Lugu 6
6
Njékwakila Jejuje riba barkəmko gə ndɔ-kwa-rɔ’g lé
Mat 12.1-8, Mar 2.23-28
1Ndɔ kára bèe gə́ to ndɔ-kwa-rɔ lé Jeju tal mee ndɔ gə́ kó unda kəm keneŋ. Njékwakiláje riba barkəmko rii gə ji dee d’usɔ . 2Parisiḛje gə́ na̰je dəji dee pana: Gelee ban ɓa raje né gə́ kəm ra ndɔ-kwa-rɔ’g el lé wa.
3Jeju ila dee keneŋ pana: Né gə́ ra Dabid gə deḛ gə́ d’aw səa loo gə́ lab ɔr dee neelé see seḭ turaje taree mee maktub’g el wa. 4Yeḛ uru mee kəi-Ala’g un muru gə́ deḛ d’unda gə kəmee keneŋ lé o̰ ya̰ ar deḛ gə́ d’aw səa lé d’o̰ tɔ, nɛ muru neelé d’unda gə kəmee gə mba kar njékinjanéməsje ɓa d’o̰ gə kar dee ba lé see seḭ ooje togə́bè el wa .
5Tɔɓəi yeḛ ula dee pana: Ŋgon-dəw lé nja ɓa to gə́ mbai dɔ ndɔ-kwa-rɔ lé tɔ.
Jeju aji dəw gə́ jia wəi wɔ
Mat 12.9-14, Mar 3.1-6
6Ndɔ-kwa-rɔ gə́ raŋg, Jeju andə aw mee kəi-kwa-dɔ-na̰’g si ndoo dee ta keneŋ. Diŋgam kára gə́ jikɔlee wəi wɔ si keneŋ tɔ. 7Njéndaji-maktubje gə Parisiḛje d’unda kəm dee lér-lér d’oo ne Jeju, see yeḛ a kajee gə ndɔ-kwa-rɔ nee wa, ɓó gə kiŋga ne loo kila ta dəa’g. 8Nɛ yeḛ gər takə̰ji gə́ meḛ dee’g gao ndá yeḛ ula dəw gə́ jia wəi wɔ neelé pana: Uba naŋg ḭ aar tar gə ŋgali par dan sí’g nee ya.
Togə́bè yeḛ neelé uba naŋg ḭ aar tar dan dee’g ya tɔ. 9Jeju ula dee pana: M’a dəji sí koo, see ndɔ-kwa-rɔ lé see to ndɔ gə mba ra né gə́ maji əsé to ndɔ gə mba ra né gə́ majel ɓa keneŋ wa. See to ndɔ gə mba kaji dəw əsé to ndɔ gə mba tɔl dəw ɓa keneŋ wa.
10Yen ŋga Jeju aa kəm dee njal ɔr ndá ula dəw neelé pana: Ndɔji jii ra̰daŋ.
Dəw neelé ra togə́bè ya tɔ ndá jia lé tel to kari ba péd-péd tɔ. 11Oŋg ti meḛ dee paŋ-paŋ ar dee maḭ na̰ ta dɔ né gə́ d’a ra gə Jeju lé ŋga.
Jeju ɔr njékaḭkulaje dɔg-gir-dee-joo
Mat 10.1-4, Mar 3.13-19
12Mee ndəa’g neelé Jeju ɔd aw dɔ mbal’g gə mba ra tamaji ta Ala’g ndá yeḛ ar keneŋ saar ar loo àr dəa’g təsərə. 13Loo gə́ loo àr mba̰ ndá yeḛ ɓar njékwakiláje gə́ rəa’g mbər dee dɔg-gir-dee-joo unda dee gə́ njékaḭkulaje as bèe: 14Simo̰ gə́ yeḛ unda ria lə Piɛrə gə ŋgokea̰ Andre, gə Jak gə Ja̰ gə Pilibə gə Bartelemi 15gə Matiyo gə Tomas gə Jak, ŋgolə Alpe, gə Simo̰ gə́ deḛ ɓaree Jelote, 16gə Jude, ŋgolə Jak, gə Judas Iskariot gə́ tel to njekun dəa lé tɔ.
Jeju ndoo boo-dəwje ta ləm, aji njérɔko̰je ləm tɔ
Mat 4.23-25
17Yeḛ risi sə dee gə́ bər loo gə́ loo asəna rai-rai keneŋ, lée neelé d’iŋga boo-njékwakiláje keneŋ gə dəwje bula digi-digi gə́ d’ḭ Jude ləm, gə Jerusalem ləma, gə Tir gə Sido̰ gə́ to ta mán’g ləm tɔ. Deḛ ree keneŋ gə mba koo ta təa’g ləm, gə mba kar rɔko̰je lə dee kara ɔr rɔ dee’g ləm tɔ. 18Deḛ gə́ ndilje gə́ yèr d’ula kəm dee ndòo lé kara d’aji kəbərə-kəbərə ya. 19Boo-dəwje lai-lai lé saŋg loo gə mba kɔrɔ rəa gə́ ji dee peb-peb ya mbata siŋgamoŋ teḛ rəa’g uru rɔ dee’g ndá aji dee lai-lai ya tɔ.
Rɔlel əsé némeeko̰ lé
Mat 5.1-12
20Yen ŋga Jeju ɔr dəa gə́ tar ɓad gə́ rɔ njékwakiláje’g ula dee pana:
Seḭ njéndooje lé rɔ sí lel sí
Mbata ɓeeko̰ lə Ala lé to ka̰ sí-seḭ ya!
21Seḭ gə́ ɓó tɔl sí ɓasinè lé
Rɔ sí lel sí mbata meḛ sí a ndan tub-tub ɓəi!
Seḭ gə́ no̰je jəm-jəm ɓasinè lé
Rɔ sí lel sí mbata seḭ a ndubaje rɔ sí raŋg-raŋg ɓəi to!
22Loo gə́ dəwje d’a kḛji sí bəḭ-bəḭ ləm, loo gə́ d’a kun sí tuba sí ra sə sí néurti ləma, loo gə́ d’a mbad sí kunda sí gə́ ram-dəwje ləm tɔ gə mba Ŋgon-dəw lé ndá rɔ sí a lel sí ɓəi . 23Mee ndəa’g neelé ndaje meḛ sí kaḭ, alje ne rɔ sí mbata seḭ a kiŋgaje némeekila lə sí gə́ boo dara ɓəi, mbata ka deeje kara d’ula kəm njéteggintaje ndòo togə́bè ya tɔ .
24Seḭ bao-nékiŋgaje lé meeko̰ a koso dɔ sí’g,
Mbata seḭ iŋgaje nérɔlel gə́ ka̰ sí-seḭ lé mba̰.
25Seḭ gə́ meḛ sí ndan tub-tub lé meeko̰ a koso dɔ sí’g
Mbata seḭ a kwəije yoo-ɓoo ɓəi.
Seḭ gə́ síje gə ŋgaŋ-kogo ɓasinè lé meeko̰ a koso dɔ sí’g
Mbata seḭ a kwaje ndòo rɔ sí loo-yoo’g ləm,
A sije dan mán-no̰’g ɓəi ləm tɔ.
26Seḭ gə́ dəwje lai d’ɔr ta lə sí maji lé meeko̰ a koso dɔ sí’g mbata ka deeje lé to gə́ njéra né togəbèje gə njéteggintaje gə́ ŋgɔm lé bèe tɔ.
Meenoji gə́ ka̰ ndigi njéba̰je lə sí
Mat 5.38-48, 7.12a
27Nɛ seḭ gə́ ooje ta ləm lé ma m’ula sí təsərə, undaje njéba̰je lə sí dan kəm sí’g ləm, raje maji gə deḛ gə́ d’ə̰ji sí bəḭ-bəḭ ləm, 28tɔrje ndu sí dɔ deḛ gə́ d’ɔr sə sí ləma, raje tamaji ta Ala’g mbata lə deḛ gə́ d’ula kəm sí ndòo ləm tɔ. 29Ɓó lé dəw unda mbɔri gə́ kel kára ndá tel nje gə́ kel kára ila aree unda tɔ. Ɓó lé dəw a kɔr kubu ləi gə́ boi yul rɔi’g ndá tel aree kubu-kaar ləi gə́ raŋg dɔ’g ɓəi tɔ. 30Nana ɓa gə́ kwɔii né ndá aree nja, yeḛ gə́ rara ɓa gə́ wai né ləi taai ndá ya̰ gée jia’g aree né ləa. 31Né gə́ rara gə́ seḭ ndigije kar dəwje gə́ raŋg ra d’ar sí ndá maji kar sí-seḭ nja raje ar deeje togə́bè .
32Ɓó lé deḛ gə́ d’unda sí dan kəm dee’g ɓa seḭ undaje deeje dan kəm sí’g ndá see to ndigi na̰ ŋga ɓa nee wa. Njékaiyaje kara deḛ gə́ d’unda dee dan kəm dee’g ɓa deḛ d’unda dee dan kəm dee’g ɓəi tɔ. 33Ɓó lé seḭ raje maji gə deḛ gə́ ra sə sí maji ya to ŋga see to gə́ nojikwa ŋga ɓa nee wa. Mbata njékaiyaje lé kara deḛ ra togə́bè ya tɔ. 34Ɓó lé dəwje gə́ d’a gə wɔr sí né nɛ seḭ ar deeje mbata meḛ sí to yel dɔ dee’g to gə́ a kiŋgaje né ji dee’g ya ɓəi ndá see to néwor ndá ŋga ɓa nee wa. Mbata njékaiyaje lé kara wɔr na̰ né gə mba tel kiŋga né ji na̰’d gogo bèe ya tɔ. 35Nɛ seḭ lé undaje njéba̰je lə sí dan kəm sí’g ləm, waje sə dee noji ləma, ar deeje wɔr sí né ɓa undaje bala təa el ləm tɔ. Togə́bè ɓa nékiŋgaje lə sí a kal dɔ loo ɓəi ləm, seḭ a toje ŋgan Njekurdɔloo’g ləm tɔ mbata yeḛ ra meemaji gə njéra nédɔkuduje ləm, gə njémeeyèrje ləm tɔ. 36Arje meḛ sí oso lemsé dɔ mar síje’g to gə́ bɔ síje ar mée oso lemsé dɔ sí-seḭ’g nja tɔ.
Gaŋje ta dɔ mar síje’g el
Mat 7.1-5
37Gaŋje ta dɔ mar síje’g el ndá Ala kara a gaŋgta dɔ sí’g el tɔ, ilaje ta dɔ mar síje’g el ndá Ala a kila ta dɔ sí’g el tɔ, ɔrje ta dɔ mar síje’g ndá Ala a kɔr ta dɔ sí’g tɔ. 38Maji kar mar síje né gə́ kar ndá d’a kar sí né gə kar tɔ, d’a kar sí gə́ kar ɓó d’a kwɔji el, d’a kɔm né mee né’g lə sí, d’a yəg yəg-yəg ləm, d’a mbusu jigi-jigi ləma, d’a kɔm keneŋ karee rusu ruba naŋg pɔ-pɔ ləm tɔ, mbata d’a kwɔji né kar sí kwɔji ne bua ka̰ sí gə́ seḭ wɔjije ne lé ya tɔ.
39Yeḛ ula dee gosota gə́ raŋg tɔɓəi pana: See njekəmtɔ a kaskəm kula kag ji njekəmtɔ maree’g wa. See deḛ joo bɔr d’a koso bwa’g el wa . 40Njekwakila mbai a kur dɔ ɓéeje’g el, njekwakila mbai gə́ gɔl ta néreaje gɔl-gɔl ndá yeḛ a to kasəna gə ɓéeje ya tɔ .
41See ban ɓa i unda kəmi dɔ njawala gə́ to kəm ŋgokɔḭ’g ŋga see guburu kag gə́ o̰ kəmi mbèd kən lé see i oo el wa. 42Esé see i a kula ŋgokɔḭ pana: Ŋgokɔm, am m’ɔr njawala gə́ to kəmi’g kən m’ari ŋga see guburu kag gə́ o̰ kəmi mbèd kən lé see i oo el wa. Njehulai, ɔr guburu kag gə́ o̰ kəmi mbèd kən lé kédé ɓad ɓa i a koo loo gə mba kɔr ne njawala gə́ to kəm ŋgokɔḭ’g lé ɓəi.
Kandə kag lé ɓa a gər ne kag lé ɓəi
Mat 7.16-20, 12.33-35
43Kag gə́ tɔg ɓṵdu-ɓṵdu lé a kandə majel nda̰ el ləm, kag gə́ ŋgon ŋgɔsɔrɔ-ŋgɔsɔrɔ lé a kandə maji nda̰ el ləm tɔ. 44Mbata kag gə́ rara kara lé ka̰dee ya ɓa d’a gəree ne. Dəw a kinja kandə kodé dɔ kag-kun’g el ləm, dəw a kinja kandə nduú dɔ kun ŋgar’g el ləm tɔ . 45Dəw gə́ maji lé né gə́ maji gə́ to dɔɓəŋgəree’g ɓa a teḛ gə́ raga ɓəi, nɛ dəw gə́ njemeeyèr lé né gə́ majel gə́ to dɔɓəŋgəree’g ɓa a teḛ gə́ raga ɓəi tɔ, mbata né gə́ ɔs kɔr mee dəw’g lé ɓa a teḛ təa’g karee pa ɓəi tɔ .
Gosɔta gə́ wɔji dɔ kəije joo lé
Mat 7.24-27
46See ban ɓa seḭ ɓarmje Mbaidɔmbaije, Mbaidɔmbaije ndá seḭ mbad raje né gə́ ma m’ula sí lé ɓəi wa. 47M’a kwɔji sí né gə́ wa bua ka̰ dəw gə́ rara gə́ ree rɔm’g oo ta ləm gə́ ra née lé tɔ. 48Yeḛ to asəna kára ba gə dəw gə́ tum gin kəi nɛ yeḛ uru bwa ila naŋg ndad-ndad gə́ teḛ dɔ mbal’g tum gin kəi dɔ’g tɔ. Loo gə́ mán bélm aw ula unda kaar kəi pəji-pəji ndá kəi lé yə rəa yəgə el mbata njekunda kəi lé unda maji péd-péd ya. 49Nɛ yeḛ gə́ oo tapam ɓa ra née el ndá yeḛ to asəna kára ba gə dəw gə́ unda kəi ləa dɔ naŋg’d lal kuru bwa ɓa tum ne ginee. Loo gə́ mán bélm aw ula unda kaar kəi pəji-pəji ndá léegəneeya kəi lé təd kuyum oso naŋg tɔ ndá tuji gə́ oso dɔ kəi’g neelé to tuji gə́ boo ya.
Currently Selected:
Lugu 6: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.