Matiyo 20
20
Gosɔta gə́ wɔji dɔ njéndɔ-nduúje
1Ɓeeko̰ gə́ dara to asəna gə njekəi gə́ ḭta gə ndɔ rad aw iŋga njékulaje ɓar dee gə mba kɔm dee loo-ndɔ-nduú’g ləa. 2Yeḛ wɔji sə dee gə mba kar dee ŋgon larnda kára-kára mbata ndɔje kára-kára ndá deḛ ndigi səa to ɓa yeḛ ula dee ar dee d’aw loo-ndɔ-nduú’g ləa ɓəi. 3Yeḛ si waga ar kàr ḭ dege ndá ḭ tel teḛ raga, iŋga njé gə́ raŋg gə́ d’aar kari ba loo-nada lal ra kula. 4Yeḛ ula dee pana: Seḭje kara ɔd awje loo-ndɔ-nduú’g ləm ndá m’a kuga sí gə né gə́ kəm kuga sí ne gə goo rəbee ya. 5Deḛ d’ɔd d’aw keneŋ ya tɔ. Loo gə́ kàr aar daŋdɔ ndá yeḛ unda loo teḛ tɔɓəi, loo gə́ kàr tel rəa gə mbɔree lé kara yeḛ teḛ iŋga dəwje ula dee loo-ndɔ’g ləa to gə́ kédé lé tɔ. 6Loo gə́ kàr aar dɔ kam’g ler ndá yeḛ unda loo teḛ iŋga dəwje gə́ d’aar loo-nada dəji dee pana: See ban ɓa aarje loo gə́ nee’g gə ndɔ ba saar lal raje kula wa. 7Deḛ tel d’ilá keneŋ pana: Dəw kára kara ɓar sí gə mba kula sí el. Yeḛ ula dee pana: Bèe ndá seḭje kara ɔd awje loo-ndɔ-nduú’g ləm tɔ.
8Loo gə́ kàr andə mba̰ ndá njendɔ-nduú lé ɓar njekaa dɔ néje ləa ulá pana: Ɓar njékulaje lé ɓó gə uga dee, un kudee dɔ deḛ gə́ ree gogo’g lé ɓa teḛ ne dɔ deḛ gə́ ree kédé’g ɓəi#Ləb 19.13, TtG 24.15. 9Deḛ gə́ ree loo gə́ kàr aar dɔ kam’g ler lé d’iŋga ŋgon larnda kára-kára ya. 10Deḛ gə́ ree gə ndɔ rad ra kula lé meḛ dee to yel, ar dee d’ə̰ji ta meḛ dee’g pana: N’a kiŋgaje lar kunda mar neḛje ya, nɛ deḛ kara d’iŋga ŋgon larnda kára-kára ba ya tɔ. 11Loo gə́ deḛ d’iŋga mba̰ ndá deḛ jém ta gə ŋgan gwɔs dee, ndɔl ne mbai gə́ njekəi lé 12d’ulá pana: Deḛ gə́ ree ra kula goo sí’g gə kuree waga ba ya ɓəi gə́ i ar dee lar askəm dee, nɛ ban ɓa see jeḛ gə́ n’ree gə ndɔ rad ya n’ra kula saar-saar n’dao ləm, kàr kara ula sí ndubu yaa̰ nee ɓa ra sə sí bèe wa. 13Yeḛ tel ula dəw kára gə́ mbuna dee’g pana: Kuramarm, ma lé m’buguri gə́ buguru el, see jeḛ səi j’wɔji na̰ laree kédé am m’pana: M’a kari ŋgon larnda kára ba ya el wa. 14Bèe ndá taa né ləi jim’g ndá ɔd tam’g. Ma m’ndigi kar yeḛ gə́ ree gogo lé to gə́ m’ari-i bèe ya tɔ. 15See né gə́ m’wɔji məəm’g gə mba ra gə néje ləm lé see m’askəm ra el wa. See kəmi kas ŋgɔgərɔ dɔm’g mbata néram gə́ maji lé wa. 16Togə́bè ɓa deḛ gə́ goo loo gə́ gogo lé d’a kaw gə́ ŋgaw ta dee kédé, tɔɓəi deḛ gə́ d’aw gə́ ŋgaw ta dee kédé lé d’a tel to njé gə́ goo loo gə́ gogo tɔ#Mat 19.30, Mar 10.31, Lug 13.30.
Jeju pata kwəi ləa gə teḛ dɔkumbwa’g ləa kɔm gə́ gɔl munda
Mar 10.32-34, Lug 18.31-34
17Jeju si aw gə́ Jerusalem ndá yeḛ ɔr njékwakiláje gə́ dɔg-gir-dee-joo lé sa sə dee rəa rəw wɔji sə dee ta gə kag-rəw tar, ula dee pana: 18Aa ooje, kaw sí gə́ j’isi j’aw gə́ Jerusalem neelé d’a kwa Ŋgon-dəw kulá ji mbai dɔ njékinjanéməsje-je gə njéndaji-maktubje’g. D’a kɔm ta yoo dəa’g 19ndá d’a kulá ji njépole-magəje’g gə mba kar dee d’ula sul dəa’g ləm, gə kundá gə ndəi-kɔb ləma, gə ɗaree kaar kag’d ləm tɔ, nɛ ndɔ gə́ njekɔm’g munda ləa ndá yeḛ a kunda loo teḛ ya.
Né gə́ ko̰ Jakje gə Ja̰je kwɔi Jeju lé
Mar 10.35-45
20Yen ŋga ko̰ ŋgalə Jebede ree gə ŋganeeje pər gə́ rɔ Jeju’g unda barmba nea̰’g gə mba dəjee ta,
21Jeju tel dəjee pana: See ɗi ɓa i ndigi wa.
Dené lé ndigi təa’g pana: Aa oo, ŋganmje gə́ joo neelé nja ɓa ma m’ndigi kari ar yeḛ gə́ kára si dɔ jikɔli’g ləm, kára si dɔ jigeli’g ləm tɔ mee ɓeeko̰’g ləi gə́ dara lé.
22Jeju tel ila dee keneŋ pana: Né gə́ seḭ dəjimje lé seḭ gərje kilá el nja ɓəi. See seḭ asje kəm kaije né gə́ mee ŋgo-kai-mán gə́ m’a gə kai lé wa.
Deḛ ndigi ta Jeju’g pana: Jeḛ j’askəm kai ya.
23Jeju tel ila dee keneŋ pana: To tɔgərɔ ya, né gə́ mee ŋgo-kai-mán’g ləm lé seḭ a kaije ya nɛ ka̰ si dɔ jikɔlm’g gə dɔ jigelm’g lé ma ɓa gə́ njekar dəw el. Deḛ gə́ Bɔm nja wa dɔ gɔlee ar dee ɓa d’a kiŋga ɓəi.
24Ges dee gə́ dɔg lé loo gə́ d’oo ta nee ndá meḛ dee ḭ sə dee jugugu dɔ ŋgako̰ na̰je gə́ joo lé. 25Jeju ɓar dee ula dee pana: Seḭ gərje gao, njéko̰ɓeeje lə ginkoji dəwje gə raŋg lé d’o̰ dəwje d’ula ne kəm dee ndòo ləm, dəwje gə́ boo kara to dəw dɔ mar deeje ləm tɔ#Lug 22.25-26. 26Nɛ seḭ nja maji kar sí raje togə́bè mbuna na̰’d el. Nana ɓa mbuna sí’g ndigi kur dɔ sí’g lai ndá maji karee tel rəa gə́ ŋgonjelookisi lə sí ləm#Mat 23.11, Mar 9.35. 27Nana ɓa ndigi to ŋgaw ta sí kédé ndá maji karee ra rəa gə́ ɓər lə sí ləm tɔ. 28Yee gə́ bèe ɓa Ŋgon-dəw ree ne naŋg nee mba ra ne né kar dəwje gə́ dɔ naŋg nee ɓó gə mba kar dəwje gə́ dɔ naŋg nee ɓa ra né d’aree el. Yeḛ ree gə mba kila rəa kɔ gə́ nékoga dɔ dəwje bula ya.
Jeju ar njékəmtɔje joo d’oo loo
Mar 10.46-52, Lug 18.35-43
29Loo gə́ deḛ d’ḭ Jeriko d’unda loo teḛ ndá boo-dəwje gə́ bula digi-digi ndɔm na̰ goo Jeju’g. 30Aa ooje, njékəmtɔje joo gə́ d’isi dɔ ji rəw’g lé loo gə́ d’oo Jeju a gə dəs ndá deḛ naa ndia wəl pana: Mbaidɔmbaije, ŋgon Dabid, oo kəm sí lootondoo’g ya kari.
31Boo-dəwje lé d’ɔm ta dee dɔ dee’g gə mba kar dee d’əw rɔ dee nɛ deḛ d’ila boo-ndu dee naŋg ra ne d’aree al dɔ loo sula, deḛ pana: Mbaidɔmbaije, ŋgon Dabid, oo kəm sí lootondoo’g ya kari.
32Jeju ɔs gɔlee gèŋ aar naŋg ɓar dee dəji dee pana: See ɗi ɓa seḭ ndigije kam m’ra m’ar sí wa.
33Deḛ tel d’ilá keneŋ pana: Mbaidɔmbaije, maji kari ar kəm sí inja bərəŋ ya.
34Yen ŋga mee Jeju tɔsee gə no̰ mbigi-mbigi aree ila jia kəm dee’g ndá léegəneeya, kəm dee inja bərəŋ ar dee d’oo ne loo ɓa d’ɔm na̰ gée’g d’aw ɓəi.
Currently Selected:
Matiyo 20: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
