Romanos 9
9
Ri tinamit Israel cha'tal ruma ri Dios
1Lic katzij wa cambi'ij che alak, ma in re ri Cristo y na can'an ta rak'ubal. Lic cuna' c'u nuc'u'x katzij ri cambi'ij, ma e ri Santowilaj Ruxlabixel ri Dios cac'amaw uwach ri nuna'oj. 2Katzij c'ut ri'in lic quimbisonic y ri c'ax c'o chinuc'u'x na quic'ow taj 3ruma ri qui'anom ri e aj Israel, ri katz-kachak' kib cuc'. Canya ne wib e quinc'oji' ri'in chuxe' ri k'atbal tzij re ri Dios y na e ta rique, tob na jinta chi re ri Cristo chwe, we ta ne ruc' wa' quecolobetaj rique. 4Ma raj Israel e utinamit ri Dios, yey e rique ri xebucha' ri Dios re quebu'an ralc'o'al chique;#Éx. 4:22 xuc'ut c'u runimal uchomalil chiquiwach y xu'an tzij cuc'. Chique rique xya'taj wi Rutzij Upixab y xc'ut chique su'anic calok'nimax uk'ij ri Dios pa sakil wi. Yey tak rubi'tisinic ri Dios u'anom, que rique. 5Rique e calc'o'al can ri kamam lic c'o quiwach ojertan.#9:5 Wa' e ri Abraham, ri Isaac y ri Jacob. Yey chique c'u rique upetebem wi ri Cristo, Rucha'o'n lo ri Dios, ri xc'un che ruwachulew y xu'an ticawex. Yey Rire e Dios puwi ronoje tak ri c'olic. ¡Na jinta utakexic lic nim uk'ij! ¡Amén!
6¿Na u'anom ta neba ri Dios ri ubi'tisim che rutinamit Israel?#9:6 Tob e q'ui ri e aj Israel na xquicoj taj we ri Jesús e Ucha'o'n lo ri Dios, wa' na e ta que'elawi na jinta uchac ri xubi'tisij lo ri Dios chique. Gn. 12:3; Gl. 3:8 Pero na conoje ta ri e ralc'o'al can ri Israel#9:6 “Israel” e bi'aj xucoj ri Dios che ri Jacob. Rire e uc'ajol ri Isaac y umam ri Abraham. e sakil utinamit ri Dios. 7Na xa ta ruma quipetebem che ri Abraham, e ralc'o'al ri Dios.#9:7 Na xew ta ri Isaac e uc'ajol ri Abraham, ma xec'oji' jujun chic uc'ajol. Gn. 25:1-2,12 Ma jewa' xubi'ij ri Dios che ri Abraham: «Xew che rac'ajol Isaac caquipetebej wi lo rawalc'o'al»#Gn. 21:12 xcha'. 8Na conoje ta c'u ri quipetebem che ri Abraham, e ralc'o'al ri Dios; ma xew e ralc'o'al ri Dios ri quebalax chirij rubi'tisinic Rire. 9Ma ri bi'tisinic xu'an ri Dios che ri Abraham e wa': «Jewa' pa jun junab quinc'un tanchic, yey ec'u ri' rawixokil Sara c'o chi jun ralab»#Gn. 18:10 xcha'.
10Y na xew ta wa', ma echiri' ruma ri kamam Isaac ri Rebeca xcanaj yewa' ixok, xebumatzej eyo'xab. 11Yey c'amaja' ne quebalax rique y c'amaja' ne caqui'an ri utz o ri na utz taj echiri' ri Dios xucha' jun chique. Jec'ula' cak'alajinic e cu'ana na janipa ri uch'obom lo ri Dios; y wa' na e ta ruma ri caqui'an ri winak, ma puk'ab Rire c'o wi cucha'o china ri caraj cusiq'uij. 12Ma ri Dios xubi'ij che ri Rebeca: «Ri chak'ixel e cac'oji' más uwach chwa ri atzixel»#Gn. 25:23 xcha'. 13Jec'ula' cu'ana pacha' ri tz'ibital can puwi ri ubi'im lo ri Dios:
E ri chak'ixel Jacob ri c'ax xinna'o;
no'j ri atzixel Esaú, tzel xinwilo Mal. 1:2-3
xcha'.
Puk'ab ri Dios c'o wi china ri cucha'o
14¿Sa' c'u ri' ri cakabi'ij ri'oj puwi wa'? ¿E nawi na jusuc' ta ri cu'an ri Dios? ¡Na e ta ri'! 15Ma jewa' xubi'ij ri Dios che ri Moisés ojertan:
We c'o junok cuaj Ri'in canto'o ruma ri rutzil nuc'u'x,
e ri' ri canto'o.
Y we c'o junok cuaj Ri'in canc'ut ri c'axna'bal nuc'u'x che,
che ri' rire canc'ut wi ri c'axna'bal nuc'u'x Éx. 33:19
xcha'. 16E uwari'che echiri' c'o caraj cuya ri Dios che juna ticawex, na e ta ruma lic cacha uc'u'x wa ticawex che o ruma lic cutij uk'ij cha' c'o cuc'ulu; ma e ruma ri c'axna'bal uc'u'x ri Dios. 17E pacha' ri tz'ibital can chupa Ruch'a'tem ri Dios echiri' ri Dios xubi'ij che ri faraón: «Ri'in xin'an takanel chawe cha' canc'ut ri nuchuk'ab pawi' ri'at y cha' catzijox c'u ri nubi' che ronoje ruwachulew»#Éx. 9:16 xcha'. 18K'alaj c'u ri' ri Dios ruma ri c'axna'bal uc'u'x cuto' china ri caraj cuto'o. Yey we Rire caraj cu'an pacha' abaj che ri ranima' junok, jela' cu'an che.
19Laj c'o c'u junok jewa' cubi'ij chwe: «We na jinta junok cach'ijow uk'atexic janipa ri caraj ri Dios, ¿su'be c'u ri' ri Dios cucoj quimac ri ticawex we rique xew e caqui'an ri xebutak Rire che?» 20Ec'u ri'in canc'ul uwach: «Achi, ¿sa' co rawach ri'at cha' catyajan chirij ri Dios? Ma na utz taj we ri xaro ulew cubi'ij che ri ca'anaw re: ¿Su'chac jewa' x'an la chwe?» 21E ri cachacun ruc' xok'o'l, ¿na jinta neba puk'ab cu'an ruc' ri xok'o'l sa' ri caraj cu'ano? Ma we Rire caraj che ri xok'o'l cu'an queb xun, jun lic xa k'alaj pa cachapabex wi y ri jun chic xa tob pa cachapabex wi, e cu'an ri'. 22Jec'ula' ri' ri Dios c'o puk'ab sa' ri caraj cu'an cuc' ri winak. ¿Sa' c'u cakabi'ij we ri Dios xraj cuc'ut ri royowal y ri unimal uchuk'ab paquiwi raj maquib yey na ruc' ta c'u ri', e xuc'ut ri unimal uc'u'x chique ri takal chique catzak ri royowal paquiwi' y casach quiwach? 23Y jela' xu'ano c'utubal re ri unimal uchomalil. Ma xuc'ut ri c'axna'bal uc'u'x chique ri ebucha'om chi ulok re quec'oji' ruc' pa ri chomilaj luwar chila' chicaj. 24Chique c'u ri xu'an wi wa', xebusiq'uij; y ri'oj oj jujun chique. Y wa' na xew ta xu'an cuc' ri e aj judi'ab, ma xu'an cuc' ri na e ta aj judi'ab. 25Ma jewa' ri xutz'ibaj can ri k'alajisanel Oseas puwi ri xubi'ij ri Dios:
Chique ri na e ta nutinamit ojertan,
wo'ora cambi'ij: «Ri'ix, ix nutinamit.»
Y chique ri na c'ax ta quena'ic,
wo'ora cambi'ij: «Ri'in c'ax quixinna'o.»#1 P. 2:10 Os. 2:1
26Y chupa c'u ri luwar pa xbi'x wi chique:
«Ri'ix na ix ta nutinamit,»
chila' c'u ri' cabi'x na chique e ralc'o'al ri Dios c'aslic. Os. 1:10
27Yey jela' ri xutz'ibaj can ri k'alajisanel Isaías paquiwi raj Israel:
Tob ri quiq'uiyal ri tinamit Israel
quebu'ana pacha' ruq'uiyal sanyeb c'o chuchi' ri mar,
xa e chi jumutz#Ro. 11:5 ri quecolobetaj chique.
28Ma ri Dios Kajawxel cuk'at tzij paquiwi ri ticawex che ruwachulew e chirij janipa ri ubi'im canok,
y cu'ana wa' ruc' usuc'liquil y na camayin ta che u'anic Is. 10:22-23
xcha'.
29Yey jewa' xutz'ibaj can ri k'alajisanel Isaías ojertan:
Ri Dios Kajawxel, ri lic c'o uchuk'ab puwi ronoje,
we tamaji xebucolobej can jumutz chique ri katinamit
che ri camic,
ri' cakac'ulumaj pacha' ri ca'ib tinamit Sodoma y Gomorra, ri xsachisax quiwach#Gn. 19:1-28 Is. 1:9
xcha'.
Ri Dios cu'an jusuc' chique ri na e ta aj Israel ruma ri cubulibal quic'u'x ruc'
30¿Sa' c'u ri' ri cakabi'ij che ronoje wa'? Ma ojertan lok ri na e ta aj judi'ab na xquitzucuj taj quebu'ana jusuc' chwach ri Dios; yey wo'ora ri Dios xu'an jusuc' chique ruma ri cubulibal quic'u'x ruc'. 31No'j ri e aj Israel lic xquitij uk'ij quebu'an jusuc' chwach ri Dios ruma caquitakej tak ri takanic re ri Tzij Pixab; na ruc' ta c'u ri', na xebu'ana ta jusuc' chwach ri Dios. 32¿Su'chac jewa' xquic'ulumaj? E ruma na xcubi' ta quic'u'x ruc' ri xu'an ri Dios cha' cu'an jusuc' chique. Ma xquich'obo e quebu'an jusuc' chwach ri Dios ruma tak ri caqui'ano. Y jec'ula' e pacha' xquichik quib puwi ri jun Abaj ri lic e c'o quetzak puwi'. 33Ma jewa' tz'ibital can chupa Ruch'a'tem ri Dios puwi wa Abaj:
Cancoj c'u chila' Sion jun Abaj.#9:33 “Abaj”: Wa' que'elawi e ri Kanimajawal Jesucristo. 1 P. 2:6-8 Is. 28:16
Wa' lic e c'o tak ri caquichik quib che;
y lic e c'o tak ri quetzak puwi wa nimalaj Abaj. Is. 8:14-15
No'j janipa c'u ri cacubi' quic'u'x ruc',
na queq'uixbesax taj
ma caquic'ul na ri coye'em che Rire Is. 49:23
cacha'.
Currently Selected:
Romanos 9: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.