḛ la̰ji ləm, tor nébaoje gə́ dɔ naŋg nee ɓa deḛ la̰ji ləma, mal néje gə́ ɓəd-ɓəd ɓa wa meḛ dee ləm tɔ ndá d’ula ne sul dɔ ta’g neelé d’ɔgee ne loo teḛkɔr, ŋgina ne ŋgɔsɔrɔ. 20Kandə kər gə́ oso dɔ naŋg gə́ maji kó’g lé to asəna gə deḛ gə́ d’oo ta neelé ləm, deḛ taa gə meḛ dee ləm tɔ. Kandə ta neelé gə́ oso meḛ dee’g lé andə, yee gə́ nà ndá andə rɔ-munda ləm, yee gə́ nà ndá andə rɔ-misa̰ ləma, yee gə́ nà ndá andə tɔl ləm tɔ.
Gosɔta gə́ wɔji dɔ néndogó
Lug 8.16-18
21Yen ɓa Jeju ula dee tɔɓəi pana: See néndogó to né dəw dəb ŋgo dɔ’g əsé ula gin tira’g wa. See to né gə mba kunda dɔ kagee’g tar el wa#Mat 5.15, Lug 11.33. 22Né gə́ rara gə́ to loo-kiya’g lé d’a tegginee gə́ raga ləm, né gə́ rara gə́ to loo-ŋgəḭ’g kara d’a teḛ ne gə́ raga ləm tɔ#Mat 10.26, Lug 12.2. 23Lé nana ɓa mbia to keneŋ gə mba koo ne ta ndá maji karee oo ne ta neelé ya.
24Tɔɓəi yeḛ ula dee pana: Aarje kɔgərɔ dɔ ta gə́ seḭ ooje lé. Mbata d’a kar sí né gə goo lé gə́ seḭ nja wɔjije ne ləm, d’a kɔm maree dɔ’g kar sí ləm tɔ#Mat 7.2, Lug 6.38. 25Mbata dəw gə́ né to jia’g ɓa d’a karee maree dɔ’g, nɛ yeḛ gə́ né teḛkɔr jia’g el ndá d’a taa yee gə́ nai jia’g tɔ#Mat 13.12, 25.29, Lug 19.26.
Gosɔta gə́ wɔji dɔ kó gə́ uba gə dɔrea lé
26Yeḛ ula dee tɔɓəi pana: Ɓeeko̰ lə Ala lé to asəna gə dəw kára gə́ dubu kó mee ndɔ’g ləa ndá ɔd par aw. 27Lé yeḛ toɓi əsé sí kəmba, loondul’g əsé dan kàrá kara kó lé ḭ tɔg gə́ kédé-kédé ar njea lé la̰ji toree pi tɔ. 28Togə́bè naŋg nja ar kó lé uba ləm, kamee teḛ ɓad ɓa dəa orè gée ɓəi ləma, teḛ mbi əsé teḛ boo ləm tɔ. 29Loo gə́ kəm kó lé ər mba̰ ndá debee neelé ila marm ləa gə mbɔree mbata kó lé ər kəm kinja mba̰#Joɛ 4.13.
Gosɔta gə́ wɔji dɔ kandə né gə́ ria lə senebe
Mat 13.31-32,34, Lug 13.18-19
30Jeju ula dee tɔɓəi pana: See ta ɗi ɓa j’a pa kwɔji dɔ ɓeeko̰ lə Ala lé əsé see gosota gə́ ban ɓa j’a pa kɔr ne ginee wa. 31Yee to asəna gə kandə né gə́ ria lə senebe, loo gə́ dəw dubee naŋg lé ka̰dee to gə́ yəm-yəm bèe ar kandə néje gə́ raŋg lai moŋg unda. 32Loo gə́ dəw dubee mba̰ ndá yee uba naŋg ḭ ɓar-kag unda kamnaḭje gə́ raŋg lai ar yelje ree d’wa barkəmee ko̰-ko̰ ra kəi lə dee ndilee’g tɔ.
33Togə́bè yeḛ ndoo dee ta gə gosotaje gə́ togə́bè gə́ d’askəm koo. 34Ɓó ula dee ta gə́ lal gosee el, nɛ loo gə́ yeḛ si gə njékwakiláje gə kar dee ba ndá yeḛ teg gintaje lai ar dee d’oo njai.
Jeju ar lel-boo əw rəa kula
Mat 8.23-27, Lug 8.22-25
35Mee ndəa neelé ya loo gə́ kàrkemetag ndá Jeju ula njékwakiláje pana: Gə́ reeje ar sí n’dəsje j’awje par gə́ kel tura-baa’g nu bèe ɓa.
36Loo gə́ d’ya̰ goo boo-dəwje lé ndá d’aw gə Jeju mee to gə́ yeḛ si keneŋ lé, ndá njétoje gə́ raŋg kara dan gée tɔ. 37Aa ooje, lel-boo gə paŋgəm mán d’ḭ bigim d’ur dɔ dee’g tila to poŋgm-poŋgm, ar mán wa mee to’g jiim. 38Jeju toɓi ɓoŋ-to’g, gəd dəa gə kali. Deḛ ndelee d’ulá yəgə-yəgə pana: Mbai, j’a gə kudu, nɛ see ta yoo sí a kɔḭ el ɓa i to rɔ sí’g bèe-bèe nee wa.
39Yeḛ ḭ dɔ ɓi’g ndá ḭ gə lel ndaŋgee ləm, yeḛ pa gə paŋgəm mán baa-boo ləm tɔ pana, Mbim udu, ar loo to mundu ləm tɔ!
Léegəneeya lel lé əw rəa kula ləm, dɔ mán toso ɗəḭ-ɗəḭ ləm tɔ. 40Tɔɓəi yeḛ tel dəji njékwakiláje pana: See gelee ban ɓa seḭ ɓəlje ne bèe wa. See ban ɓa meekun godo meḛ sí’g togə́bè wa.
41Ɓəl unda dee badə gaŋg dee, ar dee d’ula na̰ ta wédé-wédé pana: See dəw neelé to na̰ ɓa ar lel gə mán baa-boo ya kara d’oo ta təa’g togə́bè wa.
Currently Selected:
Mark 4: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
