1 Njé gə́ Kɔrḭtə 11
11
1Ndajije kəm to gə́ ma kara ma m’ndaji ne kəm Kristi bèe tɔ .
Néje gə́ kəm ra loo-kwa-dɔ-na̰’g
2Ma m’pidi sí mbata meḛ sí to kəmba dɔm-ma’g ta-ta ləm, taje gə́ ma m’ndoo sí kara seḭ waje dɔɓəŋgərə sí’g sud ləm tɔ. 3Nɛ lé bèe kara ma m’ndigi kar sí gərje gao to gə́ Kristi lé to dəw dɔ diŋgam gə́ rara kara ləm, ar diŋgam kara to dəw dɔ dené ləma, ar Ala to dəw dɔ Kristi ləm tɔ. 4Diŋgam gə́ rara kara gə́ ra tamaji əsé ɔr goo ta lə Ala ɓó lé ula né dəa’g ndá yeḛ ila ndɔl dɔ dəw dəa’g. 5Dené gə́ rara gə́ ra tamaji əsé ɔr goo ta lə Ala lal ko̰ dəa gə né ndá yeḛ ila ndɔl dɔ dəw dəa’g ləm, dəa lé kara to asəna kára ba gə ndisa gə́ yeḛ ndisa ŋgori-ŋgori ləm tɔ. 6Ɓó lé dené lal kon dəa gə́ né ndá maji karee inja dəa. Ɓó lé yeḛ oo gə́ nérɔkul gə mba kinja dəa əsé ndisa ndá maji karee on dəa gə né. 7Diŋgam lé a kon dəa gə né el mbata yeḛ ɔr rɔ Ala ləm, yeḛ to njekula rɔnduba dəa’g ləm tɔ. Dené lé yeḛ to gə́ njekula rɔnduba dɔ diŋgam’g . 8Mbata deḛ d’ɔr diŋgam rɔ dené’g el nɛ dené ɓa d’ɔree rɔ diŋgam’g . 9Tɔɓəi Ala unda diŋgam mbata lə dené el nɛ yeḛ unda dené mbata lə diŋgam. 10Gelee gə́ nee ɓa, dené a kaar gə né dəa’g kwɔji ne dɔ dəw dəa, yeḛ a ra bèe mbata lə kuraje gə́ dara. 11Yen ɓa, dené gə diŋgam d’a to gə́ na̰’d kára ba no̰ Mbaidɔmbaije’g. 12To gə́ deḛ d’ɔr dené rɔ diŋgam’g lé dené kara unda ne kó diŋgam tɔ tɔɓəi néje lai ḭ rɔ Ala’g lé.
13Maji kar sí ə̰jije meḛ sí’g ooje ɓa, see dené gə́ aar ra tamaji no̰ Ala’g lal kon dəa gə né lé see to né gə́ kəm ra wa. 14See néje gə́ naŋg nee tɔji sí rəbee el wa. Diŋgam gə́ ul yiŋga dəa aree ŋgal pɔ-pɔ ndá see to rɔkul el wa. 15Né gə́ kɔl ɓa nee: dené gə́ ul yiŋga dəa aree ɔm pɔ-pɔ ndá to rɔnduba ləa gə́ Ala ɓa aree gə mba kon ne dəa. 16Nɛ ɓó lé nana ɓa maḭ dɔ ta’g neelé ndá jeḛ lé jeḛ n’ra togə́bè el ləm, Eglisə lə Ala kara ra togə́bè el ləm tɔ.
Néje kəm ra ta ka nésɔ’g lə Mbaidɔmbaije
17Ta neelé ma m’pa m’ndəji sí ne ɓó ma m’pidi sí ne el, mbata loo gə́ seḭ waje dɔ na̰ lé seḭ tel toje ne majel ur dɔ nje gə́ kédé ɓó seḭ tel toje ne maji dum el. 18Né gə́ dɔtar lé deḛ d’ulam d’am m’oo pana: Loo gə́ seḭ waje dɔ na̰ ndá seḭ ɔrje kəm na̰ gə mba tḭje ne na̰. Ta neelé m’tɔr kona ɓa m’taa. 19Tɔgərɔ ya, si gə́ seḭ sije gə kudu sí kudu sí lé ɓa gə́ kuma̰ koo ne deḛ gə́ to gə́ majikojije gəd-gəd mbuna sí’g. 20Loo gə́ seḭ waje dɔ na̰ keneŋ loo kára lé to mba sɔ né lə Mbaidɔmbaije el, 21mbata loo gə́ seḭ sije ta ka nésɔ’g mba sɔ né lé ndá nana kara ɔs rəa ɓad mba sɔ né karee oso loo-ɓoo’g ləa-yeḛ, yee ɓa njé gə́ na̰je lé ɓoo tɔl dee ne ləm, njé gə́ raŋg lé d’ai né d’aree al dɔ dee ləm tɔ. 22See kəi lə sí gə mba sɔ né gə kai né keneŋ lé godo wa. Esé see seḭ ndigije kila ndɔl dɔ Eglisə’g lə Ala lé ɓa seḭ ilaje ne rɔkul dɔ dee gə́ lal kiŋga né lé wa. See m’a pa ban kar sí ɓəi wa. See m’a pidi sí gə́ pidi wa. Wah! Né neelé m’a pidi sí dɔ’g el.
23Né gə́ ma m’ndoo sí lé m’taa rɔ Mbaidɔmbaije’g ya: Jeju Mbaidɔmbaije, mee tilee gə́ deḛ ndogee’g lé yeḛ un pil muru 24tɔɓəi loo gə́ yeḛ ra Ala lé oiyo ndá yeḛ wa gaji dana ɓəi pana: Yee gə́ nee to gə́ darɔm gə́ m’ya̰ m’ar sí. Raje togə́bè gə mba kar meḛ sí olé ne dɔm’g. 25Loo gə́ d’o̰ muru mba̰ ndá yeḛ un ŋgo-kai-né togə́bè tɔ pana: Ŋgo-kai-né neelé to manrɔ gə́ sigi gə́ ma man ne rɔm gə məsm m’ar sí. Loo gə́ rara ɓa gə́ seḭ a kaije ndá arje meḛ sí olé ne dɔm’g . 26Tɔgərɔ ya, loo gə́ rara gə́ seḭ o̰ muru neelé ləm, gə aije ne mee ŋgo-kai-né’g neelé ləm tɔ ndá seḭ ilaje ne mber kwəi lə Mbaidɔmbaije saar areeje ree ne ya.
27Gelee gə́ nee ɓa yeḛ gə́ a ko̰ muru neelé əsé a kai né mee ŋgo-kai-né’g lə Mbaidɔmbaije gə goo rəbee el ndá némajel gə́ yeḛ ra ila ne ndɔl dɔ darɔ Mbaidɔmbaije’g ləm gə dɔ məsee’g ləm tɔ lé a kwa dəa-yeḛ ya. 28Bèe ndá maji kar dəwje kára-kára lai tən meḛ dee kédé ɓa d’a ko̰ muru ləm, gə d’a kai né mee ŋgo-kai-né’g ɓəi ləm tɔ, 29mbata yeḛ gə́ o̰ gə ai ɓa ɓó oo rɔ Mbaidɔmbaije keneŋ el ndá yeḛ o̰ gə ai ila ne ta dɔ rəa-yeḛ’g ya. 30Togə́bè ɓa dəwje bula mbuna sí’g to ne yɔ-dəwje ləm, gə njérɔko̰je ləma, dəwje gə́ na̰je d’wəi ne ləm tɔ. 31Ɓó lé jeḛ nani dɔ néra sí j’udu ne dəa ndá d’a kila ta dɔ sí’g el. 32Loo gə́ Mbaidɔmbaije gaŋgta dɔ sí’g ndá yeḛ ra gə mba kula sí ne kəmkàr ɓó mba kar tuji gə́ wa dɔ naŋg neelé wa dɔ sí el.
33Bèe ndá ŋgakɔmje, loo gə́ seḭ waje dɔ naŋg gə mba sɔ né ndá maji kar sí ŋginaje na̰. 34Ɓó lé nana ɓa mbuna sí’g ɓa ɓoo tɔlee ndá maji karee sɔ né kəi ləa-yeḛ, yee ɓa maji unda kar sí waje dɔ na̰ ilaje ne ta dɔ sí’g. Ges taje gə́ nai lé m’a gɔl kar sí loo gə́ m’a teḛ rɔ sí’g lé ɓəi.
Currently Selected:
1 Njé gə́ Kɔrḭtə 11: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.