Lugu 11
11
Jeju ndoo dee ta gə́ wɔji dɔ tamaji
Mat 6.9-13, 7.7-11
1Ndɔ kára bèe Jeju ra tamaji dəb loo gə́ kára. Loo gə́ yeḛ əw rəa ndá njekwakilá gə́ kára mbuna mareeje’g ulá pana: Mbaidɔmbaije, maji kari ndoo sí loo ra tamaji lé to gə́ Ja̰ ndoo ne njékea̰je bèe tɔ.
2Yeḛ tel ula dee pana:
Loo gə́ seḭ a gə raje tamaji lé ndá pajena:
Bɔ síje, maji kar rii to gə kəmee ɓəd ləm,
Maji kar ɓeeko̰ ləi ree taa loo ləm tɔ.
3Ar sí muru j’o̰ as meḛ sí béréré gə ndɔ sí ndɔ sí ləm,
4Ar məəi oso lemsé dɔ kaiya’g lə sí
Mbata jeḛ kara j’ar meḛ sí oso lemsé dɔ nana ɓa gə́ mée ɔs sə sí gel lé tɔ,
Uba sí yag ya̰ sí dan nékər’g el.
5Tɔɓəi yeḛ tel təa ula dee pana: Ɓó lé dəw kára mbuna sí’g lé kuramaree si gən ɓa yeḛ ḭ dan loo’g aw ɓee ləa gə mba dəjee pana: Kuramarm, am m’wəri pil muru munda 6mbata baokura ləm kára ḭ mbá’g teḛ dɔm’g nɛ m’oo né jim’g gə mba karee el. 7Ɓó lé dəw gə́ to naŋg kəi ya ula təa aree pana: Jɔgm el ŋga mbata m’udu rəw-kəi ləm dɔm’g ar sí jeḛ gə ŋganəmje n’toje loo-to sí’g naŋg kɔl-kɔl ɓó m’oo loo kḭ tar kari muru lé el. 8Ma m’ula sí təsərə, lé dəw neelé a kḭ ta kun né karee mbata to gə́ yeḛ to ne baokura ləa lé el nɛ mbata to gə́ yeḛ to təa’g pəgə-pəgə lé ɓa yeḛ a kḭ kun ne né gə́ rara gə́ ndée rəa lé karee gə mbəa ya. 9Ma nja m’ula sí, kwɔi deeje né ndá d’a kar sí ɓəi, saŋgje né ndá a kɔsje dɔ sí keneŋ ɓəi, undaje tabidi rəw-kəi ndá d’a kɔr kar sí ya tɔ. 10Mbata nana ɓa gə́ kwɔi dee né ndá d’a karee ya ləm, yeḛ gə́ saŋg né ndá a kɔs dəa keneŋ ɓəi ləma, yeḛ gə́ unda tabidi rəw-kəi ndá d’a kɔr karee ya ləm tɔ. 11See bɔ ŋgon gə́ ra ɓa mbuna sí’g lé ɓó lé ŋgonee a kwɔiyee muru ndá a kun pil mbal ɓa karee wa. Esé see lé yeḛ a kwɔiyee ka̰ji ndá a kun li ɓa karee tor ka̰ji’g wa. 12Esé lé a kwɔiyee kawkṵja ndá a kun mbai-yḭ ɓa kula jia’g wa. 13Seḭ gə́ toje njémeeyèrje ɓəi-ə lé gərje loo karje ŋgan síje né gə́ maji gə́ deḛ kwɔi sí nɛ ɓəd ɓa see Bɔ síje gə́ si dara lé a lal kar deḛ gə́ kwɔiyee Ndilmeenda lé ɓəi wa.
Ta gə́ Jeju tel ila njéba̰je’g ləa
Mat 12.22-30, Mar 3.22-27
14Jeju tuba ndil gə́ yèr mee dəw gə́ gwɔsee udu lé. Loo gə́ ndil gə́ yèr lé unda loo teḛ yá̰ aree pata njai-njai ndá boo-dəwje gə́ d’aar keneŋ neelé kaar dee wa dee paḭ-paḭ. 15Nɛ njé gə́ na̰je mbuna dee’g pana: Mbɔl dɔ Beeljebul, mbai lə ndilje gə́ majel lé ɓa yeḛ tuba ne ndilje gə́ majel lé meḛ dəwje’g .
16Njé gə́ raŋg gə́ ndigi kaḭ mée lé dəjee gə mba karee ra némɔri gə́ a kḭ dara lé kar dee d’oo . 17Nɛ Jeju gər takə̰ji lə dee gao ndá yeḛ ula dee pana: Ɓeeko̰ gə́ rara gə́ a kḭ kai rəa loo joo ndá lée a to nduba piu-piu kar kəije təd d’ɔm dɔ na̰’d mbələŋ-mbələŋ. 18Ɓó lé Njekurai a kḭ gə mba kunda kəm rəa loo joo ndá see ɓeeko̰ ləa a to loo gə́ ra’g wa, mbata seḭ pajena: Mbɔl dɔ Beeljebul ɓa m’tuba ne ndilje gə́ yèr lé. 19Ma lé ɓó lé mbɔl dɔ Beeljebul ɓa m’tuba ne ndilje gə́ majel bèe ŋga see mbɔl dɔ na̰ ɓa ŋgan síje tuba ne ndilje gə́ majel ɓəi wa. Gelee gə́ nee ɓa deḛ nja d’a to gə́ njékɔrkəmtaje lə sí ya. 20Nɛ ɓó lé ŋgaw ji Ala ɓa m’tuba ne ndilje gə́ majel ndá ɓeeko̰ lə Ala lé ula iŋga sí mba̰ ya.
21Loo gə́ dəw gə́ njesiŋgamoŋ gə́ to gə́ bao-rɔ lé gaŋg tarəwkəi ləa béréré aar keneŋ gə nérɔje ləa lé ndá nékiŋgaje ləa a to gə lé doŋgɔ kɔmɔmo̰ ya. 22Nɛ ɓó lé dəw gə́ njesiŋgamoŋ gə́ ur dəa-yeḛ’g lé ree teḛ dəa’g tədee rém-rém dumee ndá a kiri nérɔje ləa gə́ yeḛ ɔm mée dɔ dee’g rigim ləm, tɔɓəi néje gə́ maree unda banrɔ neelé a kai dəwje pə-pə ləm tɔ.
23Yeḛ gə́ nai səm el ndá yeḛ nja gə́ njetɔlm ya tɔɓəi yeḛ gə́ kəw dee səm dɔ na̰’d el ndá yeḛ nja gə́ njejané dee rɔm’g ya tɔ .
Ndil gə́ majel gə́ tel ree si mee dəw’g
Mat 12.43-45
24Loo gə́ ndil gə́ majel teḛ mee dəw gə́ kára bèe ndá yeḛ uru aw gə dɔ looje gə́ tudu kurum-kurum’g ndolè loo gə́ mba kwa rəa keneŋ. Nɛ yeḛ iŋga el ndá yeḛ pana: N’a tel kaw loo gə́ neḛ n’ḭ keneŋ n’unda loo teḛ lé ɓa. 25Loo gə́ yeḛ tel ree keneŋ ndá to gə́ kwa rəw-rəw ləm, ndaŋg néje keneŋ bəndərə ləm tɔ. 26Yen ŋga yeḛ ɔd aw ndá ɔr mareeje gə́ raŋg gə́ meḛ dee yèr undá-yeḛ ya tɔɓəi siri ɔm dee dəa’g ar dee ree d’uru mee kəi’g neelé ra ɓee keneŋ ndá d’ar mee dəw neelé majel unda nje gə́ kédé.
Rɔlel gə́ gəd
27Loo gə́ Jeju si pata néje neelé təa’g bèe-bèe ndá dené kára bèe aar mbuna boo-dəwje’g neelé pata wəl pana: Yeḛ gə́ odi gə gel kumee ləm, gə ari mbà il ləm tɔ lé rɔlel nai səa ya!
28Nɛ Jeju tel ilá keneŋ pana: Deḛ gə́ d’oo ta lə Ala gə́ d’aa dəa kər-kər lé ɓa rɔlel lə dee a kal dɔ yeḛ gə́ nee ɓəi.
Jeju mbad ra némɔri
Mat 12.38-42
29Loo gə́ koso-dəwje mbo̰ na̰ kəmlə-kəmlə rəa’g ndá Jeju un tapa pana: Ginka dəwje gə́ nee lé to gə́ njémeeyèrje ya, deḛ dəji némɔri gə mba koo nɛ némɔri gə́ ka̰ Junas lé nja d’a koo ɓó némɔri gə́ raŋg el . 30To gə́ Junas to gə́ némɔri ar njé gə́ Ninibə d’oo lé Ŋgon-dəw ya kara a to gə́ némɔri gə mba kar ginka dəwje gə́ nee d’oo ya tɔ . 31Mbai gə́ dené gə́ si gə́ kel dɔkɔl lé a kḭ ta gə ginka dəwje gə́ nee na̰’d ndɔ gaŋg-rəwta’g lé ndá yeḛ a kila ta dɔ dee’g mbata yeḛ nja ḭ gwɔi naŋg’d gə mba koo ta kəmkàr lə Salomo̰. Nɛ aa ooje, yeḛ gə́ aar neelé ur dɔ Salomo̰’g ɓəi . 32Njé gə́ Ninibə d’a kḭ ta gə ginka dəwje gə́ nee lé na̰’d ndɔ gaŋgta’g lé d’a gaŋgta dɔ dee’g mbata ta kɔr lə Junas lé ar dee d’wa ndòo rɔ dee dɔ kaiya’g lə dee, nɛ aa ooje, yeḛ gə́ aar neelé ur dɔ Junas’g ɓəi .
Néndogó lə darɔ
Mat 5.15, 6.22-23
33Dəw kára kara a kɔs pər néndogó’g gə mba kwa kula duu-loo’g el ləm, əsé a dəb dəa gə né el ləm tɔ, nɛ a kunda dɔ kag-kundá’g tar ɗaŋg mba kar deḛ gə́ d’a gə kandə mee kəi’g lé d’a koo ne loo njai-njai ya . 34Kəmi ɓa to néndogó gə́ ar loo àr məəi’g. Ɓó lé kəmi àr ŋgad-ŋgad ndá darɔi bura a sa rəw ya. Nɛ ɓó lé kəmi to bigim ndá məəi a to bigim ya tɔ. 35Bèe ndá məəi dɔ rɔi’g nà banelə lookàr gə́ àr məəi’g lé a tel to bigim ɓəi. 36Ɓó lé darɔi bura to dan lookàr’g ar yérkér rɔi gə́ raŋg kára kara nai loondul’g el ndá darɔi bura a ndogó jol-jol asəna gə néndogó gə́ ndɔḭ wər-wər ar rɔi sa ne rəw lé tɔ.
Jeju ila ta dɔ Parisiḛje gə njéndaji-maktubje’g
37Parisiḛ kára bèe ra ndòo rəa’g gə mba karee aw səa kəi ləa aw sɔ səa né. 38Loo gə́ Parisiḛ lé oo to gə́ yeḛ togo rəa kédé el ndá kaaree wá paḭ dɔ’g. 39Nɛ Mbaidɔmbaije lé ulá pana: Seḭ Parisiḛje lé seḭ togoje gir ŋgo-kai-manje ləm gə gir kaje ləm tɔ ar deeje d’àr raŋg-raŋg, nɛ meḛ sí gə́ kəi lé meeyèr gə kəmkəḭ wa keneŋ gɔgɔgɔ-gɔgɔgɔ. 40Seḭ mbə-dəwje! dəw gə́ njera gir né gə́ raga lé see to njera mée gə́ kəi el wa. 41Néje gə́ to ŋgaw meḛ sí’g ɓa waje arje njénékəmtondooje ɓa néje lai a to néje gə́ àr mbata lə sí ɓəi tɔ.
42Nɛ seḭ Parisiḛje lé meeko̰ a koso dɔ sí’g. Mbata seḭ kaije ta kamnaḭje lə sí gə́ ri dee lə mantə gə ruə gə kamnaḭje gə́ gə ria-ria lé loo dɔg ndá unje təa kára-kára arje Ala, nɛ meekarabasur gə meenoji gə́ ka̰ Ala lé seḭ ubaje ya̰je. Néje neelé ɓa kəm kar sí oreeje kəm sí keneŋ sḭ raje ɓó a lal kya̰ ne néje gə́ raŋg lé el tɔ .
43Seḭ Parisiḛje lé meeko̰ a koso dɔ sí’g. Mbata seḭ ndigi sije kédé ɗaŋg mee kəi-kwa-dɔ-na̰je’g ləm, seḭ ndigi karje dəwje ra sí lapia loo nada lé ləm tɔ. 44Meeko̰ a koso dɔ sí’g. Mbata seḭ toje asəna gə dɔɓar gə́ naŋg gɔl dəa ar dəwje d’oo el, ar dee njaa dɔ’g lé.
45Yen ŋga njeteggin godndu kára bèe mbuna mareeje’g un ta ulá pana: Mbai, tapai gə́ i pa neelé unda sí ne na̰’d bura ya ndɔl sí ne jeḛ sə deeje na̰’d ya tɔ.
46Jeju tel ilá keneŋ pana: Seḭ njéteggin godnduje lé meeko̰ a koso dɔ sí’g ya tɔ. Mbata seḭ odoje nékodoje gə́ wɔi gə́ dum dɔ loo ya undaje dɔ dəwje’g nɛ ŋgaw ji sí kára kara ɔrɔje ne kereŋ bèe el. 47Meeko̰ a koso dɔ sí’g. Mbata seḭ raje dɔɓar njéteggintaje gə́ ka síje tɔl dee lé bur-bur tɔ. 48Seḭ raje né ɔrje ne goo néra ka síje lé ndigije ne sə dee rəgm ya. Mbata deḛ nja tɔl njéteggintaje neelé ya nɛ seḭ nja seḭ raje dɔɓar dee lé bur-bur. 49Gelee gə́ nee ɓa Ala pa ne ta kəmkàr ləa pana: N’a kula njéteggintaje gə njékaḭkulaje rɔ dee’g ndá d’a tɔl njé gə́ na̰je ləm, d’a kula kəm njé gə́ na̰je ndòo ləm tɔ. 50Bèe ɓa məs njéteggintaje lai gə́ ula dɔ naŋg nee un kudee ndɔ tum gin naŋg nee ləm, 51un kudee ka̰ Abel’g saar teḛ ne ka̰ Jakari’g gə́ deḛ tɔlee dan mee kəi-Ala’g ləm tɔ lé taree wa dɔ ginka dəwje gə́ nee ya. Oiyo, ma m’ula sí təsərə, ta məs dee a kwa dɔ ginka dəwje gə́ nee ya .
52Seḭ njéteggin godnduje lé meeko̰ a koso dɔ sí’g. Mbata seḭ unje nékɔr takəi gosonégər ji sí’g, seḭ nja seḭ a̰dje keneŋ el ləm, dəwje gə́ ndigi kandə keneŋ kara seḭ ɔg deeje loo kandə’g ləm tɔ.
53Loo gə́ Jeju ḭ lée’g neelé unda loo teḛ ndá njéndaji-maktubje gə Parisiḛje d’ɔm na̰ dəa’g d’aar səa gə tar jələ-jələ dəjee ta dɔ néje gə́ ɓəd-ɓəd bula. 54Deḛ ndo̰ ne təa gə ta gə mba koo ne ta gə́ to lée’g el təa’g.
Currently Selected:
Lugu 11: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
