Matiyo 14

Kwəi lə Ja̰ Njera-batɛm

Mar 6.14-29, Lug 9.7-9

1Mee ndəa’g neelé Herɔdə, yeḛ gə́ to njeguburuɓee lé oo no̰ Jeju lé ndá ula kuraje ləa pana: 2To Ja̰ Njera-batɛm ɓa teḛ dan njé gə́ d’wəi’g, yee ɓa ra ne némɔrije ɓəd-ɓəd.

3Mbata Herɔdə lé taa ta lə Herodias, dené lə ŋgokea̰ Pilibə wa ne Ja̰ teá ne ndər-ndər ilá ne daŋgai’g duu-loo’g#Lug 3.19-20. 4Mbata Ja̰ ula Herɔdə pana: To dené gə́ kəm karee-yeḛ təa el#Ləb 18.16, 20.21.

5Herɔdə lé ndigi tɔl Ja̰ gə́ tɔl ya nɛ yeḛ ɓəl koso-dəwje gə́ d’ée gə́ njetegginta lé.

6Nɛ loo gə́ deḛ ra naḭ ləb koji Herɔdə lé ndá ŋgon Herodias gə́ ma̰də uba là dan njéndamje’g aree uru mee Herɔdə’g ndá léegəneeya, yeḛ ubu rəa aree pana: 7Né gə́ ban-ban ɓa lé dəji neḛ kara n’a karee ya. 8Ŋgoma̰də lé ulá gə goo ta sula lə kea̰je pana: Ar dee d’ila dɔ Ja̰ Njera-batɛm mee ka’g d’ari ree ne am.

9Mbai lé si yəgədə, rəa gaḭ ges, nɛ rɔkubu ləa gə́ yeḛ ubu kəm njéndamje’g bura lé ɓa aree un ne ndia ar dee d’aree ne dɔ Ja̰ ya. 10Yeḛ ula dee kəi-daŋgai’g ar dee gaŋg dɔ Ja̰ Njera-batɛm lé. 11D’un d’ila mee ka’g d’ar ŋgoma̰də lé ndá yeḛ un aw ne ar kea̰je tɔ. 12Njékwakila Ja̰je lé d’un yée d’aw dubu mba̰ ndá deḛ ree d’ula Jeju taree.

Jeju ar dəwje tɔl-mi nésɔ

Mar 6.30-44, Lug 9.10-17, Ja̰ 6.1-14

13Loo gə́ Jeju oo taree ndá yeḛ ḭ uru mee to’g mba sa rəa kaw dɔdilaloo’g. Boo-dəwje lé d’oo soree ndá d’ḭ gə ɓee-booje ndolè gée gə gɔl dee. 14Loo gə́ yeḛ ḭ mee to’g al uru naŋg ndá yeḛ oo boo-dəwje d’aar digi-digi. Yeḛ oo kəmtondoo lə dee ndá ɔr ne rɔko̰ rɔ njérɔko̰je’g.

15Loo gə́ kàr rəm ler ndá njékwakiláje d’aw pər gə́ rəa’g d’ulá pana: Loo gə́ neelé to dɔdilaloo’g gə mḭdé ba ləm, kàr kara godo ləm tɔ. Bèe ndá ar boo-dəwje nee sanéna̰ d’aw mee ɓeeje’g mba ndogo nésɔ dee.

16Jeju ila dee keneŋ pana: Wah! kəm kar dee d’aw bèe el. Seḭ nja ar deeje nésɔ d’usɔ.

17Nɛ deḛ tel d’ilá keneŋ pana, Pil muru mi gə ka̰jije joo ba to ji sí’g nee.

18Yeḛ ula dee pana: Amje gə́ nee.

19Yeḛ ar boo-dəwje neelé d’unda naŋg dɔ mu’g mburug ndá yeḛ odo pil muru gə́ mi ləm gə ka̰jije joo ləm tɔ ɓa yeḛ un kəmee gə́ tar ra ne Ala lé oiyo. Gée gə́ gogo yeḛ odo pil muru təd dana ar njékwakiláje mba kar dee kai boo-dəwje neelé. 20Deḛ lai d’o̰ d’ar meḛ dee ndan tub-tub ndá d’ya̰ gesee naŋg d’ar dee mbo̰ budu dɔg-giree-joo. 21Deḛ gə́ d’o̰ muru neelé d’aḭ dəwje tɔl-dɔg-loo-mi. Deḛ tura diŋgamje ya doŋgɔ, lal tura denéje gə ŋganje.

Jeju njaa dɔ mán baa-boo’g

Mar 6.45-52, Ja̰ 6.15-21

22Léegəneeya yeḛ ula njékwakiláje ar dee d’ḭ kédé d’ɔm na̰ mee to’g mba gaŋg mán kaw turá. Yeḛ nai gogo mba kula boo-dəwje kar dee sanéna̰ tel d’aw ɓéeje lə dee. 23Loo gə́ yeḛ ɔm dee rəbə yəg mba̰ ndá yeḛ tuga dɔ mbal mba kaw ra tamaji lé gə karee ba. Kàr andə mba̰ nɛ yeḛ nja gə karee ba ɓa si. 24Njétoje teḛ dan baa-boo’g dana bab ndá paŋgəm mán tuga ar to toso bigiri-bigiri ar lel ɔs dee rəw. 25Gel bagbee ndá Jeju ḭ aw gə́ rɔ dee’g, yeḛ njaa dɔ mán baa-boo gə́ no̰ tar mbiao̰-mbiao̰ lé. 26Loo gə́ njékwakiláje d’aa loo d’ée loo njaa dɔ mán’g ləa ndá deḛ dḭga sə-sə pana: To njabaw-dəw. Deḛ d’uru kó dəa’g wəl-wəl mbata deḛ ɓəl yaa̰. 27Léegəneeya Jeju ula dee pana: Ǝwje rɔ sí ɓəlje, to ma nja. Ɓəlje el ŋga.

28Piɛrə ilá keneŋ pana: Mbai, ɓó lé i nja ɓa njaa dɔ mán bélm’g aw’n ndá un ndui am m’njaa dɔ mán’g m’aw gə́ rɔi’g tɔ.

29Jeju ilá keneŋ pana: Ḭta, gə́ ree!

Piɛrə al uru mán, si njaa gə́ rɔ Jeju’g lé. 30Nɛ loo gə́ yeḛ oo lel ula ɓar mḭ yaa̰ ndá yeḛ ndəb un kudu ndusu mán tɔɓəi yeḛ ula təa no̰’g wəl pana: Mbai, ajim.

31Léegəneeya, Jeju duu wa jia unee dɔ mán’g njororo ndá ulá pana: I gə́ njemeembɔrè, see ban ɓa i maḭ gə rɔi wa.

32Deḛ d’ɔm na̰ mee to’g ndá lel gaŋg ŋgaji. 33Deḛ gə́ d’isi mee to’g lé ree d’ɔm gɔl Jeju’g pana: Tɔgərɔ, i lé to Ŋgon-Ala gə́ gəd ya.

Jeju aji njérɔko̰je bula

Mar 6.53-56

34Deḛ gaŋg mán d’aw teḛ Genesaret. 35Njéɓeeje gə́ keneŋ d’ée gə́ Jeju ndá d’ula kula gə ɓee-ɓee ndá dəwje ree gə njérɔko̰je yao-yao gə́ rəa’g. 36Deḛ ra ndòo rəa’g gə mba karee ar dee d’wa ta kubu ləa ba. Deḛ lai gə́ d’wa ta kubu ləa lé ndá d’aji ne kəbərə-kəbərə ya tɔ.

Currently Selected:

Matiyo 14: SBA2015

Highlight

Copy