Matiyo 21
21
Jeju andə mee ɓee-boo gə́ Jerusalem
Mar 11.1-11, Lug 19.28-40, Ja̰ 12.12-19
1Loo gə́ deḛ d’unda dɔ Jerusalem dəb ndá deḛ teḛ Betpage mbɔr mbal gə́ ria lə Koiyoje ndá Jeju ɔr njékwakiláje joo ula dee pana: 2Maji kar sí ɔd awje ɓee gə́ to no̰ sí’g kédé lé ndá a kiŋgaje ko̰-mulayḛ̀je gə́ teá naŋg nɛ ŋgonee aar gelee’g tɔ. Tudu deeje reeje sə dee amje. 3Ɓó lé dəw a bəg sí gə mbəa ndá seḭ a kuláje pajena: Mbaidɔmbaije nja ɓa aw ndée ndá léegəneeya d’a kya̰ dee kar sí.
4Ta neelé teḛ togə́bè mba kar ta gə́ njetegginta pa lé aw lée’g béréré mbata yeḛ pana:
5Maji kar sí ulaje koso-dəwje gə́ Sio̰ pajena:
Aa ooje, mbai lə sí si aw gə́ rɔ sí’g nee,
Yeḛ to dəw gə́ kul yururu, uba dɔ mulayḛ̀je gao si’g.
To ŋgon mulayḛ̀je gə́ aḭ goo kea̰je gə́ yeḛ uba lé#Jkr 9.9.
6Njekwakila Jeju-je d’ḭ d’aw ra to gə́ Jeju un ndia ar dee lé. 7Deḛ ree gə ko̰-mulayḛ̀je gə ŋgonee gelee’g ndá deḛ lab kubuje lə dee dɔ dee’g d’ar Jeju uba dəa ndoi si tar. 8Njé gə́ na̰je bula mbuna boo-dəwje’g neelé mbalé kubuje lə dee naŋg dɔ kag-rəw’g ləm, njé gə́ raŋg ti mbi kamje lab naŋg mbələŋ-mbələŋ rəbee ləm tɔ. 9Deḛ gə́ njaa nea̰’g gə deḛ gə́ ndɔm gée’g lé ra né tar u-u-u pana: Hosana, arje ŋgon Dabid. Maji kar dɔkaisəgərə nai gə yeḛ gə́ ree gə ri Mbaidɔmbaije lé. Hosana, arje deḛ gə́ d’isi mee loo gə́ to tar sab lé ləm tɔ#Pak 118.25-26.
10Loo gə́ Jeju teḛ mee ɓee gə́ Jerusalem ndá koso-dəwje gə́ mee ɓee’g neelé d’aw dɔ na̰’d pum-pum pana: See to gə́ na̰ ɓa aa’n wa.
11Boo-dəwje tel d’ila dee keneŋ pana: To Jeju, njetegginta gə́ Najaret mee ɓeeko̰ gə́ Galile.
Jeju tuba njérab-néndogoje kəi-Ala’g
Mar 11.15-19, Lug 19.45-48, Ja̰ 2.13-22
12Jeju andə mee kəi-Ala’g. Yeḛ tuba njérab-néndogoje gə njéndogo néje keneŋ ləm, yeḛ tila tabulje lə njémbél larje gə kalije lə njéndogo dərje ləm tɔ. 13Yeḛ ula dee pana: Deḛ ndaŋg mee maktub’g pana: Kəi ləm lé d’a ɓaree kəi-ra-tamaji nɛ seḭ teleeje undaje gə́ duu-loo lə njéɓogoje ya#Esa 56.7, Jer 7.11.
14Yen ŋga, njékəmtɔje rəm pər gə́ rəa’g mee kəi-Ala’g ndá yeḛ aji dee. 15Loo gə́ mbai dɔ njékinjanéməsje-je gə njéndaji-maktubje d’oo né gə́ maji gə́ yeḛ ra ləm, gə ŋganje gə́ ra né u-u-u mee kəi-Ala’g pana: Hosana arje ŋgon Dabid lé ndá meḛ dee ḭ dəa’g pu. 16Deḛ dəji Jeju pana: See mbii oo pa gə́ ŋganje d’ɔs’n lé ya wa.
Jeju tel ila dee keneŋ pana: M’oo ya. See seḭ turaje ta nee gə́ to mee maktub’g lé el wa. Ta lé pana: Ta gə́ teḛ ta ŋganje ləm, gə ta ŋganje gə́ nai ta mbà’g ləm tɔ lé i tum ne gin siŋgamoŋ ləi keneŋ#Pak 8.3.
17Tɔɓəi yeḛ uba dee ya̰ dee unda loo mee ɓee-boo’g teḛ raga aw Betani mba to keneŋ.
Jeju man kodé
Mar 11.12-14,20-24
18Teḛ gə́ ndɔ rad yeḛ tel ree mee ɓee-boo ndá ɓó tɔlee. 19Jeju aa loo oo kodé dɔ ji rəw gə́ wala bèe. Yeḛ aw pər gə́ keneŋ ndá kamee ɓa yeḛ oo. Yen ɓa yeḛ pana: I a kandə gogo el nja saar gə no̰.
Léegəneeya kodé lé wəi wuu, tudu kurum. 20Loo gə́ njékwakiláje d’aa loo d’oo bèe ndá kaar dee wa dee paḭ ar dee pana: See gelee ban ɓa kodé gə́ aar neelé wəi tar wuu gə́ léegəneeya bèe wa.
21Jeju ila dee keneŋ pana: Ma m’ula sí təsərə, ɓó lé seḭ awje gə meekun gə́ seḭ maḭje gə rɔ sí dɔ’g el ndá né gə́ ra gə kodé neelé gə karee ba ɓa seḭ a raje el, nɛ ɓó lé mbal gə́ boo nee nja ɓa a kulaje pajena: Ɔr rɔi gə ŋgirai oso dan baa-boo’g nee kara né neelé a to togə́bè ya#Mat 17.20, 1Kɔr 13.2. 22Né gə́ rara ɓa seḭ a dəjije gə meekun gə ndukwɔi lə sí ndá kara seḭ a kiŋgaje née ya.
Gin siŋgamoŋ lə Jeju
Mar 11.27-33, Lug 20.1-8
23Jeju andə mee kəi-Ala’g si ndoo dee ta ndá mbai dɔ njékinjanéməsje gə ŋgatɔg-dəwje ree pər gə́ rəa’g dəjee pana: See néje gə́ i ra lé see na̰ ɓa un ndia ari gə mba kari ra togə́bè wa.
24Jeju ila dee keneŋ pana: Ma kara m’a dəji sí ta kára koo tɔ. Ɓó lé seḭ ulamje lée’g ya ndá ma kara m’a riba sə sí dɔ dəw gə́ njekarm m’ra néje neelé tɔ. 25See batɛm lə Ja̰ lé see to né gə́ ḭ dara əsé to ka̰ dəwje wa.
Deḛ d’ula ta dee d’ar na̰ d’isi dəji na̰ ta pana: Ɓó lé j’a kilá keneŋ pana: To né gə́ ḭ dara ndá yeḛ a kila sí keneŋ pana: Bèe ŋga see ban ɓa j’ɔm meḛ sí dəa’g el wa. 26Ɓó lé j’a pana: To gə́ ka̰ dəwje ndá kara jeḛ m’ɓəl meḛ sí’g pana: Dəwje d’a ndigi sə sí el mbata d’oo Ja̰ gə́ njetegginta ya.
27Yen ŋga deḛ tel d’ila Jeju’g pana: Jeḛ n’gər el.
Yeḛ tel ila dee’g gogo pana: Ma kara m’a kula sí ri dəw gə́ njekarm m’ra néje neelé el tɔ.
Gosɔta gə́ wɔji dɔ ŋganje joo
28See gə́ meḛ sí-seḭ gə́ banwa. Dəw kára to njenganje gə́ diŋgam joo. Yeḛ ula yeḛ gə́ tɔg pana: Ŋgonəm, ɔd aw ra kula mee ndɔ-nduú’g. 29Yeḛ ilá keneŋ pana: Ma m’ndigi el. Gée gə́ gogo yeḛ la̰ji toree mée’g ndá tel ɔd aw keneŋ. 30Tɔɓəi yeḛ tel ula yeḛ gə́ kára to gə́ maree lé tɔ. Yeḛ tel ilá keneŋ pana: Ma m’ndigi ya, Mbai. Nɛ yeḛ mbad kaw saar. 31Ŋga see yeḛ gə́ ra ɓa mbuna dee’g ɓa to njera torndu bɔbeeje lé wa. Deḛ tel ndigi təa’g pana: Yeḛ gə́ dəa ɔs naŋg kédé lé nja. Jeju ila dee keneŋ pana: Ma m’ula sí təsərə, njétaa lar-gədɓeeje ləm, gə kaiya-denéje ləm tɔ lé d’a teḛ ɓeeko̰’g lə Ala lé gə́ ŋgaw ta sí kédé ɗo̰joŋ ya. 32Mbata Ja̰ lé ree rɔ sí’g gə rəw gə́ meekarabasur nɛ seḭ ɔmje meḛ sí dəa’g el. Nɛ njétaa lar-gədɓeeje ləm, gə kaiya-denéje ləm tɔ ɓa d’ɔm meḛ dee dəa’g ya. Loo gə́ seḭ ooje bèe ndá seḭ waje ndòo rɔ sí dɔ kaiya’g lə sí mba kɔmje ne meḛ sí dəa’g el#Lug 3.12, 7.29-30.
Gosɔta gə́ wɔji dɔ njéndɔ-nduúje gə́ to njémeeyèrje
Mar 12.1-12, Lug 20.9-19
33Urje mbi sí ooje ne gosota gə́ raŋg tɔɓəi. Dəw kára gə́ to njekəi si gən wa ndɔ-nduú. Yeḛ ula ŋgalaŋ giree’g siŋ-siŋ ləm, ra loo mbula mán-nduú ləma, uru pal ləm tɔ. Yeḛ wa ndɔ-nduú neelé ula ji njéndəaje’g ndá ɔd par aw dɔɓee gə́ raŋg#Esa 5.1-2. 34Loo gə́ naḭ ra kandə nduú lé nai dəb ndá yeḛ ula kuraje ləa rɔ njéndɔ-nduúje’g lé gə mba kar dee tḭja ka̰dee d’aree. 35Njéndɔ-nduúje neelé twa kuraje ləa kunda yeḛ gə́ kára mbugu-mbugu ləm, tɔl yeḛ gə́ kára mbḭ ləma, tila yeḛ gə́ njekɔm dee gə́ munda gə kɔri-ərje ləm tɔ. 36Yeḛ tel ula kuraje ləa bula unda njé gə́ kédé nɛ njéndɔ-nduúje lé ra sə dee né to gə́ ra gə njé gə́ kédé lé ya tɔɓəi. 37Togə́bè yeḛ tel ula ŋgon mée ya pana: Ŋgon neḛ ɓa yḛ̀, d’a ɓəl kəmee mbata yeḛ to ŋgon mee neḛ ya. 38Loo gə́ njéndɔ-nduúje neelé d’aa loo d’oo ŋgon lé ndá d’ula njuma̰ meḛ na̰’d pana: Aa ooje, ŋgon gə́ njekwa-nénduba lé ya ŋga sí aw gə́ nee to ŋga. Reeje ɓó gə ar sí n’tɔleeje, j’ya̰je loo n’taaje ne nénduba ləa. 39Yen ŋga d’ubá d’wá ndɔree jol-jol d’aw səa ŋgaŋloo ndɔ-nduú’g lé tuga keneŋ jag-jag tɔlee.
40Ɓasinè, loo gə́ mbai gə́ njendɔ-nduú lé ree ndá see ri ɓa a ra gə njéndəaje neelé wa.
41Deḛ tel d’ilá keneŋ pana: Yeḛ a kun kəmee rəw mba tɔl njémeeyèrje neelé ya ndá a kar njé gə́ raŋg gə́ d’a gə leel kandə nduú naḭ kinja’g kaw ne karee lé ɓa a kunda dee ta ndɔ-nduú’g ləa lé ɓəi tɔ.
42Yen ɓa Jeju ula dee pana: See ta nee gə́ to mee maktub gə́ to gə kəmee lé seḭ turaje el wa.
Pil mbal gə́ njékṵdakəije mbad d’ila kɔrɔ lé
Yee nja tel to mbal kunda dɔ kum kəi gə́ gəd tɔ.
Mbaidɔmbaije ɓa ra ar sí.
To né gə́ dum kəm sí ya tɔ#Pak 118.22-23.
43Gelee gə́ nee ɓa ma m’ula sí ne m’pana: Ɓeeko̰ lə Ala lé d’a taa ji sí’g kula ji ginkoji dəwje gə́ kudu kára gə́ néra dee wa bua ɓeeko̰ lé. 44Nana ɓa gə́ a koso dɔ mbal’g neelé ndá a təd rəa keneŋ njigi-njigi ya, nɛ dəw gə́ rara ɓa mbal neelé a koso dəa’g ndá a rədee naŋg mbə̰ji-mbə̰ji ya tɔ#21.44 Ta neeelé godo mee maktubje gə́ ləw gə́ na̰je..
45Loo gə́ mbai dɔ njékinjanéməsje-je gə Parisiḛje d’oo gosotaje neelé ndá deḛ gər gao to gə́ yeḛ pata neelé wɔji ne dɔ dee-deḛ ya. 46Deḛ saŋg rəw gə mba kwá gə ji dee peb nɛ deḛ ɓəl boo-dəwje mbata boo-dəwje neelé d’oo Jeju gə́ njetegginta gə́ gəd ya.
Currently Selected:
Matiyo 21: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
