Mark 5
5
Jeju ar ndilje gə́ yèr teḛ mee dəw’g d’aw mee bərje’g
Mat 8.28-34, Lug 8.26-39
1Deḛ teḛ kel tura ɓeeko̰’g lə Gadaraje. 2Loo gə́ Jeju ḭ mee to’g teḛ raga ndá léegəneeya dəw kára gə́ ndil gə́ yèr to mée’g unda loo bwa-doɓarje’g teḛ tila kəm Jeju. 3Dəw neelé ra ɓee mbuna bwa-doɓarje’g ar dəw kára kara askəm kilá kag teá el ləm, kúla lar kara d’askəm kwá ne el ləm tɔ. 4As gɔl bula deḛ d’ilá kag ləm, d’wá teá gə kúla lar ləm tɔ nɛ yeḛ gaŋg kúla lar lé mbidi-mbidi ləm, yeḛ təd kag gə́ d’ila ne lé kərm-kərm ləm tɔ. Dəw kára kara askəm taa siŋga el. 5Dan kàrá gə loondul lé yeḛ si mbuna bwa-doɓarje’g gə dɔ mbalje’g ləm, yeḛ ra né wəl-wəl usu ne rəa kaar mbalje’g aree tḭja pədərə-pədərə ləm tɔ.
6Loo gə́ yeḛ aa loo ɓèd oo Jeju ŋgərəŋ ndá yeḛ ḭ aiŋgwɔd aw oso naŋg nea̰’g bəbərə unda barmba nea̰’g ra né gə ndia gə́ boi wəl-wəl ulá pana: 7I Jeju, Ŋgon-Ala lé gə́ Njesisémdara’g lé see ɗi ləi to ŋga ɓa to rɔm’g wa. Ma m’ra ndòo rɔi’g gə ri Ala mba kari ula kəm ndòo el nja kari.
8Mbata Jeju ulá pana: I ndil gə́ yèr lé teḛ mee dəw’g nee gə́ raga.
9Jeju dəjee pana: See rii lə nawa.
Yeḛ tel ilá keneŋ pana: Rim lə Bula digi-digi. Mbata jeḛ m’bula yaa̰.
10Yeḛ to ta Jeju’g pəgə-pəgə ra ndòo rəa’g mba karee tubá mee ɓee’g neelé ilá walá el.
11Lée neelé loo gə́ par gə́ kel mbɔr mbal’g bèe lé bər-kosoje d’aar d’o̰ mu keneŋ. 12Ndilje gə́ yèr lé to ta Jeju’g pəgə-pəgə d’ulá pana: Ula sí ar sí j’aw n’to meḛ dee-deḛ bər-kosoje’g neelé ɓó gə j’uru meḛ dee’g mbidi.
13Jeju ndigi sə dee ɗəgm. Yen ŋga ndilje gə́ yèr lé d’unda loo mee dəw’g neelé teḛ d’aḭ d’aw d’ɔm mee bər-kosoje’g d’ar bər-kosoje lé buŋga na̰ d’aḭ ndida koŋgo puduru-puduru ɓugu mán wɔlɔg, bər-kosoje neelé d’as tɔl-dɔg-loo-joo nai dan baa-boo’g ho̰d.
14Deḛ njékul deeje lé təd na̰ d’aḭ gə taree d’aree oso gə loo mbidi-mbidi mee ɓee-booje’g ləm, gə mee ŋgan-ɓeeje gə́ walá ləm tɔ. Yen ŋga koso-dəwje teḛ budu-budu mba kaw koo né gə́ teḛ togə́bè lé. 15Loo gə́ deḛ teḛ rɔ Jeju’g lé ndá d’aa loo d’oo dəw gə́ ndilje gə́ yèr gə́ bula digi-digi taa mée pəl-pəl kédé lé nɛ yeḛ ula kubu rəa’g si ne ləm, gə si maji ar rəa tḭja péd-péd ləm tɔ ndá ɓəl unda dee badə gaŋg dee. 16Deḛ gə́ d’oo né gə́ teḛ lé d’ɔr sor né gə́ ra njendilje gə́ yèr lé ləm, gə ra bər-kosoje lé ləm tɔ. 17Yen ŋga deḛ to ta Jeju’g pəgə-pəgə ra ndòo rəa’g mba karee sa rəa gə́ gogo, ya̰ ɓee lə dee.
18To gə́ Jeju si al gə́ mee to’g ndá njendil gə́ yèr lé dəjee ɓó gə mba karee yá̰ aree nai səa. 19Jeju ɔm səa keneŋ el nɛ tel ulá pana: Ɔd aw kəi ləi rɔ njé’g ləi ɓó gə ɔr sor néje lai gə́ Mbaidɔmbaije ra səi ləm, gə kəmtondoo ləi gə́ yeḛ oo lé ləm tɔ.
20Bèe ɓa yeḛ ɔd aw ɔr sor né gə́ Jeju ra səa ila mberee gə loo-loo ɓeeko̰ gə́ Dekapol. Kaar dəwje lai-lai wa dee paḭ-paḭ dɔ’g.
Jeju aji ŋgolə Jayirus gə dené gə́ ɔrɔ ta kubu ləa lé
Mat 9.18-26, Lug 8.40-56
21Jeju uru mee to’g gaŋg mán teḛ kel tura ndá boo-dəwje d’ḭ kəmlə-kəmlə ree mbo̰ dɔ na̰ rəa’g. Yeḛ si dɔ koŋgo baa-boo’g. 22Yen ŋga dəw kára gə́ to mbai gə́ njekəi-kwa-dɔ-na̰, gə́ ria lə Jayirus, aa loo oo Jeju ndá ti oso naŋg gɔlee’g, 23to təa’g pəgə-pəgə oso ne ndòo nea̰’g ulá pana: Ŋgonəm gə́ dené to naŋg gə́ yée ya. Gə́ ree ila jii dəa’g mba karee aji si kəmba am.
24Jeju ɔd aw səa ndá boo-dəwje lé buŋga na̰ gée’g njaa kaaree’g puduru-puduru.
25Dené kára bèe aw sə dee na̰’d tɔ, to dené gə́ məs tal rəa’g saar-saar as ləbee dɔg-giree-joo ya ŋga. 26Yeḛ bəg rəa rɔ njékuma̰je’g loo bula, sané ne néje ləa kɔ lai, nɛ rɔko̰ gə́ rəa lé rəa kəmee gə́ kédé-kédé ɓó ḭ dəa’g pélé kara bèe el. 27Loo gə́ yeḛ oo sor néra Jeju lé ndá yeḛ tel rəa goo boo-dəwje’g neelé andə mbuna dee’g wɔi aw ula jia ɔrɔ ne ta kubu lə Jeju. 28Mbata yeḛ ə̰ji mée’g pana: Ɓó lé ta kubu ləa nja ɓa n’a kwa gə ji neḛ kara rɔ neḛ a to kari péd-péd ya. 29Léegəneeya məs gə́ tal rəa’g lé ginee gaŋg ŋgaji aree gər gao rɔko̰ gə́ rəa lé godo rəa’g péd-péd aree aji mba̰. 30Léegəneeya Jeju gər gao to gə́ siŋgá teḛ rəa’g bəl. Yeḛ turu kəmee wagəsa gə́ dɔ boo-dəwje’g neelé dəji dee pana: See na̰ ɓa wa ta kubu ləm wa.
31Njékwakiláje d’ilá keneŋ pana: See i oo boo-dəwje gə́ d’usi wuduru-wuduru nee el ɓəi ɓa i dəji dəw gə́ njekwa ta kubu ləi ɓəi wa.
32Yeḛ aa boo-dəwje neelé njal ɔr gə mba koo dəw gə́ njekwa ta kubu ləa lé. 33Dené neelé ɓəl unda badə gaŋgee aree unda bala tigi-tigi mbata yeḛ gər né gə́ teḛ neelé gao, to gə́ wɔji dəa-yeḛ nja ndá yeḛ ti oso naŋg gɔlee’g teggin néje lai neelé wad-wad. 34Jeju ulá pana: Ŋgonəm gə́ dené, meekun ləi taa né ari aji ne ya, ɔd aw loo ləi gə meekulɔm ləm, maji kar rɔko̰ ləi lé ɔr rɔi’g gə no̰ péd-péd ləm tɔ.
35Loo gə́ yeḛ si pata bèe-bèe ɓəi ndá dəwje d’ḭ kəi lə ŋgatɔg gə́ mee kəi-kwa-dɔ-na̰’g lé ree d’ula Jayirus pana: Ŋgoni gə́ dené lé wəi mba̰, nɛ see ɗi ɓəi ɓa i ɔs ne mbai lé tar ɓɔḭ-ɓɔḭ gə mbəa tɔɓəi wa.
36Nɛ Jeju un mbia dɔ ta’g lə dee rəw, ula ŋgatɔg dee gə́ kəi-kwa-dɔ-na̰’g neelé pana: Ila məəi dɔ maree’g ɓó ɓəl el.
37Yeḛ ya̰ rəw ar dəw gə́ raŋg kára kara aw səa el nɛ ar Piɛrə gə Jak gə Ja̰, ŋgoko̰ Jak ɓa d’aw səa. 38Loo gə́ deḛ teḛ kəi lə ŋgatɔg dee-deḛ gə́ kəi-kwa-dɔ-na̰’g lé ndá Jeju oo boo-dəwje gə́ ra ne birim-birim ləm, gə njé gə́ na̰je no̰ gə kii wəl-wəl ləm tɔ. 39Ndá yeḛ andə mee kəi’g ula dee pana: See ban ɓa seḭ raje né birim-birim bèe wa. See ɗi ɓa seḭ no̰je ne wa. Ŋgon lé wəi el nɛ to ɓi ɓa yeḛ to ya.
40Deḛ kɔgee dɔ ŋgaŋ dee’g ŋgwɔi-ŋgwɔi. Yen ŋga, yeḛ ar dəwje lai d’unda loo teḛ raga nɛ yeḛ ar bɔ ŋgonje gə ko̰ ŋgonje ləm, gə deḛ gə́ d’aw səa ləm tɔ lé d’andə d’aw loo gə́ ŋgon lé to keneŋ. 41Yeḛ un ji ŋgon lé wa ulá pana: Talita kumi (tel takɔji sí pana: Ŋgon dené, ma nja m’ulai, uba naŋg ḭta).
42Léegəneeya ŋgon gə́ dené lé uba naŋg ḭta, ɔs njaa, njaa ɓad-ɓad mbata ləb ŋgon gə́ dené neelé to dɔg-giree-joo ŋga. Kaar dəwje lai wa dee paḭ-paḭ dɔ’g. 43Jeju ndəji dee bər-bər gə mba kar dee pa taree d’ar dəw kára kara oo el, tɔɓəi yeḛ ula dee gə mba kar dee d’ar ŋgon gə́ dené lé nésɔ usɔ.
Currently Selected:
Mark 5: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
