Lugu 13
13
Ɔsje badm telje
1Mee ndəa’g neelé njé gə́ na̰je gə́ d’aar keneŋ, d’ɔr sor né gə́ teḛ dɔ njé gə́ Galile’g lé d’ar Jeju oo, to né gə́ Pilatə ra loo gə́ yeḛ podé məs dəwje neelé gə məs néje gə́ d’inja gə́ məs lé na̰’d. 2Jeju ila dee keneŋ pana: See meḛ sí ndaji ta pana: Njé gə́ Galile’g lé to njékaiyaje d’ur dɔ njé gə́ Galile gə́ raŋg lai ɓa ar né gə́ togə́bè teḛ ne dɔ dee’g gə mbəa wa. 3Wah! bèe el. Nɛ ma nja m’ula sí təsərə ya, ɓó lé seḭ waje ndòo rɔ sí dɔ kaiya’g lə sí el ndá seḭje lai lé seḭ a kuduje bèe ya tɔ. 4Esé deḛ gə́ dɔg-gir-dee-jinaijoo gə́ kəi gə́ Siloe gə́ ŋgal gə́ duu dɔ loo lé təd unda dee tɔl dee lé see deḛ ɓa gə́ dəwje gə́ ta wa dɔ dee ur dɔ njéɓeeje gə́ Jerusalem gə́ raŋg wa. 5Wah! bèe el. Nɛ ɓó lé seḭ waje ndòo rɔ sí dɔ kaiya’g lə sí el ndá seḭ a kuduje to gə́ deḛ bèe ya tɔ.
Gosɔta gə́ wɔji dɔ kodé gə́ ka̰dee godo lé
6Jeju un ta ula dee gə gosota pana: Diŋgam kára ma̰a kodé mee ndɔ-nduú’g ləa. Yeḛ ree gə mba saŋg ka̰dee keneŋ nɛ yeḛ iŋga kára kara el. 7Yen ɓa yeḛ ula njeŋgəm ndɔ-nduú lé pana: Aa oo, as ləb munda ma m’ree keneŋ ta-ta gə mba saŋg kandə kodé lé nɛ m’iŋga ka̰dee keneŋ kára kara el nja saar. Bèe ndá tuga gaŋg mən, gelee ban ɓa aree to bə dɔ naŋg kari ba togə́bè wa. 8Njeŋgəm ndɔ-nduú lé ilá keneŋ pana: Mbai, maji kari ya̰ wəl nee ɓoŋ am m’ndɔ naŋg m’gugu ne dəa ləm, gə m’odo ɓiri-ɓisi m’ɔm keneŋ ləm tɔ am m’oo ɓa. 9Banelə ləb gə́ gogo yee a kandə gə́ kandə ya, ɓó lé bèe el ndá m’a tuga badə gaŋg ɓəi.
Jeju ɔr rɔko̰ rɔ dené ndɔ-kwa-rɔ’g
10Jeju ndoo dee ta gə ndɔ-kwa-rɔ mee kəi-kwa-dɔ-na̰ gə́ kára bèe. 11Aa ooje, dené kára bèe gə́ ndil gə́ yèr to mée’g aree to gə́ yɔ-dəw as ləbee dɔg-giree-jinaijoo ləm, wá rugee koŋgoŋ aree oo loo kɔr rəa gə́ tar el ləm tɔ lé si keneŋ. 12Loo gə́ Jeju aa loo ée ndá yeḛ ɓaree ulá pana: Dené, ji rəm ləi ɔr rɔi’g mba̰.
13Yeḛ ila jia dəa’g. Léegəneeya yeḛ ḭ ndɔji rəa ra̰daŋ gə́ tar ndá yeḛ pidi ne Ala tɔ. 14Yen ŋga mbai gə́ njekəi-kwa-dɔ-na̰ lé mée ḭ səa jugugu mbata Jeju ɔr rɔko̰ rɔ dəw’g gə ndɔ-kwa-rɔ. Yeḛ ula boo-dəwje neelé pana: Ndɔje gə́ misa̰ to keneŋ mba ra kula. Bèe ndá reeje gə ndəaje neelé ɓa gə mba kar dee d’ɔr rɔko̰ rɔ sí’g ɓó reeje gə ndɔ-kwa-rɔ el .
15Mbaidɔmbaije ilá keneŋ pana, Njéhulaije, see seḭje kára kára lai lé seḭ tuduje bɔ maŋg lə sí əsé mulayḛ̀je lə sí kəi-kulee’g ndɔreje awje səa mán gə mba karee ai mán gə ndɔ-kwa-rɔ’g el wa. 16Nɛ dené nee gə́ to gə́ ŋgon Abrakam gə́ Njekurai teá naŋg jo̰dɔrɔ as ləbee dɔg-giree-jinaijoo lé see tudu kúla lar rəa’g gə ndɔ-kwa-rɔ lé see to né gə́ kəm ra el wa.
17Loo gə́ yeḛ pa togə́bè ndá njéba̰je ləa lai rɔkul ra dee, nɛ boo-dəwje lai lé d’al rɔ dee wɔji dɔ néje lai gə́ maji dum gə́ yeḛ ra lé tɔ.
Gosɔta gə́ wɔji dɔ ka̰ kamnaḭ gə́ ɓaree senebe
Mat 13.31-32, Mar 4.30-32
18Jeju ula dee tɔɓəi pana: See ɓeeko̰ lə Ala lé to tana ɗi wa. See ɗi ɓa m’a kwa kwɔjee ne wa. 19Yee to asəna gə kandə né gə́ ɓaree senebe gə́ dəw un dubu mee kamnaḭ’g ləa, yeḛ uba ndá ḭ ɓar-kag ar yelje gə́ tar ree d’wa na̰ barkəmee’g ko̰-ko̰ ra kəi lə dee keneŋ.
Gosɔta gə́ wɔji dɔ né gə́ ar nduji ti lé
Mat 13.33
20Yeḛ ula dee tɔɓəi pana: See ɗi ɓa m’a kwa kwɔji ne ɓeeko̰ lə Ala lé wa. 21Yee lé to asəna gə né gə́ ar nduji ti gə́ dené un wɔji nduji ŋgo munda ɔm danee’g gur ne aree ḭ dor-dor tɔ.
Tarəw gə́ njo̰ lé
Mat 7.13-14,21-23
22Jeju unda mee ɓee-booje gə ɓee-kogoje dana gaŋg aw ndoo ta keneŋ kəmee gə́ Jerusalem. 23Dəw kára un ta dəjee pana, Mbai, see dəwje gə́ d’a gə kaji lé d’a bula bəl ba bèe wa.
Jeju tel ilá keneŋ pana: 24Ɔsje rɔ sí ɓad mba kandə gə tarəw gə́ njo̰ ɓa. Mbata ma m’ula sí təsərə, njé gə́ na̰je bula d’a saŋg loo gə mba kandə keneŋ nɛ d’a kas el.
25Loo gə́ njekəi lé a kuba naŋg kḭ tar gə mba kudu takəi ɓa seḭ a naije raga ndá a kunje kudu kundaje tabidi rəw-kəi, a pajena: Mbai, mbai, ɔr rəw ar sí. Nɛ yeḛ a kila sí keneŋ pana: Ma m’gər loo gə́ seḭ ḭje keneŋ el. 26Yen ŋga seḭ a kɔmje dɔ ta’g pajena: Jeḛ n’toje gə́ njésɔ seḭje gə njékai seḭje na̰’d ya ləm, i ndoo sí ta gə mba̰-rəwje gə́ lə sí ya ləm tɔ. 27Yeḛ a kila sí keneŋ pana, ma m’ula sí təsərə, ma m’gər loo gə́ ḭje keneŋ el. Seḭ njéra némajelje lai lé ɔdje ne tam’g gə́ gogo . 28Lée neelé a to loo no̰ gə mán-no̰ kəm’g ləm, gə loo sɔ ŋgaŋ pəgərə-pəgərə ləm tɔ loo gə́ seḭ a kooje Abrakam gə Isaak gə Jakob gə njéteggintaje lai mee ɓeeko̰’g lə Ala lé ya nɛ seḭje lé d’a kɔm sí gir loo’g raga tɔ . 29Koso-dəwje d’a kḭ bər gə dɔ-gó ləm, d’a kḭ dɔkɔl gə dɔgel ləm tɔ, d’a kwa na̰ kisi ta nésɔ’g mee ɓeeko̰’g lə Ala ya . 30Tɔɓəi aa ooje, deḛ gə́ to gə́ rudu dee gogo lé d’a tel to gə́ ŋgaw ta dee kédé, tɔɓəi deḛ gə́ to gə́ ŋgaw ta dee kédé lé d’a tel to gə́ rudu dee gogo tɔ .
Jeju njaa kəmee gə́ Jerusalem
Mat 23.37-39
31Mee ndəa neelé nja Parisiḛje gə́ na̰je ree rəa’g d’ulá pana: Ɔd loo gə́ nee’g aw mbata Herɔdə saŋg rəw gə mba tɔli.
32Jeju ila dee keneŋ pana: Ɔd aw ulaje pajena: Aa oo, ɓogənè gə bèlè m’isi m’tuba ndilje gə́ yèr meḛ dəwje’g ləm, ma m’ɔr rɔko̰ rɔ dee’g ləm tɔ, nɛ nona ɓa m’a kun rudee ɗiao ɓəi. 33Nɛ lé riri kara m’a njaa kəm gə́ kédé-kédé ɓogənè ləm, gə bèlè ləma, gə nona ləm tɔ, mbata kar njetegginta udu raga gir ɓee gə́ Jerusalem ɓa to né gə́ lée’g el.
34Jerusalem, Jerusalem, i gə́ tila njéteggintaje gə́ d’ula dee rɔi’g gə kɔri-ər tɔl dee lé see gɔl ka̰da ɓa ma m’ndiŋga rɔm gə mba mbo̰ ŋgani gelm’g to gə́ ko̰ kṵja mbo̰ ne ŋganee gel bagee’d bèe nɛ seḭ ndigije el nee wa. 35Aa ooje, d’a kuba kəi lə sí kya̰ mée wəl kar sí ya, nɛ ma m’ula sí təsərə, seḭ a koomje gogo el saar njena seḭ a pajena: Maji kar dɔkaisəgərə nai gə yeḛ gə́ ree gə ri Mbaidɔmbaije lé tɔ .
Currently Selected:
Lugu 13: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
