Mark 3

Dəw gə́ jia wəi wɔ lé

Mat 12.9-14, Lug 6.6-11

1Jeju tel andə aw mee kəi-kwa-dɔ-na̰’d lə dee ndá iŋga diŋgam kára keneŋ gə́ jia wəi kaaree’g wɔ. 2Deḛ d’unda kəm dee lér-lér gée’g gə mba koo see Jeju a kɔr rɔko̰ rəa’g gə ndɔ-kwa-rɔ wa. Deḛ ra togə́bè gə mba kiŋga ne loo səgee ne. 3Jeju ula dəw gə́ jia wəi wɔ neelé pana: Uba naŋg ḭta aar tar dan sí’g nee.

4Tɔɓəi yeḛ dəji dee pana: Ndɔ-kwa-rɔ lé see godndu lə sí wɔji mba ra né gə́ maji əsé mba ra né gə́ majel wa. Esé gə mba kaji ne rɔ dəw əsé gə mba kya̰ ne karee udu gə́ kudu wa.

Deḛ d’isi dɔ na̰’d jim-jim. 5Yen ŋga Jeju aa kəm dee njal ɔr, nɛ mée ḭ səa pu mbata meendər lə dee tɔ ndá yeḛ ula dəw gə́ jia wəi wɔ neelé pana: Ndɔji jii ra̰daŋ. 6Loo gə́ Parisiḛje teḛ raga ndá deḛ gə njé’g lə Herɔdə d’ɔm meḛ dee na̰’d téréré d’o̰ njuma̰ Jeju saŋg loo mba tɔlee tɔ.

Boo-dəwje ree rɔ Jeju’g

7Jeju gə njékwakiláje d’ɔs badm tel gə́ par gə́ ta baa-boo’g ndá boo-dəwje gə́ bula digi-digi d’ḭ Galile tuga na̰ kəmlə-kəmlə ndolè gée, 8gə deḛ gə́ d’ḭ Jude ləm, gə deḛ gə́ Jerusalem ləm, gə deḛ gə́ d’ḭ Idume ləm, gə deḛ gə́ d’ḭ tura kel Jurdɛ̰’g ləma, gə deḛ gə́ d’ḭ Tir gə Sido̰ ləm tɔ. Loo gə́ deḛ d’oo no̰ nérea lai-lai gə́ yeḛ ra lé ndá deḛ lai ree rəa’g tɔ. 9Togə́bè ɓa yeḛ ula njékwakiláje gə mba kar dee d’wa ŋgaw to ŋginá ne pèrèrè nà banelə boo-dəwje neelé d’a kɔs neḛ ɓèsèsè-ɓèsèsè. 10Mbata loo gə́ yeḛ ɔr rɔko̰ rɔ dəwje bula ndá deḛ lai gə́ to njérɔko̰je lé buŋga na̰ dəa’g gə mba kwa rəa gə ji dee ya peb-peb karee aji dee#Mar 4.1, Lug 5.1-3. 11Loo gə́ ndilje gə́ yèr d’aa loo ɓèd d’ée ndá d’unda barmba dəb kəm dee naŋg nea̰’g ra né pénéné-pénéné pana: I lé to Ŋgon-Ala gə́ gəd nja. 12Nɛ Jeju tɔ ta dee ká ɔg dee pata gər gə́ deḛ gəree.

Jeju mbər njékwakiláje dɔg-gir-dee-joo

Mat 10.1-4, Lug 6.12-16

13Tɔɓəi Jeju ɔd aw dɔ mbal’g tar ndá yeḛ ɓar njékwakiláje gə́ na̰je gə́ yeḛ mbər dee lé ar dee ree rəa’g. 14Yeḛ mbər dee dɔg-gir-dee-joo unda dee gə́ njékwakiláje mba kar dee nai səa ləm, 15gə mba kar dee d’aw d’ɔr goo ta ləa gə siŋgamoŋ gə́ ka̰ tuba ne ndilje gə́ yèr lé ləm tɔ. 16Deḛ gə́ yeḛ ɔr dee dɔg-gir-dee-joo lé ɓa nee: Simo̰ gə́ Jeju ɓaree Piɛrə, 17gə Jak, ŋgolə Jebede, gə Ja̰, ŋgoko̰ Jak, deḛ neelé yeḛ ɓar dee Boanerges, tel ta koji sí pana: Ŋgan lə ndi-gə́-ndaŋg: 18gə Andre, gə Pilibə, gə Bartelemi, gə Matiyo, gə Tomas, gə Jak, ŋgolə Alpe, gə Tade, gə Simo̰ dəw gə́ Kana̰, 19gə Judas Iskariot, dəw gə́ njekun dɔ Jeju lé tɔ.

20Jeju gə njékwakiláje tel ree kəi ndá boo-dəwje d’ḭ kəmlə-kəmlə ar dee d’oo loo sɔ né el. 21Loo gə́ njénojije ləa d’oo ndá deḛ ree gə mba kɔree kaw səa, mbata deḛ pana: Yeḛ lé dəa tel wagəsa ŋga.

Jeju ila dee ta dɔ ta’d gə́ deḛ səgee ne

Mat 12.22-32, Lug 11.14-23, 12.10

22Njéndaji-maktubje gə́ d’ḭ Jerusalem’g ree lé deḛ pana: Ndil Beeljebul taa mée, ar mbɔl dəa ɓa yeḛ tuba ne ndilje gə́ yèr neelé#Mat 9.34, 10.25.

23Togə́bè ɓa Jeju ɓar dee dəji dee gə gosota pana: See Njekurai a tuba Njekurai to gə́ banwa. 24Ɓó lé dəwje gə́ mee ɓeeko̰ gə́ kára d’ḭ kai na̰ loo joo rɔ na̰ ndá ɓeeko̰ neelé a to el, 25əsé ɓó lé dəwje gə́ d’isi mee kəi gə́ kára ba d’a kḭ gə na̰ ndá njémeekəije neelé d’a si el tɔ. 26Ɓó lé Njekurai nja ḭ kai rəa ɓəd ndá yeḛ a teḛkɔr nda̰ bèe el ŋga ləm, kea̰ kara a godo ləm tɔ.

27Dəw kára a kaskəm kandə ugugu kaw mee kəi lə njesiŋgamoŋ gə mba kodo némajije ləa el. Ɓó lé yeḛ a gə kaw kəi lə njesiŋgamoŋ neelé ndá a kwá kubá gə kúla njim-njim kédé mba̰ ɓa a kodo némajije ləa lé ɓəi.

28Tɔgərɔ ma m’ula sí təsərə, kaiya gə́ rara gə́ dəwje ra əsé ndɔl gə́ rara gə́ dəwje d’ila dɔ loo’g kara Ala a koo loo kar mée ti mbidi dɔ’g ɓəi. 29Nɛ dəw gə́ rara ɓa ila ndɔl dɔ Ndilmeenda’g ndá Ala a koo loo kar mée ti mbidi dɔ’g tel el. Njea neelé kaiya a kwa dəa, reḛ́ keneŋ saar gə no̰ ya#Lug 12.10.

30Jeju pa bèe mbata deḛ nja pata pana: Ndil gə́ yèr lé to mée’g.

Ko̰ Jeju gə ŋgakea̰je

Mat 12.46-50, Lug 8.19-21

31Ko̰ Jeju gə ŋgakea̰je d’aar takəi gə́ raga, d’ula kula ɓaree. 32Koso-dəwje gə́ d’isi mbɔree’g dəb lé d’ulá pana: Aa oo, kɔinje gə ŋgakɔḭje d’aar takəi’g d’aar dəjii.

33Yeḛ tel ila dee keneŋ pana: See na̰je ɓa gə́ kɔmje gə ŋgakɔmje wa.

34Tɔɓəi yeḛ aa kəm deḛ gə́ d’isi mbɔree’g dəb lé njal ɔr ula dee pana: Aa ooje, kɔmje gə ŋgakɔmje ɓa nee. 35Mbata dəw gə́ rara ɓa ra torndu Ala lé aree ɔr rɔd ndá yeḛ ɓa gə́ ŋgokɔm gə́ diŋgam əsé kɔnanəm gə́ dené əsé kɔmje gə́ njekojim tɔ.

Currently Selected:

Mark 3: SBA2015

Highlight

Copy