Matiyo 13
13
Gosɔta gə́ wɔji dɔ njekila kər
Mar 4.1-9, Lug 8.4-8
1Mee ndəa’g neelé nja Jeju ḭ mee kəi’g teḛ ɗaga, aw si dɔ koŋgo baa-boo’g. 2Dəw-bulaje mbo̰ dɔ na̰ rəa’g ndá yeḛ uru mee to’g rəm si keneŋ. Dəw-bulaje d’isi dɔ koŋgo’g tɔ#Lug 5.1-3. 3Yeḛ ula dee ta gə gosota wɔji ne dɔ néje bula pana: 4Njendɔ aw ndɔ mba kila kər. Loo gə́ yeḛ aar ila kər lé ndá yee gə́ na̰je teḛ pə ɔm kag-rəw’g ar yelje ree keneŋ d’o̰. 5Yee gə́ na̰je teḛ pə ɔm dɔ mban-ər’g, loo gə́ naŋg to keneŋ təgəsə bèe. 6Yee ḭ wububu mbata naŋg to keneŋ ŋgwɔidɔ bèe, nɛ loo gə́ kàr ɔs keneŋ ndá wa mèŋgèŋgḛ̀, ndòlé mbata ŋgirá wa naŋg el. 7Yee gə́ na̰je teḛ pə wa naŋg mee kun’g, ar kun ḭ dəb dəa’g aree kas ker-ker. 8Yee gə́ raŋg teḛ pə ɔm dɔ naŋg gə́ maji kó’g ndá andə yaa̰, yee gə́ ná ndá andə tɔl, yee gə́ ná ndá andə rɔ-misa̰, yee gə́ ná ndá andə rɔ-munda tɔ. 9Yeḛ gə́ mbia to gən ndá maji karee oo ne ta gə́ m’pa nee ya.
See ban ɓa Jeju ula dee ta gə́ gosotaje wa
Mar 4.10-12, Lug 8.9-10
10Njékwakiláje rəm pər gə́ rəa’g dəjee pana: See ban ɓa i ula dee ta gə gosotaje bèe wa.
11Jeju tel ila dee keneŋ pana: Seḭ nja, d’ar kəm sí inja mba kar sí gərje ne ta lə ɓeeko̰ gə́ dara gə́ to loo-kiya’g ɓəi, deḛ lé d’ar kəm dee inja dɔ’g el ɓəi. 12Mbata dəw gə́ si gə né jia’g ɓa d’a kɔm maree dɔ’g mba karee si danee’g pubag. Nɛ dəw gə́ si gə né ɓa iŋga maree dɔ’g el ndá d’a kwá taa yee gə́ jia’g lé#Mat 25.29, Mar 4.25, Lug 8.18, 19.26. 13Togə́bè ɓa ma m’ula dee ta gə gosotaje mbata d’oo ya nɛ d’aa gə́ kaa mbə̰ ləm, deḛ d’oo ya nɛ ɓar mbi dee’g gə́ ɓar koo ɓó gər ginee el ləm tɔ. 14Ta gə́ Ala ula Esai aree pa lé ɔr gin ka̰ dee njal pana:
Seḭ a kooje gə mbi sí ya nɛ a ɓar gə́ koo mbi sí’g ləm,
Seḭ a kooje gə kəm sí ya nɛ seḭ a kaaje gə́ kaa mbə̰ ləm tɔ#Esa 6.9-10.
15Mbata koso-dəwje neelé meḛ dee ndər ləm,
Mbi dee udu ləma,
Kəm dee libi ləm tɔ
Ɓa nà d’a koo gə kəm dee gə mbi dee ləm,
D’a kḛji meḛ dee gər ginee ləma,
D’a kɔs ne badm tel kam m’aji dee ne ləm tɔ.
16Nɛ seḭ lé rɔ sí lel sí mbata seḭ ooje gə kəm sí mba̰ ləm, rɔ sí lel sí mbata seḭ ooje taree gə mbi sí mba̰ ləm tɔ#Lug 10.23-24. 17Ma m’ula sí təsərə, njéteggintaje bula ləm, gə njémeekarabasurje kara bula ləm tɔ lé mal koo né gə́ seḭ ooje lé ra dee nɛ d’oo gə kəm dee el ləm, mal koo né gə́ seḭ ooje gə mbi sí lé ra dee nɛ oso mbi dee’g el ləm tɔ.
Jeju tegginta lə dəw gə́ njekila kər
Mar 4.13-20, Lug 8.11-15
18Seḭje lé maji kar sí ooje gosota gə́ wɔji dɔ njekila kər lé. 19Loo gə́ dəw oo ta lə ɓeeko̰ lé nɛ yeḛ gər ginee el ndá njegosoyèr ree ɔr kandə né gə́ oso mée’g ho̰d ndá mee dəw neelé to asəna gə kag-rəw gə́ kandə kər lé wa naŋg keneŋ. 20Kandə kər gə́ oso dɔ mban-ər’g lé to asəna gə dəw gə́ oo ta lé ndá léegəneeya yeḛ taa gə́ rɔlel, 21nɛ ŋgira ta neelé ɔm jamee mée’g el ndá dəw neelé si ne waga el mbata mée mbɔré dɔ’g. Loo gə́ néɓəl əsé néurti teḛ dəa’g mbata lə ta neelé ndá yeḛ oso kas ila ne ta kɔrɔ yal. 22Kandə kər gə́ oso mee kun’g lé to asəna gə dəw gə́ oo ta neelé ya nɛ tor ta gə́ wɔji dɔ naŋg nee gə takə̰ji gə́ wɔji dɔ nébaoje ɓa yeḛ la̰ji mée’g aree tuji ta neelé ɔgee ne loo teḛkɔr ŋgia̰ ne ŋgɔsɔrɔ. 23Kandə kər gə́ oso dɔ naŋg gə́ maji kó’g lé to asəna gə dəw gə́ oo ta neelé ləm, gə gər ginee ləm tɔ. Dəw neelé nai gə́ kər gə́ andə tɔl əsé rɔ-misa̰ əsé rɔ-munda tɔ.
Haowa gə́ kinja gə kó na̰’d
24Jeju ula dee gosota gə́ raŋg pana: Ɓeeko̰ gə́ dara lé to asəna kára ba gə njekəi gə́ aw dubu né gə́ maji mee ndɔ’g ləa. 25Loo gə́ dəwje d’ɔm ɓi yəm ndá njeba̰ ləa aw ila haowa mée’g podé-podé ndá ɔd par aw. 26Loo gə́ kó gə́ maji neelé uba lub-lub ndá haowa kara kinja səa na̰’d ɓagəsa tɔ. 27Kuraje lə njekəi lé d’aw rəa’g dəjee pana: Mbai, see kandə kó gə́ maji ɓa i dubu ndɔ ləi el wa. Bèe ŋga see loo gə́ ra ɓa haowa ḭ keneŋ wa. 28Yeḛ tel ila dee keneŋ pana: Njeba̰ lé nja ra né kən. Kuraje ləa lé tel dəjee pana: Ŋga see i ndigi kar sí j’aw n’tɔr j’ɔmje kɔrɔ wa. 29Njekəi lé ila dee keneŋ pana: Wah, ya̰je ɓoŋ ɓa nà seḭ a tɔrje kó gə haowa na̰’d. 30Ya̰je ar deeje tɔg na̰’d saar ndɔ kinja kó lé ndá ma nja m’a kula njékinjakoje pana: Tɔrje haowa tɔje gə dəa-dəa oreeje dɔ na̰’d més-més mba kula pər keneŋ, nɛ mbo̰je kó gə́ maji ɔmje dàmá ləm ya.
Gosɔta gə́ wɔji dɔ kandə né gə́ yəm-yəm
Mar 4.30-32, Lug 13.18-19
31Yeḛ ula dee gosota gə́ raŋg pana: Ɓeeko̰ gə́ dara lé to asəna gə kandə kamnaḭ gə́ ɓaree senebe gə́ dəw dubu mee ndɔ’g ləa. 32Ka̰dee lé to gə́ yəm-yəm bèe ba ar kandə néje gə́ raŋg lai lé moŋg undá ya. Nɛ yee neelé loo gə́ uba ndá ḭ ɓar-kag unda kag kamnaḭje gə́ raŋg lai ar yelje ree d’wa barkəmee ko̰-ko̰ ra kəi lə dee keneŋ.
Gosɔta gə́ wɔji dɔ né gə́ ar nduji ti
Lug 13.20-21
33Yeḛ ula dee gosota gə́ raŋg ya tɔɓəi pana: Ɓeeko̰ gə́ dara lé to asəna gə né gə́ ar nduji ti gə́ dené ɔm dan nduji as ŋgo munda’g guru ne saar aree ḭ dor-dor.
Gin-né gə́ ar Jeju ndoo dee ne ta gə gosotaje lé
Mar 4.33-34
34Taje nee lai lé Jeju ula koso-dəwje gə gosota ɓó ula dee ta gə́ lal gosee lé godo, 35gə mba tɔl ne ta gə́ njéteggintaje pa kédé lé pana:
M’a teḛ tam mba pa ne gosotaje ləm,
M’a kila mber ta néje gə́ to loo-kiya’g
Ndɔ tum gin naŋg nee saar ɓasinè tɔ#Pak 78.2.
36Yeḛ ya̰ koso-dəwje ar dee d’aw ɓa yeḛ ɔd aw kəi ɓəi. Njékwakiláje d’aw pər gə́ rəa’g dəjee pana: Teggin gosota lə haowa gə́ to mee ndɔ’g lé ar sí j’ooje.
37Yeḛ ila dee keneŋ pana: Njedubu kandə kó gə́ maji lé yee ɓa to gə́ Ŋgon-dəw. Mee ndɔ lé yee ɓa to gə́ dɔ naŋg nee. 38Kandə kó gə́ maji lé to ŋganje gə́ ɓeeko̰ gə́ dara lé. Haowa lé to ŋganje lə njegosoyèr ya. 39Njeba̰ gə́ njedubu haowa lé yee ɓa to gə́ Njekurai lé ya. Naḭ kinja kó lé yee ɓa to ndɔ gə́ rudu naŋg nee a kun ɗiao. Njékḭjakoje lé deḛ ɓa to kuraje gə́ dara tɔ. 40To gə́ deḛ tɔr haowa d’ɔm pər’d lé ndɔ gə́ rudu naŋg nee a kun ɗiao lé kara d’a ra togə́bè tɔ. 41Ŋgon-dəw lé a kula kuraje ləa gə́ dara mba kar dee ree tɔr né gə́ njetuga gɔl dee ləm, gə deḛ gə́ njéra néje gə́ yèr lé ləm tɔ, d’a tɔr dee ɓɔgədɔ-ɓɔgədɔ. 42D’a kɔm dee dan pər gə́ kṵjee teḛ gi-gi’g, to loo gə́ d’a no̰ kar mán kəm dee wa dee jiim-jiim keneŋ ləm, d’a sɔ ŋgaŋ dee keneŋ pəgərə-pəgərə ləm tɔ. 43Ndəa neelé rɔ njémeekarabasurje a nduba raŋg-raŋg ɓeeko̰’g lə Bɔ deeje asəna gə kàr gə́ nduba rəa raŋg-raŋg bèe tɔ. Yeḛ gə́ mbia to gən mba koo ne ndá maji karee oo ne ya.
Gosɔta gə́ wɔji dɔ mərkwɔji
44Ɓeeko̰ gə́ dara lé to asəna gə nébao gə́ to loo-kiya’g mee ndɔ’g. Dəw teḛ keneŋ un iya kág gə́ lée’g ya. Rea lelee yaa̰ aree aw ndogo néje ləa mba kya̰ laree ndogo ne ndɔ neelé.
45Ɓeeko̰ gə́ dara lé to asəna gə njetelkəmlar gə́ ndolè mərkwɔjije gə́ maji-maji. 46Loo gə́ yeḛ iŋga mərkwɔji kára gə́ laree to ɓad-ɓad ndá yeḛ aw ndogo néje ləa lai ɓa ya̰ laree aw ndogo ne məree neelé.
Gosɔta gə́ wɔji dɔ bura
47Ɓeeko̰ gə́ dara lé to asəna gə bura gə́ d’ɔs ne mán baa-boo d’wa ne ka̰jije gə́ gə ria-ria. 48Loo gə́ ka̰jije rusu bura lé tub ndá njékɔs-ka̰jije lé ndɔr bura lé d’ila dɔ koŋgo’g raga. D’isi keneŋ mbər njé gə́ maji-maji d’ɔm mee duguru’g nɛ njé gə́ majel ndá d’ɔm kɔrɔ. 49Ndɔ gə́ rudu naŋg nee a kun ɗiao lé ndá d’a ra togə́bè tɔ. Kuraje gə́ dara d’a ree mba kunda kəm njémeeyèrje ɓəd ləm, gə njémeekarabasurje ɓəd ləm tɔ. 50D’a kɔm njémeeyèrje dan pər gə́ kṵjee teḛ bilim-bilim ləm, d’a no̰ kar mán kəm dee wa dee jiim-jiim ləma, d’a sɔ ŋgaŋ dee keneŋ pəgərə-pəgərə ləm tɔ.
Nébaoje gə́ sigi gə njé gə́ ləw
51See seḭ gərje ta néje neelé lai ya wa. Deḛ tel d’ilá keneŋ pana: Oiyo!
52Yeḛ ula dee pana: Bèe ɓa njendaji-maktub gə́ rara kara gə́ ndoo néje gə́ wɔji dɔ ɓeeko̰ gə́ dara lé ndá yeḛ to asəna gə njekəi gə́ tɔr nébaoje ləa gə́ sigi-sigi gə njé gə́ ləw-ləw rab raga.
Njé gə́ Najaret d’ɔm meḛ dee dɔ Jeju’g el
Mar 6.1-6, Lug 4.16-30
53Loo gə́ Jeju ula dee gosotaje neelé lai mba̰ ndá yeḛ ḭ keneŋ ɔd aw. 54Yeḛ aw mee ɓee gə́ yeḛ tɔg keneŋ ndoo dee né mee kəi-kwa-dɔ-na̰’g lə dee. Deḛ gə́ d’oo ta gə́ yeḛ ndoo dee lé kaar dee wa dee paḭ ar dee pana: Kəmkàr ləa gə siŋgamoŋ gə́ yeḛ ra ne némɔrije bèe lé see yeḛ ḭ ne ra wa. 55See yeḛ to ŋgolə njekḭjakag lé el wa. See Mari ɓa to gə́ kea̰je el wa. See Jak gə Jisəb gə Simo̰ gə Jude lé to gə́ ŋgakea̰je el wa. 56See kɔnaneeje lai d’isi mbuna sí’g nee ya el wa. Bèe ŋga see néreaje neelé yeḛ ḭ ne ra ɓəi wa.
57Yee gə́ neelé to gə́ né kun gɔl dee kar dee d’oso ne ya. Nɛ Jeju ila dee keneŋ pana: Njetegginta lé d’a kḛjee bəḭ-bəḭ mee ɓee-kojee’g əsé mbuna njémeekəije’g ləa ɓa#Ja̰ 4.44.
58Yeḛ ra némɔrije bula ɓee lə dee el mbata d’un mbi dee ndogo ne lel dɔ ta’g ləa.
Currently Selected:
Matiyo 13: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
