Matiyo 18

See na̰ ɓa ur dɔ mareeje’g wa

Mar 9.33-37, Lug 9.46-48

1Mee kàree’g neelé njékwakila Jejuje rəm wɔr gə́ rəa’g dəjee pana: See na̰ ɓa a to njekur dɔ maree’g mee ɓeeko̰ gə́ dara wa#Lug 22.24.

2Jeju ɓar ŋgon gə́ gɔ bèe aree aar tar dan dee’g 3ula dee ne pana: Ma m’ula sí təsərə, ɓó lé seḭ ɔsje badm telje el ləm, a kosoje kas asəna gə ŋganje gə́ gɔ el ləm tɔ ndá seḭ a kulaje dɔ sí ɓeeko̰ gə́ dara lé wɔr el#Mar 10.15, Lug 18.17. 4Togə́bè ɓa nana ɓa gə́ a kula dəa asəna gə ŋgon gə́ gɔ neelé ndá yeḛ neelé a to njekur dɔ maree’g mee ɓeeko̰ gə́ dara ya. 5Nana ɓa gə́ wa ŋgon gə́ gɔ gə́ togə́bè gə́ rəa’g gə rim-ma ndá ma nja wam gə́ rəa’g kən.

Kaiya lé to ta gə́ boo

Mar 9.42-48, Lug 17.1-2

6Nɛ nana ɓa gə́ ər ŋgon gə́ gɔ gə́ mbuna mareeje gə́ d’ɔm meḛ dee dɔm’g neelé ilá dan kaiya’g ndá tɔ biri mbal gwɔs debee gə́ neelé kunee kilá ŋgɔrəw-baa’g, maji unda karee si kəmba ya. 7Némeeko̰ a ra dəwje dɔ naŋg nee mbata némeekɔsgelje lə dee. Lé riri kara némeekɔsgelje lé d’a to ya nɛ meeko̰ a ndər di-di dɔ njekunda ginee’g.

8Ɓó lé jii əsé gɔli ɓa odi loo-kaiya’g kɔrəm ndá inja badə gaŋg unda piriŋ ila kɔ, aw gə jii dum əsé məd-dəw gə́ loo gə́ a si gə kəmə keneŋ lé maji unda kaw gə jii bɔr əsé gɔli bɔr kar dee d’wai d’ilai dan pər gə́ a ko̰ bilim-bilim gə no̰ lé#Mat 5.30. 9Ɓó lé kəmi ɓa a kɔdi dan kaiya’g ndá ɔr unda piriŋ ila kɔ, aw gə kəmi kára ba gə́ loo gə́ a si gə kəmə keneŋ lé maji unda kar dee d’wai gə kəmi bɔr d’ilai ne dan pər gehene’g#Mat 5.29.

Gosɔta gə́ wɔji dɔ badə gə́ ndəm igi nɛ d’iŋgá

Lug 15.3-7

10Meḛ sí dɔ rɔ sí’g nà seḭ a kulaje sul dɔ ŋgon kára gə́ mbuna mareeje’g neelé mbata ma m’ula sí təsərə, kuraje lə dee gə́ dara d’aar nderəm ta Bɔm gə́ si dara lé. 11Mbata Ŋgon-dəw lé ree gə mba saŋg yeḛ gə́ ndəm igi mba karee aji#Lug 19.10#18.11 Ta neelé godo mee maktubje gə́ ləw gə́ na̰je’g.. 12Gə́ meḛ sí-seḭ’g banwa. Ɓó lé dəw to njebadje gə́ tɔl nɛ yeḛ gə́ kára ndəm igi lé see a kya̰ deḛ gə́ rɔ-jinaikara-gir-dee-jinaikara dɔ mbal’g mba kaw ndolè yeḛ gə́ ndəm igi lé el wa. 13Ma m’ula sí təsərə, loo gə́ iŋgá mba̰ ndá a karee rɔlel yaa̰ unda deḛ gə́ rɔ-jinaikara-gir-dee-jinaikara gə́ d’igi el lé. 14Togə́bè ɓa Bɔ síje gə́ si dara lé wɔji-kwɔji kar ŋgon kára kara mbuna mareeje’g neelé ndəm igi el tɔ.

Gɔlje ta lə sí gə goo rəbee

15Ɓó lé mari ra səi né gə́ majel ndá aw rəa’g ar sí-seḭ səa joo ba tɔjee goo némajel gə́ yeḛ ra səi. Ɓó lé yeḛ oo ta ləi ndá i iŋga ŋgokɔḭ mba̰#Lug 17.3. 16Nɛ ɓó lé yeḛ oo ta ləi el ndá maji kari ɔr dəwje joo əsé munda jén ɓó gə mba gɔl taree neelé kəm njékɔrgootaje gə́ joo əsé munda tɔ#TtG 19.15. 17Ɓó lé yeḛ mbad koo ta lə dee ndá maji kari aw ula églisə taree. Ɓó lé yeḛ mbad koo ta lə églisə tɔɓəi ndá maji kar dee d’ée gə́ njetar-Ala ləm, gə njetaa lar-gədɓee ba ləm tɔ. 18Ma m’ula sí təsərə, né gə́ rara ɓa gə́ seḭ a tɔje dɔ naŋg nee kara d’a tɔ dara ləm, né gə́ rara ɓa gə́ seḭ a tuduje dɔ naŋg nee ndá kara d’a tudu dara tɔ#Mat 16.19, Ja̰ 20.23.

19Ma m’ula sí tɔɓəi, ɓó lé dəwje joo mbuna sí’g d’ɔm meḛ dee na̰’d sad mba dəji Ala né gə́ ban-ban kara Bɔm gə́ si dara a kar dee ya. 20Mbata loo gə́ dəwje joo əsé munda d’wa dɔ na̰ gə rim-ma ndá ma nja m’aar mbuna dee’g ya.

Gosɔta gə́ wɔji dɔ kura gə́ ar mée oso lemsé dɔ maree’g el lé

21Yen ŋga Piɛrə rəm pər gə́ rəa’g dəjee pana: Mbaidɔmbaije, see loo gə́ ŋgokɔm ra səm majel ndá see gɔl ka̰da ɓa m’a kar məəm oso lemsé dəa’g wa. See saar gɔl siri wa#Lug 17.3-4.

22Jeju ilá keneŋ pana: Gɔl siri ba el, nɛ saar rɔ-siri-siri gɔl siri. 23Gelee gə́ nee ɓa ɓeeko̰ gə́ dara to asəna gə mbai gə́ ndigi tura goo néje gə́ yeḛ ɔm ji kuraje’g ləa. 24Loo gə́ yeḛ un kudu tura goo néje neelé ndá deḛ ree gə kura ləa gə́ kára gə́ ɓaŋg lar ləa to dəa’g ŋgan larlɔr tɔl-dɔg-loo-dɔg. 25Nékoga ɓaŋgee dəa’g godo ndá ɓéeje un ndia ar dee gə mba kar dee d’wa darəa-yeḛ gə dené ləa gə ŋganeeje gə néje ləa lɔd ndogo dee mba kya̰ laree kuga ne ɓaŋgee. 26Kura neelé oso naŋg bəbərə dəb kəmee naŋg nea̰’g ra ndòo rəa’g pana: Mbai, ar məəi oso lemsé dɔm’g ndá m’a kuga ɓaŋg ləi ŋgər-ŋgər ɓəi. 27Yen ŋga mbai lə kura neelé mée tɔsee gə no̰ mbigi-mbigi aree ḭ ɔr ne ɓaŋg neelé dəa’g gə́ kɔr, yá̰ aree ɔd aw loo ləa.

28Kura ləa neelé loo gə́ yeḛ teḛ ɗaga ndá yeḛ dar baokura ləa kára gə́ ɓaŋg ləa to dəa’g ŋgan lar gə́ ndá tɔl lé bus ndá ubá ndɔree wá kègègè ulá pana: Ugam ɓaŋg ləm gə́ to dɔi’g lé. 29Baokura ləa rəm bəbərə oso naŋg gɔlee’g ra ndòo rəa’g pana: Ar məəi oso lemsé dɔm’g ndá m’a kogai ɓaŋg ləi ya ɓəi. 30Nɛ yeḛ un kəmee rəw, wá aw səa ilá daŋgai’g saar mba karee uga ɓaŋgee ŋgər-ŋgər. 31Kuramareeje d’oo né gə́ yeḛ ra neelé ndá meeko̰ lə dee al dɔ dee sula, ar dee d’aw ndaji ta néje lai gə́ teḛ neelé d’ar ɓée deeje oo tɔ. 32Yen ŋga mbai ləa ɓaree aree ree ulá pana: I to kura gə́ yèr. M’ɔr ɓaŋg ləm dɔi’g gə lée ba moŋgoŋgo̰ mbata i ra ndòo rɔm’g ɓa m’ra səi togə́bè. 33See i yḛ̀ gər koo kəmtondoo lə mari to gə́ ma m’oo ne kəmtondoo kaḭ bèe lé el wa. 34Mee ɓéeje ḭ səa jugugu, aree wá ulá ji njégaŋ-rəwtaje’g ar dee d’ilá daŋgai’g saar mba karee uga ɓaŋg gə́ to dəa’g lé ŋgər-ŋgər ya tɔ.

35Togə́bè ɓa ɓó lé nana ɓa mbuna sí’g a kar mée oso lemsé gə meendakaḭ dɔ ŋgokea̰’g el ndá Bɔm gə́ si dara lé a ra səa né togə́bè tɔ.

Currently Selected:

Matiyo 18: SBA2015

Highlight

Copy