Matiyo 22
22
Gosɔta gə́ wɔji dɔ mbai gə́ ra muru gad kunda dené kəi-ŋgaw’g
Lug 14.15-24
1Jeju un ta gə́ raŋg ula dee gə gosota pana: 2Ɓeeko̰ gə́ dara lé to asəna gə mbai gə́ ra muru gad kunda dené lə ŋgonee kəi-ŋgaw’g. 3Yeḛ ula kuraje ləa mba kar dee d’aw ɓar kuramareeje nɛ deḛ ndigi ree el. 4Yeḛ ula kuraje ləa gə́ raŋg tɔɓəi pana: Ulaje kuramarmje lé pajena: Ma m’wa dɔ gɔl né ra naḭ lé jəb mba̰, maŋgje ləm, gə nékulje gə́ d’ər ndɔl-ndɔl ya ləm tɔ ndá m’tɔl dee m’wa dɔ gɔl néje lai jəb mba̰ tɔ. Gə́ reeje loo-naḭ’g lé ŋga. 5Nɛ kuramareeje neelé dɔ dee to̰ keneŋ kəw el ar dee d’ɔd d’aw, yeḛ gə́ nee ɔd aw loo-ndɔ’g ləa ləm, yeḛ gə́ kən ɔd aw loo-tel-kəm-larje’g ləa ləma, 6njé gə́ raŋg twa kuraje ləa neelé d’ula sul dɔ dee’g ləm, tɔl dee ləm tɔ. 7Mbai lé oo ndá mée ḭ səa pu aree ɔr njérɔje ləa ar dee d’aw mba kar njétɔl dəwje neelé d’udu ləm, gə roo ɓee lə dee dula-dula ləm tɔ. 8Yen ɓa yeḛ ula kuraje ləa pana: M’wa dɔ gɔl né ra naḭ lé jəb mba̰, nɛ deḛ gə́ m’ɓar dee kuramarmje lé néra dee wa bea el. 9Togə́bè ndá awje gə tɔ-rəwje mba ɓar deḛ lai gə́ seḭ a kiŋga deeje lé mba kar dee ree loo-naḭ’g neelé ya. 10Kuraje neelé taa kila-rəwje yéŋgé-yéŋgé mbo̰ deḛ gə́ d’iŋga dee lé njé gə́ majel gə njé gə́ maji deḛ bula yaa̰, taa loo-naḭ lə mbai lé pəl-pəl tɔ.
11Mbai lé andə aw kəi mba koo deḛ gə́ d’isi ta ka-nésɔ’g lé nɛ yeḛ oo diŋgam kára si keneŋ gə́ yeḛ ula kubu-naḭ rəa’g el. 12Mbai lé dəjee pana: Kuramarm, see ban ɓa aw gə́ loo-naḭ’g nee ndá lal kula kubu-naḭ rɔi’g wa. Diŋgam neelé ta igee sel aree si jim. 13Yen ŋga mbai lé ula kuraje ləa pana: Wáje tɔje jia gə gɔlee ṵdáje iláje raga dan loondul gə́ ndul njudu-njudu’g loo gə́ d’a no̰ gə mán-no̰ kəm dee’g ləm, d’a sɔ ŋgaŋ dee keneŋ pəgərə-pəgərə ləm tɔ#Mat 8.12, 25.30, Lug 13.28. 14Mbata d’a ɓar dee bula nɛ d’a taa dee jebəre bèe.
Né ka̰ Ala lé aree ya
Mar 12.13-17, Lug 20.20-26
15Yen ŋga Parisiḛje d’ula njuma̰ meḛ na̰’d gə mba kaw goso Jeju ɓó gə mba kiŋga ne ta gə́ gəd təa’g. 16Deḛ d’ula njékwakila deeje ləm, gə herodiḛje ləm tɔ rəa’g d’ar dee d’ulá pana: Mbai, jeḛ n’gər gao to gə́ i lé to kankəm dəw ya ləm, i ndoo dəwje kankəmta lə Ala gə goo rəbee, ɓəl ne kəm dəw kára el ləm tɔ mbata i lé rɔ dəwje gə́ raga ɓa kəmi wəi dɔ’g el. 17Ta gə́ to neelé maji kar i ula sí woḭ ya. See kuga lar-gədɓee gə Sesar lé see to né gə́ kəm ra əsé to né gə́ kəm ra el wa.
18Jeju gər goso lə dee gao aree ila dee keneŋ pana: Seḭ njéhulaije, see ban ɓa seḭ sɔmje bèe wa. 19Tɔjimje lar gə́ seḭ ugaje ne lar-gədɓee lé amje m’oo sə sí.
Deḛ ree gə ŋgon larnda kára d’aree oo sə dee tɔ 20ndá yeḛ dəji dee pana: See dɔ na̰ əsé gə ri na̰ ɓa d’unda keneŋ nee ɓəi wa.
21Deḛ ndigi təa’g pana: To ka̰ Sesar.
Yen ŋga yeḛ ula dee pana: Né gə́ wɔji dɔ Sesar ndá arje Sesar ɓó né gə́ to ka̰ Ala lé ndá arje Ala ya tɔ.
22Ta gə́ yeḛ ula dee lé ar kaar dee wa dee paḭ-paḭ ndá d’ubá d’yá̰ d’ɔd gə́ kɔd yɔroŋ-yɔroŋ d’aw.
Ta gə́ wɔji dɔ teḛ loo-yoo
Mar 12.18-27, Lug 20.27-40
23Mee ndəa’g neelé Saduseḛje gə́ njémaḭta teḛ dɔkumbwa’g lə dəwje, rəm wɔr gə́ rɔ Jeju’g dəjee pana#NNk 23.8: 24Mbai, Moyis ndaŋg ta nee ar sí pana: Ɓó lé dəw wəi ɓa lal ŋgon ndá maji kar ŋgoko̰ dəw neelé taa dené-nduba ləa oji ne ŋgon tor nojee’d gə mba kunda ne kó ŋgokea̰ lé#TtG 25.5. 25Ləw ɓa njégoo na̰je’g deḛ siri d’isi mbuna sí’g. Yeḛ gə́ doŋgɔr taa dené, yeḛ wəi galao lal koji ne ŋgon, yeḛ ya̰ dené neelé nduba ar njegée’g. 26Njekɔm gə́ joo neelé ra togə́bè ləm, njekɔm’g munda kara ra togə́bè ləm tɔ ar deḛ lai gə́ to dəwje siri ra togə́bè lal koji ne ŋgon nja lai. 27Gée gə́ gogo ndá dené lé kara wəi udu ta dee jigi ya ləm tɔ. 28Togə́bè ŋga see ndɔ gə́ dəwje d’a teḛ dɔkumbwa’g lé ndá see dené neelé a to gə́ dené lə na̰ ŋga ɓa mbuna deḛ gə́ siri’g neelé wa. Mbata deḛ gə́ siri nee lai lé təa gə́ dené lə dee.
29Jeju ila dee keneŋ pana: Takə̰ji lə sí lé ur sí wala mbata seḭ gərje gin maktub gə́ to gə kəmee lé el ləm, seḭ gərje siŋgamoŋ lə Ala lé el ləm tɔ. 30Mbata ndɔ teḛ dɔkumbwa’g lə dəwje lé ndá diŋgamje d’a taa denéje el ləm, denéje d’a taa ŋgaw el ləm tɔ, nɛ dəwje lai d’a si asəna gə kuraje lə Ala lé gə́ dara ya. 31Ta gə́ wɔji dɔ teḛ dɔkumbwa’g lə dəwje lé see seḭ turaje ta nee gə́ Ala ula sí mee maktub’g lé el wa. Mbata yeḛ pana: 32Ma m’to Ala lé lə Abrakam ləm, gə Ala lé lə Isaak ləma, gə Ala lé lə Jakob ləm tɔ. Bèe ndá Ala lé to ka̰ njé gə́ d’isi kəmba lé ɓó to ka̰ njé gə́ d’wəi lé el#Tr 3.6.
33Ta gə́ Jeju ndoo dee lé ɓar mḭ yaa̰ dum dɔ boo-dəwje neelé təs.
Godndu gə́ ur dɔ mareeje
Mar 12.28-34, Lug 10.25-28
34Loo gə́ Parisiḛje d’oo to gə́ Jeju tɔ ta Saduseḛje gə ta ká ndá deḛ d’aḭ ŋgaŋ na̰ gɔl rɔ dee yəg tɔ. 35Dəw kára mbuna dee’g to gə́ njeteggin godndu. Yeḛ ree pər gə́ rɔ Jeju’g un ta dəjee gə mba kaḭ ne mée pana#Lug 10.25-28: 36Mbai, see godndu gə́ ra ɓa to boi unda mareeje gə́ to mee maktub godndu’g lé wa.
37Jeju ilá keneŋ pana: Mbaidɔmbaije Ala ləi lé i a kundá dan kəmi’g ndigee dɔɓəŋgəri’g ləm, gə ŋgaw məəi bura ləma, gə takə̰ji ləi bura ləm tɔ#TtG 6.5. 38Yee ɓa gə́ godndu gə́ doŋgɔr gə́ ur dɔ mareeje’g. 39Aa oo, yeḛ gə́ njekɔm’g joo lé as səa tɔ. I a kunda mari dan kəmi’g to gə́ i ra gə darɔi bèe tɔ#Ləb 19.18. 40Dan godnduje gə́ joo neelé gin godnduje lai gə gin ka̰ njéteggintaje lai ləm d’ḭ keneŋ ləm tɔ.
Kristi, Ŋgon-Ala gə Dabid
Mar 12.35-37, Lug 20.41-44
41Loo gə́ Parisiḛje mbo̰ dɔ na̰ ndá Jeju dəji dee pana: See ɗi ɓa seḭ ə̰jije dɔ Kristi’g wa. 42See yeḛ lé to gə́ ŋgon nawa.
Deḛ tel d’ilá keneŋ pana: Yeḛ to ŋgon Dabid ya.
43Jeju tel dəji dee pana: Bèe ŋga see ban ɓəi ɓa Dabid ɓaree Mbaidɔmbaije loo gə́ Ndil ula ta mée’g aree pana:
44Mbaidɔmbaije lé ula Mbai ləm pana:
Si dɔ jikɔlm’g saar
Mba karm m’ar njéba̰je ləi tel to nétura-gɔl-kɔm ləi lé#Pak 110.1.
45Ɓó lé Dabid ɓaree Mbaidɔmbaije ləa ndá ŋga see a to gə́ ŋgonee gə́ ban tɔɓəi wa.
46Dəw kára kara as teḛ təa ja̰ kila ta gə́ yeḛ dəji dee neelé el nja saar. Un kudee mee ndəa’g neelé dəw kára kara ila ɗigi kaaree’g dəjee ne ta el ŋga.
Currently Selected:
Matiyo 22: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
