Lugu 4
4
Njekurai aḭ mee Jeju Kristi lé
Mat 4.1-11, Mar 1.12-13
1Ndilmeenda taa mee Jeju pəl-pəl loo gə́ yeḛ ḭ ta baa gə́ Jurdɛ̰ tel ree lé ndá Ndil lé ɔsee aw səa dɔdilaloo’g 2ar njekurai aḭ mée keneŋ ndəa rɔ-sɔ. Mee ndəaje’g neelé yeḛ sɔ né keneŋ njagm el ndá loo gə́ rudu ndəa gə́ rɔ-sɔ lé un ɗiao ndá lab ɔree həgəm, 3Yen ŋga njekurai lé ulá pana: Ɓó lé i to ŋgon-Ala ndá un ndui ar kɔr mbal neelé tel muru ko̰.
4Jeju tel ilá keneŋ pana: Deḛ ndaŋg taree mee maktub’g pana: Muru nja kára ba ɓa dəw a si ne kəmba el .
5Njekurai lé aw səa tɔjee ɓeeko̰je gə́ dɔ naŋg nee njal aree oo gə́ léegəneeya asəna gə néje gə́ teḛ goo na̰’g ɗəŋ-ɗeŋ 6ndá ulá pana: M’a kari siŋgamoŋ neelé lai ləm, gə rɔnduba lə ɓeeko̰je lé ləm tɔ, mbata d’arm gə́ kama ya ndá dəw gə́ rara ɓa ma m’ndigi karee ndá m’a karee to gə́ məəm-ma ya ndigi. 7Ɓó lé i a kunda barmba dəb kəmi naŋg nɔm’g ndá néje neelé lai d’a to gə́ kaḭ nja bura.
8Jeju tel ilá keneŋ pana: Deḛ ndaŋg mee maktub’g pana: Mbaidɔmbaije Ala ləi lé yeḛ ya kára ba ɓa i a kunda barmba nea̰’g ləm, gə yeḛ nja kára ba kiao ɓa i a ra né karee ləm tɔ .
9Tɔɓəi njekurai lé ɔree aw səa Jerusalem dɔ kəi-Ala’g tar ndá ulá pana: Ɓó lé i to Ŋgon-Ala ya ndá mbad rɔi piriŋ al oso naŋg ar sí j’oo: mbata deḛ ndaŋg mee maktub’g pana: 10Yeḛ a kun ndia kar kuraje ləa gə́ dara kwɔji ne dɔi gə mba kar dee tɔs kəm dee dɔi’g , 11tɔɓəi d’a kuni gə ji dee nà banelə i a tuga gɔli dɔ kɔr mbal’g .
12Jeju tel ilá keneŋ pana: Deḛ ndaŋg mee maktub’g pana: Mbaidɔmbaije, Ala ləi lé i a kaḭ mée nda̰ el .
13Loo gə́ njekurai lé aḭ mée gə goso néje ɓəd-ɓəd togə́bè ndá yeḛ ubá yá̰ sa rəa aw saar mba kiŋga loo gə́ kəm kaḭ mée ɓəi tɔ.
Jeju un kudu ra kula ləa Galile
Mat 4.12-17, Mar 1.14-15
14Siŋgamoŋ lə Ndil lé dəb dɔ Jeju’g rigim aree ɔs badm tel aw Galile, nea̰ oso gə loo-loo mee ɓeeje gə́ gugu dəa lé tɔ. 15Yeḛ ndoo dee né mee kəi-kwa-dɔ-na̰je’g ndá deḛ lai d’ula rɔnduba dəa’g tɔ.
D’ɔs Jeju rəw mee ɓee gə́ Najaret
Mat 13.53-58
16Jeju ḭ keneŋ aw Najaret, ɓee gə́ yeḛ tɔg keneŋ ndá yeḛ andə aw mee kəi-kwa-dɔ-na̰’g gə ndɔ-kwa-rɔ gə goo nérea gə́ yeḛ ra ta-ta. Yeḛ uba naŋg ḭta gə mba tura maktub 17ndá deḛ d’un maktub lə Esai, njetegginta ɓa d’aree. Loo gə́ yeḛ tudu wərərə ndá yeḛ teḛ dɔ ta gə́ deḛ ndaŋg keneŋ loo kára pana:
18Ndil Mbaidɔmbaije dəb dɔm’g
Mbata yeḛ nja wa dɔm gə ubu
Mba karm m’ila mber tagə́maji lé m’ar njéndooje ya.
Yeḛ ulam gə mba karm m’ila mber ta kɔr ɓər dɔ deḛ gə́ d’wa dee ɓər ləm,
Mba karm m’ula njékəmtɔje ta kəm deḛ gə́ a gə kinja kar dee d’oo ne loo ləm,
Mba kar deḛ gə́ d’udu dee kəi lé d’a kila rɔ dee ləma,
19Mba kila mber ləb noji lə Mbaidɔmbaije lé ləm tɔ .
20Tɔɓəi yeḛ tel kə́ maktub lé na̰’d gogo, rəm ne ar njeŋgəm kəi-kwa-dɔ-na̰ lé ndá tel sí naŋg. Deḛ lai gə́ d’isi mee kəi-kwa-dɔ-na̰’g lé mbo̰ kəm dee dəa’g sɔmɔmo̰. 21Yen ŋga yeḛ un ta ula dee pana: Ɓogənè ɓa ta gə́ to mee maktub gə́ to gə kəmee gə́ seḭ ooje lé née teḛ kəm sí’g təsərə mba̰.
22Deḛ lai d’ɔr ta ləa maji, boo-ta gə́ kul yururu gə́ kinja təa’g lé ar kaar dee wa dee dɔ’g paḭ-paḭ ar dee d’ula na̰ ta d’wɔji ne dəa pana: See yeḛ neelé to gə́ ŋgolə Jisəb el wa.
23Jeju ila dee keneŋ pana: Seḭ a kawje saar a kɔrje gosota nee gə́ pana: I njekuma̰-kaji lé aji darɔi-i nja ar sí j’oo səi. Seḭ a kɔrje kwɔjije ne dɔm paje ne səm pana: Néje lai gə́ m’ra Kapernawum gə́ seḭ ooje taree lé maji karm m’ra mee ɓee-kojim’g nee m’ar sí ooje səm tɔ. 24Ma nja m’ula sí təsərə, njetegginta gə́ rara kara d’a kée gə́ dəw mee ɓee-kojee’g el . 25Ma m’ula sí təsərə, njékəisiŋgaje bula bəl jərərə d’isi Israɛl’g mee ləb gə́ Eli si ne kəmba ɓəi loo gə́ ta dara udu jigi ar ndi ər el as ləb munda gə naḭ misa̰ ar ɓoo-boo oso bib ɔn dɔ naŋg lai . 26Lé bèe kara Ala ula Eli rɔ dee’g el nɛ njekəisiŋga kára gə́ si Sarepta dɔ naŋg gə́ Sido̰ lé ɓa yeḛ ulá Eli rəa’g . 27Njéba̰jije bula bəl jərərə d’isi Israɛl’g, ləbee gə́ Elije, njetegginta si ne kəmba ɓəi nɛ ba̰ji ɔr rɔ dəw kára kara mbuna dee’g el nɛ Naaman, dəw gə́ Siri nja gə karee ba ɓa ba̰ji ɔr rəa’g ndɔs-ndɔs ya .
28Deḛ lai gə́ d’isi mee kəi-kwa-dɔ-na̰’g lé loo gə́ deḛ d’oo taje neelé ndá meḛ dee ḭ sə dee pu. 29Deḛ d’uba naŋg d’ḭ səa tubá mee ɓee’g d’aw səa saar d’uba səa dɔ sém mbal gə́ ɓee lə dee to kaaree’g lé gə mba kɔsee kilá godə mbal gə́ naŋg. 30Nɛ Jeju sa rəa ta̰ mbuna dee uru teḛ aw.
Dəw gə́ ndil gə́ yèr ula kəmee ndòo lé
Mar 1.21-28
31Yeḛ ɔd keneŋ aw Kapernawum dɔ naŋg gə́ Galile ndoo dee ta keneŋ gə ndɔ-kwa-rɔ. 32Ta gə́ yeḛ ndoo dee lé dum dɔ dee təs, mbata yeḛ ndoo dee asəna gə njedɔmoŋ . 33Dəw kára gə́ ndil gə́ yèr to mée’g lé si kəi-kwa-dɔ-na̰’g ndá yeḛ pata ɓəgəgə pana: 34Wai, Jeju gə́ Najaret! See ɗi ləi to rɔ sí’g wa. See i ree rɔ sí’g mba tuji sí kɔ to ŋga wa. Ma m’gər gao, i to Njemeenda ka̰ Ala lé nja.
35Jeju ɔs təa’g rəw pana: Wa tai gə́ raŋg ndá unda loo ɓad ya teḛ mee dəw’g neelé gə́ gogo.
Ndil gə́ yèr lé biri dəw neelé widi ilá naŋg dan koso-dəwje gə́ d’wa dɔ na̰ lé ɓa unda loo teḛ mée’g ɓəi ɓó ra səa né gə́ majel kára kara el. 36Deḛ lai gə́ d’aar keneŋ lé ta igi dee sel ar dee d’ula na̰ pana: See ta neelé to ban ɓa bèe wa. Yeḛ wa ta ndilje gə́ yèr daŋ’d ndá deḛ d’unda loo teḛ ya tɔ.
37No̰ Jeju oso gə loo mbidi-mbidi gə mee ɓeeje gə́ gugu dɔ ɓee neelé sub tɔ.
Jeju aji njérɔko̰je bula
Mat 8.14-17, Mar 1.29-34
38Loo gə́ yeḛ ḭ kəi-kwa-dɔ-na̰’g lé unda loo teḛ ndá yeḛ ɔd keneŋ aw kəi lə Simo̰. Məm Simo̰je gə́ dené oso gə rɔko̰ boo ar rəa taa pər lam-lam, deḛ ra mbai ta Jeju’g mbata ləa. 39Jeju aar dəa’g, rugu naŋg ndaŋg rɔko̰ neelé ndá rɔko̰ lé ḭ dəa’g kə̰geŋ. Léegəneeya məəm Simo̰je gə́ dené lé uba naŋg ḭta ndá ra né ar dee d’usɔ.
40Loo gə́ kàr uru naŋg sɔrɔg mba̰ ndá deḛ lai gə́ njé’g lə dee d’oso gə rɔko̰je gə́ ban-ban kara d’odo dee ɗṵga-ɗṵga ree sə dee rəa’g. Yeḛ ila jia dɔ dee’g kára-kára lai aji dee ne. 41Ndilje gə́ yèr d’unda loo teḛ meḛ dəwje’g bula gə kii ta dee’g wəl-wəl pana: I to Ŋgon-Ala lé nja. Nɛ yeḛ ɔs ta dee’g rəw, ɔg dee loo pea’g mbata deḛ gər gao yeḛ to Kristi lé nja.
Jeju aw ila mber tagə́maji lé
Mar 1.35-39
42Loo gə́ loo àr yərərə mba̰ ndá yeḛ unda loo teḛ aw dɔdilaloo’g. Boo-dəwje d’un loo yéŋgé-yéŋgé ndolee, d’aw saar teḛ rəa’g, deḛ ndigi kwá naŋg ɓó gə mba karee ya̰ dee el ŋga. 43Nɛ yeḛ ula dee pana: Wai, lé riri kara dɔ ɓeeje gə́ raŋg lé m’a kila mber tagə́maji gə́ wɔji dɔ ɓeeko̰ lə Ala keneŋ ya tɔ, mbata yeḛ nee nja ɓa d’ulam ne gə mbəa.
44Togə́bè ɓa yeḛ ɔr ne goo ta mee kəi-kwa-dɔ-na̰je gə́ to Galile lé ya.
Currently Selected:
Lugu 4: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.