Lugu 3
3
Mber kila lə Ja̰ Njera-batɛm
Mat 3.1-12, Mar 1.1-8, Ja̰ 1.19-28
1Mee ləb ko̰ɓee lə Tiber Sesar gə́ aḭ dɔg-giree-mi lé to mee ləb gə́ Po̰sə Pilatə to ne njeguburuɓee gə́ Jude ləm, Herɔdə to ne njeguburu dəb ɓee gə́ Galile ləm, ŋgokea̰ Pilibə kara to ne njeguburu dəb ɓee gə́ Ituree gə dɔ naŋg gə́ gugu dɔ Trakonitə ləma, Lisanias to ne njeguburu dəb ɓee gə́ Abilene ləm tɔ. 2To mee ləb gə́ An gə Kayipə to ne ŋgɔ-njékinjanéməsje ndá mee ləb’g neelé ɓa ta lə Ala oso mbi Ja̰, ŋgolə Jakari dɔdilaloo’g. 3Ja̰ lé aw gə dɔɓee-dɔɓee gə́ gugu dɔ Jurdɛ̰ lé ila mber ta ra batɛm ar dəwje d’wa ndòo rɔ dee dɔ kaiya’g lə dee mba kɔr ne ɓaŋg kaiya dɔ dee’g.
4To gə goo ta gə́ deḛ ndaŋg mee maktub’g lə Esai njetegginta lé pana:
To ndu yeḛ gə́ njekilamber gə dɔdilaloo lé pana:
Gɔlje rəw lə Mbaidɔmbaije lé
Gɔlje ŋgan rəwje ləa ar deeje dana njoroŋ.
5Kəm godə wəlje lai lé d’a tula ləm,
Dɔ mbalje gə dɔdərlooje kara d’a pugudu naŋg pugudu-pugudu ləm tɔ.
Kila rəwje gə́ nduni koŋ-koŋ lé d’a kar dee d’ar dana njoroŋ-njoroŋ ləm,
Rəwje gə́ to guduru-guduru lé kara d’a gɔl dee yəg-yəg kar dee d’asəna rai-rai ləm tɔ.
6Dəw-kundaje lə Ala lai gə́ dɔ naŋg nee d’a koo kaji lə Ala lé gə kəm dee nda̰-nda̰ ya .
7Yeḛ ula dəwje gə́ bula digi-digi gə́ ree rəa’g mba karee ra dee batɛm lé pana: Seḭ ŋgan li-meewaije lé see na̰ ɓa wɔji sí loo kaḭ oŋg gə́ a ree lé wa . 8Ɓó lé seḭ waje ndòo rɔ sí dɔ kaiya’g lə sí ndá teḛje gə kée gə́ raga ɓó pajena Abrakam ɓa gə bɔ síje, paje bèe el! mbata ma m’ula sí təsərə ya, kɔr mbalje gə́ nee ya Ala lé askəm tel dee gə́ ŋganje kar Abrakam ya . 9Tina to ŋgira kagje’g béréré-béréré mba̰. Kag gə́ rara ɓa gə́ andə gə ka̰dee gə́ maji el ndá d’a tuga badə gaŋg kila pər’d .
10Boo-dəwje neelé dəjee pana: Bèe ŋga, see j’a ra ba̰ ŋga gə rɔ sí wa.
11Yeḛ tel ila dee keneŋ pana: Nana ɓa gə́ kubu kula rəa’g joo ɓa ka̰ ŋgokea̰ gə́ dəw godo ndá maji karee un kára bəl aree. Nana ɓa gə́ to njekiŋga nésɔ kara maji karee ra togə́bè ya tɔ.
12Deḛ njétaa lar-gədɓeeje to ŋga ree rəa’g mba karee ra dee batɛm ya tɔ ndá deḛ dəjee pana: Mbai, see jeḛ yḛ̀ j’a ra ba̰ to ŋga gə rɔ sí wa .
13Yeḛ tel ila dee keneŋ pana: Né gə́ d’ula sí kula lé seḭ a tədje maree kilaje dɔ’g kára bèe godo.
14Deḛ gə́ njérɔje tɔ ŋga dəjee pana: Ŋga jeḛ lé see j’a ra ba̰ to wa.
Yeḛ ila dee keneŋ pana: Maji kar sí taaje lar lə dəw kára kara dɔ buguru el ləm, seḭ a kilaje taŋgɔm dɔ dəw’g el ləm tɔ. Nékoga-dɔ-ji sí lé ɓa seḭ a kundaje meḛ sí dɔ’g ya.
15Boo-dəwje lai lé meḛ dee to kəgəgə dɔ Ja̰’g ar dee maḭta meḛ dee’g pana: See Ja̰ lé to gə́ Kristi lé el wa. 16Ja̰ un ta ula dee pana: Ma lé mán ɓa wɔji dɔm gə mba karm m’ra sí ne batɛm nɛ yeḛ gə́ a gə ree lé siŋgá ur dɔm’g pubug. Ma m’askəm tudu kúla négɔlje ləa wad lé gə dɔrɔm el. Yeḛ nja ɓa a ra sí batɛm gə Ndilmeenda gə pər tɔ. 17Nékwayiŋga dɔ kó ləa to jia’g, yeḛ a kwa ne yiŋga dɔ kó loo-kunda-kó’g ləa ndá yeḛ a mbo̰ kandə kó ləa kɔm dàmá nɛ yeḛ a roo yiŋga dəa dan pər gə́ a kwəi nda̰ el.
18Togə́bè ɓa Ja̰ tɔji dee goo néje gə́ raŋg ɓəd-ɓəd loo bula ɓəi, unda ne no̰ tagə́maji lé ar dee d’oo. 19Nɛ Herɔdə gə́ to njeguburu dəb ɓee lé Ja̰ ndaŋgee mbata Herodias gə́ to dené lə ŋgokea̰ gə́ yeḛ təa ləm, gə dɔ néje ɓəd-ɓəd gə́ ra majel’g lé ləm tɔ. 20Ndá Herɔdə lé ḭ ra né gə́ majel gə́ raŋg ila dɔ maree’g ya ɓəi, ar dee d’wa Ja̰ d’ilá daŋgai’g .
Ja̰ ra Jeju batɛm
Mat 3.13-17, Mar 1.9-11
21Boo-dəwje lai lé d’ar Ja̰ ra dee batɛm mbad-mbad ləm, ra Jeju nja batɛm ləm tɔ. Loo gə́ Jeju aar ra tamaji lé ndá kəm dara teḛ wərərə 22ar Ndilmeenda nar asəna gə dərnda ree si dəa’g. Ndu dəw ɓar gə́ par gə́ dara wəl pana: I lé to Ŋgonəm gə́ gəd-gəd gə́ m’undai dan kəm’g, i taa kəm rəgm ya .
Ginka Jeju Kristi lé
Mat 1.1-17
23Loo gə́ ləb koji Jeju aḭ rɔ-munda jén mba̰ ɓa yeḛ un kudu ra kula gə́ wɔji dəa lé ɓəi ndá koso-dəwje d’ə̰ji ta dəa’g d’ée gə́ ŋgolə Jisəb, gə́ to ŋgolə Heli 24ŋgolə Matat, gə́ to ŋgolə Lébi, gə́ to ŋgolə Melsi, gə́ to ŋgolə Janai, gə́ to ŋgolə Jisəb, 25gə́ to ŋgolə Matatias, gə́ to ŋgolə Amɔs, gə́ to ŋgolə Nahum, gə́ to ŋgolə Esli, gə́ to ŋgolə Naggai, 26gə́ to ŋgolə Maat, gə́ to ŋgolə Matatias, gə́ to ŋgolə Semei, gə́ to ŋgolə Joses, gə́ to ŋgolə Joda, 27gə́ to ŋgolə Joanan, gə́ to ŋgolə Resa, gə́ to ŋgolə Jorobabel, gə́ to ŋgolə Salatiel, gə́ to ŋgolə Neri, 28gə́ to ŋgolə Melsi, gə́ to ŋgolə Adi, gə́ to ŋgolə Kosam, gə́ to ŋgolə ka̰ Elmadam, gə́ to ŋgolə Er, 29gə́ to ŋgolə Jeju, gə́ to ŋgolə Eliéjer, gə́ to ŋgolə Jorim, gə́ to ŋgolə Matat, gə́ to ŋgolə Lébi, 30gə́ to ŋgolə Simeo̰, gə́ to ŋgolə Juda, gə́ to ŋgolə Jisəb, gə́ to ŋgolə Jonam, gə́ to ŋgolə Eliakim, 31gə́ to ŋgolə Meləa, gə́ to ŋgolə Mena, gə́ to ŋgolə Matata, gə́ to ŋgolə Natan, gə́ to ŋgolə Dabid, 32gə́ to ŋgolə Isai, gə́ to ŋgolə Jobed, gə́ to ŋgolə Booj, gə́ to ŋgolə Salmo̰, gə́ to ŋgolə Naaso̰, 33gə́ to ŋgolə Aminadab, gə́ to ŋgolə Admin, gə́ to ŋgolə Arni, gə́ to ŋgolə Esrɔm, gə́ to ŋgolə Parɛs, gə́ to ŋgolə Juda, 34gə́ to ŋgolə Jakob, gə́ to ŋgolə Isaak, gə́ to ŋgolə Abrakam, gə́ to ŋgolə Tara, gə́ to ŋgolə Nakɔr, 35gə́ to ŋgolə Seruk, gə́ to ŋgolə Rago, gə́ to ŋgolə Palek, gə́ to ŋgolə Eber, gə́ to ŋgolə Sala, 36gə́ to ŋgolə Kayinam, gə́ to ŋgolə Arpajad, gə́ to ŋgolə Sem, gə́ to ŋgolə Noe, gə́ to ŋgolə Lamek, 37gə́ to ŋgolə Matusala, gə́ to ŋgolə Enɔk, gə́ to ŋgolə Jared, gə́ to ŋgolə Maléléel, gə́ to ŋgolə Kayina̰, 38gə́ to ŋgolə Enɔs, gə́ to ŋgolə Set, gə́ to ŋgolə Adam, gə́ to ŋgolə Ala lé.
Currently Selected:
Lugu 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
