Lugu 12

Jeju ndəji njékwakiláje mbata njéhulaije

Mat 10.26-27

1 # Mat 16.6, Mar 8.15 Mee ndəaje’g neelé koso-dəwje bula digi-digi mbo̰ na̰ rəa’g d’uba na̰ tususu ndá Jeju un kudu kula njékwakiláje pana: Aaje rɔ sí kər-kər dɔ né gə́ ar nduji ti’g gə́ ka̰ Parisiḛje gə́ to gə́ néhulai lé. 2Né gə́ rara gə́ d’udu dəa gə́ d’a lal teḛ gə́ raga lé kára kara godo ləm, né gə́ rara gə́ iya rəa gə́ d’a lal gəree lé kára kara godo ləm tɔ#Mar 4.22, Lug 8.17. 3Gelee gə́ nee ɓa né gə́ rara ɓa gə́ seḭ a paje taree dan loo’g kara d’a koo dan kàrá pai-pai ləm, né gə́ rara ɓa gə́ seḭ a wédéje taree mbi na̰’g duu-loo’g mee kəi’g kara d’a kuba ne dɔ kəi gə́ tar kila ne mber ɓəgəgə-ɓəgəgə ləm tɔ.

Yeḛ gə́ kəm ɓəlee lé

Mat 10.28-31

4Seḭ gə́ toje baokuraje ləm lé ma m’ula sí təsərə: Deḛ gə́ d’askəm tɔl darɔ sí nɛ gée’g gogo ndá d’askəm ra né gə́ raŋg el lé maji kar sí ɓəl deeje el. 5M’a tɔji sí yeḛ gə́ kəm kar sí ɓəleeje ya. Yeḛ gə́ tɔl sí ɓa siŋga as mba kɔm sí dan pər gehene’g lé ɓəi maji kar sí ɓəleeje ya. Oiyo, ma m’ula sí təsərə, yeḛ nja ɓa kəm kar sí ɓəleeje ya.

6See tḭtḭje mi lé deḛ ndogo dee gə ŋgan larje joo el wa. Nɛ lé bèe kara mee Ala lé unda pudum dɔ yee gə́ kára kara mbuna dee’g el. 7Seḭje lé yiŋga dɔ sí ya kara yeḛ tura dee dém-dém tɔ. Bèe ndá ɓəlje pai godo, mbata gad sí-seḭ lé to ɓai-ɓai unda ka̰ tḭtḭje gə́ bula lé.

Teḛ gə ri Jeju, gə lɔm dɔ Jeju

Mat 10.32-33, 12.32, 10.19-20

8Ma m’ula sí təsərə, dəw gə́ rara ɓa gə́ a teḛ gə rim no̰ dəwje’g ndá Ŋgon-dəw lé a teḛ gə ria-yeḛ no̰ kuraje’g lə Ala gə́ dara ya tɔ. 9Nɛ yeḛ gə́ rara ɓa gə́ lɔm dɔm kəm dəwje’g ndá d’a lɔm dəa kəm kuraje’g lə Ala gə́ dara ya tɔ.

10Nana ɓa gə́ ila ta dɔ Ŋgon-dəw’g lé ndá yeḛ a kar mée ti mbidi dɔ’g ɓəi, nɛ nana ɓa gə́ ila ndɔl dɔ Ndilmeenda’g lé ndá yeḛ a kar mée ti mbidi dɔ’g pai godo#Mat 12.32, Mar 3.29.

11Loo gə́ d’a ndɔr sí kaw sə sí mee kəi-kwa-dɔ-na̰je’g ləm, əsé no̰ mbai dɔ njégaŋgtaje’g ləma, əsé no̰ njéko̰ɓeeje’g ləm tɔ ndá maji kar sí arje meḛ sí pélé wəs-wəs dɔ ta gə́ seḭ a gə kɔrje mba taaje ne dɔ sí el ləm, əsé ta gə́ seḭ a paje keneŋ el ləm tɔ#Mat 10.19-20, Mar 13.11, Lug 21.14-15, 12mbata Ndilmeenda lé nja a ndoo sí ta gə́ kəm pa lé kar sí paje gə́ léegəneeya.

Gosɔta gə́ wɔji dɔ bao gə́ to mbə

13Dəw kára gə́ mbuna boo-dəwje’g neelé un ta ula Jeju pana: Mbai, ula ŋgokɔm aree unda kəm nénduba lə sí dana ar sí n’kai na̰.

14Jeju tel ila dəw gə́ neelé pana: I dəw nee, see na̰ ɓa ɔrm undam gə́ njera rəwta lə sí əsé njekunda kəm né lə sí dana kai sí wa.

15Tɔɓəi yeḛ tel təa ula dee pana: Undaje rɔ sí ɓad dɔ nékəmkəḭ gə́ rara kara, mbata nékiŋga gə́ dəw sí danee’g bèdèg ɓa gə́ kuma̰ karee si ne gə kəmə lé el.

16Tɔɓəi Jeju ula dee gə́ gosota nee pana: Mee ndɔ lə dəw kára gə́ to gə́ bao lé koje gə́ keneŋ unda yaa̰. 17Yeḛ ə̰ji ta mée’g pana: See n’a ra ba̰ ŋga wa. Mbata neḛ n’oo loo as gə mba mbula kó lə neḛ keneŋ el. 18Tɔɓəi yeḛ ula rəa pana: Yee gə́ nee ɓa n’a gə ra, n’a jané damje lə neḛ ndá n’a gə njé gə́ boi unda njé gə́ kédé, tɔɓəi n’a kɔm koje lə neḛ gə némajije lə neḛ lai keneŋ tɔ, 19ndá n’a kula rɔ neḛ pana: Rɔm, nékiŋgai to yaa̰, a ra səi ləb bula yaa̰. Bèe ndá maji kari taa kəmə ɓó gə sɔ gə ai ra ne rɔlel tɔ. 20Nɛ Ala ulá pana: I mbə-dəw, mee til’g nee ya d’a ree kuba kankəmrɔi kwa, ŋga néje ləi lai gə́ i wa dɔ gɔl dee jəb-jəb mba̰ lé see d’a tel to ka̰ nawa.

21A to togə́bè gə dəw gə́ mbo̰ nékiŋgaje ləa wɔji ne dɔ rəa-yeḛ nja ɓó to bao-nékiŋga mbata lə Ala el.

Ɔmje meḛ sí dɔ Ala’g lé

Mat 6.25-34

22Tɔɓəi yeḛ un ta ula njékwakiláje pana: Gelee gə́ nee ɓa ma m’ula sí ne təsərə: Arje meḛ sí pélé wəs-wəs dɔ rɔ sí’g el wɔji ne dɔ nésɔ sí’g əsé dɔ né ko̰ rɔ sí’g el. 23Mbata si kəmba lə sí ur dɔ nékusɔ’g ləm, darɔ sí kara uru dɔ néko̰ rɔ sí’g ləm tɔ. 24Oreeje kəm sí sḭ dɔ ga̰-ga̰je’g oo deeje. Dee lé dubu né el ləm, d’inja kó el ləm, dee d’uru bwa ɓa d’ɔm né keneŋ el ləma, dee d’ur dam ɓa d’ɔm né keneŋ el ləm tɔ, nɛ Ala nja gə́ njekul dee ya. See gad sí-seḭ lé ur dɔ ka̰ yelje gə́ d’aw tar lé ɓai-ɓai el wa. 25See na̰ ɓa mbuna sí’g ɓó lé mée pélé wəs-wəs dɔ rəa’g ndá askəm kar ləb-siée ḭ ŋgal ne gə kuree ɗegəse gə́ kédé ɓəi wa. 26Bèe ndá ɓó lé seḭ asjekəm raje né gə́ tḛ́ bèe gə dɔrɔ sí el ndá ŋga see ban ɓa seḭ arje meḛ sí pélé wəs-wəs dɔ ges néje gə́ raŋg’d ɓəi wa. 27Oreeje kəm sí sḭ dɔ pudu ndujaje’g gə́ mee ndɔ’d ooje, puduje neelé ra kula el ləm, sorè kula yereŋ el ləm tɔ. Nɛ lé bèe kara ma nja m’ula sí təsərə, loo ndubarɔ lə Salomo̰ gə kubu gə́ rəa’g kara ur dɔ pudu ndujaje’g neelé el#1Mb 10.4-7, 2SgI 9.3-6. 28Ɓó lé Ala lé gə́ njekar muje d’ḭ ma̰də nɛ mu gə́ ḭ ma̰də ndɔ kára ba ɓa bèlè d’inja yel ne pər mee pil’g ɓəi nɛ ɓəd ɓa see yeḛ a lal kar sí nékula rɔ sí’g wa, seḭ njémeekunje gə́ əḭ el. 29Bèe ndá seḭ lé arje meḛ sí pélé wəs-wəs dɔ rɔ sí’g ar sí pajena: See ɗi ɓa j’a sɔ wa, əsé see ɗi ɓa j’a kai wa lé maji kar sí paje bèe el. 30Mbata néje lai gə́ togə́bè lé njépole-magəje gə́ dɔ naŋg nee ɓa gə́ njésaŋ géeje ya. Nɛ Bɔ síje lé gər né gə́ seḭ awje ndée lé gao. 31Nɛ saŋgje ɓeeko̰ lə Ala kédé ɓa néje lai neelé a kar sí dɔ’g ɓəi.

Waje dɔ gɔl nébaoje gə́ to dara

Mat 6.19-21

32Seḭ koso-nékulje ləm, ɓəlje el, mbata Bɔ síje lé wɔji-kwɔji kar sí ɓeeko̰ lé gə meendakaḭ ya. 33Ndogoje néje lə sí ya̰je laree gə́ nékoo kəmtondoo lə njéndooje. Raje ɓɔl-larje gə́ a ŋgisi el, yee ɓa gə́ nébao lə sí gə́ a kaḭ gə́ mán-ŋgur dara to loo gə́ njéɓogoje kɔdee loo ɓogo keneŋ el ləm, dirije d’unda né keneŋ el ləm tɔ. 34Mbata loo gə́ nébao lə sí to keneŋ ndá lé neelé meḛ sí a to gə́ keneŋ kərm tɔ.

Ŋginaje pèrèrè

35Maji kar sí waje ɓər sí gə ndar njim-njim, arje néndogoje lə sí ndogó wər-wər tɔ#Mat 25.1-13. 36Seḭje lé maji kar toje asəna gə kuraje gə́ d’isi ŋgina ɓée deeje gə́ a kḭ loo ra naḭ kunda dené kəi-ŋgaw’g lé ɓó gə mba kɔr takəi karee loo gə́ yeḛ a ree kunda tabidi rəw-kəi lé tɔ#Mar 13.34-36. 37Kuraje gə́ ɓée deeje ree iŋga dee loo-kisi gə́ d’isi dɔkəji dee’g pèrèrè ndá rɔ dee a lel dee ya. Ma m’ula sí təsərə, yeḛ nja ɓa a tɔ kubu ləa njim-njim ləm, a kar dee d’wa na̰ ta ka-nésɔ’g ko̰-ko̰ ləma, a ree pər gə́ rɔ dee’g mba kar dee né d’usɔ ləm tɔ. 38Lé yeḛ a tel dan loo bab əsé jidɔɓee’g ɓa lé iŋga dee loo-si gə́ d’isi dɔkəji dee’g pèrèrè kara deḛ kuraje neelé rɔ dee a lel dee ya. 39Ooje maji, ɓó lé njekəi gər kàr gə́ njeɓogo a gə ree ne kəi ləa ndá a si dɔkəjee’g kəgəgə ɓó a kya̰ rəw gə mba kar njeɓogo tila kəi ləa mbudu el. 40Seḭje kara waje dɔ gɔl rɔ sí síje ne dɔkəji sí’g kəgəgə tɔ, mbata Ŋgon-dəw lé a ree dɔ kàr gə́ seḭ si go̰je lé el#Mat 24.43-44.

Majikoji əsé njerɔkas

Mat 24.45-51

41Piɛrə dəjee pana: Mbaidɔmbaije, see gosota neelé ula síjeḛ ba əsé ula dəwje gə́ raŋg bura to wa.

42Mbaidɔmbaije ilá keneŋ pana: See na̰ ɓa gə́ kura gə́ to majikoji gə́ inja paw gə́ mbai ləa aree si gə́ njekaa dɔ kuraje’g ləa gə́ raŋg gə mba kai dee nésɔ dee gə lée-lée lé wa. 43Kura neelé gə́ mbai ləa teḛ dəa’g iŋgá loo néra gə́ togə́bè’g ndá yeḛ a kisi dan rɔlel’g ya. 44Ma m’ula sí təsərə, yeḛ a kunee kundá gə́ njekaa dɔ néje ləa lai ya. 45Nɛ ɓó lé kura neelé ə̰ji ta mée’g pana, Mbai lə neḛ a ree dəb el ɓəi, ɓó lé yeḛ ḭ bigim ur dɔ kuraje gə́ diŋgam gə njé gə́ dené ɓa un kudu kunda dee ləm, sɔ né gə́ ai kido aree tɔlee ləm tɔ 46ndá mbai lə kura neelé a ree mee ndəa əsé gə kàree gə́ yeḛ si go̰ lé el ndá a kur dəa’g kundá gə ndəi gaŋg rəa təgərə-təgərə ləm, a karee si gə njékaltaje na̰’d ləm tɔ.

47Kura gə́ gər godndu mbai ləa nɛ yeḛ wa dɔ gɔl rəa el ləm, ra torndia el ləm tɔ ndá d’a kundá yaa̰ kar rəa ila ɓiriri-ɓiriri. 48Nɛ yeḛ gə́ gər torndu ɓéeje el, nɛ yeḛ ra né gə́ kəm kar bea̰ ɔs təa’g ndá kara d’a kundá ji dee bula el. Nana ɓa gə́ d’ɔm né jia’g yaa̰ ndá d’a dəjee gée yaa̰ ɓəi ləm, nana ɓa gə́ d’ɔm né jia’g ɔs dɔ maree yaa̰ ɓəi ndá d’a tel taa jia’g ɓad-ɓad ɓəi ləm tɔ.

Jeju to gin tḭ-na̰ lə dəwje

Mat 10.34-36

49Ma m’ree gə mba kila pər dɔ naŋg nee, nɛ ɓó lé yel pər keneŋ d’aree taa mba̰ ŋga see ɗi ɓa m’a ndiŋga ne rɔm ɓəi wa. 50Batɛm to keneŋ mba kar dee ram ɓəi, ta kar dee ra tɔl bém ɓa wa məəm ya#Mar 10.38. 51See meḛ sí ndaji ta pana: Ma m’ree gə mba kar naŋg nee to gə loo-kulee lɔm wa. Wah! bèe el ɓəi, nɛ ma m’ree gə mba kar ta tḭ-na̰ ɓa oso ya. 52Mbata un gelee ɓasinè lé loo gə́ dəwje dee mi d’isi mee kəi gə́ kára’g ndá d’a kɔr kəm na̰ ya, njé gə́ munda d’a tḭ gə njé gə́ joo ləm, njé gə́ joo d’a tḭ gə njé gə́ munda ləm tɔ. 53Bɔ ŋgon a kḭ tḭ gə ŋgonee gə́ diŋgam ləm, ŋgon gə́ diŋgam a kḭ tḭ gə bɔbeeje ləm tɔ, ko̰ ŋgon a kḭ tḭ gə ŋgonee gə́ dené ləm, ŋgon gə́ dené a kḭ tḭ gə kea̰je ləm tɔ, njeməm gə́ dené a kḭ tḭ gə məmeeje gə́ dené ləm, məmeeje gə́ dené a kḭ tḭ səa-yeḛ ləm tɔ#Mis 7.6.

Néje gə́ wɔji dɔ ndəa lé

Mat 16.2-3

54Yeḛ tel ula boo-dəwje neelé pana: Loo gə́ seḭ ooje ndi pélé mee dara’g gə́ kel dɔ-gó lé ndá léegəneeya seḭ pajena: Ndi si ree ŋga. Ndá ndi lé ree ya tɔ. 55Loo gə́ seḭ ooje lel ḭ gə́ kel dɔkɔl bèe sí ula ndá seḭ pajena: Loo a gə nuŋga. Ndá loo lé nuŋga ya tɔ. 56Seḭ njéhulaije! Dara gə naŋg nee ɓa seḭ gərje loo kundaje kəm néje gə́ keneŋ, ŋga see ban ɓa néje gə́ a gə ree gə́ tɔji sí ndəa lé seḭ gərje loo go̰je el ɓəi wa.

Ɔmje na̰’d gə njéba̰je lə sí

Mat 5.25-26

57See gelee ban ɓa seḭ go̰je loo ooje ne né gə́ to gə goo rəbee lé el wa. 58Loo gə́ i aw gə njeba̰ ləi no̰ njeko̰ɓee’g ndá ɔs rɔi ɓad gə mba kar sí-seḭ gə njetar ləi lé ɔmje na̰’d rəbə yəg ɓa nà banelə yeḛ a ndɔri kaw səi no̰ njegaŋ-rəwta’g ləm, kar njegaŋ-rəwta lé taai ulai ji njekaa dɔ daŋgai’g ləma, karee-yeḛ nja ilai daŋgai’g ndəd ya ləm tɔ. 59Ma m’ulai təsərə, lée gə́ neelé i a nai keneŋ saar njena a kuga gira ɓaŋgee ŋgər-ŋgər tɔ.

Currently Selected:

Lugu 12: SBA2015

Highlight

Copy