1 Njé gə́ Kɔrḭtə 12
12
Nénojije gə́ ka̰ Ndil lé
1Ŋgakɔmje, noji gə́ Ala wa sə sí gə́ wɔji dɔ ndil lé ma m’ndigi kar sí sije keneŋ dɔ mbə’g el. 2Seḭ gərje gao, loo gə́ seḭ naije gə́ njépole-magəje ɓəi lé ndá seḭ ya̰je loo ar dee ndɔr sí d’ɔm sí rɔ magəje gə́ ta mundu’g lé. 3Gelee gə́ nee ɓa, ma m’ula sí təsərə ya, dəw gə́ rara gə́ Ndil Ala a karee pata lé a pa pana: Maji kar dɔ Jeju udu guduru lé a pa bèe godo. Dəw gə́ rara gə́ pana: Jeju to Mbaidɔmbaije lé ɓó lé Ndil Ala ula njea lé el ndá yeḛ askəm pa bèe el tɔ.
4Nénoji gə́ Ala wa gə dəwje lé to ɓəd-ɓəd ya nɛ Ndil gə́ njekunda gelee lé to gə́ kára ba kiao . 5Kula ra dəwje to gə kəmee-kəmee, nɛ Mbai dɔ dee gə́ deḛ ra kula d’aree lé to gə́ kára ba kiao. 6Gosɔkulaje to gə kəmee-kəmee, nɛ Ala nja kára ba kiao ɓa to njegin gosɔkulaje gə́ ɓəd-ɓəd neelé lai tɔ. 7Ndil ɓa to meḛ dəwje’g kára-kára lai kinja gə kula ra dee ɓəd-ɓəd mba kar dee d’unda ne na̰ maji’g. 8Tɔgərɔ ya, Ndil ɓa ar kəmkàr rusu mee dəw kára njḭ-njḭ. Ndil nja ɓa ar dəw gə́ raŋg pata gosonégər tɔ. 9Ndil neelé ɓa ar dəw si ne gə njemeekun ləm, Ndil neelé ɓa ar dəw gə́ raŋg nénoji gə́ wɔji dɔ kɔr rɔko̰ rɔ dəwje’g ləm tɔ. 10Ndil neelé ɓa ar dəw kára siŋga gə mba ra ne némɔrije ləm, ar dəw gə́ raŋg to ne njetegginta ləm, ar dəw gə́ raŋg oo ne ndaa ndilje ɓəd-ɓəd unda dee ne gə kəmee-kəmee ləm, ar dəw pata gə takɔji dəwje gə́ raŋg ɓəd-ɓəd ləma, gə ar dəw gə́ raŋg to ne njekɔr ne gin takɔjije lé ləm tɔ. 11Néje lai neelé to kula ra Ndil gə́ kára ba kiao neelé ya. Nénojije lé yeḛ kai ar nana kara aree to gə́ mée-yeḛ ndigi.
12Tɔgərɔ ya, to gə́ darɔ dəw lé barkəmeeje bula nɛ barkəmreaje lé bula kara to gə́ darɔ gə́ kára ba ndá Kristi kara to togə́bè tɔ . 13Jeḛ lai gə́ to gə́ Jibje əsé Grekje, əsé ɓərje, əsé ŋgankojije kara deḛ ra sí batɛm d’ɔm sí ne na̰’d kára ba gin Ndil gə́ kára ba ləm, Ndil gə́ kára ba ya to meḛ sí’g lai ləm tɔ.
14Togə́bè kagrɔ dəw to gə́ kára ba el, nɛ barkəmeeje ɓəd-ɓəd bula ɓa rḛdə na̰’d. 15Ɓó lé gɔl dəw a pana: Neḛ n’to gə́ jia el, bèe ndá neḛ n’to gə́ darəa el lé see tapea gə́ togə́bè lé a karee tel to ne barkəmee el wa. 16Esé ɓó lé mbi dəw a pana: Neḛ n’to kəmee el, bèe ndá neḛ n’to gə́ darəa el lé see tapea gə́ togə́bè a karee tel to gə́ barkəmee el wa. 17Ɓó lé kagrɔ dəw a to gə́ kəmee nja bura ndá see loo koo ta ləa a to ra wa. Ɓó lé kagrɔ dəw a to gə́ loo koo ta ya bura ŋga, see loo gə́ ra ɓa a to gə́ loo taa baḭ né keneŋ wa. 18Ɓasinè Ala nja unda barkəmrɔ dəwje kára-kára lai gə lée-lée gə goo rəbee gə́ maji gə́ yeḛ wɔji mée’g. 19Ɓó lé barkəmrɔje lai d’a to né gə́ kára ba ŋga, see darɔ a to ra wa. 20Ɓasinè kara kagrɔ to gə́ kára ba nɛ barkəmeeje bula tɔ keneŋ dèm-dèm tɔ.
21Kəm dəw a kas kula ji dəw pana: M’aw ndooi el, a pa bèe el ləm, dɔ dəw a kula gɔl dəw pana: M’aw ndooi el, a pa bèe el ləm tɔ. 22Nɛ barkəmrɔ dəw gə́ yeḛ oo gə́ né gə́ əḭ el lé yee ɓa to né gə́ əḭ ya. 23Barkəmrɔ sí gə́ əḭ kəm sí’g el lé jeḛ j’ula mbai dəa’g. Togə́bè barkəmrɔ sí gə́ kəm rabee raga el lé jeḛ n’rabee raga ndəgəsə ya 24nɛ barkəmrɔ sí gə́ kəm rab raga lé deḛ nja to raga pai-pai mba̰ tɔ. Ala nja unda kagrɔ dəw mba kar barkəmeeje gə́ lal keḭ kəm sí’g lé ndá a keḭ kəm sí’g ya. 25Bèe ɓa mba kar ta tḭ-na̰ oso mbuna dee’g el nɛ deḛ kul gə na̰ yururu. 26Ɓó lé né ra barkəmrɔ dəw gə́ kára ndá barkəmreaje lai lé rɔ dee adə dee mbag-mbag. Ɓó lé barkəmrɔ dəw gə́ kára nduba rəa ndá barkəmreaje lai nduba rɔ dee səa na̰’d bura tɔ.
27Seḭ lé toje kagrɔ Kristi ləm, seḭje lai toje barkəmreaje gə́ ɓəd-ɓəd gə́ raje kula gə́ wɔji dɔ sí dɔ sí ya ləm tɔ. 28Yee ɓa Ala unda ne gin Eglisə, ar deḛ gə́ dɔtar lé to njékaḭkulaje ləm, njékɔm dee’g jooje to njéteggintaje ləma, njékɔm dee’g mṵdaje to njḛ́gɔ-négərje ləm tɔ, njékorè goo deeje gə́ raŋg lé to njéra némɔrije ləm, gə deḛ gə́ d’iŋga nénoji mba kida ne rɔko̰ rɔ dəwje’g ləm, gə njéla gə mar deeje gə́ d’odo nékodoje gə́ wɔi dee ləm, gə deḛ gə́ d’askəm kɔr no̰ mar deeje ləma, gə deḛ gə́ gər pa takɔji dəwje gə́ ɓəd-ɓəd ləm tɔ . 29See deḛ to njékaḭkulaje ya bura wa. See deḛ to gə́ njéteggintaje ya bura wa. See to gə́ njḛ́gɔ-négərje ya bura wa. See deḛ lai d’askəm ra némɔrije ya bura wa. 30See deḛ lai d’iŋga nénoji gə mba kida ne rɔko̰ rɔ dəwje’g ya bura wa. See deḛ lai d’askəm pa takɔji dəwje gə́ ɓəd-ɓəd wa. See deḛ lai d’askəm kɔr ginta gə takɔji dəwje-dəwje wa. 31Narje rɔ sí gə mba kunje ne nénojije gə́ maji dum mareeje gə́ Ala ar sí.
Nɛ ɓasinè lé m’a gə tɔji sí né kára gə́ maji dum lé.
Currently Selected:
1 Njé gə́ Kɔrḭtə 12: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.