Romanos 11
11
Ri Dios na rok'otam ta rutinamit
1Ec'u wo'ora cantz'onoj: ¿E nawi xrok'otaj can ri Dios rutinamit Israel? ¡Lic k'alaj na xrok'otaj taj! Ma ri'in in aj Israel, in ralc'o'al can ri Abraham, in jun chique tak can ri ralc'o'al ri Benjamín;#11:1 Raj Israel e ralc'o'al can ri Abraham, yey ri Benjamín e jun chique ri e uxiquin-umam can ri Abraham. yey ri'in na xinok'otax ta can ruma ri Dios. 2Ri Dios, lic ojertan lo ri' xuch'ob rakan cu'an utinamit chique raj Israel; y c'a e u'anom wo'ora, na rok'otam ta can rutinamit Israel. ¿Na eta'am ta neba alak ri cubi'ij Ruch'a'tem ri Dios puwi ri xubi'ij ri Elías echiri' rire xch'a't chwach ri Dios chiquij ri e aj Israel? Ma jewa' xubi'ij:
3Lal Kajawal Dios, raj Israel e xecamisan
que ri k'alajisanelab e la
y xquiwulij tak ri altar e la.
Xew chi c'u ri'in in canajinak canok
y cacaj ne quinquicamisaj 1 R. 19:10, 14
xcha'.
4¿Yey sa' c'u ri' ri xuc'ul uwach ri Dios che ri Elías? Xubi'ij:
Na xew ta ri'at, ma c'a e c'o chi can wukub mil achijab ebenucolobem cha' quinquilok'nimaj Ri'in yey rique na exuqui'nak ta c'ana chwach ri tiox Baal 1 R. 19:18
xcha ri Dios che.
5Jec'ula' wo'ora c'a e c'o chi can jumutz chique raj Israel echa'tal can ruma ri unimal rutzil uc'u'x ri Dios. 6Yey we echa'tal ruma ri unimal rutzil uc'u'x ri Dios, ri' na e ta ruma juna chac qui'anom rique. Ma we ta e ri', ri unimal rutzil uc'u'x ri Dios na cajawax taj. 7¿Sa' c'u ri' ri cakamaj usuc' che wa'? Lic e q'ui chique ri tinamit Israel c'amaja' caquirik ri quetajin lo che utzucuxic, wa' e su'anic quebu'an jusuc' chwach ri Dios. No'j ri xerikow re, e ri echa'om chi lo ruma ri Dios. Ec'u ri nic'aj chic x'an pacha' abaj che ri canima'. 8Ma e pacha' ri tz'ibital can pa Ruch'a'tem ri Dios:
Ri Dios xu'an chique pacha' cawar quiwach
chwach tak ri caraj Rire; Is. 29:10
y c'a wak'ij ora tob quetzu'nic,
na caquil ta ri cuc'ut ri Dios chiquiwach;
tob quetanic, na caquita ta ri cubi'ij ri Dios chique. Dt. 29:4
9E pacha' ri xubi'ij ri David ojertan paquiwi ri tzel xebilow re:
Ri nimak tak nimak'ij caqui'ano,
chu'ana pacha' co'c y pacha' ra'al re quetzak chupa,
y jela' queya' pa c'axc'obic.
10Chu'ana c'u k'eku'm rupa ri quiwach
cha' na caquil ta ri cuc'ut ri Dios chiquiwach;
Yey canaj na canok e ri' xaki c'uyuq'uic chi ri quij
ruma ri queka'n lic al Sal. 69:22-23
xcha'.
Ri c'ambal na'oj puwi ri che' re olivo
11Cantz'onoj c'ut: ¿Ri quitzakibal raj Israel#11:11 Raj Israel xetzakic ma na xcubi' ta quic'u'x ruc' ri Cristo. e nawi cha' asu na queyactaj ta chic? ¡Na e ta c'ana ri'! Ma ruma ri quitzakibal rique, e xc'un ri colobetajic chique ri na e ta aj Israel, cha' jela' raj Israel caquijek caquirayij quecolobetaj pacha' ri na e ta aj Israel. 12Yey we ruma c'u ri tzakibal y ri jaljobic que raj Israel, lic chom ri xquic'ul tak ri tinamit re ruwachulew, ¡mac'uwari' e más chom ri caquic'ul tak ri tinamit echiri' conoje ri e aj Israel caquitzelej tanchi quitzij chwach ri Dios!
13C'o c'u ri cuaj cambi'ij che alak ri na alak ta aj Israel. Ri'in in tako'n re ri Jesús chique ri na e ta aj Israel. Ruma c'u wa', lic c'ax canna' wa chac ya'om panuk'ab. 14Yey ri lic cuaj ri'in chique raj Israel, ri e watz-nuchak', e caquirayij pan ri c'ulum ralak y jec'ula' quecolobetaj na jujun chique. 15Ma we ri tzakibal que raj Israel xuya luwar cha' uq'uiyal ticawex che ruwachulew xc'oji' utzil chomal chiquiwach ruc' ri Dios, ¿sa' c'u ri' ri cuc'am lok echiri' raj Israel quec'ul tanchi ruma ri Dios? ¡E cuc'am lo c'aslemal chique ri ecaminak chwach ri Dios!
16We junok cuya puk'ab ri Dios ri nabe pam quesax che ri k'or, wa' e c'utubal re ronoje ri k'or re ri Dios.#Nm. 15:17-21 Yey we chom ri ratz'ayak juna che', jenela' ri' chom tak ruk'ab.#11:16 Wa queb c'ambal na'oj puwi ri k'or y puwi ri che' que'elawi: Ri Abraham, ri Isaac y ri Jacob echa'tal ruma ri Dios. Ruma c'u wa', ri calc'o'al can rique, e re ri Dios.
17Ec'u che ri sakil che' re olivo (wa' e que'elawi rutinamit ri Dios e aj Israel) xjok'ix bi jujun uk'ab (wa' e que'elawi raj Israel na quicojom ta rubi' ri Cristo). Yey puc'axel ri xjok'ix bi, e xnac' jujun uk'ab che' re olivo xa re pa tak juyub (wa' e que'elawi ralak hermanos, ri na alak ta aj Israel). Ec'u wo'ora e pacha' cac'ul alak ri sakil uwa'al che' re olivo, ri quel lo che ri ratz'ayak. 18Pero mach'ob ne alak we más c'o wach ralak chiquiwa ri sakil uk'ab ri che' xejok'ix bi. Ma we ca'an nim che ib alak, mic'ow chic'u'x alak na e ta ralak ri c'asbayom re ri ratz'ayak ri che', ma e ne ri ratz'ayak ri c'asbayom e alak.
19Laj e c'o jujun chixo'libal alak jewa' caquibi'ij: «Jujun uk'ab ri che' re olivo xjok'ix bi cha' jela' e cojnac' can ri'oj paquic'axel» cacha alak. 20Katzij, pero wa' xjok'ix bi ruma na jinta cubulibal quic'u'x ruc' ri Kanimajawal. No'j c'u ralak xtiqui' can alak xa ruma ri cubulibal c'u'x alak ruc' ri Kanimajawal. E uwari'che, ma'an nim che ib alak; e c'ola xi'in ib uc' alak chwach ri Dios. 21Lic chajij c'u ib alak, ma we ri Dios xujok'ij bi tak ri sakil uk'ab che' (wa' e ri e aj Israel na xcubi' ta quic'u'x ruc' ri Kanimajawal), jec'uri'la' cu'an che ralak we jela' ca'an alak pacha' ri xqui'an rique.
22Chilape c'u alak ri': Ri utzilaj rutzil uc'u'x ri Dios yey rutewul ri royowal. Ma lic c'o utewul ri royowal Rire echiri' cayactaj chirij ri na utz taj, jela' pacha' ri xu'an cuc' ri xejaljobic. No'j ri utzilaj rutzil uc'u'x e ri cuc'ut che ralak we catiqui' alak chupa wa rutzil uc'u'x. Yey we na e ta c'u ca'an alak ri', cajok'ix ne ubi ri' ralak pacha' ri xquic'ulumaj rique. 23Yey we ne ri e aj Israel caquitzelej quitzij y cacubi' quic'u'x ruc' ri Kanimajawal, quenac' tanchi che ri sakil che', ma ri Dios puk'ab c'o wi cu'an wa'. 24Ma ralak, ri xset lo alak che jun che' re olivo lic rewi xa re pa tak juyub, xnac' c'u alak ruma ri Dios che ri sakil che' re olivo tob wa' na che'ul ta alak. We ri Dios xurik c'u unaq'uic alak che jun che', lic na c'ayew ta c'u ri' che Rire cunac' tanchi ri sakil uk'ab che ri che' pa petinak wi.
Ri quicolobetajic raj Israel
25Hermanos, ri Dios c'o ri uch'obom chi lo rakan paquiwi raj Israel, yey wa' na k'alajisam ta lo ojertan. Ec'u wo'ora lic cuaj ri'in queta'maj ralak wa' cha' na ca'an ta nim che ib alak. Ri quic'ulumam raj Israel, tob na conoje taj, e ri x'an pacha' abaj che ri canima', ma na cacaj ta caquicoj rubi' ri Cristo. Yey jec'ula' qui'anom c'a echiri' catz'akat na ri quiq'uiyal ri na e ta aj Israel caquiya quib puk'ab ri Cristo. 26C'a tec'uchiri' conoje raj Israel quecolobetaj na, ma jewa' tz'ibital can pa Ruch'a'tem ri Dios:
C'a chila' Sion cape wi ri cayolopin lo que ri ticawex
y queberesaj na c'u lo ri e ralc'o'al can ri Jacob chupa ri ch'ulilaj mac.#11:26 Ri Dios xujal rubi' ri Jacob y xucoj “Israel” che.
27Ec'u nutzij wa' can'an Ri'in cuc'
echiri' cancuy na ri quimac Jer. 31:33-34
cacha ri Dios.
28Na ruc' ta c'u ri', raj Israel xebu'ana e aj retzelal c'u'xaj chirij ri Dios ruma na xcaj taj caquicoj ri Utzilaj Tzij. Ec'u ri' wa' xuya luwar che ralak ri na alak ta aj Israel cha' utz cakib alak ruc' ri Dios. No'j ri Dios c'a c'ax quebuna' raj Israel ma xebucha' lo ri cati'-quimam ojertan. 29Ma e janipa ri sipanic y ri siq'uibal u'anom ri Dios che rutinamit,#Ro. 9:4-5 wa' na caresaj ta chi q'uenok.
30Ralak ri na alak ta aj Israel, rojertan na xcoj ta alak utzij ri Dios. No'j wo'ora e raj Israel ri na caquicoj ta utzij; y ruma c'u wa', ya'tal che ralak cac'ul alak ri c'utubal re ri rutzil uc'u'x ri Dios. 31Jec'uri'la', wo'ora rique na quicojom ta utzij ri Dios; yey ruma ri rutzil uc'u'x ri Dios che ralak, chikawach apanok ri Dios cuc'ut tanchi ri rutzil uc'u'x chique rique. 32Ma ri Dios xuk'alajisaj conoje ri ticawex junam quiwach e aj palajiy tzij, cha' jela' cuc'ut ri rutzil uc'u'x chique conoje.
33¡Janipa lo umajom rubeyomalil y runa'oj ri Dios yey tak ri reta'am Rire; ronoje wa' lic na jinta utakexic! ¡Na jinta ne c'ana junok cach'ijow umajic usuc' janipa ri uch'obom y ri u'anom Rire! 34Ma jewa' cubi'ij Ruch'a'tem ri Dios:
¿C'o nawi junok umajom usuc' ronoje runa'oj ri Dios Kajawxel?
¿C'o nawi junok xya'w una'oj Rire? ¡Na jintaj! Is. 40:13
cacha'. 35Yey cubi'ij:
We c'o junok casipan che ri Dios,
¿chirajawaxic nawi che ri Dios cuya lo ri rajil uc'axel che?
¡Na chirajawaxic ta che!#1 Cr. 29:14 Job 41:11
36Ma janipa tak ri c'olic, ruc' Rire petinak wi;
ma ronoje 'anatal ruma Rire y e re yacbal uk'ij Rire.
¡Lic takal c'u ri' che cayac uk'ij na jinta utakexic! ¡Amén!
Currently Selected:
Romanos 11: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
