Romanos 10
10
1Cambi'ij che alak hermanos, pakatzij wi ri lic curayij nuc'u'x y ri lic cantz'onoj che ri Dios paquiwi ri e aj Israel e cha' rique caquirik ri colobetajic. 2Ri'in cambi'ij ri wilom chique: Rique lic caquitij uk'ij quec'oji' chi utz chwach ri Dios, pero wa' na caqui'an ta ruc' sakil na'oj. 3Ma na cacaj taj caquimaj usuc' su'anic ri Dios cu'an jusuc' chique ri ticawex; ri cacaj e quebu'ana jusuc' xa pa que rique. Y na quiya'om ta c'u quib ca'an jusuc' chique jela' pacha' ri caraj ri Dios. 4Yey ri Tzij Pixab catz'akat uwach ruc' ri Cristo; jec'ula' china ri cacubi' uc'u'x ruc' Rire, e ca'an jusuc' che chwach ri Dios.
5E puwi ri cu'ana jusuc' ri ticawex ruma cutakej ri Tzij Pixab, jewa' xutz'ibaj ri Moisés:
China ri ca'anaw re ronoje ri cubi'ij ri Tzij Pixab,
ri' c'o uc'aslemal chwach ri Dios ruma cu'an wa'. Lv. 18:5
6No'j puwi ri cu'ana jusuc' ri ticawex ruma ri cubulibal c'u'xaj, jewa' cubi'ij pa Ruch'a'tem ri Dios: «Mabi'ij pa awanima': ¿China c'u ri que'ec c'a chila' chicaj#Dt. 30:12 che uc'amic lo ri Cristo?» 7O «¿China c'u ri cakaj c'a chupa ri siwan catz'irir upa che uc'amic lo ri Cristo chiquixo'l ri ecaminak?» 8Na cajawax taj que'ec junok, ma ¿sa' ri' ri cubi'ij pa Ruch'a'tem ri Dios? Jewa' cubi'ij:
Rutzij ri Dios lic xa nakaj c'o wi chawe.
C'o chupa rawanima' y quel lo pachi'. Dt. 30:14
Ec'u ch'a'tem wa' ri cakatzijoj ri'oj puwi ri cubulibal c'u'xaj: 9We ri'at cak'alajisaj ruc' ruchi' akul: «Ri Jesús e Wajawal» y cacoj c'u chupa rawanima' Rire xc'astaj lo ruma ri Dios chiquixo'l ri ecaminak, ri' catcolobetajic. 10Ma pa ri kanima' cakacoj wi wa' cha' coju'an jusuc' chwach ri Dios; yey ruc' c'u ruchi' kakul, cakak'alajisaj Rire e Kajawal cha' jela' cojcolobetajic. 11Ma Ruch'a'tem ri Dios jewa' cubi'ij puwi ri Cristo:
China ri cacubi' uc'u'x ruc', na caq'uixbesax taj
ma cuc'ul na ri roye'em che Rire Is. 49:23
cacha'. 12Echiri' cubi'ij «china», wa' que'elawi tob e aj judi'ab o na e ta aj judi'ab, ma xaki junam quiwach. Ma ri Kanimajawal e Cajawal que conoje, tob junwi tak ri quitinamit. Yey Rire cuya ri unimal rutzil uc'u'x chique conoje ri caquitz'onoj to'bal que che. 13Ma Ruch'a'tem ri Dios jewa' cubi'ij:
E janipa ri caquitz'onoj colobetajic
chupa rubi' ri Kanimajawal,
ri' quecolobetaj na Jl. 2:32
cacha'.
14¿Su'anic c'u ri' caquitz'onoj colobetajic chupa rubi' ri Kanimajawal we na quicojom ta rubi' nabe? ¿Yey su'anic caquicoj rubi' we na quitom ta puwi Rire? ¿Yey su'anic caquita ri tzijonic puwi Rire we na jinta junok catzijow re chique? 15¿Yey su'anic e c'o ri quetzijon puwi ri Kanimajawal we na jinta junok catakaw bi que cha' caqui'an wa tzijonic? E pacha' ri tz'ibital can chupa Ruch'a'tem ri Dios:
¡Lic chom ri quic'unic ri caquic'am lo ri tzijonic
re ri utzil chomal,
ri quec'un che utzijoxic ri Utzilaj Tzij! Is. 52:7
cacha'. 16No'j na conoje ta c'ut xecojow re ri Utzilaj Tzij xtzijox chique. E pacha' ri xubi'ij can ri Isaías:
Kajawal, ¿c'o nawi junok cojoyom re ri katzijom chic? Is. 53:1
xcha'. 17Ri cubulibal quic'u'x ri ticawex cujeko echiri' caquita ri catzijox chique; yey wa' wa caquito, e Ruch'a'tem ri Dios puwi ri Cristo. 18No'j cantz'onoj c'ut: ¿Na xquita ta nawi ri Utzilaj Tzij? ¡Katzij, xquito! Ma e pacha' ri cubi'ij Ruch'a'tem ri Dios:
Che ronoje ruwachulew xtataj wi ri quikul
ri xetzijon puwi ri Dios;
y ri quich'a'tem oponinak pa ronoje luwar
che ruwachulew#10:18 Wa jun versículo re Salmos e cach'a't chwi tak ri ch'umil, ri caquik'alajisaj ruchuk'ab y ruchomalil ri Dios y quebilitaj pa ronoje luwar che ruwachulew. Jec'ula' ri Pablo xujunimaj wa' ruc' rutzijoxic ri Utzilaj Tzij re ri Dios che ronoje ruwachulew. Sal. 19:4
cacha'. 19Cantz'onoj tanchi c'ut: ¿Raj Israel na queta'am ta nawi wa'? ¡Queta'am! Nabe na, e pacha' ri xutz'ibaj can ri Moisés puwi ri xubi'ij lo ri Dios chique raj Israel:
Ri'in can'an chiwe cu'an c'ax ic'u'x
chirij jun “tinamit” na tinamit taj;
campetisaj iwoyowal chirij jun tinamit
na jinta queta'am puwi ri K'ijsak#10:19 Chiquiwach ri e aj Israel, xew takal chique rique caquic'ul ri rutzil uc'u'x ri Dios. Ruma wa' xpe coyowal echiri' ri Dios xuc'ut ri rutzil uc'u'x chique tak ri tinamit che ruwachulew. Dt. 32:21
xcha'. 20Jec'ula', ri Isaías xuch'ij ubi'xiquil ri ubi'im lo ri Dios paquiwi ri na e ta aj Israel:
Xinrikitaj c'u cuma ri na quinquitzucuj taj,
yey xink'alajisaj c'u wib chiquiwach
ri na xinquitz'onobej taj Is. 65:1
xcha'.
21No'j paquiwi raj Israel, jewa' xubi'ij lo ri Dios:
Lic xinelaj chique jun tinamit
e aj palajiy tzij y e titz'itak
cha' quetzelej tanchi lo wuc' Is. 65:2
xcha'.
Currently Selected:
Romanos 10: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
