Matiyo 15

Né gə́ àr gə́ né gə́ mina̰

Mar 7.1-13

1Parisiḛje deḛ gə njéndaji-maktubje d’ḭ Jerusalem ree rɔ Jeju’g dəjee pana: 2See gə mba ɗi ɓa njékwakilaije d’al dɔ néjiɓee lə ŋgatɔgje wa. Mbata loo gə́ d’a gə ko̰ muru ndá togo ji dee el.

3Yeḛ ila dee keneŋ pana: Ŋga see ban ɓa seḭ raje néjiɓee lə sí alje ne dɔ godndu Ala lé ɓəi wa. 4Mbata Ala lé pana: Təd kag bɔbije gə kɔinje. Tɔɓəi dəw gə́ a kɔr gə bɔbeeje əsé kea̰je ndá debee neelé kəm tɔlee gə́ tɔl ya#Tr 20.12, 21.17, TtG 5.16, Ləb 20.9. 5Nɛ seḭ lé seḭ pajena: Yeḛ gə́ a kula bɔbeeje əsé kea̰je pana: Né gə́ i aw ndée ɓa m’a gə kari ya nɛ m’un gə́ kédé m’ar Ala lé mba̰. Ŋgon pa togə́bè lé seḭ ɔrje kəmee ɔgeeje kila riɓar dɔ bɔbeeje’g gə kea̰je’g tɔ. 6Seḭ nja unje néjiɓee lə sí tujije ne ta lə Ala lé pugudu. 7Seḭ njétədtaje, ta gə́ Esai pa wɔji ne dɔ sí lé to lée’g ya mbata yeḛ pana:

8Koso-dəwje neelé ta dee ɓa deḛ təd ne kagm,

Nɛ meḛ dee nai səm əw#Esa 29.13.

9Deḛ tədkagm gə mḭdé-mḭdé ba

Ndoo dee ne ndukunje gə́ to gə́ torndu dəwje ba.

Néje gə́ ar dəw mina̰ ne lé

Mar 7.14-23

10Yen ɓa yeḛ ɓar boo-dəwje gə́ rəa’g lé ula dee pana: Undaje mbi sí ooje ne ta nee ɓó gə gərje gosee. 11Né gə́ ḭ mee dəw’g teḛ təa’g ɓa a karee mina̰ ne ɓó né gə́ ḭ ta dəw’g aw mée’g ndá a karee mina̰ ne el.

12Yen ŋga njékwakila Jejuje rəm pər gə́ rəa’g dəjee pana: Tapai gə́ togə́bè gə́ Parisiḛje d’oo lé ila dee kag nɛ see i gər el wa.

13Yeḛ ila dee keneŋ pana: Néje gə́ ma̰a lé yee gə́ ra ɓa Bɔm ma̰a el kara d’a tɔr gə ŋgira ɓɔgədɔ-ɓɔgədɔ kɔm kɔ ya. 14Maji kar sí ya̰ deeje. Deḛ to njékəmtɔje gə́ d’ula kag ji na̰’d. Ɓó lé njekəmtɔ a ndɔr njekəmtɔ maree ndá deḛ joo bɔr d’a koso godə-bwa’g ya#Lug 6.39.

15Piɛrə un ta ulá pana: Gosɔta neelé ria sə sí dəa ar sí j’oo ba.

16Jeju ila dee keneŋ pana: See seḭje kara kəm sí inja el nja dɔrɔ ɓəi wa. 17Né gə́ ḭ ta dəw’g aw mée’g lé tel né gə́ majel aree ɓugu loo-ŋgəḭ’g walá. See ooje njai el wa. 18Nɛ né gə́ ḭ mee dəw’g teḛ təa gə́ raga lé yee ɓa ar dəw mina̰ ne jɔmri-jɔmri#Mat 12.14. 19Mbata takə̰ji gə́ majel ləm, gə tɔl gə́ dəw tɔl maree ləm, gə mɔdkaiya ləm, gə kaw gə́ balgogé ləm, gə ɓogo ləm, gə ta gə́ kɔr gaŋg dəa badə-badə ləma, gə tɔr maji rɔ mari’g rɔd-rɔd ləm tɔ lé to néje d’ḭ mee dəw’g gə́ kəi. 20Néje lai neelé ɓa gə́ néje gə́ ar dəw mina̰ ne jɔmri-jɔmri ɓó sɔ né lal togo ji ɓa gə́ né gə́ ar dəw mina̰ ne el.

Jeju aji ŋgolə dené gə́ Kana̰

Mar 7.24-30

21Jeju ḭ keneŋ aw kəmee gə́ Tir gə Sido̰. 22Dené gə́ ḭ ɓee gə́ Kana̰ lé dar Jeju bus ndá yeḛ ra ne wəl pana: Mbaidɔmbaije, ŋgon Dabid, oo kəm lootondoo’g ya kari. Ŋgonəm gə́ dené lé ndil gə́ yèr ula kəmee ndòo yaa̰.

23Jeju teḛ təa ja̰ el. Njékwakiláje rəm pər gə́ rəa’g d’ɔs kudee ɓɔḭ-ɓɔḭ pana: Tubá aree aw, mbata yeḛ uru kii goo sí’g pénéné-pénéné boi.

24Jeju ila dee keneŋ pana: D’ulam ɓee lə Israɛlje mbata ŋgan badje gə́ ndəm keneŋ ba.

25Nɛ dené lé ŋgəs gə́ rəa’g unda barmba dəb kəmee naŋg nea̰’g pana: Mbaidɔmbaije, la səm ya kari.

26Jeju ilá keneŋ pana: Maji kun tudu muru lə ŋganje kila naŋg kar ŋgan bisije el.

27Dené lé tel ilá keneŋ pana: Oiyo, Mbaidɔmbaije, nɛ ŋgan bisije lé d’usɔ bum muru lə ɓée deeje gə́ ɔm naŋg gin ka nésɔ’g ɓa

28Yen ŋga Jeju tel ila dené’g lé pana: Ah! dené, meekun ləi al dɔ loo sula, taa né gə́ i ndiŋga lé ari ya.

Léegəneeya, rɔ ŋgonee lé tel to kari péd-péd tɔ.

Njérɔko̰je bula d’aji Galile

29Jeju ḭ keneŋ aw gə́ kəmee gə́ par gə́ ta baa-boo gə́ Galile. Yeḛ tuga dɔ mbal aw si keneŋ. 30Yen ɓaa boo-dəwje gə́ bula digi-digi rəm pər gə́ rəa’g. Deḛ ree gə njémədje ləm, gə njékəmtɔje ləm, gə njégwɔskuduje ləm, gə deḛ gə́ dəb rɔ dee wəi wɔ-wɔ ləma, gə njérɔko̰je gə́ gə ria-ria ləm tɔ. D’odo dee d’ɔm dee naŋg gɔl Jeju’g rib-rib ndá yeḛ aji dee tɔ. 31Boo-dəwje d’ila ji dee ta dee’g sud mbata deḛ d’oo njégwɔskuduje pata njai-njai ləm, deḛ gə́ dəb rɔ dee wəi wɔ-wɔ kara rɔ dee kila kɔd-kɔd ləm, njémədje kara d’aw tar njam-njam ləma, njékəmtɔje nja kara d’oo loo njai-njai ləm tɔ. Bèe ɓa boo-dəwje neelé d’ula ne rɔnduba dɔ Ala’g lə Israɛlje lé tɔ.

Jeju ar muru ḭ dɔ maree’g gə́ kédé-kédé

32Jeju ɓar njékwakiláje ula dee pana: Meem tɔsəm gə no̰ mbigi-mbigi mbata lə boo-dəwje neelé. Mbata as ndɔ munda d’ya̰’m d’aw raŋg el nja saar ndá nésɔ dee godo ŋga. Ma m’ndigi kya̰ dee kar dee d’aw meḛ dee ɓoo el nà d’a guru rəbə.

33Njékwakiláje dəjee pana, Ŋga loo gə́ neelé to dɔdilaloo’g gə mḭdé ba nɛ see loo gə́ ra ɓa j’a kiŋga muru gə́ kəm karee as boo-dəwje neelé keneŋ wa.

34Jeju dəji dee pana: See pil muru ka̰da ɓa to ji sí’g wa.

D’ilá keneŋ pana: Yee siri gə ŋgan ka̰jije gə́ na̰je ɓa to ji sí’g nee.

35Yeḛ ula boo-dəwje ar dee d’isi naŋg. 36Tɔɓəi yeḛ taa pil muru gə́ siri lé gə ka̰jije lé tɔ. Loo gə́ yeḛ ra Ala oiyo mba̰ ndá yeḛ wa təd dana ar njékwakiláje gə mba kar dee kai boo-dəwje lé. 37Deḛ lai d’o̰ d’ar meḛ dee ndan tub-tub ar gesee gə́ nai lé d’odo budu siri. 38Deḛ gə́ d’o̰ muru neelé d’aḭ dəwje tɔl-dɔg-loo-sɔ, lal tura denéje gə ŋganje, diŋgamje ya lai ɓa tura dee togə́bè. 39Loo gə́ yeḛ ula boo-dəwje lé ar dee sanéna̰ tel d’aw ɓéeje lə dee mba̰ ndá yeḛ uru mee to’g aw gə́ kəmee gə́ Magada̰.

Currently Selected:

Matiyo 15: SBA2015

Highlight

Copy