Matiyo 17

Loo gə́ dɔ mbal’g lé rɔ Jeju tel ndɔḭ wər-wər

Mar 9.2-13, Lug 9.28-36

1Ndɔ misa̰ gogo, Jeju ɔr Piɛrə, gə Jak gə Ja̰ gə́ to ŋgokea̰ njɔl sa sə dee rəa aw sə dee dɔ mbal gə́ ŋgal léŋgé-léŋgé’g. 2Rea tel ndɔḭ ar ŋgo nea̰ gə kwɔji kəmee ndɔḭ wər-wər asəna gə kàr ləm, kubuje ləa kara tel ndá ɔr njɔl-njɔl ləm tɔ. 3Tɔɓəi Moyis gə Eli teḛ kəm dee’g wai d’aar d’wɔji səa ta. 4Yen ŋga Piɛrə un ta ula Jeju pana: Mbai, maji kar sí j’isi loo gə́ nee’g, ɓó lé i ndigi ndá m’a la kəi-kubuje munda, kára a to kaḭ, kára a to ka̰ Moyis, kára a to ka̰ Eli tɔ.

5Ta gə́ pa nai təa’g ɓəi ndá mum ree liriri dəb dɔ dee’g rigim ar ndu dəw ɓar mee mum’g neelé wəl pana: Yeḛ neelé to Ŋgonəm gə́ gəd-gəd gə́ m’undá dan kəm’g gə́ taa kəm rəgm ya. Taaje ta təa’g#Gn 22.2, TtG 18.15, Pak 2.7, Esa 42.1, Mat 3.17, 12.18, Mar 1.11, Lug 3.22, 2Pi 1.17-18.

6Loo gə́ d’oo ndu dəw gə́ ɓar neelé ndá njékwakiláje d’unda naŋg mburug dəb kəm dee naŋg ɓəl ndəb ne pəd-pəd. 7Nɛ Jeju ree pər gə́ rɔ dee’g ula dee yəgə-yəgə pana: Ɓəlje el, ḭje ta.

8D’ɔr dɔ dee tar ɓad-ɓad ndá d’oo Jeju nja gə karee ba.

9Loo gə́ deḛ d’ḭ dɔ mbal’g risi d’uru naŋg ndá Jeju un ndia ar dee pana: Né gə́ seḭ ooje lé areeje teḛ ta sí’g ja̰ ar dəw oo el saar kar ndɔ gə́ Ŋgon-dəw a kunda loo yoo teḛ.

10Njékwakiláje d’un ta nee dəjee pana: See gə mba ɗi ɓa njéndaji-maktubje pana, Eli ɓa a ree kédé doŋgɔr wa.

11Yeḛ tel ila dee keneŋ pana: Tɔgərɔ ya, Eli a ree kédé gə mba gɔl néje lai karee to lée’g nja. 12Nɛ ma nja m’ula sí, Eli lé ree mba̰, nɛ deḛ gəree el ləm, deḛ ra səa né to gə́ meḛ dee ndigi ləm tɔ. Ŋgon-dəw lé nja kara d’a ra səa néurti togə́bè tɔ#Mat 11.14.

13Yee ɓa njékwakiláje gər to gə́ pata neelé wɔji ne dɔ Ja̰ Njera-batɛm.

Jeju aji ŋgon gə́ ndil gə́ yèr to mée’g

Mar 9.14-29, Lug 9.37-43a

14Loo gə́ nai dəb mba kar dee teḛ mbɔr koso-dəwje’g ndá diŋgam kára ree unda barmba naŋg no̰ Jeju’g ulá pana: 15Mbai, oo kəm ŋgonəm lootondoo’g ya kari, rɔko̰ jimkil ulá ndubu aree ḭ toso pər’d gɔl bula-bula ləm, aree aḭ toso mán gɔl bula-bula ləm tɔ. 16M’ndɔree m’ree səa m’ar njékwakilaije nɛ loo kajee dum dee təs.

17Jeju ilá keneŋ pana, seḭ ginkoji dəwje gə́ njéndɔjitaje ləm, gə mbim-oo-ta-elje ləm tɔ lé see m’a si sə sí ndɔm ka̰da tɔɓəi wa. Esé see ndɔ gə́ ra ɓa rɔm a kasm dɔ sí’g ɓəi wa. Ndɔreeje gə́ rɔm’g nee.

18Jeju wa ta ndil gə́ yèr neelé aree teḛ mee ŋgon’g lé. Mee kàree’g neelé nja rɔ ŋgon lé to kari péd-péd tɔ.

19Njékwakila Jejuje rəm pər gə́ rəa’g pata wédé-wédé dəjee pana: See ban ɓa jeḛ j’askəm tuba ndil gə́ yèr neelé el wa.

20Jeju ila dee keneŋ pana: To mbata meekun lə sí gə́ əḭ el lé ɓa seḭ asjekəm raje ne né gə́ togə́bè el. Ma m’ula sí təsərə, ɓó lé meekun lə sí to asəna gə kandə né gə́ yəm-yəm bèe ndá seḭ a kulaje mbal neelé pana: Un rɔi unda gə́ yo bèe ndá léegəneeya, yee a kun rəa kunda gə́ yo ya tɔ. Né kára kara a dum sí el#Mat 21.21, Mar 11.23, 1Kɔr 13.2. 21#17.21 Ta neelé godo mee maktubje gə́ ləw gə́ na̰je’g.Ndil gə́ yèr gə́ togə́bè lé tamaji gə́ ra lé gə kɔg-mee-ɓoo ɓa a teḛ ne.

Jeju pata kwəi ləa gə kunda loo teḛ ləa

Mar 9.30-32, Lug 9.43b-45

22Loo gə́ deḛ d’unda mee ɓee gə́ Galile gaŋg ndá Jeju ula dee pana: Ŋgon-dəw lé d’a kulá ji dəwje’g, 23d’a tɔlee nɛ ndɔ munda ndá yeḛ a kunda loo teḛ. Meeko̰ lə dee al ne dɔ loo sula ya.

Jeju uga lar-gədɓee

24Loo gə́ deḛ teḛ Kapernawum ndá deḛ gə́ taa lar-gədɓee gə́ kəm ŋgan larnda joo-joo lé dar Piɛrə bus dəjee pana: See ɓéije a kuga lar-gədɓee gə́ kəm ŋgan larnda joo-joo lé el wa#Tr 30.13, 38.26. 25Piɛrə ilá keneŋ pana: Oiyo, a kuga ya.

Loo gə́ d’andə kəi ndá Jeju ɓar Piɛrə dəjee pana: Simo̰, see gə́ məəi’g banwa. See mbaije gə́ dɔ naŋg neelé see deḛ taa lar-gədɓee əsé né dɔ naŋgje ji na̰je wa. See taa ji ŋgan meḛ deeje əsé ji njékwagirlooje’g wa.

26Piɛrə ilá keneŋ pana: Deḛ gə́ to gə́ njékwagirlooje ɓa deḛ taa ji dee’g ya. Jeju ilá keneŋ pana: Bèe ndá ŋgan meḛ deeje lé d’ɔr kəm dee d’ya̰ dee. 27Nɛ gə mba kila dee kag el ndá ɔd aw ta baa-boo’g ila ki ɓa ka̰ji gə́ un ki dɔtar ya ndá wá ndɔree ilá ɗaga, njia̰ təa ndá a kiŋga lar gə́ nda keneŋ kára ndá un ar dee mbata ləm-ma ləm, gə mbata ləi ləm tɔ joo bɔr ya.

Currently Selected:

Matiyo 17: SBA2015

Highlight

Copy