Lugu 5
5
Jeju ɓar njékwakiláje gə́ dɔtar lé
Mat 4.18-22, Mar 1.16-20
1Loo gə́ Jeju aar ta mán baa-boo gə́ ria lə Genesaret ar boo-dəwje d’aw dɔ na̰’d wur-wur rəa’g mba koo ta lə Ala lé 2ndá yeḛ aa loo oo toje joo gə́ d’aar ta koŋgo nɛ njeaje-je d’ɔd d’aw gə mba sugu buraje lə dee. 3Yeḛ ɔd al uru mee to’g kára gə́ to gə́ ka̰ Simo̰ ulá gə mba karee ɔs to bəl gə́ kédé gə mba kya̰ ta koŋgo. Yeḛ təd loo-si keneŋ si ndoo koso-dəwje neelé ta .
4Loo gə́ gin ta ləa gaŋg ŋgaji ndá yeḛ ula Simo̰ pana: Ɔs to wɔr gə́ ta ŋguru mán’g ulaje buraje lə sí mán ɔsje ne mán ooje.
5Simo̰ tel ilá keneŋ pana: Mbai, jeḛ lé j’ɔs ka̰ji loondul’g ya saar j’ar loo àr dɔ sí’g təsərə, j’wa ka̰ji gə́ rḛdeŋ el, nɛ ɓó lé i nja ulam bèe ndá m’a kula bura mán pá koo ya .
6Loo gə́ deḛ d’ila bura mán mba̰ ndá ka̰jije rusu bura lə dee njḭ-njḭ ar bura lə dee til . 7Yen ŋga deḛ kəb ji dee ɓar ne njéboando̰je lə dee gə́ d’aw gə to gə́ raŋg mba kar dee ree la sə dee tɔ. Deḛje neelé ree d’iŋga dee ndá d’odo ka̰jije rusu toje lé joo bɔr ar ta toje kai mán pɔ-pɔ. 8Loo gə́ Simo̰ Piɛrə oo togə́bè ndá yeḛ rəm bəbərə oso naŋg no̰ Jeju’g ulá pana: Mbaidɔmbaije, ɔr rɔi rɔm’g gə́ gogo mbata ma m’to njekaiya.
9Yeḛ gə deḛ lai gə́ d’aar səa lé ɓəl unda dee badə gaŋg dee mbata bura gə d’ila mán-njum nja ɓəi ndá teḛ ne gə ka̰jije ɓagəsa lé tɔ. 10Jak gə Ja̰, ŋgalə Jebede gə́ to njéboando̰je lə Simo̰ lé kara né neelé dum dɔ dee təs tɔ. Yen ŋga Jeju ula Simo̰ pana: Ɓəl el, un ginee ɓogənè lé i a to njendo̰-dəwje to ŋga.
11Togə́bè loo gə́ deḛ ndɔr toje lé d’unda dee tudu ndá deḛ tal turu raga d’ya̰ néje lə dee bura d’ɔm na̰ gée’g tɔ.
Jeju aji njeba̰ji
Mat 8.1-4, Mar 1.40-45
12Loo gə́ Jeju sí mee ɓee-boo gə́ kára bèe ndá diŋgam kára gə́ ba̰ji ila bina rəa’g mbə̰gərə-mbə̰gərə aa loo ée ndá rəm oso naŋg bəbərə dəb kəmee naŋg nea̰’g, un ta ulá oso ne ndòo pana: Mbaidɔmbaije, ɓó lé məəi ndigi ndá i askəm kar rɔm ɔr ɓə̰dərə-ɓə̰dərə ya.
13Jeju ula jia par wa ne rəa peb ulá pana: Ma m’ndigi bèe ya, maji kar ba̰ji ɔr rɔi’g ndɔs-ndɔs.
Léegəneeya ba̰ji lé ɔr rəa’g ndɔs-ndɔs ya tɔ. 14Jeju tɔ təa ká mba kar taree teḛ təa’g ar dəw oo el ɓəi. Nɛ yeḛ ulá pana: Maji kari ɔd aw ɓee lə njekinjanéməs aw unda rɔi aree oo ndá un nékinjaməs gə́ godndu Moyis wɔji mba kɔr won rɔi lé mba karee to gə́ nékɔrkəmta ləi kəm dəwje’g .
15No̰ néra lə Jeju lé taree oso gə loo mbidi-mbidi ar koso-dəwje bula digi-digi buŋga na̰ bura ree mba koo ta ləa ləm, gə mba kar rɔko̰ lə dee ḭ dɔ dee’g kə̰geŋ ləm tɔ. 16Nɛ yeḛ ḭ sa rəa ur dɔdilaloo’g aw gə mba ra tamaji lé.
Jeju aji dəw gə́ dəb rəa wəi wɔ
Mat 9.1-8, Mar 2.1-12
17Ndɔ kára bèe Jeju si ndoo dee ta ndá Parisiḛje gə njéteggin godnduje gə́ d’ḭ ŋgan-ɓeeje gə́ Galile ləm, gə Jude ləma, gə Jerusalem ləm tɔ lé d’isi keneŋ tɔ. Siŋgamoŋ lə Mbaidɔmbaije nai səa aree ɔr rɔko̰ gə́ rɔ njérɔko̰je’g. 18Aa ooje, dəwje d’un dəw kára gə́ dəb rəa wəi wɔ gə tira-tée bura ɓəgəgə saŋg ne loo mba kandə səa kaw kundá no̰ Jeju’g. 19Nɛ deḛ d’oo kəm loo gə́ kára bèe gə mba kandə kaw səa kaw teḛ ne rɔ Jeju’g lé el mbata boo-dəwje rusu loo tub-tub ndá d’unee bura d’al səa dɔ kəi’g tar, d’ɔr kəm loo d’ulá keneŋ gə tira ləa bura risi səa d’unda naŋg no̰ Jeju’g mbuna koso-dəwje’g neelé. 20Loo gə́ Jeju oo meekun lə dee al dɔ loo ndá yeḛ pana: Kuramarm, kaiya ləi ɔr dɔi’g mba̰.
21Njéndaji-maktubje gə Parisiḛje d’un kudu kḛji ta meḛ dee’g pana: See dəw neelé to gə́ na̰ ɓa yeḛ ila ndɔl dɔ loo’g togə́bè wa. See na̰ ɓa askəm kɔr kaiya dɔ dəwje’g wa. See Ala lé nja kára ba el wa.
22Jeju gər takə̰ji lə dee gə́ meḛ dee’g gao, bèe ɓa yeḛ un ta ula dee ne pana: See ta ɗi ɓa seḭ ə̰jije meḛ sí’g nḛ wa. 23See yee gə́ ra ɓa a to kəm pa ɓəi wa, kaiya ləi ɔr dɔi’g əsé ḭta njaa ɓa kəm pa ɓəi wa. 24Nɛ gə mba kar sí gərje gao, Ŋgon-dəw lé siŋgamoŋ ləa askəm kɔr kaiya dɔ dəwje gə́ dɔ naŋg nee ya ndá yeḛ tel təa ula dəw gə́ dəb rəa wəi wɔ lé pana: Ma nja m’un ndum m’ari, uba naŋg ḭta, un nétoi ɔd aw ne kəi ləi.
25Léegəneeya, yeḛ uba naŋg ḭta kəm dee’g nee ya un tira-tée gə́ yeḛ to keneŋ kédé lé ɔd aw ne kəi ləa ləm, yeḛ ula ne rɔnduba dɔ Ala’g ləm tɔ. 26Deḛ lai gə́ d’aar keneŋ lé kaar dee wa dee paḭ-paḭ ar dee pidi Ala lé tɔ. Ɓəl unda dee badə gaŋg dee ar dee pana: Ɓogənè lé jeḛ j’oo né gə́ dum loo gə́ doŋgɔ ya to ŋga.
Jeju ɓar Lébi
Mat 9.9-13, Mar 2.13-17
27Gée gə́ gogo Jeju teḛ raga ndá aa loo oo dəw kára gə́ ria lə Lébi gə́ njetaa lar-gədɓee. Yeḛ ulá pana: Gə́ ree un rəw goom’g.
28Lébi uba néje ləa bura ya̰, un rəw gée’g ya tɔ.
29Lébi ra naḭ gə́ boo mee kəi’g ləa mbata lə Jeju ndá njétaa lar-gədɓeeje gə dəwje gə́ raŋg bula d’isi sə dee keneŋ na̰’d ta nésɔ’g. 30Parisiḛje gə njéndaji-maktubje jém ta gə ŋgan gwɔs dee dəji ne njékwakila Jejuje pana: See ban ɓa seḭ sɔje gə aije né gə njétaa lar-gədɓee gə kaiya-dəwje togə́bè wa .
31Jeju un ta ula dee pana: Njé gə́ rɔ dee to kari lé deḛ ndiŋga njekuma̰ el nɛ njérɔko̰je ɓa d’a ndiŋga njekuma̰ ya. 32Ma m’ree gə mba ɓar njékaiyaje gə mba kar dee d’wa ndòo rɔ dee dɔ kaiya’g lə dee ɓó gə mba ɓar njémeekarabasurje ɓa el.
Jeju teggin kɔg-mee-ɓoo
Mat 9.14-17, Mar 2.18-22
33Deḛ d’ulá pana: Njékwakila Ja̰je gə ka̰ Parisiḛje lé d’ɔg meḛ dee ɓoo ta-ta ɓa d’oso ne ndòo nɛ njékaḭje lé d’usɔ né gə́ sɔ ləm, d’ai né gə́ kai ləm tɔ.
34Jeju tel ila dee keneŋ pana: Baokuraje lə njedené-sigi lé loo gə́ yeḛ si sə dee na̰’d ɓəi lé see seḭ a kasjekəm kar deeje d’ɔg meḛ dee ɓoo wa. 35Ndɔ gə́ kàree a gə teḛ gə́ d’a gə kɔr njedené-sigi lé mbuna dee’g ndá yen ɓa deḛ d’a kɔg meḛ dee ɓoo keneŋ ɓəi.
36Yeḛ ula dee ta kára gə gosota pana: Dəw a kwa ta kubu-kula-rəa’g sigi ɓa til kya̰ kila ne kəm ŋgisi kubu el, ɓó lé yeḛ ra togə́bè ndá kubu gə́ sigi gə́ yeḛ goré kəmee ɔr lé a tuji ləm, ta kubu gə́ sigi gə́ yeḛ uru ne kəm ŋgisi kubu lé ndaji dee a kaw na̰’d el ləm tɔ. 37Dəw kára kara a kɔm mán-nduú gə́ sigi mee ɓɔl-ndarje gə́ ləw el, ɓó lé a ra togə́bè ndá mán-nduú gə́ sigi lé a kḭ kar barɓɔlje lé ndubu kum kar mán-nduú gə́ sigi lé ula naŋg kəŋgəŋ-kəŋgəŋ ləm, ɓɔl-ndarje lé kara d’a tuji ləm tɔ. 38Nɛ mán-nduú gə́ sigi ɓəi lé maji kɔm mee ɓɔl-ndarje gə́ sigi’g ya tɔ. 39Dəw gə́ to njekai mán-nduú gə́ kal ɓa aw ai ɓəi ndá yeḛ a dəji goo yee gə́ sigi el ŋga mbata yeḛ lé pana: Yee gə́ kal lé ɓa maji.
Currently Selected:
Lugu 5: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.