Lugu 2
2
Koji Jeju Kristi lé
1Mee ndəaje’g neelé Sesar Auguste un ndia mba kar dee tura dəwje lai-lai dɔ naŋg nee kunda ne ri dee mee maktub-tura-dəwje’g. 2Kunda ri dəwje mee maktub’g neelé to yee gə́ dɔtar mee ləb gə́ Kirinius to ne njeguburuɓee gə́ Siri. 3Togə́bè dəwje kára-kára lai d’aw d’ar dee d’unda ri dee mee maktub’g gə goo ɓee lə dee lə dee.
4Jisəb kara ḭ Galile mee ɓee gə́ ria lə Najaret mba kaw Jude mee ɓee-boo’g lə Dabid gə́ ɓaree Betlehem, mbata yeḛ to ŋgoka Dabid gə́ koji kəi kɔl ɓa yeḛ si aw ne gə mbəa 5gə mba kar dee d’unda ne ri dee-deḛ gə Mari goo dee’g tɔ, mbata yeḛ wɔji-kwɔji təa nɛ yeḛ aw gə kèm mée’g liew-liew tɔ. 6Loo gə́ d’isi lée’g ndá ndɔ koji ŋgon lə Mari lé teḛ keneŋ wai tɔ, 7aree oji ŋgondəree gə́ diŋgam keneŋ. Yeḛ ɓiree gə kubu ilá mee bəgərə sɔ né’g lə maŋgje mbata loo-to as dee Kəi-to-mbàje’g el.
Kura gə́ dara teḛ dɔ njéŋgəmbadje’g
8Njéŋgəmbadje d’isi wala dəb loo gə́ kára bèe d’isi ŋgəm koso-badje lə dee keneŋ, to dan loo’g. 9Aa ooje kura lə Mbaidɔmbaije ḭ dara teḛ dɔ dee’g təsərə ar rɔnduba lə Mbaidɔmbaije ndogó gugu dɔ dee sub. Ɓəl unda dee badə gaŋg dee ar dee d’unda bala tigi-tigi tɔ. 10Nɛ kura gə́ dara lé ula dee pana: Ɓəlje el ɓòo! Mbata ta gə́ maji ɓa ma m’ula sí ya, taree lé a to gin kalrɔ gə́ boo mbata lə dəwje mbad-mbad ya. 11Kàr gə́ ɓogənè ɓa d’oji njekaji sí mee ɓee-boo’g lə Dabid d’ar sí, yeḛ to Kristi, Mbaidɔmbaije lé. 12Ŋgonkas neelé deḛ ɓiree gə kubu d’ilá mee bəgərə sɔ né’g lə maŋgje, seḭ a kéeje keneŋ ya, yee ɓa seḭ a gəreeje ne ya tɔ.
13Léegəneeya boo-dəwje gə́ dara teḛ digi-digi gə kura gə́ dara neelé. Deḛ pidi Ala lé yaa̰ d’ɔs ne pa pana:
14Ulaje rɔnduba dɔ Ala’g lé, seḭ gə́ síje mee dara’g lé
Deḛ gə́ dɔ naŋg nee gə́ taa kəmee rəgm lé d’a sí ne dan meekulɔm’g tɔ.
Njéŋgəmbadje d’aw Betlehem
15Loo gə́ kuraje gə́ dara lé d’ya̰ dee tel gə́ dɔ gɔl dee’g dara mba̰ ndá njéŋgəmbadje neelé d’ula ta dee pa gə na̰ ta gə́ yo gə́ nee pana: Ar sí j’awje njal Betlehem j’aw j’ooje né gə́ Mbaidɔmbaije tɔji sí lé j’ooje.
16Deḛ d’ɔs rɔ dee ɓad d’ɔm na̰ rəbee d’aw ndá d’iŋga Mari ləm, gə Jisəb ləma, ŋgonkas lé kara to mee bəgərə sɔ né’g lə maŋgje’g ya ləm tɔ. 17Loo gə́ deḛ d’ée mba̰ ndá deḛ d’ɔr soree gə́ kura gə́ dara pa taree ar dee wɔji dɔ ŋgonkas neelé. 18Deḛ lai gə́ d’oo ta gə́ njékulbadje d’ula dee lé kaar dee wa dee paḭ. 19Nɛ Mari wa ta neelé mée’g bururu, aree to mée’g ɗəŋ tɔ. 20Njéŋgəmbadje lé d’isi tel gə́ loo’g lə dee ndá d’ula rɔnduba dɔ Ala’g ləm, deḛ pidee ne ta-ta ləm tɔ, ɓa d’aw ɓəi mbata néje lai gə́ deḛ d’oo taree gə mbi dee ləm, gə d’oo gə kəm dee ləm tɔ, to gə́ d’ula dee lé ya.
21Loo gə́ ndɔ aḭ jinaijoo ndá deḛ d’inja tamɔd ŋgon neelé keneŋ ɓa d’unda ria ɓəi, ria gə́ d’unda gə́ Jeju lé to ri gə́ kura gə́ dara unda dəa’g kédé ɓa kea̰je əskèmee ɓəi tɔ .
D’un Jeju d’aw səa mee kəi-Ala’g
22Loo gə́ ndɔ teḛ ŋgon as mba̰, to gə́ godndu Moyis wɔji lé ndá Jisəb gə Mari d’ḭ gə ŋgonkas lé d’aw səa Jerusalem mba kundá gə kəmee kar Mbaidɔmbaije , 23gə goo ta gə́ ndaŋg mee maktub godndu’g lə Mbaidɔmbaije lé pana: Ŋgandərje gə́ diŋgam kára-kára lai lé d’a kɔr dee kunda dee gə kəmee doi mbata lə Mbaidɔmbaije . 24Deḛ d’un nékinjaməs d’ar Ala, dərkulje joo əsé dərndaje joo to gə́ ndaŋg taree mee maktub godndu’g lə Mbaidɔmbaije lé tɔ,
25Dəw kára si Jerusalem ria lə Simeo̰. Yeḛ to dəw gə́ njemeekarabasur ləm, gə njekwa Ala lé mée’g ləm tɔ. Yeḛ ŋgina né gə́ a kar meḛ Israɛlje to lɔm lé ləm, Ndilmeenda dəb dəa’g bigim ləm tɔ. 26Ndilmeenda lé riba səa dəa kédé pana: A kwəi el saar a koo Kristi lə Mbaidɔmbaije gə kəmee ya ɓa. 27Ndilmeenda ɔsee ɓɔḭ-ɓɔḭ aw səa mee kəi-Ala’g. Njékoji Jejuje kara d’unee ree səa mba ra səa to gə́ ndaŋg ne taree mee maktub godndu’g lé 28ndá Simeo̰ unee ɓəgəgə odee gə kag jia pidi ne Ala lé pana:
29Ɓasinè lé Mbaidɔmbaije, ya̰ kura ləi
Aree aw gə mée gə́ kulɔm ŋga, gə goo tapai gə́ i pa lé ŋga.
30Mbata m’oo kaji ləi gə kəm mba̰
31To kaji gə́ i nja wa dɔ gɔlee kəm koso-dəwje mbad-mbad lé tɔ.
32Yee neelé to lookàr gə́ a ndogó jol-jol dɔ ginkoji dəwje gə raŋg’g ləm,
A kula rɔnduba dɔ koso-dəwje ləi gə́ Israɛl lé ləm tɔ .
Ndərta gə́ Simeo̰ pa lé
33Ta gə́ Simeo̰ pa ar ta igi bɔ ŋgonje gə kea̰je sel dɔ ta néje lai gə́ yeḛ pa wɔji ne dɔ ŋgon neelé. 34Simeo̰ tɔr ne ndia dɔ dee’g, ula Mari gə́ ko̰ ŋgonje lé pana: Aa oo, ŋgon neelé d’unda no̰ dee’g ɗaŋg gə né kɔr koso gə nékuba loo kḭ lə dəwje bula gə́ Israɛl ləm, gə nétɔji gə́ a kar dee d’aw ne gə na̰ puduru-puduru ya ləm tɔ. 35Togə́bè i nja kara kiambas a riba ɓəŋgəri ɓó gə mba kar takə̰jije lə dəwje bula kinja ne gə́ raga.
Njetegginta gə́ dené ria lə An
36Njetegginta gə́ dené ria lə An, to ŋgolə Panuel gə́ ginkoji lə Aser. Yeḛ ɓuga mba̰. Yeḛ si gə ma̰dee kəi lə ŋgabeeje as ləbee siri ɓa ŋgabeeje wəi. 37Yeḛ si gə́ njekəisiŋga ɓəi ar ləbee aḭ rɔ-jinaijoo-giree-sɔ ndá yeḛ ya̰ mee kəi-Ala un gɔlee unda raŋg ndɔ kára el. Yeḛ wa Ala mée’g loondul’g gə dan kàrá ləm, ɔg ne mée ɓoo ta-ta ra ne tamaji təa’g ləm tɔ. 38Kàree neelé yeḛ kara ree iŋga dee keneŋ tɔ ndá yeḛ pidi Ala lé yaa̰ tɔ. Yeḛ pata lə ŋgonkas neelé ar dəwje lai gə́ d’isi kərm ŋgina njetaa dɔ dee gə́ si Jerusalem lé.
Tel kaw Najaret gogo lé
39Loo gə́ deḛ tɔl ta néje gə́ godndu lə Mbaidɔmbaije wɔji bém mba̰ ndá Jisəb gə Mari tel d’aw Galile mee ɓee lə deḛ gə́ Najaret . 40Ŋgon neelé ra tɔg pir-pir ləm, rəa to kəmba ŋgəŋ-ŋgəŋ ləm tɔ. Kəmkàr rusu mée njḭ-njḭ ləm, noji lə Ala nai səa ya ləm tɔ.
41Njékoji Jejuje d’aw Jerusalem gə ləb dee ləb dee ra naḭ Pag keneŋ . 42Loo gə́ ləbee aḭ dɔg-giree-joo ndá deḛ tuga loo d’aw səa keneŋ loo-naḭ’g to gə́ néjiɓee lə dee. 43Tɔɓəi loo gə́ rudu naḭ lé un ɗiao ar dee d’ḭ gə mba tel kaw ɓee lə dee gogo ndá Jeju gə́ ŋgon dee lé nai Jerusalem yag, ar njékojeeje lé gər loo nai ləa gə́ yeḛ nai gogo lé el. 44Deḛ lé d’ə̰ji ta meḛ dee’g pana: Yeḛ wa gaŋg goo njéboalookawje’g lə neḛje gə́ raŋg ar dee ra ndɔ kára rəbə ɓa deḛ ndolee mbuna njénojije’g lə dee ləm, gə mbuna deḛ gə́ to gə́ baokuraje’g lə dee ləm tɔ. 45D’wa ta kàr d’ula naŋg mɔrɔg ndá deḛ tel tuga ta dee naŋg njag d’aw tor dee’g Jerusalem mba saŋgee keneŋ. 46Ndɔ munda lə dee ɓa d’iŋgá mee kəi-Ala’g, yeḛ ta̰ pə̰ njégərgosɔ godnduje si dan dee’g si oo tapa dee ləm, yeḛ kara dəji dee ta ləm tɔ. 47Deḛ lai gə́ d’oo tapea lé kaar dee wa dee paḭ dɔ ta kəmkàr gə́ teḛ təa’g ləm, gə ta gə́ tel ila’g ləm tɔ. 48Loo gə́ njékojeeje lé teḛ dəa’g təsərə-təsərə ndá kaar dee wa dee paḭ ar dee d’ila ji dee ta dee’g sud ɓa, kea̰je dəjee pana: Ŋgonəm, see ban ɓa ra sə sí nje gə́ tal nee wa. Aa oo, jeḛ gə bɔbije j’unda-kundai n’sa̰gi jəmə-jəmə.
49Yeḛ tel ila dee keneŋ pana: See saŋgmje gə mba ɗi wa. See seḭ gərje to gə́ néje lə Bɔm lé ndəa teḛ mba̰ gə mba karm m’ula gɔŋgm keneŋ el wa.
50Nɛ ta gə́ yeḛ ula dee lé deḛ gər rəbee el.
51Yen ɓa, yeḛ tədkag dee uba naŋg ḭ aw sə dee ɓee lə dee gə́ Najaret lé ɓəi. Ta neelé kea̰je wa mée’g bururu tɔ. 52Jeju lé ra tɔg ar kəmee àr raŋg raŋg ləm, ra tɔg gə́ darɔ’g ləma, yeḛ taa kəm Ala gə kəm dəwje ləm tɔ .
Currently Selected:
Lugu 2: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
