Matiyo 16
16
Parisiḛje gə Saduseḛje dəji Jeju némɔri
Mar 8.11-13, Lug 12.54-56
1Parisiḛje gə Saduseḛje ree rɔ Jeju’g dəjee gə mba ndo̰ ne təa kaḭ ne mée pana: Ar sí j’ooje némɔri gə́ ḭ dara lé#Mat 12.38, Lug 11.16. 2Jeju ila dee keneŋ pana: Loo gə́ kàr andə mba̰ ndá seḭ pajena: Loo to maji mbata dara tel kas, bèlè ndá loo a sa rəw. 3Nɛ loo gə́ kàr uba gə ndɔ ɓa dara lé pélé na̰ kas gə ndul ndá seḭ pajena: Ɓogənè ko̰ mán a kər. Dara ɓa seḭ gərje go̰je ne né gə́ to keneŋ nɛ néje gə́ a gə ree gə́ tɔji sí ndəa lé seḭ gərje go̰je el ya. 4Ginka dəwje gə́ njémeeyèrje gə njémɔdkaiyaje lé dəjim gə mba koo némɔri nɛ ka̰ Junas ɓa d’a koo ɓó d’a koo némɔri gə́ raŋg el.
Tɔɓəi yeḛ uba dee ya̰ dee, ɔd aw loo ləa#Mat 12.39, Lug 11.29.
Né gə́ ar nduji ti ka̰ Parisiḛje gə Saduseḛje lé
Mar 8.14-21
5Loo gə́ njékwakiláje teḛ turá mba̰ ndá meḛ dee olé dɔ pil muru gə́ d’ya̰ naŋg lé. 6Jeju ula dee pana: Aaje rɔ sí kər-kər dɔ né gə́ ar nduji ti ka̰ Parisiḛje gə Saduseḛje lé#Lug 12.1.
7Njékwakiláje d’ula na̰ ta pana: Pil muru gə́ j’ya̰ naŋg lé un ɓa pa ne sə sí gə mbəa.
8Jeju gər takə̰ji lə dee gao ndá ila dee keneŋ pana: Seḭ gə́ meekun lə sí əḭ el lé see ban ɓa ə̰jije ta meḛ sí’g pajena: Pil muru gə́ seḭ ya̰je naŋg ɓa m’pa ne sə sí wa. 9See kəm sí inja el nja dɔrɔ ɓəi wa. Pil muru gə́ mi gə́ ma m’kai dəwje tɔl-dɔg-loo-mi lé see meḛ sí olé dɔ’g el wa. See odoje gesee gə́ nai as budu ka̰da wa#Mat 14.17-21. 10Esé pil muru gə́ siri gə́ ma m’kai dəwje tɔl-dɔg-loo-sɔ lé see meḛ sí olé dɔ’g el wa. See gesee gə́ nai lé see odoje budu ka̰da wa#Mat 15.34-38. 11Ta gə́ m’ula sí lé wɔji dɔ pil muru el. See ban ɓa kəm sí inja dɔ’g el nja dɔrɔ ɓəi wa. Aaje rɔ sí kər-kər dɔ né gə́ ar nduji ti gə́ ka̰ Parisiḛje gə Saduseḛje lé.
12Togə́bè ɓa deḛ gər gao ta gə́ yeḛ pa lé wɔji dɔ ta gə́ Parisiḛje gə Saduseḛje ndoo dəwje ɓó wɔji dɔ né gə́ ar nduji ti lé el.
Jeju to Kristi Ŋgon-Ala ya
Mar 8.27-30, Lug 9.18-21
13Loo gə́ Jeju teḛ Sejare gə́ wɔji dɔ Pilibə ndá yeḛ dəji njékwakiláje pana: See ta ɗi ɓa dəwje pa dɔm’g wa. Ma gə m’to gə́ Ŋgon-dəw lé see deḛ d’oom gə́ dəw gə́ banwa.
14Deḛ tel d’ilá keneŋ pana: Njé gə́ na̰je d’ooi gə́ Ja̰ Njera-batɛm, njé gə́ na̰je pana: I to Eli, ar njé gə́ na̰je kara pana: I to Jeremi əsé njetegginta lé ɓa#Mat 14.1-2, Mar 6.14-15, Lug 9.7-8.
15Jeju tel dəji dee pana: Ŋga see seḭ paje ka̰ sí-seḭ banwa. See seḭ oomje gə́ dəw gə́ banwa.
16Simo̰ Piɛrə ilá keneŋ pana: I to Kristi gə́ to Ŋgon-Ala gə́ Njesikəmba lé nja#Ja̰ 6.68-69.
17Jeju ulá pana: Simo̰, ŋgon Junas, dɔi ai səgərə, mbata darɔ dəw əsé məs dəw ɓa ar kəmi inja dɔ né gə́ neelé el nɛ Bɔm gə́ si dara ɓa riba səi dəa bèe. 18Ma nja m’ulai təsərə: I to Piɛrə, dɔ mbal neelé m’a rɔd Eglisə ləm dɔ’g. Lé riri gə́ a gə teḛ gə tarəw gə́ ɓee lə yoo kara a koma̰ səa pi ya. 19M’a kari nékɔr tarəw ɓeeko̰ gə́ dara. Néje lai gə́ i a kɔg dee dɔ’g dɔ naŋg nee ndá a to né gə́ d’ɔg dee dɔ’g dara ya tɔ. Néje lai gə́ i a kun ndui kar dee ra dɔ naŋg nee ndá a to né gə́ d’a kun ndu dee kar dee ra dara tɔ#Mat 18.18, Ja̰ 20.23.
20Yen ɓa yeḛ ndəji njékwakiláje bər-bər gə mba kar dee d’ula dəw kára kara pana: To Kristi lé ya bèe el.
Jeju pata kwəi ləa gə ta teḛ dɔkumbwa’g ləa
Mar 8.31–9.1, Lug 9.22-27
21Ndəa neelé Jeju un kudu tɔji njékwakiláje ta pana: Ŋgatɔgje ləm, gə mbai dɔ njékinjanéməsje-je ləma, gə njéndaji-maktubje ləm tɔ lé d’a ra sə neḛ néurti kar neḛ n’wəi ndá ndɔ munda ɓa n’a kunda loo teḛ ɓəi. Yee gə́ bèe ɓa gə́ kuma̰ gə́ n’a gə kḭ kaw ne Jerusalem ya.
22Piɛrə ɔr Jeju njɔl aar səa ŋgərəŋ pa səa ta ɔgee dɔ’g pana: Né neelé a teḛ dɔi’g ra wa. Mbaidɔmbaije, maji kar Ala lé ɔgi dɔ’g ya.
23Nɛ Jeju tel ila Piɛrə’g pana: Njekurai, ɔd gə́ gogo. Tapai a gə kilam kag, mbata takə̰ji ləi to ka̰ dəwje ɓó to ka̰ Ala el.
24Yen ŋga Jeju ula njékwakiláje pana: Nana ɓa gə́ ndigi kaw goom’g ndá maji karee ya̰ rəa yag ləm, a kun kag-dəs ləa-yeḛ nja kodo ləm tɔ ɓa a kaw ne goom’g ɓəi#Mat 10.38, Lug 14.27. 25Yeḛ gə́ ndigi kaji rəa ndá yeḛ neelé rəa a kigi yɔm ɓəi nɛ yeḛ gə́ ya̰ rəa yag mbata ləm-ma ndá a lal kiŋga rəa el#Mat 10.39, Lug 17.33, Ja̰ 12.25. 26Lé dəw a kiŋga nékiŋgaje gə́ dɔ naŋg nee lai ya nɛ kankəmrea igi yɔm ndá see nékiŋga ɓa nee wa. Esé see ɗi ɓa dəw neelé a kun kuga ne kankəmrea taa wa. 27Mbata Ŋgon-dəw lé a ree gə kuraje ləa gə́ dara na̰’d gə rɔnduba gə́ bɔbeeje a kula dəa’g. Ndəa neelé yeḛ a kuga nana kara gə goo kula rəa-rəa ya#Mat 25.31, Pak 62.13, Rɔm 2.6. 28Ma m’ula sí təsərə, njé gə́ na̰je mbuna deḛ gə́ d’isi neelé d’a kwəi el nja ɓəi ɓa d’a koo Ŋgon-dəw ree asəna gə mbai bèe gə kəm dee.
Currently Selected:
Matiyo 16: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
