Romanos 12

Ri sakil kabinic kasilabic ri cubul kac'u'x ruc' ri Cristo

1Hermanos, ri Dios lic uc'utum ri unimal rutzil uc'u'x che alak. Ruma c'u wa', lic cantz'onoj che alak ya'a ronoje ri cuerpo alak puk'ab ri Dios pacha' juna kasa'n c'aslic,#12:1 Rojertan xya'i' chwach ri Dios kasa'n que awaj, yey wa' quecamisaxic y queporoxic. No'j wo'ora ri kasa'n cutz'onoj ri Dios e ri'oj, yey Rire na caraj ta ri camic ke'oj; ri caraj e cakaya ronoje puk'ab Rire: ri kacuerpo, ri kabinic y ri kac'aslem. na jinta c'ana ch'ul che y lic cuc'ul uc'u'x Rire; ma wa' e ulok'nimaxic takalic ca'an ralak che. 2Ma'an chi e alak pacha' ri caqui'an ri winak re ruwachulew wak'ij ora. E ya'a alak luwar che ri Dios cujalc'atij ri na'oj alak y cu'an c'ac' che ronoje ri binic silabic alak. Jela' c'u ri' queta'maj alak y ca'an alak janipa ri utz caraj ri Dios che alak; wa' e ri lic cuc'ul uc'u'x Rire y e ri lic jusuc' chwach.

3Ruma c'u ri unimal rutzil uc'u'x ri Dios, ya'tal lo chwe ri'in cambi'ij che onoje alak: Lic ma'an nim che ib alak ruc' ri uya'om ri Dios pak'ab alak. Puwi ri ya'tal che alak, mic'ow uwi' ri cach'ob alak chwa ri takal che alak; e ch'obo alak rusuc' puwi tak ri uya'om ri Dios chijujunal alak ruma ri xcubi' c'u'x alak ruc'. 4Ma jela' pacha' ri kacuerpo xa jun u'anom tob lic q'ui uchapom wi rib, pero junwi tak ri quichac ronoje ri chapayom re; 5jec'uri'la', ri'oj, tob lic oj q'ui, xa jun ka'anom ruc' ri Cristo, y konoje c'u ri' cojajawax tak chikawach. 6Ec'u ri Dios, jalajuj tak rusipanic uya'om chike chikajujunal cha' caka'an ruchac; wa' e chirij tak ri caraj Rire chike ruma ri unimal rutzil uc'u'x. E uwari'che, ri ya'tal che cak'alajisan puwi runa'oj ri Dios, chu'ana xew e chirij ri bi'tal che ruma ri Dios. 7Ri ya'tal che lic quebuto' jujun chic, e chu'ana ri'. Ri ya'tal che cac'utunic, e chuya'a rib che ri c'utunic. 8Ri ya'tal che capixabanic, e chuya'a rib che ri pixabanic. Ri ya'tal che casipanic, e chu'ana ri' ri casipan ruc' ronoje uc'u'x. Ri ya'tal che cuc'am quiwach jujun chic, e chuya'a rib che u'anic wa' chi utz. Ri ya'tal che cuc'ut ri c'axna'bal uc'u'x, e chu'ana ri' ruc' qui'cotemal.

9C'ax na'a ib alak pa sakil wi, na xa ta ruc' queb palaj alak. Mac'ul che ri binic silabic alak ri na utz taj; e takej alak u'anic ri utz. 10Chijujunal alak lic c'ax na'a ib alak pa sakil wi, ma chak' ib alak chwach ri Kakaw. Matzucuj ri yacbal k'ij ralak; e yaca alak quik'ij ri jujun chic. 11'Ana alak ri lic alak sac'aj, ma'an alak lic alak xepu; e lok'nimaj alak ri Kanimajawal ruc' ronoje c'u'x alak. 12Ruc' qui'cotemal choye'ej alak janipa ri ubi'tisim ri Dios che alak. Ch'ija alak uchuk'ab ri c'axc'obic cape pawi' alak y lic mok'otaj alak u'anic orar. 13Cheto'o alak ri quicojom rubi' ri Cristo ruc' tak ri cajawax chique. Tijoj ib alak che quic'ulic chi utz janipa ri quebopon chi ocho alak. 14Tz'onoj alak ri rutzil uc'u'x ri Dios paquiwi ri quiternabem alak ruc' c'ax; matz'onoj alak ri na utz taj paquiwi', e tz'onoj alak ri utz. 15Qui'cota alak cuc' ri e c'o pa qui'cotemal; chok'a alak cuc' ri quebok'ic. 16Chu'ana xa jun c'u'x alak chiwach alak. Ma'an alak nim che ib alak; e 'ana alak xa jun cuc' ri na jinta quiwach. Mach'ob alak lic c'o na'oj alak chiquiwa jujun chic.

17Matzelej alak uwach ri na utz taj cu'an junok chi'ij alak. E choca alak il che u'anic ri utz chiquiwach conoje ri ticawex. 18'Ana c'u alak janipa ri c'o pak'ab alak cha' cac'oji' alak chi utzil chomal cuc' conoje ri ticawex. 19Ralak nu hermanos ri c'ax canna' alak, we c'o ca'anaw ri na utz taj chi'ij alak, matzelej alak uc'axel che. E ya'a alak puk'ab ri Dios cha' e Rire ri caya'w ri tojbal re, ma jewa' tz'ibital chupa Ruch'a'tem:

Panuk'ab Ri'in c'o wi cank'at tzij

paquiwi ri quebanaw re ri na utz taj chiwij;

In c'u ri' ri quin'anaw uc'axel chique Dt. 32:35

cacha ri Dios Kajawxel. 20Jec'uri'la', e 'ana alak pacha' ri cubi'ij Ruch'a'tem ri Dios:

We canum ri tzel quilow e la, ya'a la uwa.

We catzajin uchi', ya'a la umik'ina'.

Ma echiri' ca'an la wa', rire cujek caq'uix chiwach la

yey cuna' c'u rib ri' che ri na utz taj xu'an che'la#12:20 Q'uisbal re wa jun versículo pa ri ch'a'tem griego cubi'ij “rachak'a'l caka'wic cat'uba' chwi ujolom”. Pr. 25:21-22

cacha'. 21Maya alak luwar casocotaj alak ruma ri na utz taj; e ch'ija alak uchuk'ab ri na utz taj ruc' ri utz ca'an alak.

Currently Selected:

Romanos 12: acrT

Highlight

Copy